baam̧le ippān ro jibwieer im jim̧m̧aer ilo laļ eo an Jetōb

Kōm Ippāer im Er Ippam, jān Caitlin Connolly

Nobōm̧ba 1–7

Katak im Bujen Ko 125–128

“Juon Ainikien Em̧m̧an n̄an ro Remour im ro Remej;”

Eļan̄n̄e kwoj katakin ajri ro reddikļo̧k im aikuj jipan̄ ko jet, lale “Tōpar Aikuj ko an Ajri ro Reddikļo̧k” ilo kein katakin in.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Jipan̄ ajri ro ļōmņake jet men raar ekkatak wiik in ilo kapijuknen ak Būraimere. Leļo̧k n̄an er jejjo̧ minit n̄an jin̄aik juon pija in ta eo raar ļōmņake im kwaļo̧k n̄an kūlaaj eo.

pija in katakin

Katakin Katak eo: Ajri ro Reddikļo̧k

Katak im Bujen Ko 126:3.

Ij iakwe baam̧le eo aō.

Ālkin an Brigham Young ro̧o̧l n̄an m̧weeo jān kwaļo̧k gospel eo, Irooj eaar ba n̄an e n̄an kōjparok baam̧le eo an.

Makūtkūt ko Maron̄ Kōm̧m̧ani

• Kwaļo̧k n̄an ajri ro meļeļe eo kōn Brigham Young ilo “Jebta 50: Ro Rekwojarjar ilo Nauvoo” (Bwebwenato ko ilo Katak im Bujen Ko, 184), ak kōmeļeļeiki Katak im Bujen Ko 126 ilo naan ko am̧ make. Riiti Katak im Bujen Ko 126:3 n̄an ajri ro, kōmeļeļeik bwe naan in “kappukot eļapļo̧k kea kōn baam̧le eo am̧.” Ta meļeļein kea kōn baam̧le ko ad? Jipan̄ ajri ro ļōmņake wāween ko remaron̄ kwaļo̧k iakwe n̄an baam̧le ko aer.

• Mokta jen kūlaaj, karuwaneneik ajri ro n̄an bōk juon pijain baam̧le eo aer (ak kajjitōk ippāer n̄an jin̄n̄a pija ko). Innām kajjitōk ippāer n̄an kwaļo̧k jet men em̧m̧an ipaer kōn baam̧le eo aer. Kwaļo̧k juon pijain baam̧le eo am, im kōm̧m̧an āindein. Kōmeļeļeik unnin an Jemedwōj Ilan̄ kōņaan bwe jen kea kōn baam̧le ko ad. Al juon al kōn jerbal ippān doon, eo āinwōt “When We’re Helping” (Children’s Songbook, 198).

Katak im Bujen Ko 128:5, 12

Aolep ro nejin Anij reaikuj in peptaij.

N̄an kokkobaba jipan̄ ajri ro pojak n̄an kōm̧m̧ani make bujen peptaij ko aer, katakin er bwe jemaron̄ jipan̄ ro em̧ōj aer mej me raar jab peptaij n̄an bōk ejja kōjeraam̧m̧an in.

Makūtkūt ko Maron̄ Kōm̧m̧ani

• Kwaļo̧k juon pija in an kar Jisōs Kraist peptaij (lale Gospel Art Book, no. 35), ak kwaļo̧k pija eo “The Baptism of Jesus” (ChurchofJesusChrist.org). Kajjitōk ippān ajri ro eļan̄n̄e raar lo an juon kar peptaij. Ta eo rej keememeje? Kōjerbal pija in kwaļo̧k n̄an ajri ro bwe n̄e jej peptaij, jej tuļo̧k ium̧win dān im bar wanlalōn̄tak, āinwōt kar Jisōs. Kōpeļļo̧k n̄an Katak im Bujen Ko 128:12, im kōmeļeļeik bwe Josep Smith eaar kwaļo̧k bwe peptaij ej kakeememej kōj kōn Jerkakpeje.

