“Nobōm̧ba 15–21. Katak im Bujen Ko 133–134: ‘Kom̧in Pojak n̄an Itok eo an Ļeo Pālele,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Nobōm̧ba 15–21. Katak im Bujen Ko 133–134,” Itok, Ļoor Eō—N̄an Kajjojo Armej im Baam̧le ko: 2021
Itok eo an Ļeo Pālele, jān Elizabeth Gibbons
Nobōm̧ba 15–21
Katak im Bujen Ko 133–134
“Kom̧in Pojak n̄an Itok eo an Ļeo Pālele”
Būreejtōn Henry B. Eyring ekar katakint: “Jepļaaktok eo an gospel eo ekar ijjno kōn juon kajjitōk ettā kar kejōkļo̧kjeņ kake ilo juon em̧ ettā, im emaron̄ wōnm̧aanļo̧k wōt ilo kajjojo im̧ōko im̧ōd” (“M̧weo Ijo Jetōb eo an Irooj ej Jokwe ie,” Ensign ak Liaona, Māe 2019, 25).
Je En̄jake ko Rej Im̧we Eok
Ke Kabun̄ in ej kab tin kar 19 allōn̄ rūttoon, Rikanaan Josep Smith im ritōl ro jet an Kabun̄ in raar ejaake karōk ko rekōketak n̄an kobaik revelesōn ko an Anij ilo raan ko āliktata n̄an juon bok im būriini 10,000 kape ko—tabōļe oran kape ko ilo jinoin būriin an Bok in Mormon. Kaburomōjmōj eo, wōņāān ko reļļap kapan̄ karōk kein, im rinana ro rekar kakkure jikin būriin eo an Kabun̄ in ke rej būriin. Rekar kajeplōklōke peij ko me rejan̄in koba ippān doon, im men̄e Armej ro Rekwojarjar reperan rekar kōjparoki jet iaer, ejjeļo̧k kape in Bok in Mormon me rekar dedeļo̧k rejeļā kaki ak loi n̄an kiiō.
Ta eo jejeļā kake kiiō āinwōt jekjōn 133 ilo Katak im Bujen Ko rej aikuj kar appendix n̄an Bok in Mormon, āinwōt kōjem̧ļo̧k eo ekajoor ilo jem̧ļo̧kin publish eo an revelesōn ko an Irooj. Ej kakkōl kōn raan in ekajet eo ej itok im āliiji akweļap in me epād ilo revelesōn in ekāāl raan kein: ko jān men ko an laļ in, āinwōt kōkaļļe kōn Babiļon; kalōk Zaion; kōppopo n̄an Itok eo Kein Karuo; im kajedeed enaan eo “n̄an aolep laļ, im bwij, im lo, im armej” (eoon 37). Ilo an kar karōk ko jinoin tata an Bok in Kien ko rekar jab kūrm̧ool, revelesōn in ej juon kakemeemej im juon kam̧ool bwe jerbal in an Irooj ejjab maron̄ bōbrae, “bwe E naaj kakeelwaan Pein Ekwojarjar … , im aolep jem̧ļo̧kin jem̧ļo̧k ko in laļ renaaj lo lo̧mo̧o̧r eo an aer Anij” (verse 3).
Ļōm̧ņak ko n̄an Ekkatak Jeje Ko Rekwojarjar Ippam̧ Make
M̧ool ko ilo Katak im Bujen Ko remaron̄ kōpooj eō n̄an kōm̧m̧an jerbal eo an Anij.
Bok ko jet iien rej jem̧ļo̧k kōn juon jem̧ļo̧k me ej kwaļo̧k ak kakaduduik meļeļe eo an bok eo. Jekjōn 133 ekar lukkuun men eo jinointata me ej aikuj kar erom̧ juon kōjem̧ļo̧k ilo Bok in Mormon, im emaron̄ lukkuun aorōk n̄an riiti jekjōn in kōn kōļmenļo̧kjeņ. Ta meļeļe ko me Irooj ej kwaļo̧k aorōkin kōn jerbal eo An? Ta eo eoon ko 57–62 rej katakin eok kōn jerbal eo me Irooj ekōņaan bwe kwon kōm̧m̧ane ilo jerbal in An?
