“Oktoba 25–31. Katak im Bujen Ko 124–125: ‘Juon Em̧ ilo Eta,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Oktoba 25–31. Katak im Bujen Ko 124–125,” Itok, Ļoor Eō—N̄an Kajjojo Armej im Baam̧le ko: 2021
Nauvoo eo Eaiboojoj, jān Larry Winborg
Oktoba 25–31
Katak im Bujen Ko 124:15
“Juon Em̧ ilo Eta”
Ilo am̧ riiti Katak im Bujen Ko 124–25, kejo̧kļo̧kjeņ kōn kōjeraam̧m̧an ko me Irooj ekar karuwaineneik Armej ro Rekwojarjar n̄an būki im kōjeraam̧m̧an ko E ej lewaj n̄an eok.
Je En̄jake ko Rej Im̧we Eok
Jekdo̧o̧n n̄e iiō ko jiljino rem̧ootļo̧k rekar lukkuun pen n̄an Armej ro Rekwojarjar, men ko rekar jino em̧m̧anļo̧k ilo jibriin̄ eo ilo 1839: Armej ro Rekwojarjar me rejipo̧kwe rekar en̄jake tūriam̧o ilubwiljin armej ro ilo Quincy, Illinois. Riwaj ro rekar kōtļo̧k bwe Rikanaan Josep Smith im ritōl ro jet an Kabun̄ in ren ko jān kam̧akoko ilo Missouri. Im Kabun̄ in ej kab kar m̧ōj an wiaiki juon jikin ilo Illinois ijo Armej ro Rekwojarjar remaron̄ bar koba ippān doon ie. Aaet, ekar lukkuun epatpat e, jikin eobrak kōn ņam, ak keidi n̄an apan̄ ko me Armej ro Rekwojarjar rekar jelm̧aeiki, menin remaron̄ anjo̧ jāni. Kōn menin rekar joļo̧k dān ko jān pat ko im rekar je juon aer jemānāe n̄an jikin eo aer ekāāl, eo rekar ņa etan Nauvoo. Ej meļeļein “aiboojoj” ilo kajin Hibru, men̄e ekar ļap aer kōjerbal n̄an kwaļo̧k tōmak ijjeļo̧kin juon kōmeļeļe eo ejejjet, kar jinoin. Ejja wōt ilo iien in, Irooj ekar kajjieon̄ kōmeļeļeik Rikanaan eo An n̄an kōm̧akajļo̧k jerbal ko an. Ekar lōn̄ļo̧k m̧ool im kain̄i ko n̄an kōjepļaaki, im E ekar aikuji juon tampeļ ekwojarjar ijo Armej ro Rekwojarjar remaron̄ bōki. Ilo elōn̄ wāween ko, ejja en̄jake kein wōt kōn tōmak im kōmakajļo̧k in raorōk ilo jerbal eo an Irooj rainin.
Ilo an Nauvoo kar erom̧ juon jikin eaiboojoj kōn juon tampeļ eaiboojoj, jim̧or jikin kein rekar āliktata jojolāār. Ak jerbal eo an Irooj eaiboojoj tata, ippānļo̧k aolep, em̧ōj aer “kūrawūni kom̧ kōn utiej, mour ejjeļo̧k jem̧ļo̧kier, im mour indeeo” (Katak im Bujen Ko 124:55), im jerbal eo ekar jab bōjrak.
Lale Saints, 1:399–427; “Organizing the Church in Nauvoo,” Revelations in Context, 264–71.
Ļōm̧ņak ko n̄an Ekkatak Jeje Ko Rekwojarjar Ippam̧ Make
Imaron̄ erom̧ juon rikaļoor eo Irooj ej lōke.
Men̄e jet ritōl ro routiej rekar etal jān Kabun̄ in ilo jem̧ļo̧kin 1830 ko, eiten aolepān membōr ro rekar dāpdep wōt ilo tōmak. Armej rein Rekwojarjar ekoba ro me rekar niknik ilo jelm̧aeiki melijjon̄ ko ilo Missouri ro rej kab kar kobatok ilo Kabun̄ in. Ilo Katak im Bujen Ko 124:12–21, Irooj ekar ba men ko rem̧m̧an kōn jejjo iaer. Ta meļeļe ko kōn mour in rikaļoor eo kwoj lo ilo naan ko An? Elōn̄ ke jabdewōt men ko kōn Armej rein Rekwojarjar retiljek me rej im̧we eok n̄an erom̧ āinwōt er? Kwomaron̄ barāinwōt kejo̧kļo̧kjeņ kōn wāween an Irooj kwaļo̧k iakwe eo an n̄an kwe.
