“Jeptōm̧ba 27–Oktoba 3. Katak im Bujen Ko 109–110: ‘Ej Im̧ōm m̧wiin, juon Jikin Ekwojarjar eo Am̧,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Jeptōm̧ba 27–Oktoba 3. Katak im Bujen Ko 109–110,” Itok, Ļoor Eō—N̄an Kajjojo Armej im Baam̧le ko: 2021
Kirtland Tampeļ, jān Jon McNaughton
Jeptōm̧ba 27–Oktoba 3
Katak im Bujen Ko 109–110
“Ej Im̧ōm Mwiin, juon Jikin Ekwojarjar eo Am̧”
Kōnono kōn Katak im Bujen Ko 109:24–28, Elder David A. Bednar ekar ba, “Ij kūr kom̧ n̄an āliji ami ekkatak im kejōkļo̧kjeņ kake im jar kōn tōprak ko an eoon ko ilo mour eo am̧ im baam̧le eo am̧” (“Honorably Hold a Name and Standing,” Ensign ak Liahona, May 2009, 99). Ļōmņak kōn kūr in ilo am̧ ekkatak kake.
Je En̄jake ko Rej Im̧we Eok
Kōjem ko n̄an Kirtland Tampeļ rekar jab aikuj peļļo̧k m̧ae 8:00 ilo jibbon̄ in M̧aaj 27, 1836. Ak Armej ro Rekwojarjar rekar kōjatdikdik n̄an deļon̄e ilo iien kōjeraam̧m̧an eo me ekar jino ļain eo ke ekar jibbon̄ wōt 7:00. N̄e jikin jijjet ko im iaļan etetal ko rekar m̧ōkaj aer obrak kōn rikabun̄-jar ro, Josep Smith ekar leļo̧k ļōmņak in kōn juon jikin ekilepļo̧k. Ke jikin eo ekar bar obrak, rekar pepe kōn m̧wen̄an kein karuo. Im ekar jab ro remour wōt me rekar kijoroor in pād. Elōn̄ rikam̧ool ro rekar kam̧ool bwe rekar lo enjeļ ro, ilowaan tampeļ eo im barāinwōt ilo borowaj ko, ilo iien im ālkin aje eo. Lukkuun ilo m̧ool kar kalimjōke “ritariņae an lan̄” rekar itok im” al im [n̄an] lam̧ōj” ippān Armej ro Rekwojarjar (“Jitob An Anij,” Al ko, no. 20).
Etke ekar lukkun ļap ikūtōltōl—ilo jim̧or ilo jait ko an ran̄ōl eo? Kallim̧ur eo bwe Armej ro Rekwojarjar naaj kar “im̧wem̧we kōn kajoor jān ijo eutiej” ekar juon un rekar ippān doon n̄an Ohio ilo jikin eo jinoin (Katak im Bujen Ko 38:32). Im men ko reļļap rekar kallim̧ur ko n̄an ilju im jekļaj. “En̄in,” Irooj ekar ba, “ej jinoin kōjeraam̧m̧an eo me enaaj lukōtleplepļo̧k ioon bōran armej ro Aō” (Katak im Bujen Ko 110:10). Tōre in me jej mour ie—kōn jerbal in tampeļ im kain̄i ko rem̧ōkaj repojak n̄an milien armej ro remour im remej—kar ijjino ilo Kirtland, ke “ran̄ōl nuknuk eo me ej kalibubuik laļ in [ekar] jino waļo̧k” (“Jitob An Anij”).
Barāinwōt lale Saints, 1:232–41; “A House for Our God,” Revelations in Context, 169–72.
Ļōmņak ko n̄an Ekkatak Jeje Ko Rekwojarjar Ippam̧ Make
Irooj ekōņaan kōjeraam̧m̧an eō ilo m̧weo Im̧ōn ekwojarjar.
