Joseph Smith in Nauvoo, 1840, jān Theodore Gorka

Nobōm̧ba 8–14.

Katak im Bujen Ko 129–132

“N̄e Jej Bōk Jabdewōt Kōjeraam̧m̧an jān Anij, Ej jān Pokake”

Elder David A. Bednar eaar ba: “Kōnono im ba rejjab kwaļo̧k wōt. Kwaļo̧k gospel eo ilo wāween eo an Irooj ekoba lale im ron̄jake im etale” (“Becoming a Preach My Gospel Missionary,” New Era, Okt. 2013, 6). Ta eo Jetōb ej katakin eok ilo am lale im ron̄jake n̄an ajri ro kwoj katakin?

Je En̄jake ko Rej Im̧we Eok

Kajjitōk bwe ren Kwaļo̧k

Kālet juon unin kōnono jān jekjōn 129–32, im kōtļo̧kbwe ajriro ren ba waj ta eo raar kadede ekkatak kōn unin kōnono in. N̄an waanjon̄ok, ta eo rejeļā kōn Jemewōj Ilan̄ ak Doulul Anij? kōn m̧are indeeo? kōn aelōn̄ in kiin̄ an celestial?

Katakin Katak eo: Ajri ro Reddikļo̧k

Katak im Bujen Ko 130:20–21; 132:5

Kōjeraam̧m̧an ko rej itok jān pokake Anij.

Josep Smith eaar kwaļo̧k bwe aolep kōjeraam̧m̧an jān Anij ej pedped ioon ad pokake kien ko An. Elmen am maron̄ katakin pedped in ilo juon wāween me ajri ro renaaj meļeļe?

Makūtkūt ko Maron̄ Kōm̧m̧ani

• Kwaļo̧k jidik oktak n̄an ajri ro me rej kwaļo̧k ewi aorōkin n̄an ļoor kōmeļeļe ko; n̄an waanjon̄ok, kōnono n̄an er kōn jon̄ak ko jej aikuj in ļoori n̄an keppopo m̧ōn̄ā ak jidik ikkure ak kalōk juon men. Ta eo ej waļo̧k n̄e jejjab ļoor kōmeļeļe ko? (Bōlen emaron̄ wōt juon am en̄jake make kwomaron̄ kwaļo̧ke.) Riiti Katak im Bujen Ko 130:21, im keidi kōmeļeļe kein n̄an kien ko jej aikuj ļoori n̄an būki kōjeraam̧m̧an ko jān Jemedwōj Ilan̄.

• Kajjitōk ippān ajri ro eļan̄n̄e remaron̄ ļōmņake iien eo ke raar pokake kien ko an Anij. Ekōjkan aer kar en̄jake? Al ippān doon juon al kōn pokake, āinwōt “Keep the Commandments” (Children’s Songbook, 146–47), im kalikkar kōjeraam̧m̧an ko kōn pokake rej waļo̧k ilo al in. Kōnono jet iaan men ko Anij ej jiron̄ kōj n̄an kōm̧m̧ani. Elmen an Anij kōjeraam̧m̧an kōj n̄e jej kōjparok kien ko?

Katak im Bujen Ko 130:22

Jemedwōj Ilan̄ im Jisōs Kraist ewōr ānbwin jab wabanban.

N̄e jej meļeļe bwe Anij im Jemed im Jisōs Kraist ewōr ānbwniier āinwōt kōj, jej en̄jake n̄an epakeļo̧k Er, im jemdo̧o̧n eo ad Ippāer ekajoorļo̧k.

Makūtkūt ko Maron̄ Kōm̧m̧ani

• Kwaļo̧k n̄an ajri ro juon pijain Jisōs Kraist, im karuwaineneik er n̄an jitōkļo̧k Mejen, botin, im m̧ōttan ko jet ilo Āinbwiinin. Innām karuwaineneik er n̄an jutak im jitōn̄ļo̧k ejja m̧ōttan ko wōt ilo ānbwiiniier. Riit jān Katak im Bujen Ko 130:22: “Jemed ewōr juon ānbwinnin kanniōk im diik ko … ; Nejin barāinwōt.” Kam̧ool bwe ānbwinniid rej āinwōt ānbwinnin Jemedwōj Ilan̄ im Jisōs Kraist.