Irooj ekōņaan bwe in kōppopo n̄an Itok eo an Kein Karuo.
Jim̧or jekjōn 1 kōmeļeļe eo an Irooj kōn Katak im Bujen Ko, im jekjōn 133, unin tōl eo n̄an bok eo, jino kōn ejja kajjitōk eo wōt jān eo jān Irooj: “Eo̧ron̄, O kom armej in Kabun̄ eo Aō” (Katak im Bujen Ko 1:1; 133:1). Ta meļeļein n̄an eo̧ron̄? (lale Unin Tōl eo n̄an Jeje ko Rekwojarjar, “Hearken,” scriptures.ChurchofJesusChrist.org). Ta kūr ko ak kakien ko me Irooj ekōņaan bwe kwon eo̧ron̄i ilo Katak im Bujen Ko 133:1–19? Ta eo kar im̧mwe eok n̄an kōm̧m̧an n̄an em̧m̧anļo̧k am̧ kōpooj eok n̄an itok eo An? Ewi wāween am̧ naaj jipan̄ ro jet ipeļaakim n̄an kōppopo?
Barāinwōt lale Matu 25:1–13; D. Todd Christofferson, “Kōppopo n̄an Ro̧o̧ltok eo an Irooj,” Ensign ak Liaona, Māe 2019, 81–84.
Itok eo Kein Karuo enaaj lukkuun ļap lan̄lōn̄ n̄an ro rim̧m̧an.
Ilo am̧ riit ilo Katak im Bujen Ko 133:19–32 kōn m̧akūtkūt ko me renaaj itok ilo Itok eo Kein Karuo an Rilo̧mo̧o̧r, kwomaron̄ kejōkļo̧kjeņ kake ta eo kōmeļeļe ko an m̧akūtkūt kein lewaj ļōmņak n̄an eok kōn Rilo̧mo̧o̧r im jerbal eo An. Ta jerbal ko rekkar ilo mour in jetōb kwomaron̄ loe ilo kōmeļeļe kein?
Ilo am̧ riit kōmeļeļe ko kōn jepļaak tok eo an Rilo̧mo̧o̧r ilo eoon ko 32–56, ta eo ej kōm̧m̧an bwe kwon erreim̧aanļo̧k n̄an raan eo eļap? Ta naan ak jentōj ko me rej kōmeļeļeik iakwe eo an Irooj n̄an armej ro An? Ļōmņak in je en̄jake ko am̧ make kōn “iakwe eo ejouj eo an [am̧] Irooj, im aolep men ko Eaar likūt [ioom̧] ekkar n̄an em̧m̧an eo An” (eoon 52).
“Kien kar ejaak in Anij n̄an jeraam̧m̧an eo an armej.”
Jem̧jerā eo an Armej ro Rekwojarjar etto ippān kien ekar lukkuun pen. Ke Armej ro Rekwojarjar kar kadiwōjļo̧k er jān Jackson County, Missouri, ilo 1833, ekkar ejjeļo̧k rijipan̄ er ak jāān jān kien eo an jikin eo im laļ eo jekdo̧o̧n kajjitōk ko aer n̄an jipan̄. Ilo ejja iien eo wōt, jet armej me rej pād inabōjin m̧ōn jar eo rekar kōmeļeļe katak ko an Zaion n̄an meļeļein bwe Armej ro Rekwojarjar rej jum̧ae mālim an kien ko an laļ.. Katak im Bujen Ko 134 kar je, ilo m̧ōttan, n̄an kallikar jerbal eo an Kabun̄ in ikkijeen kien eo ioļap.
