“ວັນທີ 13–19 ເດືອນທັນວາ. ຄອບຄົວ: ການປະກາດຕໍ່ໂລກ: ‘ຄອບຄົວເປັນຈຸດໃຫຍ່ໃຈກາງຂອງແຜນຂອງພຣະຜູ້ສ້າງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 13–19 ເດືອນທັນວາ. ຄອບຄົວ: ການປະກາດຕໍ່ໂລກ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021

ວັນທີ 13–19 ເດືອນທັນວາ

ຄອບຄົວ: ການປະກາດຕໍ່ໂລກ

“ຄອບຄົວເປັນຈຸດໃຫຍ່ໃຈກາງຂອງແຜນຂອງພຣະຜູ້ສ້າງ”

ປະທານດາລິນ ເອັຈ ໂອກສ໌ ໄດ້ກ່າວວ່າ: “ຂ້າພະເຈົ້າເຊື່ອວ່າ ທ່າທີຂອງເຮົາ ແລະ ການໃຊ້ຄຳທີ່ຢູ່ໃນໃບປະກາດກ່ຽວກັບຄອບຄົວ [ເປັນການທົດສອບ] ສຳລັບລຸ້ນຂອງເຮົາ. ຂ້າພະເຈົ້າອະທິຖານຂໍໃຫ້ໄພ່ພົນຍຸກສຸດທ້າຍທຸກຄົນ ຈົ່ງໝັ້ນຄົງ ໃນການທົດສອບນີ້” (“The Plan and the Proclamation,” Ensign ຫລື Liahona, Nov. 2017, 31). ໃຫ້ໄຕ່ຕອງຂໍ້ຄວາມເຫລົ່ານີ້ ຂະນະທີ່ທ່ານສຶກສາການປະກາດກ່ຽວກັບຄອບຄົວ ໃນອາທິດນີ້.

ບັນທຶກຄວາມປະທັບໃຈຂອງທ່ານ

ແມ່ນແຕ່ກ່ອນເຮົາໄດ້ມາເກີດ, ເຮົາໄດ້ເປັນພາກສ່ວນຂອງຄອບຄົວ—ຄອບຄົວຂອງພຣະບິດາມານດາເທິງສະຫວັນຂອງເຮົາ. ເມື່ອເຖິງເວລາທີ່ຈະໜີຈາກທີ່ປະທັບຂອງພວກພຣະອົງ, ມັນຄົງເປັນສິ່ງອຸ່ນໃຈທີ່ຮູ້ວ່າ ຢູ່ໃນໂລກ, ຄອບຄົວຍັງເປັນພາກສ່ວນໜຶ່ງໃນແຜນຂອງພຣະເຈົ້າຢູ່. ແບບແຜນຢູ່ເທິງແຜ່ນດິນໂລກ ຄວນເປັນເໝືອນແບບແຜນທີ່ສົມບູນແບບຢູ່ໃນສະຫວັນ.