Ilo bar jet wāween, Kirtland Tampeļ ekar oktak jān tampeļ ko jejeļā kaki rainin. Ekar ejjeļo̧k lokatok im ekar ejjeļo̧k jikin peptaij, im kain̄i ko āinwōt peptaij n̄an ro remej im liāp rejjan̄in kar jepļaaktok. Ak kōjeraam̧m̧an ko kōmeļeļeiki ilo jekjōn 109, jar in aje eo n̄an Kirtland Tampeļ, rej kōjeraam̧m̧an ko jej bōki ilo m̧ōn Irooj rainin. Etale eoon kein rej elaajrak n̄an kappukot jet iaan kōjeraam̧m̧an kein. Ilo ad riit kōn eoon kein, kejōkļo̧kjeņ etke raorōk n̄an kwe im baam̧le eo am̧.
Eoon ko 5, 12–13 (barāinwōt lale Katak im Bujen Ko 110:6–8): Ilo tampeļ Irooj emaron̄ kwaļo̧k E make n̄an kōj im jemaron̄ en̄jake kajoor eo An.
Eoon ko 9, 17–19, 26, 78–79: Ilo tampeļ jej bōk iood make etan Irooj.
Eoon ko 22–23: N̄e jej kōm̧m̧an im kautiej bujen ko an tampeļ, Irooj ej letok n̄an kōj kajoor n̄an kōm̧m̧ane jerbal in An.
Eoon ko 24–33: N̄e jej deļon̄e tampeļ ilo erreo, jemaron̄ bōk kōjparok ko an Irooj.
Kōjeram̧m̧an ko jet:
Ta eo Jetōb ej im̧we eok n̄an kōm̧m̧ane n̄an bōk kōjeraam̧m̧an kein?
Jar in aje eo an Kirtland Tampeļ emaron̄ katakin eō kōn jar.
Jekjōn 109 ej juon jar in aje eo me kar leļo̧k n̄an Josep Smith ilo revelesōn (lale heading eo an jekjek eo) Ta eo kwoj ekkatak kake kōn jar jān jekjōn in? Ilo am̧ riiti, kwomaron̄ ļōmņak kōn jar ko am̧ make. Ta im̧we ko kwoj en̄jake me remaron̄ jipan̄ eok kōkm̧anm̧anļo̧k iaļan am̧ bōk meļeļe ippān Jemedwōj Ilan̄? N̄an waanjon̄ak, ta eo Rikanaan eo ekar jar kake ilo jar in?
Irooj emaron̄ kwaļo̧k E make n̄an n̄a ilo tampeļ eo.
Ta am̧ en̄jake kōn Rilo̧mo̧o̧r ālkin am̧ riiti Katak im Bujen Ko 110:1–10? Ekōjkan An kar kwaļo̧k E make n̄an kwe ilo tampeļ? Ilo wāween ta ko me E ej jipan̄ eok jeļā bwe E ej m̧ōņōņō kōn kijejeto im kaarmājet ko am̧?
Kajjojo jem̧ļo̧kin Kirtland Tampeļ ewōr lokatok n̄an ritōl ro an priesthood.
Kii ko an priesthood rekar aikuj n̄an kadedeikļo̧k jerbal eo an Anij repād ilo Kabun̄ in rainin.
N̄an meļeļe kōn kii ko an priesthood me Moses, Elias, im Elija rekar kallim̧ur kake n̄an Josep Smith im Oliver Cowdery ilo Kirtland Tampeļ, kwomaron̄ riiti enaan eo an Quentin L. Cook. “M̧aanjāppopo n̄an Iioon Anij” (Ensign ak Liaona, Māe 2018, 114–17). Elder Cook ekar kōmeļeļeik wāween an kii kein ekkeijel ippān jerbal eo an Kabun̄ in rainin. Kwomaron̄ barāinwōt ļōmņak n̄an ekkatak kōn rikanaan rein etto ilo am̧ katak “Moses,” “Elias,” im “Elijah” ilo Unin Tōl eo n̄an Jeje ko Rekwojarjar (scriptures.ChurchofJesusChrist.org). Kejōkļo̧kjeņ kōn ta eo kwomaron̄ kōm̧m̧ane n̄an jipan̄ ilo jerbal in me ej iookļo̧k kii kein.