• Ba n̄an ajri ro kōn juon eo kwojeļā kajjien (āinwōt rūtto ro) me raar mej im jab kar peptaij. Riiti Katak im Bujen Ko 128:5, im kōtļo̧k aer bōk kūņaer jibwe juon pijain juon jikin peptaij ilo tampeļ (lale laajrak eo an wiik in ilo Itok, Ļoor Eō—N̄an Kajjojo Armej im Baam̧le ko). Kam̧ool bwe Jemedwōj Ilan̄ ej kōņaan bwe jen peptaij ioon laļin kōn armej ro remej. Wāween in aolep ro nejin Anij remaron̄ peptaij im kōm̧m̧an bujen ko Ippān.

Katak im Bujen Ko 128:18

Jemedwōj Ilan̄ ekōņaan bwe in jeļā kōn ro menmenbwij eo an baam̧le eo aō.

Elōn̄ wāween ko me ajri ro reddik remaron̄ bōk kūņaer ilo jerbal in menmenbwij an baam̧le. Jipan̄ er en̄jake iakwe n̄an armej ro aer ilo menmenbwij eo.

Makūtkūt ko Maron̄ Kōm̧m̧ani

• Ejaake juon peba in etal aolepen armej ro ilo menmenbwij eo am (lale peij in m̧akūtkūt eo an wiik in), im bōktok im kwaļo̧k n̄an kūlaaj eo. Ba jejjo men ko kōn armej ro ilo peba eo. Riit n̄an ajri ro jān Katak im Bujen Ko 128:18, im kōmeļeļeiki bwe Josep Smith ekar kwaļo̧k bwe “ewōr juon kwon … ikōtaan baba ro im ajri ro.” Jipan̄ ajri ro kōm̧m̧ane make peba in menmenbwij eo aer make, im karuwaineneik er n̄an bōk peba eo n̄an kapijuknen im bwe jineer im jemeer en jipan̄ er likūt jet etan rūtto ro aer.

• Kajjitōk ippān ajri ro n̄an kwaļo̧k jet kōn juon iaan ro jibwier im jim̧aer. Ba juon iaan bwebwenato ko rem̧m̧an ippam̧ kōn jinō im jem̧ōm̧ ak jibum̧ im jim̧aam̧. Kwaļo̧k pijaj ko n̄e ekkar. Rōjan̄ ajri ro n̄an ekkatak eļapļo̧k kōn jibwier im jim̧aer im rūtto ro jet.

pija ej bōk jikin katakin

Katakin Katak Ko: Ajri ro Rerūttoļo̧k

Katak im Bujen Ko 126

Imaron̄ jipan̄ kea kake baam̧le eo aō.

Elmen am maron̄ jipan̄ ajri ro kwoj katakin jerbale wāween ko ewōr tokjeer kōn menmenbwij eo aer?

Makūtkūt ko Maron̄ Kōm̧m̧ani

• Riiti ippān doon Katak im Bujen Ko 126:3. Etke Jemedwōj Ilan̄ eaar kajjitōk ippān Brigham Young n̄an “lukkuun kōjparok baam̧le eo [an]”? Elmen ad kōm̧m̧ane ejja in wōt n̄an baam̧le ko ad? Kōm̧m̧ane juon laajrak in men ko jemaron̄ kōm̧m̧ani kiiō n̄an jipan̄ baam̧le ko ad? Elmen naaj kōm̧m̧ane men kein jipan̄ kōj erom̧ eļaplok āinwōt Jemedwōj Ilan̄?

• Kwaļo̧k n̄an ajri ro bwebwenato eo an Sister Carole M. Stephens kōn ļaddik eo jibwin Porter (lale “We Have Great Reason to Rejoice,” Ensign ak Liaona, No̧b. 2013, 115). Ta eo Porter ekar kōm̧m̧ane n̄an kea kōn baam̧le eo an? Ekōjkan ad maron̄ ļoor waanjon̄ak eo an?

Katak im Bujen Ko 128:1, 15–18

Pepteij kōn ro remej ej ejaak “juon kwon” ikōtaan n̄a im rūtto ro aō?

Josep Smith eaar kwaļo̧k bwe peptaij kōn ro remej ej likwōj kōj n̄an rūtto ro aō āinwōt juon jein. Elmen am maron̄ jipan̄ ajri ro en̄jake m̧ōņōņō eo ej itok n̄an jeļā kōn rūtto ro ad im lukkuun lale bwe jerbal in tampeļ en dedeļo̧k kōn er?

