Oktoba 4–10

Katak im Bujen Ko 111–114

“Inaaj Karōk Aolep Men Otemjeļo̧k n̄an Em̧m̧an eo Ami”

Jar im kajjitōk kōn tōl eo an Jetōb ilo am̧ riiti Katak im Bujen Ko 111–114, im je im̧we ko kwoj en̄jaki. Innem ļōmņaki wāween ko kwomaron̄ kōm̧m̧an ekkar n̄an im̧we ko.

Je En̄jake ko Rej Im̧we Eok

Em̧ōj ke am̧ kar en̄jake juon en̄jake ilo jetōb eo me ekar kōm̧m̧an bwe kwon peran im inem̧m̧an ilo tōmak eo am̧—ak en̄taan ko an mour in rekar kajjieon̄ idajon̄jon̄e tōmak eo am̧, im kwar lo bwe ekar pen am̧ bōk aeņōm̧m̧an eo kwar en̄jake m̧okta? Juon men me āinļo̧k wōt ekar waļo̧k n̄an Armej ro Rekwojarjar ilo Kirtland. Edikļo̧k jān juon iiō ālkin lutōkleplep eo an jetōb ekkeijel ippān aje eo an Kirtland Tampeļ, jorrāān im kakkure ko rekar waļo̧k. Juon iien ekar jabwe jāān, ejjeļo̧k bōro kuk ilo Doulul eo an Jon̄oulruo Rijilōk ro, im melejjon̄ ko jet rekar waļo̧k im jet rekar jino ebweer ilo tōmak ko aer.

Jejjab maron̄ kōjekdo̧o̧n mellejon̄ ko, kōn menin ekōjkan ad maron̄ dāpij er jān aer kaamijak tōmak ko ad im naan in kam̧ool ko ad? Bōlen m̧ōttan uwaak eo maron̄ loe ilo kapilōk eo an Irooj ilo Katak im Bujen Ko 112, kar letok ilo iien eo ekar ļap en̄taan ilo Kirtland. Irooj ekar ba, “karreoik būruōm̧ im̧aō” (eoon 28), “Jab jum̧ae” (eoon 15), “Mejmije laļūm̧ n̄an jerbal eo” (eoon 7), im “Kwōn kōttāik eok” (eoon 10). Ilo ad ļoor kapilōk in, Irooj enaaj “tōl [kōj] kōn peim” ilo iien apan̄ im oktak n̄an kōmour im aeņōm̧m̧an (lale eoon ko 10, 13).

Ļōm̧ņak ko n̄an Ekkatak Jeje Ko Rekwojarjar Ippam̧ Make

Katak im Bujen Ko 111

Irooj emaron̄ “karōki aolep men otemjeļo̧k n̄an em̧m̧an eo [am̧].”

Ilo 1836, Kabun̄ in ekar ļapļo̧k m̧uri ko an ilo an kōm̧m̧ane jerbal eo an Irooj. Ke Josep Smith im ro jet rekar inepata wōt kōn m̧ūri ko kein im kar ļōmņak kōn wāween ko n̄an kōļļāiki, rekar em̧akūt n̄an Salem, Massachusetts, bolen kōnke kar ron̄ nuiaļ ke jet jāān rekar ejerwawa ilo m̧weo ijeņ (lale heading eo an jekjen eo ilo Katak im Bujen Ko 111). Ālkin aer kar tōparļo̧k Salem, Irooj ekar ba, “Elōn̄ļo̧k menin aorōk ko jān juon n̄an kom̧ ilo jikin kweilo̧k in” (eoon 10)—men ko raorōk ekoba armej ro me E enaaj “aintok er ilo iien eo ekkar n̄an jeban eo an Zaion” (eoon 2; barāinwōt lale Exodus 19:5). Men̄e ejjeļo̧k jāān rekar loe ilo Salem, ro me rekar oktak tok kōn jerbal ko an mijinede ro kar tokālik ijeņ rekar m̧ōttan kakūrm̧ool in kallim̧ūr eo an Irooj.

Ilo am̧ riiti jekjen 111, ļōmņak kōn men ko me kwoj inepata kaki. Ļōmņak ekōjkan an naan ko an Irooj n̄an Josep maron̄ iookļo̧k mour eo am̧. Elmen an kar Irooj jipan̄ eok loi “mennin aorōk ko” me kar jab kōtmeni? (eoon 10). Ļōmņak kōn ta eo E eaar kōm̧m̧ane n̄an “karōk aolep men otemjeļo̧k n̄an em̧m̧an eo ami” (eoon 11). Ta eo naan in “iien eo wōt em̧ōkajtata kwomaron̄ bōki” ej katakin eok kōn Jemedwōj Ilan̄?

Barāinwōt lale Matu 6:19–21, 33; “More Treasures Than One,” Revelations in Context, 229–34.

Katak im Bujen Ko 112:3–15

Irooj enaaj tōl ro me rej kappukot Ankilaan ilo ettā.

Bōro kuk ilo Doulul eo an Jon̄oulruo ro ekar m̧ōjņoļo̧k ilo jam̧m̧ar ilo 1837. Rekar jab errā kōn eddo ko, im jet membōr rekar kōnono ņae Rikanaan Josep Smith. Thomas B. Marsh, tokālik Būreejtōn eo an Doulul eo an Jon̄oulruo ro, ekar inepata, im ekar itok jān Missouri n̄an Ohio, kappukot kapilōk jān Rikanaan eo. Brother Marsh ekar bōke ilo revelesōn eo epād ilo jekjen 112. Ekōjkan an kapilōk eo an Irooj maron̄ kar jipan̄ e im doulul eo an? Ta katak eo kwomaron̄ katak jān e ilo am̧ kappukot n̄an anjo̧ jān illu im ņūrbōktak.