Barāinwōt lale “Priesthood Keys,” True to the Faith, 126–27.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 109.Āinwōt juon baam̧le, kappukot jet eoon ilo jekjōn 109 me ej im̧we eok n̄an joļo̧k eļapļo̧k iien ko ilo tampeļ (n̄an waanjon̄ak, lale laajrak in eoon ko ium̧win “Ļōm̧ņak ko n̄an Ekkatak Jeje Ko Rekwojarjar Ippam̧ Make”). Kōnono kōn wāween am̧ maron̄ kōm̧m̧ane ta eo Būreejtōn Russell M. Nelson ekar ba: “Kappukot juon wāween n̄an kōm̧m̧an juon iien aolep iien ippān Irooj—n̄an pād ilo m̧weo Im̧ōn—innem dāpij wōt iien ņe ilo jejjetin im lan̄lōn̄” (“Erom̧ Riwaanjon̄ak ro rej Armej ro Rekwojarjar ilo Raan Ko Āliktata,” Ensign ak Liaona, No̧b. 2018, 114). Eļan̄n̄e kwe ak baam̧le eo am̧ rejjan̄in kar pād ilo tampeļ, kwomaron̄ loļo̧k temples.ChurchofJesusChrist.org n̄an jipan̄ kōpooj eok make n̄an etal n̄an tampeļ.
-
Katak im Bujen Ko 109:78–80.Al eo “Jitob An Anij” (Al ko, no. 20) kar je ilo iien aje eo an Kirtland Tampeļ—im rej al kake ilo aolep iien kōjeram̧m̧an ko an tampeļ ko jān tōre eo. Kwomaron̄ al kōn al in ippān doon im kappukot eoon ko me rej kōļapļo̧k am̧ kam̧oolol kōn tampeļ ko ilo raan kein āliktata. Ewi wāween an al in iookļo̧k enaan eo an Katak im Bujen Ko 109:78–80?
Kwomaron̄ kappukot jar in aje eo n̄an tampeļ eo epaake tata n̄an kwe ilo temples.ChurchofJesusChrist.org.
-
Katak im Bujen Ko 110.Ilo an ro uwaan baam̧le eo am̧ riiti jekjōn 110 im kappukot pija eo ilo jem̧ļo̧kin katak in, kūr er n̄an pijaikļo̧k wāween aer naaj en̄jake eļan̄n̄e rekar pād ippān Josep Smith im Oliver Cowdery ilo Kirtland Tampeļ. Leļo̧k etan baam̧le eo am̧ juon iien n̄an kwaļo̧k wāween aer en̄jake kōn Rilo̧mo̧o̧r.
-
Katak im Bujen Ko 110:15.Ta eo emaron̄ jipan̄ “ukōtļo̧k būruōn” ajri ro nejim n̄an ro jibūer im jim̧aer etto? Kwomaron̄ kappukot jet ļōmņak ko rekalimomo ilo FamilySearch.org/discovery. Kwomaron̄ jerbal ippān doon n̄an kakilen ro jibūd etto ro rej aikuj kain̄i ko an tampeļ im karōke n̄an kōm̧m̧an kain̄i kein ilo tampeļ. Kwomaron̄ bar kōnono kōn wāween an jerbal in kar jepļaaktok jān Elijah ilo Kirtland Tampeļ kōļapļo̧k iakwe eok am̧ n̄an ro jibūm̧ im jim̧aam̧.
Kōn ļōmņak ko reļļapļo̧k n̄an katakin ajri ro, lale laajrak eo an wiik in ilo Itok, Ļoor Eō—N̄an Būraimere.
Al eo kar elmakote: “Jitob An Anij,” Al ko, no. 20.
Ainikien ko an Jepļaaktok eo
Waļo̧k tok ko an Jetōb im Kirtland Tampeļ eo
Āinwōt juon Kijeek ej Uruur, jān Glen S. Hopkinson
Itulaļ rej naan ko an Armej ro Rekwojarjar ilo Raan-ko Āliktata ilo Kirtland Tampeļ ilo iien aje eo im iien kweilo̧k ko jet me tokālik. Elōn̄ rekar keidi en̄jake ko aer n̄an ta eo Armej ro Rekwojarjar eto rekar en̄jake ke rekar “tōr eo kajoor jān lan̄ ej im̧we kom̧” ilo raan eo an Pentecost (Luk 24:49; barāinwōt lale Jerbal 2:1–4; Katak im Bujen Ko 109:36–37).