Makūtkūt ko Maron̄ Kōm̧m̧ani

• Kōjepeļo̧k kūlaaj ko ilo ruo kurup ko, im kajjitōk ippān kurup eo jinoin bween riiti Katak im Bujen Ko 128:1 n̄an pukote ta ļōmņak eo an Josep Smith. Kajjitōk ippān kurup eo juon n̄an riiti eoon 17 im pukote ta eo ej lukkuun ļōmņkae “eo eiaboojojtata.” Kōtļo̧k bwe ren kwaļo̧k ta eo rej loe, im kōnono etke eaorōk unin kōnono jab in. N̄e ekkar, karuwaineneik juon jodikdik eo ekar kōm̧m̧an pepteij kōn ro remej n̄an kwaļo̧k en̄jake eo an im kōmeļeļeik etke jej kōm̧m̧ane jerbal in.

• Ļōmņak in kōjerbal juon menin ekkatak n̄an kwaļo̧k bwe jej aikuj in jipan̄ rūtto ro ad ro raar jab peptaij. N̄an waanjon̄ok, kwaļo̧k juon menin letok ak juon men aorōk, ak leļo̧k n̄an juon iaan ajri ro. Ba bwe ajri ro emaron̄ bōk men in ak eban em̧m̧akūti jān jikin jijet eo an. Kajjitōk ippān ajri ro jet ta remaron̄ kōm̧m̧ane n̄an jipan̄ ajri ro bōke. Riit ippān doon Katak im Bujen Ko 128:15, im kōnono elmen keidi katak in.

• Karuwaineneik ajri ro n̄an kōm̧m̧ane juon peba jein kōn etan ro jineer im jemeer, jibwier im jim̧m̧aer, ro jibwin-jibwier im jim̧m̧an-jim̧m̧aer, im ko jet (lale peij in m̧akūtkūt eo an katak in). Eļan̄n̄e ajri ro rejjab jeļā etan rūtto ro aer, rōjan̄ er n̄an kappukot etaer im je ioon jein eo ilo m̧weeo. Riit ippān doon Katak im Bujen Ko 128:18 n̄an pukote ta in “kwon” bwe en kōm̧m̧an an baam̧le ko ad “juon wōt im dipio.” Kwaļo̧k juon bwebwenato kōn rūtto ro me ejipan̄ eok en̄jake jemdo̧o̧n n̄an e. Ak kwaļo̧k pija eo“Courage: I Think I Get It from Him” (ChurchofJesusChrist.org).

• Kwaļo̧k n̄an ajri ro juon peba in mālim n̄an deļo̧n̄e an tampeļ, im ba n̄an er elmen am bōk juon. Jipan̄ er rim̧aanļo̧k n̄an bōk aer make peba in mālim n̄an deļo̧n̄e tampeļ bwe ren maron̄ etal n̄an tampeļ im peptaij kōn rūtto ro aer make.

  ļaddik eo ej jibwe kaat ko kōn etan baam̧le eo an

  Jemaron̄ lo etan rūtto ro ad im kōm̧m̧ani kain̄i ko an tampeļ ilo etaer.

pija ej bōk jikin ekkatak

Kōketak Ekkatak ilo M̧weo

Karuwaineneik ajri ro n̄an kajjitōk ippān ro jet ilo kapijuknen n̄an jipan̄ er jeļā eļapļo̧k kōn menmenbwij eo an baam̧le. Remaron̄ kajjitōk n̄an ron̄jake bwebwenato ko kōn rūtto ro aer ak kōjerbal FamilySearch.org n̄an pukot etan rūtto ro me rejjan̄in peptaij.

Kōkōm̧anm̧anļo̧k Ad Katakin

Kōm̧m̧an bwe ajri ro ren kōm̧m̧ani jekjek ko aer rejej uwaer. Ajri ro remaron̄ ekkal, jin̄a, ak kōļare men eo ej iokļo̧k bwebwenato eo ak pedped in katak eo rej ekkatak. Remaron̄ bar kōjerbal ta eo raar kōm̧m̧ane n̄an katakin ro jet. (Lale Katakin ilo Wāween eo an Rilo̧mo̧o̧r,25

peij in m̧akūtkūt: Jemedwōj Ilan̄ ekōņaan bwe in jeļā kōn menmenbwij in baam̧le eo aō