ຮັບປະກັນບໍ່ໄດ້ວ່າ ຄອບຄົວຢູ່ໃນໂລກຈະເປັນແບບໃນອຸດົມຄະຕິ ຫລື ໝັ້ນຄົງຫລືບໍ່. ແຕ່ດັ່ງທີ່ປະທານເຮັນຣີ ບີ ໄອຣິງ ໄດ້ສິດສອນວ່າ, ຄອບຄົວໄດ້ໃຫ້ “ລູກໆຂອງພຣະເຈົ້າໄດ້ຮັບໂອກາດທີ່ດີທີ່ສຸດ ເພື່ອຈະໄດ້ຖືກຮັບຕ້ອນເຂົ້າສູ່ໂລກ ດ້ວຍຄວາມຮັກທີ່ໃກ້ຄຽງທີ່ສຸດ ກັບຄວາມຮັກທີ່ເຂົາເຈົ້າເຄີຍຮູ້ສຶກໃນສະຫວັນ—ນັ້ນຄື ຄວາມຮັກຂອງພໍ່ແມ່” (“Gathering the Family of God,” Ensign ຫລື Liahona, May 2017, 20). ການທີ່ຮູ້ວ່າຄອບຄົວຈະບໍ່ດີພ້ອມທຸກຢ່າງ ແລະ ບໍ່ໄດ້ຖືກຍົກເວັ້ນຈາກການໂຈມຕີຂອງຜູ້ປໍລະປັກ, ພຣະເຈົ້າຈຶ່ງໄດ້ສົ່ງພຣະບຸດທີ່ຮັກຂອງພຣະອົງມາ ເພື່ອໄຖ່ເຮົາ ແລະ ປິ່ນປົວຄອບຄົວຂອງເຮົາ. ແລະ ພຣະອົງໄດ້ສົ່ງສາດສະດາຂອງຍຸກສຸດທ້າຍມາ ດ້ວຍການປະກາດເພື່ອປົກປ້ອງ ແລະ ເພີ່ມຄວາມເຂັ້ມແຂງໃຫ້ຄອບຄົວ. ຖ້າຫາກເຮົາເຮັດຕາມສາດສະດາ ແລະ ມີສັດທາໃນພຣະຜູ້ຊ່ວຍໃຫ້ລອດ, ເຖິງແມ່ນວ່າຄອບຄົວໃນຊ່ວງມະຕະຈະບໍ່ເປັນເໝືອນດັ່ງໃນອຸດົມຄະຕິແຫ່ງສວັນ, ແຕ່ກໍຍັງມີຄວາມຫວັງສຳລັບຄອບຄົວ—ຢູ່ໃນໂລກ ແລະ ໃນສະຫວັນ.

ແນວຄິດສຳລັບການສຶກສາພຣະຄຳພີເປັນສ່ວນຕົວ

“ຄອບຄົວເປັນຈຸດໃຫຍ່ໃຈກາງຂອງແຜນຂອງພຣະຜູ້ສ້າງ.”

“ຄອບຄົວ: ການປະກາດຕໍ່ໂລກ” ແມ່ນກ່ຽວກັບຄອບຄົວແທ້ໆ. ແຕ່ມັນກໍກ່ຽວກັບແຜນແຫ່ງຄວາມລອດຂອງພຣະເຈົ້າຄືກັນ. ວິທີໜຶ່ງທີ່ຈະສຶກສາການປະກາດ ແມ່ນການຊອກຫາສິ່ງທີ່ການປະກາດສິດສອນກ່ຽວກັບຊີວິດກ່ອນເກີດ, ຊີວິດມະຕະ, ແລະ ຊີວິດຫລັງຈາກຊ່ວງມະຕະ. ທ່ານຮຽນຮູ້ຫຍັງແດ່ເມື່ອທ່ານສຶກສາການປະກາດໃນວິທີນີ້? ສິ່ງນີ້ຊ່ວຍທ່ານໃຫ້ເຂົ້າໃຈເຫດຜົນທີ່ການແຕ່ງງານ ແລະ ຄອບຄົວມີຄວາມສຳຄັນຕໍ່ແຜນຂອງພຣະເຈົ້າແນວໃດ?

ເບິ່ງ Dallin H. Oaks, “The Plan and the Proclamation,” Ensign ຫລື Liahona, Nov. 2017, 28–31 ນຳອີກ.

“ຄອບຄົວຈະມີຄວາມສຸກກໍຕໍ່ເມື່ອເຂົາເຈົ້າດຳເນີນຊີວິດຕາມຄຳສອນຂອງອົງພຣະເຢຊູຄຣິດເຈົ້າ.”

ໃຫ້ຄິດກ່ຽວກັບວັກທີ ຫົກ ແລະ ເຈັດ ຂອງ ການປະກາດກ່ຽວກັບຄອບຄົວ ວ່າເປັນແບບແຜນສຳລັບ “ຄວາມສຸກໃນຊີວິດຄອບຄົວ.” ຂະນະທີ່ທ່ານອ່ານວັກເຫລົ່ານີ້, ໃຫ້ຊອກຫາຫລັກທຳຂອງ “ການແຕ່ງງານ ແລະ ຄອບຄົວທີ່ມີປະສິດທິພາບ.” ແລ້ວໃຫ້ຄິດກ່ຽວກັບຄວາມສຳພັນຂອງຄອບຄົວ ທີ່ທ່ານຢາກເຮັດໃຫ້ດີຂຶ້ນ. ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງ? ທ່ານຈະໃຫ້ພຣະຜູ້ຊ່ວຍໃຫ້ລອດມີສ່ວນຮ່ວມໃນຄວາມພະຍາຍາມຂອງທ່ານແນວໃດ?

