“ວັນທີ 15–21 ເດືອນພະຈິກ. ຄຳສອນ ແລະ ພັນທະສັນຍາ 133–134: ‘ຈົ່ງຕຽມພ້ອມສຳລັບການສະເດັດມາຂອງເຈົ້າບ່າວ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 15–21 ເດືອນພະຈິກ. ຄຳສອນ ແລະ ພັນທະສັນຍາ 133–134,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ສາວບໍລິສຸດທີ່ສະຫລາດຫ້າຄົນ

The Bridegroom Cometh [ເຈົ້າບ່າວກຳລັງມາ], ໂດຍ ເອລີຊາເບັດ ກິບບອນສ໌

ວັນທີ 15–21 ເດືອນພະຈິກ

ຄຳສອນ ແລະ ພັນທະສັນຍາ 133–134

“ຈົ່ງຕຽມພ້ອມສຳລັບການສະເດັດມາຂອງເຈົ້າບ່າວ”

ປະທານເຮັນຣີ ບີ ໄອຣິງ ໄດ້ສິດສອນວ່າ: “ການຟື້ນຟູພຣະກິດຕິຄຸນໄດ້ເລີ່ມຕົ້ນດ້ວຍຄຳຖາມທີ່ຖ່ອມຕົວ ຊຶ່ງໄດ້ໄຕ່ຕອງຢູ່ໃນເຮືອນຫລັງນ້ອຍໆ, ແລະ ມັນສາມາດສືບຕໍ່ຢູ່ໃນແຕ່ລະບ້ານເຮືອນຂອງເຮົາ” (“A Home Where the Spirit of the Lord Dwells,” Ensign ຫລື Liahona, May 2019, 25).

ບັນທຶກຄວາມປະທັບໃຈຂອງທ່ານ

ເມື່ອສາດສະໜາຈັກຫາກໍຖືກຕັ້ງຂຶ້ນໄດ້ພຽງແຕ່ 19 ເດືອນ, ສາດສະດາ ໂຈເຊັບ ສະມິດ ແລະ ຜູ້ນຳຂອງສາດສະໜາຈັກຄົນອື່ນໆໄດ້ວາງແຜນດ້ວຍຄວາມກະຕືລືລົ້ນທີ່ຈະຮວບຮວມການເປີດເຜີຍໃນຍຸກສຸດທ້າຍຂອງພຣະເຈົ້າເຂົ້າເປັນໜັງສືເຫລັ້ມໜຶ່ງ ແລະ ຈະພິມ 10,000 ຫົວ—ສອງເທົ່າຂອງການພິມເທື່ອທຳອິດຂອງພຣະຄຳພີມໍມອນ. ໜ້າເສຍໃຈທີ່ແຜນການບໍ່ປະສົບຄວາມສຳເລັດເພາະຄ່າພິມສູງ, ແລະ ກຸ່ມອັນຕະພານໄດ້ໂຈມຕີໂຮງພິມຂອງສາດສະໜາຈັກຂະນະທີ່ກຳລັງທຳການພິມຢູ່. ພວກເຂົາໄດ້ໂຍນໃບທີ່ພິມແລ້ວກະຈາຍໄປທົ່ວທີບ, ແລະ ເຖິງແມ່ນວ່າໄພ່ພົນທີ່ກ້າຫານໄດ້ຮັກສາບາງຈຳນວນໄວ້, ແຕ່ກໍບໍ່ມີປຶ້ມພຣະບັນຍັດຄົບທັງເຫລັ້ມທີ່ຮູ້ວ່າເຫລືອຢູ່.

