“ວັນທີ 11–17 ເດືອນມັງກອນ. ຄຳສອນ ແລະ ພັນທະສັນຍາ 2; ໂຈເຊັບ ສະມິດ—ປະຫວັດ 1:27–65: ‘ຫົວໃຈຂອງລູກຫລານຈະຫັນໄປຫາບັນພະບຸລຸດຂອງຕົນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 11–17 ເດືອນມັງກອນ. ຄຳສອນ ແລະ ພັນທະສັນຍາ 2; ໂຈເຊັບ ສະມິດ—ປະຫວັດ 1:27–65,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ເພິ່ນໄດ້ເອີ້ນຊື່ຂ້າພະເຈົ້າ, ໂດຍ ໄມໂກ ມອມ

ວັນທີ 11–17 ເດືອນມັງກອນ

ຄຳສອນ ແລະ ພັນທະສັນຍາ 2; ໂຈເຊັບ ສະມິດ—ປະຫວັດ 1:27–65

“ຫົວໃຈຂອງລູກຫລານຈະຫັນໄປຫາບັນພະບຸລຸດຂອງຕົນ”

ພຣະວິນຍານບໍລິສຸດສາມາດສິດສອນທ່ານທຸກເທື່ອທີ່ທ່ານອ່ານພຣະຄຳພີ—ເຖິງແມ່ນທ່ານໄດ້ອ່ານພຣະຄຳພີນັ້ນຫລາຍເທື່ອແລ້ວກໍຕາມ. ສະນັ້ນ ຈົ່ງເປີດໃຈຮັບເອົາຄວາມຮູ້ ແລະ ການດົນໃຈໃໝ່.

ບັນທຶກຄວາມປະທັບໃຈຂອງທ່ານ

ມັນເປັນເວລາສາມປີຫລັງຈາກພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ມາປະກົດຕໍ່ໂຈເຊັບ ສະມິດ ຢູ່ໃນປ່າ, ແຕ່ໂຈເຊັບຍັງບໍ່ໄດ້ຮັບການເປີດເຜີຍເພີ່ມເຕີມ ນັບແຕ່ເວລານັ້ນ. ເພິ່ນໄດ້ເລີ່ມຕົ້ນສົງໄສກ່ຽວກັບຖານະຂອງເພິ່ນຢູ່ຕໍ່ພຣະພັກຂອງພຣະຜູ້ເປັນເຈົ້າ. ຄືກັນກັບເຮົາທຸກຄົນ, ເພິ່ນໄດ້ເຮັດຄວາມຜິດ, ແລະ ເພິ່ນຮູ້ສຶກວ່າເພິ່ນຖືກລົງໂທດເພາະຄວາມຜິດເຫລົ່ານັ້ນ. ແຕ່ພຣະເຈົ້າຍັງມີວຽກງານໃຫ້ເພິ່ນເຮັດຢູ່. ແລະ ວຽກງານທີ່ໂຈເຊັບໄດ້ຖືກເອີ້ນໃຫ້ເຮັດ ແມ່ນກ່ຽວພັນກັບສິ່ງທີ່ພຣະເຈົ້າໄດ້ຂໍໃຫ້ເຮົາເຮັດ. ໂຈເຊັບຕ້ອງນຳພຣະຄຳພີມໍມອນອອກມາ; ແມ່ນຫຍັງຄືສິ່ງທີ່ເຮົາຖືກຂໍຮ້ອງໃຫ້ເຮັດກັບພຣະຄຳພີມໍມອນ? ໂຈເຊັບຕ້ອງໄດ້ຮັບຂໍກະແຈຂອງຖານະປະໂລຫິດ ເພື່ອຫັນຫົວໃຈຂອງລູກໆໄປຫາພໍ່ຂອງຕົນ; ເຮົາໄດ້ຫັນຫົວໃຈຂອງເຮົາໄປຫາບັນພະບຸລຸດຂອງເຮົາແນວໃດ? ໂຈເຊັບໄດ້ຖືກບອກກ່ຽວກັບການທຳນາຍ ທີ່ບໍ່ດົນຈະສຳເລັດຄົບຖ້ວນ; ແມ່ນຫຍັງຄືພາກສ່ວນຂອງເຮົາ ໃນການຊ່ວຍໃຫ້ມັນສຳເລັດຄົບຖ້ວນ? ເມື່ອເຮົາມີພາກສ່ວນໃນວຽກງານຂອງພຣະເຈົ້າ, ເຮົາສາມາດຄາດຄະເນໄດ້ວ່າ ເຮົາຈະປະເຊີນກັບການຕໍ່ຕ້ານ ແລະ ແມ່ນແຕ່ການຂົ່ມເຫັງ, ຄືກັນກັບສາດສະດາ. ແຕ່ເຮົາສາມາດມີສັດທາວ່າ ພຣະຜູ້ເປັນເຈົ້າຈະເຮັດໃຫ້ເຮົາເປັນເຄື່ອງມືໃນພຣະຫັດຂອງພຣະອົງ, ຄືກັນກັບໂຈເຊັບ.