• Al ippān doon juon al kōn ānbwin, āinwōt “Head, Shoulders, Knees, and Toes” (Children’s Songbook, 275), im karuwaineneik ajri ro n̄an kōm̧m̧ani m̧akūtkūt eo ilo al eo. Kajjitōk ippān ajri ro kwaļo̧k etan jet men ko remaron̄ kōm̧m̧ane n̄an ānbwiinier. Kwaļo̧k am kam̧m̧oolol kōn ānbwiin eo Anij eaar lewaj n̄an eok. Elmen ad maron̄ kam̧m̧oolol kōn menin letok in ejeja?

• Karuwaineneik ajri ro n̄an jin̄aik Jemedwōj Ilan̄, Jisōs Kraist, im er make. Jipan̄ er lo elmen an ānbwiiniid āinwōt Jemedwōj Ilan̄ im Jisōs Kraist.

Katak im Bujen Ko 132:19

Jemedwōj Ilan̄ eaar kōm̧m̧an bwe baam̧le ko ren ippān doon indeeo.

Kōn kajoor in liāp eo an Irooj im kain̄i ko ilo tampeļ, jemdo̧o̧n ko an baam̧le eo ad emaron̄ in indeeo eļan̄n̄e jej kōjparok bujen ko ad.

Makūtkūt ko Maron̄ Kōm̧m̧ani

• Jipan̄ aji ļōmņake waanjon̄ok ko an men ko me rejjab n̄an indeeo—m̧ōn̄ā ko im rejorāān, wūt ko rem̧ōņakņak, im ko jet. Kwaļo̧k juon pijain baam̧le eo am, im kwaļo̧k elmen am en̄jake kōn er. Kam̧ool bwe Irooj eaar kōm̧m̧an, bwe kōn kain̄i ko ilo tampeļ, baam̧le ko ren indeeo.

• Kōpeļļo̧k n̄an Katak im Bujen Ko n̄an jekjōn 132, im ba n̄an ajri ro bwe ej juon revelesōn n̄an Josep Smith kōn m̧are im baam̧le. Kwaļo̧k n̄an er eoon 19, im jitōn̄ļo̧k naan eo “ejjeļo̧k jem̧lo̧kin” ilo am riit n̄an er. Karuwaineneik ajri ro n̄an riiti naan kein ippam̧.

• Jipan̄ ajri ro kōm̧m̧ane juon peba tole pinej jenkwan oraņ baam̧le eo aer (lale peij in m̧akūtkūt eo an wiik). Mwijiti, im likūti ilowaan juon enpeļoub ak kaddāppi ippān doon ilo juon peba kilip n̄an pinej jenkwan kajoor in liāp me emaron̄ kōm̧m̧an bwe baam̧le eo ad en indeeo.

  

  Kain̄i ko an tampeļ ekōtļo̧k bwe baam̧le ko ren indeeo.

Katakin Katak Ko: Ajri ro Rerūttoļo̧k

Katak im Bujen Ko 130:18–19

Jemedwōj Ilan̄ ekōņaan bwe in bōk jeļāļo̧kjeņ im meļetļet.

Men ko reļļōn̄ jej būki ilo mour in reban itok ippād ļo̧k n̄an mour eo juon. Ak ad “jeļāļo̧kjeņ im māletlet” enaaj (Katak im Bujen Ko 130:19).

Makūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k ippam̧ men eo raar ekkatak kake ilo jikuuļ ak jān ro jineer im jemeer. Karuwaineneik er n̄an riiti Katak im Bujen Ko 130:18–19 n̄an lale ta enaaj waļo̧k n̄an jeļāļo̧kjeņ im māletlet eo ad ilo mour eo juon.

• Ta eo eoon 19 ej katakin elmen ad bōk jeļāļo̧kjeņ im māletlet? Elmen ad maron̄ in māletlet im pokake ilo ad pukot n̄an ekkatak? (N̄an elōn̄ unin kōnono, lale “Jeļāļo̧kjeņ” ilo N̄an Kōkajoorļo̧k Jodikdik ro [peij 9–10].)