Eļaptata, kwomaron̄ kejōkļo̧kjeņ kōn eoon 10. Ta meļeļein n̄an Irooj n̄an tōl eok “kōn pein”? Etke ettā emenin aikuj n̄an kain tōl rōt in?

Barāinwōt lale Ulisses Soares, “Erom̧ Inem̧m̧an im Ettā Bōro,” Ensign ak Liaona, No̧b. 2013, 9–11; “The Faith and Fall of Thomas Marsh,” Revelations in Context, 54–60.

Eļan̄n̄e kwoj ettā, Irooj enaaj tōl kōj im uwaaki jar ko ad.

Katak im Bujen Ko 113

Josep Smith ekar “juon rikarejar ilo pā ko pein Kraist.”

Aisea ekar kōnnaan kōn juon iaan ineen Jesse āinwōt juon “juļ” im juon “okar” (Aisea 11:1, 10). Ilo jekjen 113, Irooj ej kōmeļeļeik bwij in, juon rikarejaran Kraist, enaaj erom̧ kein jerbal ilo aintok armej ro an Irooj ilo raan ko āliktata (lale Katak im Bujen Ko 113:4, 6)—juon kanaan me ekar lukkuun kōmeļeļeik Rikanaan Josep Smith. Ekōjkan an menin im m̧ool ko jet ilo jekjen 113 kar lukkuun kōketak Armej ro Rekwojarjar ilo iien tarpok eo rekar jelm̧aeiki ilo Kirtland? Ta eo kwoj loe ilo revelesōn in me ej im̧we eok n̄an bōk koņaam̧ ilo jerbal eo an Irooj rainin?

Barāinwōt lale Unin Tōl eo n̄an Jeje ko Rekwojarjar, “Jesse,” scriptures.ChurchofJesusChrist.org; 2 Nipai 21:10–12; Josep Smith—Bwebwenato 1:40.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Katak im Bujen Ko 111:2, 9–11.Eoon kein remaron̄ jinoe juon kōmeļeļe kōn ta eo baam̧le eo am̧ ej kaorōke āinwōt “mennin aorōk ko” an mour indeeo. Kwomaron̄ kar ejaake iien kappukot mennin aorōk ilo am̧ kam̧m̧o̧o̧jji men ko ilo m̧weo me rej jutak kōn mennin aorōk ko an Irooj. Ilo an baam̧le eo am̧ kappukot kajjojo m̧weiūk ko, kōnono kake ta ko kwomaron̄ kōm̧m̧ani n̄an kwaļo̧k bwe kwoj kaorōki.

Katak im Bujen Ko 112:10.Elder Ulisses Soares ekar kōmeļeļeik armej ro rettā ilo wāween in: “Eo ettā ekipilie, kile jon̄an aer make ļo̧k ilo pein Anij im kōņaan n̄an erom doon n̄an An kilaan. Rittā rej aenōm̧m̧an im wōr kajoor n̄an kareel ro jet n̄an erom ejja āinwōt kōn aer kareel.” (“Erom̧ Inem̧m̧an im Ettā Bōro,” Ensign ak Liaona, No̧b. 2013, 10). Ļōmņak kōn wāween ko n̄an jipan̄ baam̧le eo am̧ meļeļe ta meļeļein n̄an ettā. Kwomaron̄ al juon al kōn ettā, āinwōt “Be Thou Humble” (Hymns, no. 130), ilo an juon uwaan baam̧le eo ej jibwe pein ro jet “kōn pein” im tōl er im jepooļe m̧weo im̧ōm̧. Ak kwaļo̧k en̄jake ko ke Irooj ekar tōl ro uwaan baam̧le eo am̧ “kōn pein” im kar leļo̧k “uwaak n̄an jar ko [aer].”

Katak im Bujen Ko 112:11–14, 26.Ta eo oktak eo ikōtaan jeļā etan juon armej im jeļā kōn er? Ta eo jej ekkatak jān eoon ko 11–14 kōn ta meļeļein n̄an jeļā kōn Irooj?

Katak im Bujen Ko 112:15.Ta meļeļein n̄an “jum̧ae” ņae rikanaan eo? Ta eo jej kappukote ilo eoon in me ej jipan̄ kōj kōņaan rejtake rikanaan eo?

Katak im Bujen Ko 113:7–8.Ta eo jej ekkatak jān eoon 8 me enaaj jipan̄ n̄an “bar bōktok Zaion” im lo̧mo̧o̧ren eo an Israel?

N̄an ļōmņak ko reļļapļo̧k n̄an katakin ajri ro, lale laajrak eo an wiik in ilo Itok, Ļoor Eō—N̄an Būraimere.

Al eo kar elmakote: “Be Thou Humble,” Hymns, no. 130.

Kōkm̧anm̧anļo̧k Ad Katakin

Mour kōn naan in kam̧ool eo am̧. “‘Kwon katakin ta eo kwoj mour kaki,’ Elder Neal A. Maxwell eaar katakin. ‘M̧wilim naaj ļapļo̧k kemeemeje … jān juon m̧ool ealikkar ilo juon katak ealikkar’” (Teaching in the Savior’s Way, 13).

Thomas B. Marsh ej rekoote revelesōn ko kar litok n̄an e kōn Josep Smith. Be Thou Humble, jān Julie Rogers.