ເບິ່ງ Saints, 1:20–48 ນຳອີກ.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂຈເຊັບ ສະມິດ—ປະຫວັດ 1:27–33

ພຣະເຈົ້າມີວຽກງານໃຫ້ເຮົາເຮັດ.

ຂະນະທີ່ທ່ານອ່ານ ໂຈເຊັບ ສະມິດ—ປະຫວັດ 1:27–33, ໃຫ້ພິຈາລະນາວ່າ ພຣະເຈົ້າມີວຽກງານໃຫ້ທ່ານເຮັດ, ຄືກັນກັບທີ່ພຣະອົງມີໃຫ້ໂຈເຊັບ ສະມິດ ເຮັດຫລືບໍ່. ໃຫ້ໄຕ່ຕອງຄຳເຊື້ອເຊີນນີ້ ຈາກປະທານຣະໂຊ ເອັມ ແນວສັນ: “ໃຫ້ທູນຖາມພຣະບິດາເທິງສະຫວັນຂອງພວກເຈົ້າ, ໃນພຣະນາມຂອງພຣະເຢຊູຄຣິດ, ວ່າພຣະອົງຮູ້ສຶກຈັ່ງໃດກ່ຽວກັບພວກເຈົ້າ ແລະ ກ່ຽວກັບພາລະກິດຂອງພວກເຈົ້າຢູ່ໃນໂລກນີ້. ຖ້າຫາກພວກເຈົ້າທູນຖາມດ້ວຍເຈດຕະນາອັນແທ້ຈິງ, ເມື່ອເວລາຜ່ານໄປ ພຣະວິນຍານຈະບອກຄວາມຈິງທີ່ປ່ຽນແປງຊີວິດແກ່ພວກເຈົ້າ. … ຂ້າພະເຈົ້າສັນຍາວ່າ ເມື່ອພວກເຈົ້າເລີ່ມຕົ້ນເຫັນແວບໜຶ່ງ ວ່າພຣະບິດາເທິງສະຫວັນເຫັນພວກເຈົ້າວ່າເປັນແນວໃດ ແລະ ເຖິງສິ່ງທີ່ພຣະອົງຄາດໝາຍໃຫ້ພວກເຈົ້າເຮັດເພື່ອພຣະອົງ, ແລ້ວຊີວິດຂອງພວກເຈົ້າຈະບໍ່ຄືເກົ່າອີກ!” (“Becoming True Millennials” [worldwide devotional for young adults, Jan. 10, 2016], broadcasts.ChurchofJesusChrist.org).

ບາງເທື່ອທ່ານອາດຮູ້ສຶກຄືກັນກັບໂຈເຊັບ ໃນ ຂໍ້ທີ 28–29. ທ່ານສາມາດຮຽນຮູ້ຫຍັງແດ່ຈາກຕົວຢ່າງຂອງໂຈເຊັບ ກ່ຽວກັບສິ່ງທີ່ຈະເຮັດ ເວລາການກະທຳຂອງທ່ານບໍ່ສອດຄ່ອງກັບວຽກງານທີ່ພຣະເຈົ້າໄດ້ເອີ້ນໃຫ້ທ່ານເຮັດ?

ໂຈເຊັບ ສະມິດ—ປະຫວັດ 1:34–65

ພຣະຄຳພີມໍມອນບັນຈຸ “ຄວາມສົມບູນຂອງພຣະກິດຕິຄຸນອັນເປັນນິດ.”