ສິ່ງທີ່ພວກເຮົາຮູ້ໃນເວລານີ້ວ່າເປັນ ພາກທີ 133 ຂອງຄຳສອນ ແລະ ພັນທະສັນຍາ ແມ່ນພາກທີ່ຖືກຈັດໄວ້ເພື່ອໃຫ້ເປັນພາກຫ້ອຍທ້າຍຂອງປຶ້ມພຣະບັນຍັດ, ຄືກັນກັບເຄື່ອງໝາຍສຽງອຸທານຢູ່ໃນທ້າຍການເປີດເຜີຍທີ່ຖືກຈັດພິມຂອງພຣະຜູ້ເປັນເຈົ້າ. ມັນເຕືອນເຖິງວັນພິພາກສາທີ່ຈະມາເຖິງ ແລະ ປ່າວເຕືອນການເອີ້ນອີກ ທີ່ພົບເຫັນຕະຫລອດທົ່ວການເປີດເຜີຍໃນສະໄໝໃໝ່ ທີ່ວ່າ: ຈົ່ງໜີຈາກສິ່ງທີ່ເປັນທາງໂລກ, ຊຶ່ງມັນເປັນເຄື່ອງໝາຍຂອງບາບີໂລນ; ຈົ່ງສ້າງຊີໂອນ; ກະກຽມສຳລັບການສະເດັດມາຄັ້ງທີສອງ; ແລະ ແຜ່ຂະຫຍາຍຂ່າວສານນີ້ໃຫ້ “ແກ່ທຸກປະຊາຊາດ, ທຸກຕະກຸນ, ແລະ ທຸກພາສາ, ແລະ ທຸກຜູ້ຄົນທັງປວງ” (ຂໍ້ທີ 37). ເມື່ອແຜນການເທື່ອທຳອິດສຳລັບປຶ້ມພຣະບັນຍັດບໍ່ປະສົບຄວາມສຳເລັດ, ການເປີດເຜີຍນີ້ຈຶ່ງເປັນຄຳເຕືອນ ແລະ ເປັນພະຍານວ່າ ວຽກງານຂອງພຣະຜູ້ເປັນເຈົ້າ ບໍ່ສາມາດລົ້ມລະລາຍ, “ເພາະພຣະອົງຈະກາງແຂນອັນສັກສິດຂອງພຣະອົງ … , ແລະ ທົ່ວທີ່ສຸດຂອງແຜ່ນດິນໂລກຈະເຫັນການຊ່ວຍໃຫ້ລອດຂອງພຣະເຈົ້າຂອງພວກເຂົາ” (ຂໍ້ທີ 3).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 133

ຄວາມຈິງຢູ່ໃນຄຳສອນ ແລະ ພັນທະສັນຍາສາມາດກະກຽມເຮົາເພື່ອເຮັດວຽກງານຂອງພຣະເຈົ້າ.

ບາງເທື່ອປຶ້ມກໍຈົບດ້ວຍຂໍ້ສະຫລຸບທີ່ກ່າວລຶ້ມຄືນ ຫລື ໂຮມຈຸດໃຫຍ່ໃຈຄວາມຂອງປຶ້ມ. ພາກທີ 133 ທຳອິດໄດ້ຖືກກະກຽມໄວ້ເປັນຂໍ້ສະຫລຸບຂອງປຶ້ມພຣະບັນຍັດ, ແລະ ອາດເປັນປະໂຫຍດທີ່ຈະອ່ານພາກນີ້ ດ້ວຍຄວາມຄິດນັ້ນຢູ່ໃນໃຈ. ພຣະຜູ້ເປັນເຈົ້າໄດ້ເນັ້ນຈຸດໃດກ່ຽວກັບວຽກງານຂອງພຣະອົງ? ຂໍ້ທີ 57–62 ສິດສອນທ່ານຫຍັງແດ່ກ່ຽວກັບບົດບາດທີ່ພຣະຜູ້ເປັນເຈົ້າປະສົງໃຫ້ທ່ານມີ ໃນວຽກງານຂອງພຣະອົງ?

ຄຳສອນ ແລະ ພັນທະສັນຍາ 133:1–19

ພຣະຜູ້ເປັນເຈົ້າປະສົງໃຫ້ເຮົາກະກຽມສຳລັບການສະເດັດມາຄັ້ງທີສອງຂອງພຣະອົງ.