ເບິ່ງ Richard J. Maynes, “Establishing a Christ-Centered Home,” Ensign ຫລື Liahona, May 2011, 37–39; ວິດີໂອ “What Matters Most,” ChurchofJesusChrist.org ນຳອີກ.

ເຮົາ “ຈະຕ້ອງຮັບຜິດຊອບຢູ່ຕໍ່ພຣະພັກຂອງພຣະເຈົ້າ” ເພາະວິທີທີ່ເຮົາປະຕິບັດຕໍ່ຄອບຄົວຂອງເຮົາ.

ການປະກາດກ່ຽວກັບຄອບຄົວ ແມ່ນລວມທັງພອນທີ່ປະເສີດ ທີ່ພຣະບິດາເທິງສະຫວັນສັນຍາກັບຜູ້ທີ່ເຮັດຕາມຄຳແນະນຳຂອງພຣະອົງ. ມັນກໍລວມທັງຄຳເຕືອນທີ່ຈິງຈັງນຳອີກສຳລັບຜູ້ທີ່ບໍ່ເຮັດ. ໃຫ້ຄິດທີ່ຈະຂຽນພອນ ແລະ ຄຳເຕືອນທີ່ທ່ານພົບເຫັນໄວ້.

ທ່ານປະພຶດຕົນແນວໃດກັບຄຳສອນຂອງພຣະເຈົ້າຢູ່ໃນການປະກາດນີ້? ຖ້າຫາກທ່ານກຳລັງຢືນຢູ່ຕໍ່ພຣະພັກຂອງພຣະເຈົ້າໃນມື້ນີ້, ທ່ານມີຄວາມໝັ້ນໃຈໃນເລື່ອງໃດທີ່ຈະເວົ້າລົມກັບພຣະອົງກ່ຽວກັບຄວາມສຳພັນໃນຄອບຄົວຂອງທ່ານ? ທ່ານຢາກປັບປຸງສິ່ງໃດ?

ເບິ່ງ ແອວມາ 5:15–22; ຄຳສອນ ແລະ ພັນທະສັນຍາ 42:22–25; 93:39–44 ນຳອີກ.

ຄອບຄົວກຳລັງເຮັດອາຫານ — ພໍ່ແມ່ຄວນລ້ຽງດູລູກເຕົ້າດ້ວຍຄວາມຮັກ ແລະ ຄວາມຊອບທຳ.

ເຮົາສາມາດຮັບພອນທີ່ສັນຍາໄວ້ຫລືບໍ່ ຖ້າຫາກຄອບຄົວຂອງເຮົາບໍ່ເປັນແບບໃນອຸດົມຄະຕິ?