Katak im Bujen Ko 124:22–24, 60–61
Irooj ekōņaan bwe in karuwaineneik im m̧ōņōņō kōn ro jet.
Ļōmņak kōn ta eo Armej ro Rekwojarjar rekar en̄taan kaki ilo Missouri, remaron̄ kōņaan kattoļo̧k er im kabbweer e rilotok ro ilo Nauvoo. Likūt menin ilo kōļmenļo̧kjeņ ilo am̧ riiti Katak im Bujen Ko 124:22–24, 60–61. Ta eo ej im̧we eok kōn kōmeļeļe ko an Irooj n̄an kalōk juon “im̧ōn jikin kōppād”? (eoon 23). Ta eo naan ko An rej katakin eok kōn mijen eo an Kabun̄ eo An? Kejo̧kļo̧kjeņ ekōjkan an kōmeļeļe kein maron̄ jerbal n̄an kwe im m̧weo im̧ōm,
Barāinwōt lale the “A Friend to All,” Bitieo, ChurchofJesusChrist.org.
Katak im Bujen Ko 124:25–45, 55
Irooj ej kakien kōj n̄an kalōk tampeļ ko bwe jen maron̄ bōk kain̄i ko rekwojarjar.
Ilo m̧ool ekar jab juon men ekāāl n̄an Armej ro Rekwojarjar ke rekar jino amņak ilo Nauvoo, Irooj ekar leļo̧k n̄an er kōmeļeļe ko n̄an kalōk juon tampeļ—āinwōt E an kar kōm̧m̧ane ke rekar pād ilo Ohio im Missouri. Ta eo kwoj loe ilo Katak im Bujen Ko 124:25–45, 55 me ejipan̄ eok meļeļe etke Irooj ekar ba, “Armej ro aō iien otemjej jiron̄ er n̄an kalōke [tampeļ] n̄an Eta ekwojarjar”? (eoon 39).
Jān tōre eo Nauvoo Tampeļ ekar ekkal, elōn̄ļo̧k jān 200 tampeļ ko em̧ōj aer ekkaļ ak kar kōjeļļāik kaki. Būreejtōn Russell M. Nelson ekar katakin: “Jekar jeļā bwe iien ko am ilo tampeļ ekar lukkuun aorōk n̄an lo̧mo̧o̧r eo am im mour eo eutiejtata im n̄an aolepān baam̧le eo am. … rIkapo eo rej ļapļo̧k im ļapļo̧k, ilo kajoor im lōn̄ wāweer.Ad aikuj pād ilo tampeļ eo ilo kajjojo iien ej jan̄in kar ļapļo̧k. Ad aikuj pād ilo tampeļ eo ilo kajjojo iien ej jan̄in kar ļapļo̧k” (“Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” Ensign ak Liaona, No̧b. 2018, 114). Ekōjkan an tampeļ eo kar jipan̄ eok jelm̧ae “ankamājur ko an rinana eo”? Ta eo kwar en̄jake ej im̧we eok n̄an kōm̧m̧ane n̄an ļoor kapilōk eo an Būreejtōn Nelson?
Barāinwōt lale Church History Topics, “Nauvoo Temple,” ChurchofJesusChrist.org/study/church-history.
Josep Smith ilo Nauvoo Tampeļ, jān Gary E. Smith
Irooj ej ikdeleel n̄an letok kapilōk ko remālij n̄an mour eo aō.
Eoon ko 84–118 reobrak kōn kapilōk n̄an kajjojo armej, im jet iaer remaron̄ jab ilo kalimjōke aorōk n̄an mour eo am̧. Ak kwomaron̄ barāinwōt lo juon me kwoj aikuj ron̄. Ļōmņak in kajjitōk ippān Irooj ta enaan eo E ekar kōpooje n̄an eok ilo eoon kein, im kappukot tōl eo an Jetōb n̄an kappukote. Innem kālet ta eo kwonaaj kōm̧m̧ane n̄an jerbal ekkar n̄an e. N̄an waanjon̄ak, ekōjkan an ettā maron̄ jipan̄ eok n̄an bōk Jetōb (lale eoon 97).