Eliza R. Snow
“Iien jar eo ilo iien aje eo jemaron̄ bar kakemeemej kake ak ejjeļo̧k juon kajin ilo laļ in emaron̄ kōmeļeļeik waļo̧k tok eo an armej in lan̄ ilo raan eo jej emeemļo̧kjeņ kake. Enjeļ ro raar waļo̧k n̄an jet, ejja iien ņe wōt aolep ro raar pād raar en̄jake ke elōn̄ armej ro rekwojarjar raar waļo̧k, im bōro ko kajjojo raar obrak kōn ‘lan̄lōn̄ jon̄an reban kōmeļeļeiki im rekar obrak kōn aibojooj.’”1
Sylvia Cutler Webb
“Juon iaan men ko jinoin ikar aiin im bōki kar aje eo an Tampeļ eo. Jema ekar kajijjet kōm ilo neen im ba n̄an kōm etke kōm kar kōņaan etal im ta meļeļein n̄an aje juon em̧ n̄an Anij. Im men̄e ikar lukkuun dik ilo tōre eo, ij kemeemejļo̧k iien eo. Imaron̄ reilikļo̧k n̄an m̧akūtkūt ko remootļo̧k im lo āinwōt aō kalimjōk kar lo Josep Rikanaan eo, ej jutak ilo an kajutak pā ko pein ņa ilōn̄, turin mejān ekar lukkuun o, dānin kōmjaļaaļ ej toor laļļo̧k ioon jebān ilo an kōnono kōn raan eo jej kakemeemej. Eiten aolep rekar jino jan̄. Tampeļ eo ekar obrak kōn ajri im rekar kajijet ajri ro ilo neen rūtto raņ; sister eo aō ekar jijet ion jemān, n̄a ioon neen jinō. Imaron̄ barāinwōt kemeemej nuknuk ko ikar kaņōki. Kōļmenļo̧kjeņ eo aō ekar dik wōt ilo iien eo n̄an dāpij likio in aorōkin aolepān, ak ilo an kōkatkat wōt awa ekar ļapļo̧k im ļapļo̧k aō meļeļe, im eļap aō kam̧m̧oolol bwe ikar maron̄ jeraam̧m̧an n̄an ped ijo.”2
Oliver Cowdery
“Im joteen eo ikar ioon opija ro an Kabun̄ in ilo m̧weo im̧ōn Irooj. Jetōb ekar lutōkleplep—ikar lo aiboojoj eo an Anij, āinwōt juon kōdo̧ kileplep, walaļtak im jok ioon tampeļ, im kobrak ejja tampeļ eo wōt āinwōt kōto eo ekajoor em̧akroro. Ikar barāinwōt loe mennin letok eo kōn lo ko, bwe en lutōkleplep ioon elōn̄ armej, … ilo aer kōnono kōn kajin ko jet im kar kanaan.”3
Benjamin Brown
“Elōn̄ visōn ko [kar] loi. Juon armej ej lo juon kōdo̧ ej jok ioon tampeļ eo, meram in wōt āinwōt an aļ romaak ioon juon kōdo̧ āinwōt juon gold. Jet bar armej rekar lo jilu armej ro rej jutak imejatoto ilo ruum̧ eo kōn jet ki ko rejatōļtōļ ilo peier, im barāinwōt juon to aen rejatōļtōļ ilo peier.”4
Orson Pratt
“Anij ekar pād ijeņ, enjeļ ro an rekar pād, Jetōb Kwojarjar ekar pād ippān armej ro … im rekar obrak kōn jān bōraer n̄an adiin neer kōn kajoor im im̧we eo an Jetōb Kwojarjar.”5
Nancy Naomi Alexander Tracy
“[Ke] tampeļ eo ekar dedeļo̧k im kar aje … rekar ruo iaan raan ko rekam̧ōņōņō tata ilo mour eo aō. Al eo ekkar tata me kar kūne n̄an iien eo eaorōk kar ‘Jitob An Anij Ej Einwōt Kijeek.’ Ekar lukkuun m̧ool bwe kajoor jān lan̄ ekar jok ioon tampeļ eo. … Ikar en̄jake bwe tampeļ eo ekar āinwōt lan̄ ioon laļ.”6
Moses, Elias, im Elijah Rej Waļo̧k ilo Kirtland Temple, jān Gary E. Smith