ແອວເດີ ດີ ທອດ ຄຣິສໂຕເຟີສັນ ໄດ້ສິດສອນວ່າ: “ທີ່ຈະປະກາດຄວາມຈິງພື້ນຖານກ່ຽວກັບການແຕ່ງງານ ແລະ ຄອບຄົວບໍ່ແມ່ນວ່າຈະເບິ່ງຂ້າມ ຫລື ຫລຸດການເສຍສະລະ ແລະ ຄວາມສຳເລັດຜົນຂອງຜູ້ຄົນທີ່ບໍ່ໄດ້ຢູ່ໃນສະພາບການດັ່ງກ່າວໃນຄວາມເປັນຈິງປະຈຸບັນ. … ທຸກຄົນມີຂອງປະທານ; ທຸກຄົນມີພອນສະຫວັນ; ທຸກຄົນສາມາດມີສ່ວນບໍລິຈາກຕໍ່ການເປີດເຜີຍແຜນອັນສູງສົ່ງໃນແຕ່ລະລຸ້ນຄົນ. ສິ່ງທີ່ດີທັງຫລາຍ, ສິ່ງທີ່ສຳຄັນທັງຫລາຍ—ແມ່ນແຕ່ບາງເທື່ອທຸກສິ່ງທີ່ຈຳເປັນສຳລັບເວລານີ້—ກໍສາມາດບັນລຸຜົນສຳເລັດໄດ້ໃນສະຖານະການທີ່ບໍ່ສົມບູນແບບ. … ດ້ວຍຄວາມໝັ້ນໃຈພວກເຮົາເປັນພະຍານວ່າ ການຊົດໃຊ້ຂອງພຣະເຢຊູຄຣິດທີ່ໄດ້ຄາດໄວ້ແລ້ວ ແລະ, ໃນທີ່ສຸດ, ຈະທົດແທນຄວາມຂາດເຂີນ ແລະ ການສູນເສຍທັງໝົດໃຫ້ແກ່ຜູ້ທີ່ຫັນໄປຫາພຣະອົງ. ບໍ່ມີຄົນໃດຖືກກຳນົດໄວ້ລ່ວງໜ້າວ່າຈະໄດ້ຮັບໜ້ອຍກວ່າໃນທຸກສິ່ງທີ່ພຣະບິດາມີໄວ້ໃຫ້ລູກໆຂອງພຣະອົງ” (“Why Marriage, Why Family,” Ensign ຫລື Liahona, May 2015, 52).

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

“ເພດເປັນສິ່ງສຳຄັນຫລາຍ ຕໍ່ການຈຳແນກ ບອກໃຫ້ຮູ້ເຖິງບຸກຄະລິກລັກສະນະຂອງແຕ່ລະຄົນ ໃນໂລກກ່ອນເກີດ, ໃນໂລກນີ້, ແລະ ໃນນິລັນດອນ ແລະ ເຖິງຈຸດມຸ້ງໝາຍ.”ຖ້າຫາກມັນຈະເປັນປະໂຫຍດຕໍ່ຄອບຄົວຂອງທ່ານທີ່ຈະສົນທະນາກ່ຽວກັບຄຳສອນທີ່ກ່ຽວກັບເພດ ແລະ ການມັກຊອບຄົນເພດດຽວກັນ, ແຫລ່ງດັ່ງຕໍ່ໄປນີ້ອາດຊ່ວຍໄດ້: Dallin H. Oaks, “Truth and the Plan,” Ensign ຫລື Liahona, Nov. 2018, 25–28; Gospel Topics, “Same-Sex Attraction,” topics.ChurchofJesusChrist.org.

“ແຜນແຫ່ງຄວາມສຸກອັນຍິ່ງໃຫຍ່”ເພື່ອຊ່ວຍຄອບຄົວຂອງທ່ານໃຫ້ເຫັນເຖິງຄວາມສຳຄັນຂອງຄອບຄົວ ໃນແຜນຂອງພຣະບິດາເທິງສະຫວັນ, ທ່ານອາດຢາກຂຽນ ຊີວິດກ່ອນເກີດ, ຊີວິດມະຕະ, ແລະ ຊີວິດຫລັງຈາກຄວາມຕາຍ ໄວ້ໃນເຈ້ຍ ເຮັດເປັນສາມແຖວ. ຊອກຫາການປະກາດນຳກັນ, ແລະ ຂຽນສິ່ງທີ່ທ່ານຮຽນຮູ້ໃສ່ໃນເຈ້ຍ ກ່ຽວກັບແຕ່ລະພາກສ່ວນເຫລົ່ານີ້ຢູ່ໃນແຜນຂອງພຣະເຈົ້າ. ເປັນຫຍັງຄອບຄົວຈຶ່ງສຳຄັນຫລາຍແທ້ຕໍ່ພຣະເຈົ້າ?