Kwomaron̄ barāinwōt kejo̧kļo̧kjeņ kōn kapilōk ko jet me Irooj ekar lewaj n̄an eok. Ejet am jerbal ekkar n̄an kapilōk in?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 124:2–11.Eļan̄n̄e Irooj ekar ba n̄an baam̧le eo am̧ “n̄an kōm̧m̧ane juon kean̄ ekwojarjar kōn gospel eo Aō” n̄an “kiin̄ ro an laļ” (eoon ko 2–3), ta eo kean̄ eo am̧ enaaj kar ba? Ļōmņak n̄an ejaake juon ippān doon, im karuwaineneik ro uwaan baam̧le eo n̄an letok ļōmņak ko kōn m̧ool ko an gospel me rekōņaan kobaiktok.
-
Katak im Bujen Ko 124:15.Ta meļeļein n̄an m̧ool? Etke Irooj ej lukkuun kaorōk m̧ool? Ta waanjon̄ak ko an m̧ool me baam̧le eo am̧ em̧ōj an loe? (Barāinwōt loe N̄an Kōkajoorļo̧k Jodikdik ro, 19.)
-
Katak im Bujen Ko 124:28–29, 40–41, 55.Ta eo jej ekkatak jān eoon kein kōn unin an Irooj kakien kōj n̄an kalōk tampeļ ko? Baam̧le eo am̧ emaron̄ kōņaan jin̄n̄aik juon pija in juon tampeļ ak kalōk juon kōn birōk ko ak kein ekkal ko jet. Ilo am̧ kōm̧m̧ane, kwomaron̄ kōmeļeļeik etke kwoj kam̧m̧oolol kōnke ewōr ad tampeļ rainin im etke jej aikuj emakijkij ad kabun̄ jar ilowaan.
-
Katak im Bujen Ko 124:91–92.Baam̧le eo am̧ enaaj ke jeraam̧m̧an jān ekōnono in kōn kōjeraam̧m̧an an petriak? Ro uwaan baam̧le eo ro em̧ōj aer bōk kōjeraam̧m̧an an petriak remaron̄ kwaļo̧k en̄jake eo aer ilo aer bōk kōjeraam̧m̧an in im ekōjkan an kōjeraam̧m̧an er. Kwomaron̄ barāinwōt etale “Kōjeraam̧m̧an an Petriak” (Gospel Topics, topics.ChurchofJesusChrist.org).
N̄an ļōmņak ko reļļapļo̧k n̄an katakin ajri ro, lale laajrak in katak eo an wiik in ilo Itok, Ļoor Eō—N̄an Būraimere.
Al eo kar elmakote: “I Love to See the Temple,” Children’s Songbook, 95.
Ainikien ko an Jepļaaktok eo
Doulul eo an Kōrā ro
Uno jin̄n̄a in Doulul eo an Kōrā ro jān Paul Mann
Ilo 1842, ālkin an kar ejaake Doulul eo an Kōrā ilo Nauvoo, Illinois, Rikanaan Josep Smith ekar ba, “Kabun̄ in ejjan̄in kar jejjet an ejaake m̧ae iien doulul eo an kōrā ekar ejaak.”1 Eiten āinwōt ļo̧k, katak kōn Jepļaaktok eo an Kabun̄ eo an Irooj im priesthood eo An (lale Katak im Bujen Ko 107) ejjab dedeļo̧k m̧ae iien ekobatok katak kōn Doulul eo an Kōrā ro, eo me ej “juon jepļaaktok in jon̄ak ko etto” an kōrā rikaļoor ro an Jisōs Kraist.2
Eliza R. Snow ekar kōm̧m̧ane juon jerbal eo eaorōk ilo jepļaaktok eo. Ekar pād ke Doulul eo an Kōrā ekar jinointata ejaak im, āinwōt juon rijeje ilo jukjuk in pād eo, ekar je kobban kweilo̧k ko. Ekar kam̧ool jinointata bwe Doulul eo an Kōrā ekar ejaak “ālkin jon̄ak eo an priesthood.”3 Itulaļ rej naan ko an, kar je ilo iien an kar jerbal āinwōt juon Būreejtōn eo Eutiej an Doulul eo an Kōrā ro, n̄an jipan̄ sister ro meļeļe jerbal eo ekwojarjar im eaorōk kar jitōn̄e n̄an jiron̄ in bujen ro nejin Anij.