ຂະນະທີ່ທ່ານອ່ານ ໂຈເຊັບ ສະມິດ—ປະຫວັດ 1:34–65, ໃຫ້ພິຈາລະນາວ່າ ລາຍລະອຽດໃດແດ່ຢູ່ໃນຂໍ້ເຫລົ່ານີ້ ທີ່ປະທັບໃຈທ່ານ ຄືກັບວ່າທ່ານບໍ່ເຄີຍໄດ້ຍິນເລື່ອງພຣະຄຳພີມໍມອນມາກ່ອນ. ໃນຖານະຜູ້ທີ່ເຊື່ອຄົນໜຶ່ງ, ເປັນຫຍັງເລື່ອງນີ້ຈຶ່ງສຳຄັນຕໍ່ປະຈັກພະຍານຂອງທ່ານເຖິງພຣະຄຳພີມໍມອນ?

ໃຫ້ພິຈາລະນາເຖິງວິທີທີ່ພຣະຄຳພີມໍມອນໄດ້ເຮັດໃຫ້ຄຳທຳນາຍສຳເລັດຄົບຖ້ວນແນວໃດ ໃນ ເອຊາຢາ 29:4, 11–18.

ໂຈເຊັບ ສະມິດ—ປະຫວັດ 1:36–41

ການຟື້ນຟູພຣະກິດຕິຄຸນໄດ້ເຮັດໃຫ້ຄຳທຳນາຍໃນສະໄໝບູຮານສຳເລັດຄົບຖ້ວນ.

ໂມໂຣໄນໄດ້ອ້າງເຖິງຄຳທຳນາຍຢູ່ໃນພຣະຄຳພີເດີມ ແລະ ພຣະຄຳພີໃໝ່ຫລາຍຢ່າງກັບໂຈເຊັບ, ດັ່ງເຊັ່ນ ເອຊາຢາ 11; ກິດຈະການ 3:22–23; ແລະ ໂຢເອນ 2:28–32. ເປັນຫຍັງຄຳທຳນາຍເຫລົ່ານີ້ຈຶ່ງສຳຄັນສຳລັບໂຈເຊັບທີ່ຕ້ອງຮູ້ຈັກ? ເປັນຫຍັງມັນຈຶ່ງສຳຄັນສຳລັບທ່ານທີ່ຕ້ອງຮູ້ຈັກ?

ຄຳສອນ ແລະ ພັນທະສັນຍາ 2

ເອລີຢາໄດ້ຟື້ນຟູສິ່ງໃດ?

ປະທານເຮັນຣີ ບີ ໄອຣິງ ໄດ້ກ່າວວ່າ: “ມັນສຳຄັນທີ່ຈະຮູ້ວ່າ ເປັນຫຍັງພຣະຜູ້ເປັນເຈົ້າຈຶ່ງໄດ້ສັນຍາວ່າ ຈະສົ່ງເອລີຢາມາ. ເອລີຢາໄດ້ເປັນສາດສະດາທີ່ຍິ່ງໃຫຍ່ ພ້ອມດ້ວຍອຳນາດທີ່ພຣະເຈົ້າໄດ້ປະທານໃຫ້ເພິ່ນ. ເພິ່ນໄດ້ດຳລົງອຳນາດທີ່ຍິ່ງໃຫຍ່ທີ່ສຸດ ທີ່ພຣະເຈົ້າໄດ້ປະທານໃຫ້ລູກໆຂອງພຣະອົງ: ເພິ່ນດຳລົງອຳນາດແຫ່ງການຜະນຶກ, ອຳນາດທີ່ສິ່ງໃດທີ່ຖືກຜູກມັດໄວ້ຢູ່ເທິງແຜ່ນດິນໂລກ ຈະຖືກຜູກມັດໄວ້ຢູ່ໃນສະຫວັນ” (“Hearts Bound Together,” Ensign ຫລື Liahona, May 2005, 78).

ເບິ່ງ ຄຳສອນ ແລະ ພັນທະສັນຍາ 110:13–16; David A. Bednar, “Let This House Be Built unto My Name,” Ensign ຫລື Liahona, May 2020, 84–87 ນຳອີກ.