“ຄອບຄົວ [ສາມາດ] ຢູ່ນຳກັນຊົ່ວນິລັນດອນ.”ພວກທ່ານສາມາດເບິ່ງວິດີໂອ “Plan of Salvation—We’re Still a Family” (ChurchofJesusChrist.org). ໃຫ້ຊອກຫາຄວາມຈິງຢູ່ໃນ ການປະກາດກ່ຽວກັບຄອບຄົວ ທີ່ຊາຍໜຸ່ມຢູ່ໃນວິດີໂອເຂົ້າໃຈ ແລະ ໄດ້ຊ່ວຍລາວໃຫ້ມີສັດທາ.

“ຄວາມສຸກໃນຊີວິດຄອບຄົວ.”ໃນການສົນທະນາວິທີທີ່ຈະມີ “ຄວາມສຸກໃນຊີວິດຄອບຄົວ [ຂອງທ່ານ],” ພວກທ່ານສາມາດຮ້ອງເພງນຳກັນກ່ຽວກັບຄອບຄົວ, ດັ່ງເຊັ່ນ “ຮັກທີ່ບ້ານ” (ເພງສວດ ແລະ ເພງຂອງເດັກນ້ອຍ, 48). ເຮົາຮຽນຮູ້ຫຍັງແດ່ຈາກເພງ ແລະ ຈາກ ການປະກາດກ່ຽວກັບຄອບຄົວ ທີ່ຈະນຳຄວາມສຸກມາໃຫ້ຄອບຄົວຂອງເຮົາຫລາຍກວ່າເກົ່າ? ເຮົາຈະແນ່ໃຈວ່າຄອບຄົວຂອງເຮົາ “ດຳເນີນຊີວິດຕາມຄຳສອນຂອງອົງພຣະເຢຊູຄຣິດເຈົ້າແນວໃດ”? ໃຫ້ຄິດທີ່ຈະເລືອກເອົາຄຳສອນຂໍ້ໜຶ່ງທີ່ທ່ານຢາກປະຕິບັດຕາມໃນອາທິດນີ້.

“ເພີ່ມຄວາມເຂັ້ມແຂງໃຫ້ແກ່ຄອບຄົວ ໃນຖານະໜ່ວຍທີ່ເປັນພື້ນຖານຂອງສັງຄົມ.”ຊາຕານຈະພະຍາຍາມເຮັດໃຫ້ຄອບຄົວອ່ອນແອລົງ ຢູ່ໃນໂລກນີ້ແນວໃດ? ເຮົາຈະເຮັດພາກສ່ວນຂອງເຮົາໃນການເພີ່ມຄວາມເຂັ້ມແຂງໃຫ້ແກ່ຄອບຄົວແນວໃດ? ສຳລັບແນວຄິດ, ໃຫ້ເບິ່ງຂ່າວສານຂອງຊິດສະເຕີ ບອນນີ ແອວ ອໍສະກາສັນ “Defenders of the Family Proclamation” (Ensign ຫລື Liahona, May 2015, 14–17).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ຮັກທີ່ບ້ານ,” ເພງສວດ ແລະ ເພງຂອງເດັກນ້ອຍ, 48.

ການປັບປຸງການສຶກສາສ່ວນຕົວ

ຊອກຫາຄວາມຮັກຂອງພຣະເຈົ້າ. ປະທານເອັມ ຣະໂຊ ບາເລີດ ໄດ້ສິດສອນວ່າ, “ພຣະກິດຕິຄຸນນີ້ເປັນພຣະກິດຕິຄຸນແຫ່ງຄວາມຮັກ—ຄວາມຮັກສຳລັບພຣະເຈົ້າ ແລະ ຄວາມຮັກສຳລັບກັນແລະກັນ” (“God’s Love for His Children,” Ensign, May 1988, 59). ຂະນະທີ່ທ່ານອ່ານ ການປະກາດກ່ຽວກັບຄອບຄົວ, ໃຫ້ຄິດທີ່ຈະໝາຍເຫດ ຫລື ໝາຍຫລັກຖານຂອງຄວາມຮັກຂອງພຣະເຈົ້າໄວ້ ທີ່ມີຄວາມໝາຍຕໍ່ທ່ານໂດຍສະເພາະ.