“Nobōm̧ba 1–7. Katak im Bujen Ko 125–128: ‘Juon AInikien Em̧m̧an n̄an ro Remour im ro Remej,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Nobōm̧ba 1–7. Katak im Bujen Ko 125–128,” Itok, Ļoor Eō—N̄an Kajjojo Armej im Baam̧le ko: 2021
Kōm Ippāer im Er Ippāmim, jān Caitlin Connolly
Nobōm̧ba 1–7
Katak im Bujen Ko 125–128
“Juon Ainikien Em̧m̧an n̄an ro Remour im ro Remej”
Kemeemej n̄an je en̄jake ko am̧ ilo am̧ katak Katak im Bujen Ko 125–28 bwe kwon maron̄ ļōmņak kaki im jeere n̄an ro jet.
Je En̄jake ko Rej Im̧we Eok
Ilo O̧kwōj 1840, Jane Neyman eo me ekar lukkuun buromōj ekar ron̄jake an Rikanaan Josep kōnono ilo iien ilomej eo an juon mōttan etan Seymour Brunson. Jodikdik eo nejin Jane etan Cyrus ej kab m̧ōj an jako. Men eo ekar kaburomōj e ļo̧k wōt ej bwe Cyrus ejjan̄in kar peptaij, im Jane ekar inepata kōn ta eo enaaj waļo̧k n̄an jetōb eo an indeeo. Josep ekar jeļā kōn en̄jake eo an; ekar bar ļōmņak ejja menin wōt kōn brother eo an ejitōnbōro Alvin, eo ekar bar mej m̧okta jān an peptaij. Kōn menin Rikanaan eo rekar kālet n̄an jeere ippān Jane, im aolep ro ilo iien ilomej eo, ta eo Irooj ekar kwaļo̧k n̄an e kōn er ro me rekar mej ilo aer jan̄in bōk kain̄i ko an gospel eo—im ta eo jemaron̄ kōm̧m̧ane n̄an jipan̄ er.
Katak eo kōn peptaij kōn ro remej ekar kam̧ōņōņōik Armej ro Rekwojarjar, ļōmņak ko aer rekar kajju oktak n̄an ro jineer im jemāer me em̧ōj aer jako, ro jibūer im jim̧aer, im ro jet uwaan baam̧le eo. Kiiō ebar wōr kōjatdikdik n̄an er! Josep ekar kwaļo̧k aer m̧ōņōņō, im ekar kōjerbal kajin ko me rekam̧ōņōņō im rekaitoktoklimo n̄an kwaļo̧k ta eo Irooj ekar katakin e kōn lo̧mo̧o̧r eo an ro remej: “Toļ ko ren lam̧ōj kōn lan̄lōn̄, im aolep kom̧laļ kom̧in kūr ellaaj; im aolep kom̧ lojet kaņ im āne m̧ōrā ko kom̧in ba mennin bwilōn̄ ko an ami Kiin̄ Indeeo!” (Katak im Bujen Ko 128:23).
Lale Saints, 1:415–27; “Letters on Baptism for the Dead,” Revelations in Context, 272–76.
Ļōmņak ko n̄an Ekkatak Jeje Ko Rekwojarjar Ippam̧ Make
Irooj ekōņaan bwe in kea kōn baam̧le eo aō.
Ālkin an jepļaaktok n̄an kapijuknen jān mijen ko āliktatā n̄an England, Brigham Young ekar bōk bar juon kūr eaorōk jān Irooj—n̄an “bōk juon kōjparok etiljk n̄an baam̧le eo [an] ” (eoon 3), eo ekar burom̧ōj kōn jako eo an. Ilo am̧ ļōmņaki wāween an kapilōk in im ko jet ilo jekjōn 126 iookwaj eok, ļōmņak kōn naan kein jān Būreejtōn Bonnie L. Oscarson, kar Būreejtōn eo Eutiej an Jiron̄ ro.
“Keememej bwe jet iaan aikuj ko reļļap remaron̄ pād im̧aan mejāmi. Ej ijjino kōn jerbal in jipan̄ ko ami ilo m̧ōko mōmmi im ilowaan wōt baam̧le ko ami. Erkein rej jemjerā ko me rej n̄an indeeo. Men̄e—im eļaptata—jekjek ko baam̧le ko ami repād ie ejjab lukkun em̧m̧an, kwomaron̄ kappukot wāween ko n̄an jipan̄, kōketak, im kōkajoor. Jino ijo kwoj pād ie, iakwe er kōn wōn er, im kōpopo n̄an baam̧le eo am me kwo kōņaan ilju im jekļaj” (“Aikuj ko Rej Pād Imaad,” Ensign ak Liaona, Nob. 2017, 27).