ພຣະວິຫານພາໄມຣາ ນິວຢອກ ໃນລະດູໃບໄມ້ຫລົ່ນ — ພຣະວິຫານພາໄມຣາ ນິວຢອກ. ຄອບຄົວໄດ້ຖືກຜະນຶກເຂົ້າກັນຢູ່ໃນພຣະວິຫານ ໂດຍອຳນາດທີ່ຟື້ນຟູຜ່ານທາງເອລີຢາ.

ຄຳສອນ ແລະ ພັນທະສັນຍາ 2

ເອລີຢາໄດ້ມາເພື່ອຫັນຫົວໃຈຂອງເຮົາໄປຫາບັນພະບຸລຸດຂອງເຮົາ.

ຄຳວ່າ “ປູກຝັງ,” “ຫົວໃຈ,” ແລະ “ຫັນ” ຢູ່ໃນພາກນີ້ ສອນທ່ານຫຍັງແດ່ກ່ຽວກັບພາລະກິດຂອງເອລີຢາ ແລະ ເຖິງພອນຂອງຂໍກະແຈຂອງຖານະປະໂລຫິດ ທີ່ເພິ່ນໄດ້ຟື້ນຟູ? ທ່ານຮູ້ສຶກແນວໃດວ່າຫົວໃຈຂອງທ່ານໄດ້ຫັນໄປຫາບັນພະບຸລຸດຂອງທ່ານ? ໃຫ້ຄິດຫາວິທີທາງທີ່ທ່ານຈະສາມາດປະສົບກັບຄວາມຮູ້ສຶກເຊັ່ນນັ້ນເລື້ອຍໆ. ບາງເທື່ອທ່ານຄວນຂໍໃຫ້ຍາດພີ່ນ້ອງຄົນໜຶ່ງເລົ່າກ່ຽວກັບບັນພະບຸລຸດຂອງທ່ານໃຫ້ທ່ານຟັງ—ຍິ່ງຈະດີກວ່ານັ້ນ, ຖ້າທ່ານອັດສຽງໄວ້. ບາງທີທ່ານຄວນຊອກຫາບັນພະບຸລຸດຄົນໜຶ່ງທີ່ລ່ວງລັບໄປແລ້ວ ຜູ້ທີ່ບໍ່ໄດ້ຮັບພິທີການແຫ່ງພຣະກິດຕິຄຸນ ແລະ ແລ້ວປະຕິບັດວຽກງານນັ້ນຢູ່ໃນພຣະວິຫານ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ໂຈເຊັບ ສະມິດ—ປະຫວັດ 1:28–29.ໂຈເຊັບ ສະມິດ ໄດ້ຮູ້ສຶກແນວໃດກ່ຽວກັບຄວາມຜິດຂອງເພິ່ນ? ເພິ່ນໄດ້ເຮັດຫຍັງໃນການຕອບຮັບຄວາມຮູ້ສຶກເຫລົ່ານັ້ນ? ເຮົາໄດ້ຮຽນຮູ້ຫຍັງແດ່ຈາກເພິ່ນ ກ່ຽວກັບສິ່ງທີ່ຈະເຮັດ ເວລາເຮົາເຮັດຄວາມຜິດ?

ໂຈເຊັບ ສະມິດ—ປະຫວັດ 1:33–54.ທ່ານສາມາດຂໍໃຫ້ຄົນໜຶ່ງໃນຄອບຄົວອ່ານຂ່າວສານຂອງໂມໂຣໄນ ພາກສ່ວນໜຶ່ງ ຫລື ທັງໝົດອອກສຽງ ຈາກ ໂຈເຊັບ ສະມິດ—ປະຫວັດ 1:33–42 ສີ່ເທື່ອ (ເພາະວ່າໂມໂຣໄນໄດ້ກ່າວຂ່າວສານນີ້ສີ່ເທື່ອ). ລະຫວ່າງການອ່ານແຕ່ລະເທື່ອ, ໃຫ້ສະມາຊິກໃນຄອບຄົວຄົນອື່ນໆບອກເຖິງສິ່ງທີ່ເຂົາເຈົ້າຈື່ຈຳ ຈາກຂ່າວສານຂອງເພິ່ນ, ໂດຍທີ່ບໍ່ຫລຽວເບິ່ງພຣະຄຳພີ. ເປັນຫຍັງພຣະຜູ້ເປັນເຈົ້າຈຶ່ງກ່າວຊ້ຳຂ່າວສານທີ່ສຳຄັນຫລາຍໆເທື່ອ? ມີວິທີໃດອີກແດ່ທີ່ພຣະຜູ້ເປັນເຈົ້າສິດສອນເຮົາຜ່ານທາງການກ່າວຊ້ຳ?