ທັງ ພາກທີ 1, ຄຳນຳຂອງພຣະຜູ້ເປັນເຈົ້າຕໍ່ຄຳສອນ ແລະ ພັນທະສັນຍາ, ແລະ ພາກທີ 133, ຕົ້ນສະບັບຂອງພາກຫ້ອຍທ້າຍຂອງປຶ້ມ, ເລີ່ມຕົ້ນດ້ວຍຄຳຂໍຮ້ອງດຽວກັນຈາກພຣະຜູ້ເປັນເຈົ້າ ທີ່ວ່າ: “ຈົ່ງເຊື່ອຟັງ, ໂອ້ ເຈົ້າຜູ້ຄົນແຫ່ງສາດສະໜາຈັກຂອງເຮົາ” (ຄຳສອນ ແລະ ພັນທະສັນຍາ 1:1; 133:1). ທີ່ຈະເຊື່ອຟັງໝາຍຄວາມວ່າແນວໃດ? (ເບິ່ງ ຄູ່ມືພຣະຄຳພີ, “ເຊື່ອຟັງ,” scriptures.ChurchofJesusChrist.org). ຄຳເຊື້ອເຊີນ ຫລື ພຣະບັນຊາໃດທີ່ພຣະຜູ້ເປັນເຈົ້າປະສົງໃຫ້ທ່ານເຊື່ອຟັງຕໍ່ ຢູ່ໃນ ຄຳສອນ ແລະ ພັນທະສັນຍາ 133:1–19? ທ່ານໄດ້ຮັບການດົນໃຈໃຫ້ກະກຽມຫຍັງ ໃຫ້ດີກວ່າເກົ່າສຳລັບການສະເດັດມາຂອງພຣະອົງ? ທ່ານຈະຊ່ວຍຜູ້ຄົນທີ່ຢູ່ອ້ອມຮອບທ່ານໃຫ້ກະກຽມໄດ້ແນວໃດ?

ເບິ່ງ ມັດທາຍ 25:1–13; D. Todd Christofferson, “Preparing for the Lord’s Return,” Ensign ຫລື Liahona, May 2019, 81–84 ນຳອີກ.

ຄຳສອນ ແລະ ພັນທະສັນຍາ 133:19–56

ການສະເດັດມາຄັ້ງທີສອງຈະເປັນສິ່ງທີ່ໜ້າຊື່ນຊົມສຳລັບຄົນຊອບທຳ.

ຂະນະທີ່ທ່ານອ່ານຢູ່ໃນ ຄຳສອນ ແລະ ພັນທະສັນຍາ 133:19–32 ກ່ຽວກັບເຫດການທີ່ຈະເກີດຂຶ້ນພ້ອມກັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ, ທ່ານອາດຢາກໄຕ່ຕອງສິ່ງທີ່ບັນຍາຍກ່ຽວກັບເຫດການເຫລົ່ານີ້ ຊຶ່ງແນະນຳທ່ານກ່ຽວກັບພຣະຜູ້ຊ່ວຍໃຫ້ລອດ ແລະ ວຽກງານຂອງພຣະອົງ. ການນຳໃຊ້ທາງວິນຍານທີ່ເປັນໄປໄດ້ຢ່າງໃດແດ່ ທີ່ທ່ານສາມາດພົບເຫັນຢູ່ໃນການບັນຍາຍເຫລົ່ານີ້?

ຂະນະທີ່ທ່ານອ່ານການບັນຍາຍເຖິງການສະເດັດມາຂອງພຣະຜູ້ຊ່ວຍໃຫ້ລອດຢູ່ໃນ ຂໍ້ທີ 32–56, ແມ່ນຫຍັງທີ່ເຮັດໃຫ້ທ່ານຕັ້ງຕາລໍຄອຍວັນທີ່ຍິ່ງໃຫຍ່ນັ້ນ? ຖ້ອຍຄຳ ຫລື ສຳນວນໃດ ທີ່ບັນຍາຍເຖິງຄວາມຮັກຂອງພຣະຜູ້ເປັນເຈົ້າ ສຳລັບລູກໆຂອງພຣະອົງ? ໃຫ້ຄິດທີ່ຈະບັນທຶກປະສົບການສ່ວນຕົວຂອງທ່ານໄວ້ ດ້ວຍ “ຄວາມກະລຸນາຮັກຫອມຂອງພຣະຜູ້ເປັນເຈົ້າ [ຂອງທ່ານ], ແລະ ທຸກສິ່ງທີ່ພຣະອົງໄດ້ມອບໃຫ້ [ທ່ານ] ຕາມພຣະກະລຸນາທິຄຸນຂອງພຣະອົງ” (ຂໍ້ທີ 52).