Barāinwōt lale “Take Special Care of Your Family,” Revelations in Context, 242–49.
Irooj ejeļā lan̄lōn̄ im burom̧ōj ko aō.
Ņa ruōn kōn bōd ko rejjab m̧ool im kamijak n̄an kalbuuj ekar bar kam̧akūt Josep Smith bwe en kitileekek ilo O̧kwōj 1842. Im aeet naan ko ekar je n̄an Armej ro Rekwojarjar ilo iien in kiiō Katak im Bujen Ko 127) reobrak kōn kōjatdikdik im lan̄lōn̄. Ta eo eoon ko rej katakin eok kōn Anij? kōn wāween am̧ maron̄ jelm̧ae melijjon̄ ko am̧ make?
Ļōmņak n̄an je wāween an Irooj rejtake eok ilo “dān m̧wilaļ” ilo mour eo am̧.
Katak im Bujen Ko 127:5–8; 128:1–8
“Jabdewōt kom̧ij ļo̧o̧k ioon laļ naaj ļo̧o̧k ilo lan̄.”
Ilo am̧ riiti, Katak im Bujen Ko 127:5–8; 128:1–8, kappukot un ko unin an Irooj kar leļo̧k n̄an Josep Smith kōmeļeļe ko kōn rekoote peptaije ko an ro remej. Ta eo menin ej katakin eok kōn Irooj im jerbal eo An?
Kōm̧m̧an jerbal ko an tampeļ n̄an ro jibūd im jim̧aad ej ko̧o̧neek e kōj an jipan̄ kōj iakwe er.
Lo̧mo̧o̧r an ro jibū im jim̧m̧aō eaorōk n̄an lo̧mo̧o̧r eo aō.
Ealikkar jān ta eo Anj ekar kwaļo̧ke jān ippān Josep Smith unin an ro jibūd im jim̧m̧aad ro rejjan̄in kar peptaij ilo mour in aikuj jipan̄ ko ad n̄an lo̧mo̧o̧ren er. Ak etke kwoj ļōmņak lo̧mo̧o̧r an ro jibūd im jim̧m̧aad “aikuji im eaorōk n̄an lo̧mo̧o̧ren eo ad”? (lale Katak im Bujen Ko 128:15–18; kar kōjerbal italics).
Eoon 5 ej katakin bwe kain̄i ko an peptaij n̄an ro remej ekar “kōpooje m̧okta jān foundasōn eo an laļ.” Ta eo m̧ool in ej katakin eok kōn Anij im karōk eo An? Ta eo ennaan eo an Būreejtōn Henry B. Eyring “Kakobaik Baam̧le eo an Anij” ej kōm̧m̧an bwe en ļapļo̧k jeļā eo am̧? (Ensign ak Liaona, Māe 2017, 19–22).
Josep Smith ekar kōjerbal naan ko āinwōt “kajoor in liāp,” “wāween korak,” im “koba eo eweepān” n̄e ej itok n̄an katakin kōn kain̄i ko an priesthood im peptaij n̄an ro remej. Kappukot men kein im naan ko me rej āinļo̧k wōt ilo am̧ riiti Katak im Bujen Ko 128:5–25. Ta jet iaan men ko me, kōn Jisōs Kraist, emaron̄ liāp ippān kōn kain̄i kain̄i ko an priesthood n̄an ro remej? Etke “peran” ej juon naan em̧m̧an n̄an kōmeļeļeik katak in lo̧mo̧o̧r n̄an ro remej? (lale eoon ko 9–11).
Ta eo ej im̧we eok kōn naan ko an Josep Smith ilo eoon ko 19–25? Ekōjkan an eoon kein jelōt wāween am̧ en̄jake kōn jerbal ko an tampeļ n̄an ro jibūm̧ im jim̧m̧aam̧? kōn Jisōs Kraist? Ta eo kwoj en̄jake kar im̧we eok n̄an kōm̧m̧ane?(lale FamilySearch.org/discovery n̄an ļōmņak ko).
Barāinwōt lale 1 Korint 15:29; Dale G. Renlund, “Menmenbwij im Jerbal an Tampeļ: Liāp im Kōmour,” Ensign ak Liaona, Māe 2018, 46–49; “A Sacrifice of Time” and “Their Hearts Are Bound to You,” videos, ChurchofJesusChrist.org.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujenk ko 126.Riiti kapilōk in n̄an Brigham Young emaron̄ im̧we baam̧le eo am̧ n̄an kōnono kōn wāween am̧ maron̄ joļo̧k iien ko am̧ n̄an “bōk juon kōjparok etiljek n̄an” (eoon 3) doon.