N̄an ekkatak eļapļo̧k kōn wāween an Doulul eo an Kōrā ro kar ejaak, lale Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Eliza R. Snow
“Men̄e etan [Doulul eo an Kōrā] emaron̄ et in raan kein, doulul eo ekar baj wōt jān etto. Kar karon̄ kōm jān [Josep Smith], bwe ejja doulul eo wōt ekar pād ilo kabun̄ eo etto, ej kwaļo̧k jet iaan kōkaļļe ko me repād ilo leta ko me kar jeik ilo Kallim̧ur Ekāāl, kōjerbal taitōļ in, ‘kōrā in kāālet’ [lale 2 Jon 1:1; Katak im Bujen Ko 25:3].
“En̄in ej juon doulul eo me ejjab maron̄ ejaak n̄e ejjeļo̧k Priesthood, ilo m̧ool ej bōk aolep mālim im kajoor jān priesthood eo. Ke Priesthood eo kar bōke jān laļ in, doulul in barāinwōt aolep men ko rekar ekkeijel ilo laajrak eo em̧ool an kabun̄ eo an Jisōs Kraist ioon laļ in, rekar jakoļo̧k. …
“Ke ikar pād ilo ejaak eo an ‘Female Relief Society of Nauvoo,’ … im barāinwōt iminene ko aō ilo doulul eo, bolen imaron̄ kwaļo̧k jet ļōmņak ko me enaaj jipan̄ jiron̄ ro ilo Zaion n̄an wōnm̧aanļo̧k ilo jerbal in eļap an aorōk, eo me eobrak kōn eddo ko rekāāl im rellōn̄. Eļan̄n̄e jabdewōt jiron̄ im m̧am̧a ro ilo Israel rej en̄jake ke rejjab maron̄ en̄jake im̧we ilo jekjek ko rej pād ie, renaaj kiiō loe iien ko rem̧m̧an n̄an kōjerbal maron̄ ko rem̧m̧an me elōn̄ ippāer. …
Doulul eo an Kōrā ekar ejaak ilo ruum̧ ilo ilōn̄ ilo M̧ōn Wia eo etan Red Brick.
“Eļan̄n̄e jabdewōt ej bwūlōn̄, Ta kōttōpar eo an Doulul eo an Kōrā etan Female Relief Society? Inaaj uwaak—n̄an kōm̧m̧an em̧m̧an—n̄an kōjerbal aolep maron̄ ko repād ippād n̄an kōm̧m̧ani men ko rem̧m̧an, ejjab wōt n̄an kōmeraik ro ri jeramōl ak n̄an lo̧mo̧o̧r jetōb ko. Kobain kijejeto enaaj kōm̧m̧an eļap tōprak jān tōprak in kijejeto an juon armej make. …
“N̄an jipan̄ ro ri jeramōl, Doulul eo etan Female Relief Society ekar wōr an bar jet jerbal n̄an kōm̧m̧an ijjeļo̧kin wōt kōmeraiki aikuj ko an armej ilo mour in kanniōk. Mōjņo ilo kōļmeņļo̧kjen im buromōj ilowa, rej aikuj jipan̄; im elōn̄ iien rej aikuj naan in jouj—jet naan in kapilōk, ak bolen idik pā kōn jouj im iakwe enaaj kōm̧m̧an eļapļo̧k em̧m̧an im kam̧m̧oolol ijjelo̧kin leļo̧k pāāk in gold. …
“Ke Armej ro Rekwojarjar rej koba ippān doon jān ijoko rettoļo̧k, ruwamājet n̄an doon, im pidodo aer jebwābwe kōn ro rej kajjieon̄ riabe armej, [Doulul] eo an Kōrā ej aikuj jipan̄ lale [er], im kwaļo̧k kadkadier n̄an doulul eo, eo me enaaj ukot im kōketak er, im eļaptata enaaj kōkajoorļo̧k er ilo tōmak eo an Gospel, im ilo kōm̧m̧ane, maron̄ erom̧ kein jerbal n̄an lo̧mo̧o̧ren elōn̄ armej.
“Enaaj aikuj elōn̄ bok ko n̄an kwaļo̧k meļeļein jerbal ko, iien ko rem̧m̧an im eddo ko me rej itok ilowaan wōt eddo eo an Doulul eo an Kōrā. … Kōm̧m̧ane jerbal eo an Doulul eo an Kōrā (ium̧win tōl eo an bisop), ilo kōmaanwa, kōttōpar, itok limo, ippān doon, im ilo jar, im Anij enaaj kōjeraam̧m̧an kijejeto eo am̧ kōn tōprak.4
Nauvoo Tampeļ eo jān George D. Durrant