ຄຳສອນ ແລະ ພັນທະສັນຍາ 134

“ການປົກຄອງໄດ້ຖືກຈັດຕັ້ງໂດຍພຣະເຈົ້າເພື່ອຜົນປະໂຫຍດຂອງມະນຸດ.”

ຄວາມສຳພັນຂອງໄພ່ພົນລຸ້ນທຳອິດກັບການປົກຄອງແມ່ນຊັບຊ້ອນ. ເມື່ອໄພ່ພົນໄດ້ຖືກບັງຄັບໃຫ້ໜີຈາກເຂດແຈ໊ກສັນ, ລັດມີເຊີຣີ, ໃນປີ 1833, ເຂົາເຈົ້າບໍ່ໄດ້ຮັບຄວາມຊ່ວຍເຫລືອ ຫລື ການຊົດເຊີຍຈາກທ້ອງຖິ່ນ ຫລື ລັດຖະບານກາງ ເຖິງແມ່ນວ່າເຂົາເຈົ້າໄດ້ອຸທອນຂໍຄວາມຊ່ວຍເຫລືອກໍຕາມ. ໃນເວລາດຽວກັນ, ບາງຄົນທີ່ຢູ່ນອກສາດສະໜາຈັກ ໄດ້ແປຄວາມໝາຍຂອງຄຳສອນກ່ຽວກັບຊີໂອນວ່າ ໄພ່ພົນໄດ້ປະຕິເສດສິດອຳນາດຂອງລັດຖະບານຢູ່ໃນໂລກ. ຄຳສອນ ແລະ ພັນທະສັນຍາ 134 ໄດ້ຖືກຂຽນ, ເພື່ອໃຫ້ຄວາມແຈ່ມແຈ້ງເຖິງຖານະຂອງສາດສະໜາຈັກຕໍ່ຝ່າຍລັດຖະບານ.

ສະມາຊິກຂອງສາດສະໜາຈັກຄວນຮູ້ສຶກແນວໃດກ່ຽວກັບຝ່າຍລັດຖະບານ? ຂະນະທີ່ທ່ານສຶກສາ ພາກທີ 134, ໃຫ້ຄິດທີ່ຈະຈົດສອງລາຍການ: ລາຍການໜຶ່ງແມ່ນຫລັກທຳທີ່ທ່ານຮຽນຮູ້ກ່ຽວກັບຝ່າຍລັດຖະບານ ແລະ ອີກລາຍການໜຶ່ງແມ່ນໜ້າທີ່ຮັບຜິດຊອບຂອງພົນລະເມືອງ. ແນວຄິດເຫລົ່ານີ້ອາດເປັນປະໂຫຍດຕໍ່ໄພ່ພົນລຸ້ນທຳອິດແນວໃດ? ແນວຄິດເຫລົ່ານີ້ສາມາດນຳໃຊ້ຢູ່ໃນບ່ອນທີ່ທ່ານອາໄສຢູ່ແນວໃດ?

ເບິ່ງ ຫລັກແຫ່ງຄວາມເຊື່ອ 1:11–12; Gospel Topics, “Religious Freedom,” topics.ChurchofJesusChrist.org ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 133:4–14.ສິ່ງກົງກັນຂ້າມທາງວິນຍານຂອງຊີໂອນ ແມ່ນ ບາບີໂລນ—ເມືອງບູຮານທີ່ຕະຫລອດທົ່ວພຣະຄຳພີ ເປັນສັນຍາລັກຂອງຄວາມຊົ່ວຮ້າຍ ແລະ ຄວາມເປັນທາດທາງວິນຍານ (ເບິ່ງ D. Todd Christofferson, “Come to Zion,” Ensign ຫລື Liahona, Nov. 2008, 37; ຄູ່ມືພຣະຄຳພີ, “ບາເບນ, ບາບີໂລນ,” scriptures.ChurchofJesusChrist.org). ມີຫຍັງບໍທີ່ພວກທ່ານຢາກເຮັດເປັນຄອບຄົວ, ໃນຄວາມຮູ້ສຶກທາງວິນຍານ, ເພື່ອ “ໄປຈາກບາບີໂລນ” (ຂໍ້ທີ 5) ແລະ “ໄປຍັງ … ຊີໂອນ”? (ຂໍ້ທີ 9).