Katak im Bujen Ko 130:20–21; 132:5, 21–23

Kōjeraam̧m̧an ko rej itok jān pokake Anij.

Kōļmenļo̧kjeņ elmen an Irooj kōjeraam̧m̧an eok n̄e kwoj pokake kien ko An. Ta en̄jake ko kwomaron̄ kwaļo̧ki n̄an ajri ro n̄an im̧we er?

Makūtkūt ko Maron̄ Kōm̧m̧ani

• Al juon al kōn pokake, āinwōt “Keep the Commandments” (Children’s Songbook, 146–47), im karuwaineneik ajri ro n̄an riiti Katak im Bujen Ko 130:20–21 im 132:5. Jipan̄ er lo naan ko im ļōmņak ko ilo jeje ko rekwojarjar me reinļo̧k wōt al eo. Elmen ad bōk kōjeraam̧m̧an ko jān Anij? Kajjitōk ippān ajri ro n̄an kwaļo̧k ta eo raar jeraam̧m̧an kake ilo aer pokake kien ko an Anij.

• Riit ippān doon Katak im Bujen Ko 132:21–23, im karuwaineneik ajri ro n̄an jin̄aik pije ko rej pinej jenkwan ta eo raar ekkatak jān eoon kein. Rōjan̄ er n̄an kōm̧m̧an, im ba ke ren kobaik jin̄aik ko aer ilo kakien ko ak kien ko me rejipan̄ kōj pād wōt ilo iaļ in eaidik n̄an mour indeeo.

Katak im Bujen Ko 131:1–4; 132:15, 19

Jemedwōj Ilan̄ eaar kōm̧m̧an bwe baam̧le ko ren ippān doon indeeo.

Jekdo̧o̧n jekjek rot eo an baam̧le eo ad, jemaron̄ kōm̧m̧ani kālet ko kiiō me renaaj kepooj kōj n̄an bōk kōjeraam̧m̧an ko an juon baam̧le indeeo jeklaj.

Makūtkūt ko Maron̄ Kōm̧m̧ani

• Kajjitōkin jet iaan ajri ro n̄an riiti Katak im Bujen Ko 131:1–4 im ro jet riiti 132:15. Jipan̄ er pukote ta eo eoon kein rej katakin kōn m̧are. Kālet naan ko jān 132:19 (āinwōt “eļan̄n̄e juon em̧m̧aan ej m̧areik juon kōrā pālele,” “jān bujen eo ekāāl,” “im ej sil,” “pen ilo bujen eo Aō,” “n̄an aolep indeeo,” im “indeeo im indeeo”), im kajjitōk ippān ajri ro n̄an pukot naan ko ilo eoon eo. Ta eo eoon kein rej katakin kōj kōn m̧are?

• Al “Families Can Be Together Forever” (Children’s Songbook, 188), ak etale “Jebta 55: Kanan ko kōn Mare” (Bwebwenato ko ilo Katak im Bujen Ko, 198). Kajjitōk ippān ajri ro n̄an ron̄jake im pojak n̄an kwaļo̧k ta jej aikuj kōm̧m̧ane bwe baam̧le ko ad ren indeeo. Kam̧ool bwe jekdo̧o̧n jekjek rot eo an baam̧le eo ad, jemaron̄ kepooj kōj make n̄an juon m̧ōttan baam̧le eo n̄an indeeo.

Kōketak Ekkatak ilo M̧weo

Karuwaineneik ajri ro n̄an ba n̄an baam̧le ko aer ewi jon̄an aer iakwe er im kōņaan ippān doon āinwōt juon baam̧le indeeo.

Kōkōm̧anm̧anļo̧k Ad Katakin

Kwon lale jekjek ko an baam̧le eo. “Ajri in raan kein rej pād ilo elōn̄ kain baam̧le ko im jekjek ko an baam̧le ko. … [Jej] aikuj in pukot ļo̧k [ro] rej ajimakeke, makeļo̧k, ak ro likin o̧ro̧r in” (Neil L. Andersen, “Jabdewōt Eo Enaaj Bōk Er, Ej Bōk Eō,” Ensign ak Kweilo̧k eo Eļap, Māe 2016, 49, 52).