-
Katak im Bujen Ko 128:15–18.Ta jet iaan kejparok im kōkm̧anm̧anļo̧k jeram̧m̧an ko in jerbal in menmenbwij an baam̧le? Kwomaron̄ lo jet aitia ko ilo bitio in “The Promised Blessings of Family History” (ChurchofJesusChrist.org) ak juon al kōn menmenbwij an baam̧le, ko āinwōt “Family History—I Am Doing It” (Children’s Songbook, 94).
-
Katak im Bujen Ko 128:18.Ļōmņak in kōm̧m̧an juon jain in pepa kōn ko etan ro uwaan baam̧le eo im ro jibūd im jim̧m̧aad kajjojo liin̄ n̄an kwaļo̧k wāween menmenbwij an baam̧le im jerbal an tampeļ ejaake juon “wāween korak” n̄an koneek e kōj n̄an ippān ro jibūd im jim̧aad etto. Bōlen kwomaron̄ kōm̧m̧an jet etale ilo FamilySearch.org n̄an kappukot ro uwaan baam̧le ko jet am̧ im lale wāween an jain in am̧ eddōkļo̧k.
-
Katak im Bujen Ko 128:19–23.Bōlen ro uwaan baam̧le eo am̧ emaron̄ kappukot ilo eoon ko kōn naan ko me ej kwaļo̧k itok limo eo an Josep Smith kōn gospel eo an Jisōs Kraist im lo̧mo̧o̧r eo an ro remej. Ro uwaan baam̧le eo remaron̄ kwaļo̧k en̄jake ko aer me ekar kōm̧m̧an menin an itok limoer kōn jerbal in—kwomaron̄ kappukot en̄jake ko ippān doon ilo FamilySearch.org/discovery.
N̄an ļōmņak ko reļļapļo̧k n̄an katakin ajri ro, lale laajrak in katak eo an wiik in ilo Itok, Ļoor Eō—N̄an Būraimere.
Al eo kar kāālete: “Family History—I Am Doing It,” Children’s Songbook, 94.
Ainikien ko an Jepļaaktok eo
Peptaij kōn ro Remej, “juon Unin Kōnono eo Ekāāl im Eaiboojoj”
Jin̄n̄a in ej kwaļo̧k jikin peptaij eo ilo Nauvoo Tampeļ ej pād ioon jon̄oulruo kau ko.
Phebe im Wilford Woodruff
Phebe Woodruff ekar jokwe epaake Nauvoo ke Josep Smith ekar jino katakin kōn peptaij kōn ro remej. Ekar je kōn ļeo pāleen, Wilford, eo ekar mijen ilo England:
“Brother Joseph … ekar ekkatak kōn revelesōn bwe ro ilo Kabun̄ in remaron̄ peptaij kōn jabdewōt ro nukuer ro remej im ejjeļo̧k aer kar iien n̄an ron̄ kōn gospel in, aeet n̄an ajri, pāāren, brother, sister, ro jibūer im jim̧m̧aer, unlepāer im nej jineer. … Dedeļo̧kin wōt aer peptaij n̄an ro m̧ōttāer rej roļo̧k n̄an kalbuuj im remaron bōk er ilo jerkakpeje eo im boktok er n̄an aelōn̄ selestial—katak in kar bōk ilo iakwe emeneen jān kabun̄ in im rej wōnm̧aanļo̧k ilo jar in armej, jet rej tōn peptaij jon̄an lōn eo 16 kattan … ilo juon raan.”1
Wilford Woodruff ekar ba tokālik kōn pedped in katak in: “Iien eo ikar ron̄ kōn menin jetōb eo aō ekar lukkuun m̧ōņōņō. … Ikar reim̧aanļo̧k im ikar peptaij kōn aolep ro nuku remej me repād ilo ļōmņak eo aō. … Ikar en̄jake n̄an ba alleluia ke revelesōn eo ekar waļo̧k n̄an kōj n̄an peptaij kōn ro remej. Ikar en̄jake ke jemaron̄ lan̄lōn̄ ilo kōjeraam̧m̧an ko an Lan̄.”2
Vilate Kimball
Āinwōt Sister Woodruff, Vilate Kimball ekar ron̄ kōn peptaij kōn ro remej ke ļeo ippān Heber, ekar pād ettoļo̧k im kajedeed gospel eo. Ekar jeje n̄an e:
“Būreejtōn Smith ekar bōk lōn̄tak juon unin kōnono ekāāl im eaiboojoj … eo me ekar kōm̧m̧an bwe en ļapļo̧k tōmak an elōn̄ armej ro. Menin, peptaij kōn ro remej. Paul ej kōnono kōn menin, ilo juon Korint 15 jepta 29 eoon. Josep ekar bōk juon likio in kōmeļeļe kōn unin kōnono in ilo Revelesōn. … Ej juon iien em̧m̧an an kabun̄ in n̄an peptaij kōn aolep ro nukuier me rekar mej m̧okta jān an Gospel in kar jepļaaktok; jon̄an likļo̧k n̄an ro jibūer im jim̧m̧aer etto. … Ilo ad kōm̧m̧ane menin, jej jerbal āinwōt jet jipan̄ n̄an er; im leļo̧k n̄an er iien em̧m̧an ilo itok eo an jerkakpeje eo kein kajuon. Ej ba renaaj kajedeed Gospel eo n̄an er … ak ejjan̄in kar wōr jetōb ej peptaij. … Jān iien eo katakin kar ajedeed ijin, eļļļakarr jan̄in jem̧ļo̧k an boub jikin kōpeptaij eo ilo dān. Ilo iien kweilo̧k eo eļap ekar wōr jet iien jān rualitōk n̄an jon̄oul Elder ro ilo reba eo ilo juon iien rej peptaij. … Ikōņaan peptaij kōn Jinō. Ikar karōk im kōttar m̧ae kwonaaj rooltok n̄an kapijuknen, ak āliktata Josep ekar kōnono kōn unin kōnono in, ekar kapilōk aolep bwe ren jerkak im kōm̧m̧ane jerbal in, im kanemkwoj ro m̧ōttaer jān kam̧akoko ilo iien eo em̧ōkajtata. Kōn menin ij ļōmņak inaaj wōnm̧aanļo̧k wōt ilo wiik in, āinwōt ke elōn̄ ro rūtūrū rej wōnm̧aanļo̧k wōt. Jet em̧ōj aer kadede peptaij elōn̄ kōttan. … Menin kwoj loe bwe elōn̄ iien ko rem̧m̧an n̄an aolep. En̄in ej juon katak eaibojooj?”3
Phebe Chase
Ke jikin peptaij eo ekar dedeļo̧k ilo Nauvoo Tampeļ, peptaij kōn ro remej rekar jino kōm̧m̧an ijeņ ijjeļo̧kin ilo reba. Phebe Chase, ej juon ri Nauvoo, ekar jeje n̄an jinen kōn tampeļ, kōmeļeļeik jikin peptaij eo āinwōt juon jikin “jemaron̄ peptaij kōn ro remej im erom̧ rilo̧mo̧o̧r ro ilo toļ Zaion.” Ekar etal wōt im kōmeļeļeik bwe ilo jikin peptaij in, “Em̧ōj aō kar peptaij kōn eo jema jitōnbōro im aolep ro m̧ōtta me em̧ōj aer jako. … Kiiō ikōņaan jeļā etan jemam̧ im jinam̧ bwe in karōlļo̧k er, bwe ij ikdeleel n̄an jipan̄ ro Remej. … Irooj ekar bar kenono im ekar kōjepļaaktok laajrak ko etto.”4
Sally Randall
Ke ikar je menin n̄an ro m̧ōttan im baam̧le ko kōn peptaij kōn ro remej, Sally Randall ekar bar kemeemej tok mej eo an ļaddik eo nejin George:
“O juon iien epen n̄an n̄a im ej pen wōt bwe ijjab maron̄ kōkm̧anm̧anļo̧k menin, ak … jemān em̧ōj an peptaij kōn e im ej juon men eaibojooj bwe jej tōmak im bōk tarlep in gospel eo āinwōt an ajedeed kiiō im maron̄ peptaij kōn aolep ro m̧ōttad remej im lo̧mo̧o̧ren er likļo̧k n̄an jon̄an eo jeļā eo ad ejem̧ļo̧k ie.
“Ikōņaan bwe kwon je aolep et ko kar litok kōn ro nukūd me em̧ōj aer jako jon̄an eo kwotōpare likļo̧k etan ro jibūm̧ im jim̧m̧aam̧. Ij kōņaan kōm̧m̧ane ta eo imaron̄e n̄an lo̧mo̧o̧ren ro m̧ōtta im ij aikuj lukkuun m̧ōņōņō eļan̄n̄e jet iaami naaj itok im jipan̄ eō bwe ej juon jerbal eļap n̄an juon n̄an an kōm̧m̧ane make iaan. … Ij kōtmāne kwonaaj ļōmņak menin ej juon katak jejjab jeļā kake ak kwonaaj lo bwe em̧ool.”5
Jikin peptaij eo ilo Ogden Utah Tampeļ ej pād ioon likūn oxen ko jon̄oulruo.