ຄຳສອນ ແລະ ພັນທະສັນຍາ 133:20–33.ຂະນະທີ່ພວກທ່ານອ່ານຂໍ້ເຫລົ່ານີ້ນຳກັນ, ຄອບຄົວຂອງທ່ານສາມາດແຕ້ມຮູບກ່ຽວກັບສິ່ງທີ່ເຂົາເຈົ້າຄິດວ່າ ການສະເດັດມາຄັ້ງທີສອງຈະເປັນຈັ່ງໃດ. ພວກທ່ານກໍສາມາດຫລິ້ນ ຫລື ຮ້ອງເພງກ່ຽວກັບການສະເດັດມາຄັ້ງທີສອງ, ດັ່ງເຊັ່ນ “ເຮົາຮູ້ພຣະຜູ້ໄຖ່ຊົງພຣະຊົນ” (ເພງສວດ ແລະ ເພງຂອງເດັກນ້ອຍ, 42), ແລະ ສົນທະນາກ່ຽວກັບສິ່ງທີ່ຄອບຄົວຂອງທ່ານສາມາດກະກຽມສຳລັບການສະເດັດມາຂອງພຣະອົງ.

ຄຳສອນ ແລະ ພັນທະສັນຍາ 133:37–39.ຄອບຄົວຂອງທ່ານຈະມັກອ່ານຂໍ້ເຫລົ່ານີ້ “ດ້ວຍສຽງດັງ” ບໍ? (ຂໍ້ທີ 38). ການແບ່ງປັນພຣະກິດຕິຄຸນດ້ວຍສຽງດັງໝາຍຄວາມວ່າແນວໃດ? ຄວາມຈິງໃດແດ່ທີ່ເຮົາສາມາດແບ່ງປັນ?

ຄຳສອນ ແລະ ພັນທະສັນຍາ 134:1–2.ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈຄວາມສຳຄັນຂອງຝ່າຍລັດຖະບານ, ທ່ານສາມາດຖາມແບບນີ້: ການມີຂໍ້ບັງຄັບເປັນພອນໃຫ້ແກ່ຄອບຄົວຂອງເຮົາແນວໃດ? ການມີກົດໝາຍເປັນພອນໃຫ້ແກ່ປະເທດຊາດຂອງເຮົາແນວໃດ? ພວກທ່ານກໍສາມາດແຕ້ມ ຫລື ລະບາຍສີທຸງຊາດຂອງທ່ານ ຫລື ທ່ອງຈຳ ຂໍ້ທີສິບເອັດ ແລະ ສິບສອງ ຂອງຫລັກແຫ່ງຄວາມເຊື່ອ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ມາເຖີດ, ທ່ານລູກຫລານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 4.

ການປັບປຸງການສຶກສາສ່ວນຕົວ

ສິດສອນຄຳສອນທີ່ແຈ່ມແຈ້ງ ແລະ ລຽບງ່າຍ. ພຣະຜູ້ເປັນເຈົ້າບັນຍາຍພຣະກິດຕິຄຸນຂອງພຣະອົງດ້ວຍພຣະຄຳທີ່ “ແຈ່ມແຈ້ງ” ແລະ “ລຽບງ່າຍ” (ຄຳສອນ ແລະ ພັນທະສັນຍາ 133:57). ພຣະຄຳເຫລົ່ານີ້ແນະນຳທ່ານຫຍັງແດ່ກ່ຽວກັບການສິດສອນພຣະກິດຕິຄຸນໃຫ້ແກ່ຄອບຄົວຂອງທ່ານ?