Ewi wāween en̄jake ko an membōr ro an Kabun̄ in kōn kien ko ioļap? Ilo am̧ ekkatak jekjōn 134, ļōmņak n̄an kōm̧m̧an ruo laajrak ko: juon laajrak in pedped in katak ko kwoj ekkatak kaki kōn kien eo ioļap im bar eddo ko jet an ri laļ eo. Ewi wāween an ļōmņak kein lukkuun kar jipan̄ Armej ro Rekwojarjar etto? Ewi wāween am̧ mour kaki ilo ijoko kwoj mour ie?
Barāinwōt lale Laajrak in Tomak ko 1:11–12; Gospel Topics, “Religious Freedom,” topics.ChurchofJesusChrist.org.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 133:4–14Oktak eo an Zaion ilo jetōb ej Babiļon—juon jikin etto me ilo jeje ko rekwojarjar rej kwaļo̧k kōkaļļein ro renana im relokjak ilo mour in jetōb (lale D. Todd Christofferson, “Come to Zion,” Ensign ak Liahona, Nov. 2008, 37; Unin Tōl n̄an Jeje ko Rekwojarjar, “Babel, Babylon,” scriptures.ChurchofJesusChrist.org). Elōn̄ ke jabdewōt men kwoj aikuj n̄an kōm̧m̧ane āinwōt juon baam̧le ilo juon meļeļe ilo jetōb, “diwōjļo̧k … jān Babilon” im (eoon 5) im “ilo̧k … n̄an āneen … Zaion”? (eoon 9).
-
Katak im Bujen Ko 133:20–33.Ilo am̧ riiti eoon kein ippān doon, baam̧le eo am̧ emaron̄ jin̄n̄aik pija ko kōn ta eo rej ļōmņak Itok eo Kein Karuo enaaj āinwōt. Kwomaron̄ barāinwōt ikkure ak al juon al kōn Itok eo Kein Karuo, āinwōt “When He Comes Again” (Children’s Songbook, 82–83), im kōmeļeļe kōn ta eo baam̧le eo am̧ emaron̄ kōm̧m̧ane n̄an kōppopo n̄an Itok eo An.
-
Katak im Bujen Ko 133:37–39.Baam̧le eo am̧ enaaj ke m̧ōņōņō in riiti eoon kein “kōn juon ainikien eļaaj”? (eoon 38). Ta meļeļein n̄an kwaļo̧k gospel eo kōn juon ainikien eļaaj? Ta en̄jake ko jemaron̄ kwaļo̧ki?
-
Katak im Bujen Ko 134:1–2.N̄an jipan̄ baam̧le eo am̧ meļeļe kōn aorōkin kien eo ioļap, kwomaron̄ kōmeļeļe kajjitōk ko āinwōt kein: Elmen an baam̧le eo ad jeraam̧m̧an kōn an wōr kakien ko? Elemen an laļ eo ad jeraam̧m̧an kōn an wōr kakien ko? Kwomaron̄ barāinwōt kōm̧m̧an ak kōļare pijaan būļāāk in aelōn̄ eo am̧ ak kakilōklōke laajrak in tōmak jon̄oul juon im jon̄oulruo.
Kōn ļōmņak ko reļļapļo̧k n̄an katakin ajri ro, lale laajrak eo an wiik in ilo Itok, Ļoor Eō—N̄an Būraimere.
Al eo kar elmakote: “Ro Nejin Iroij Itok,” Al, nō. 9.
Kōkm̧anm̧anļo̧k Am̧ Ekkatak Ippem Make
Katakin kōn katak ko ralikkar im reļam waan. Irooj ej kōmeļeļeik gospel eo An kōn naan ko āinwōt “alikkar” im “ļam waan”” (Katak im Bujen Ko 133:57). Ta eo naan kein rej lewaj ļōmņak n̄an kwe kōn katakin gospel eo n̄an baam̧le eo am̧?
Kraist ilo Nuknuk Būrōrō eo An, jān Minerva Teichert