ຄຳສອນ ແລະ ພັນທະສັນຍາ 2:2.ເພື່ອຊ່ວຍລູກໆຂອງທ່ານໃຫ້ເຂົ້າໃຈ “ຄຳສັນຍາທີ່ໄດ້ເຮັດກັບພໍ່,” ພວກທ່ານສາມາດອ່ານ ອັບຣາຮາມ 2:9–11 ນຳກັນ ຫລື ເບິ່ງວິດີໂອ “Special Witnesses of Christ—President Russell M. Nelson” (ChurchofJesusChrist.org). ໃຫ້ຊີ້ບອກຄຳສັນຍາທີ່ພຣະເຈົ້າໄດ້ເຮັດ ຊຶ່ງເປັນພາກສ່ວນໜຶ່ງຂອງພັນທະສັນຍາຂອງພຣະອົງນຳອັບຣາຮາມ. ເຮົາຈະ “ປູກຝັງ” ຄຳສັນຍາເຫລົ່ານີ້ ໄວ້ໃນໃຈເຮົາໄດ້ແນວໃດ?

ຄຳສອນ ແລະ ພັນທະສັນຍາ 2:2–3.ເພື່ອຊ່ວຍສະມາຊິກໃນຄອບຄົວໃຫ້ຫັນຫົວໃຈຂອງເຂົາເຈົ້າໄປຫາພໍ່ (ຫລື ບັນພະບຸລຸດ) ຂອງຕົນ, ທ່ານສາມາດຊັກຊວນເຂົາເຈົ້າໃຫ້ຮຽນຮູ້ກ່ຽວກັບບັນພະບຸລຸດຄົນໃດຄົນໜຶ່ງ ແລະ ໃຫ້ແບ່ງປັນສິ່ງທີ່ເຂົາເຈົ້າຮຽນຮູ້ກັບຄົນອື່ນໃນຄອບຄົວ. ເປັນຫຍັງພຣະຜູ້ເປັນເຈົ້າຈຶ່ງປະສົງໃຫ້ເຮົາຮຽນຮູ້ກ່ຽວກັບສະມາຊິກໃນຄອບຄົວຂອງເຮົາ ແລະ ປະຕິບັດພິທີການໃນພຣະວິຫານແທນເຂົາເຈົ້າ? ເຮົາໄດ້ຮັບພອນແນວໃດເມື່ອເຮົາມີສ່ວນຮ່ວມໃນວຽກງານປະຫວັດຄອບຄົວ ແລະ ພຣະວິຫານ? (ເບິ່ງ Dale G. Renlund, “Family History and Temple Work: Sealing and Healing,” Ensign ຫລື Liahona, May 2018, 46–49).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68.

ການປັບປຸງການສຶກສາສ່ວນຕົວ

ໃຊ້ສິ່ງຊ່ວຍເຫລືອການສຶກສາພຣະຄຳພີ. ແຫລ່ງຕ່າງໆເຊັ່ນ ໝາຍເຫດຢູ່ທາງລຸ່ມໜ້າປຶ້ມ, ຄູ່ມືຫົວຂໍ້, ວັດຈະນະນຸກົມພຣະຄຣິສຕະທຳຄຳພີ, ຄູ່ມືພຣະຄຳພີ, ແລະ ChurchofJesusChrist.org ສາມາດຊ່ວຍທ່ານໃຫ້ເຂົ້າໃຈຜູ້ຄົນ, ເຫດການ, ແລະ ສຳນວນ ຢູ່ໃນພຣະຄຳພີຫລາຍກວ່າເກົ່າ.

ໂມໂຣໄນມອບແຜ່ນຈາລຶກຄຳໃຫ້ແກ່ໂຈເຊັບ ສະມິດ — Joseph Receives the Plates [ໂຈເຊັບຮັບເອົາແຜ່ນຈາລຶກ], ໂດຍ ແກຣີ ອີ ສະມິດ