Jikin Kalbuuj Carthage

Nobōm̧ba 22–28

Katak im Bujen Ko 135–136

E “Eaar Sili Mijen im Jerbal ko an kōn Bōtōktōkin Make”

Ilo am̧ ekkatak Katak im Bujen Ko 135–36, Irooj emaron̄ im̧we eok kōn ļōmņak ko n̄an jipan̄ eok mour kōn ta ko kwoj riiti. N̄e menin ewaļo̧k, je ta eo E ej katakin eok.

Je En̄jake ko Rej Im̧we Eok

Ālkin rāelep in Juun 27, 1844, kar bar kalbuuji Josep im Hyrum, ippāer tok ej John Taylor im Willard Richards. Rekar tōmak bwe ejjeļo̧k ruōer ilo jabdewōt jorrāān ko renana, ak rekar kōtļo̧k aer kalbuuji er, kōjatdikdik n̄an bōbrae jorrāān ņae Armej ro Rekwojarjar ilo Nauvoo. Menin ekar jab juon kōttan an rinana ro me rekar jum̧ae Kabun̄ in kalbuuji Rikanaan Josep ilo kalbuuj, ak ilo iien eo ekar jeļā ke renaaj m̧an e. E im ļōmaro m̧ōttan rekar kajjieon̄ kaeņōm̧m̧ane doon ilo aer kar riit jān Bok in Mormon im al al in jar ko. Innem rekar ron̄ ainikien bu, im ilowaan wōt minit ko jejjo Josep Smith im brother eo an Hyrum rekar mej.

Bōtaab ekar jab jem̧ļo̧k kōttōpar eo ekwojarjar me eto aer kaorōk e. Im ekar jab jem̧ļo̧k eo an Jepļaatok eo an gospel eo an Jisōs Kraist. Ekar lukkuun lōn̄ļo̧k jerbal n̄an kōm̧m̧ani im lōn̄ļo̧k revelesōn ko me renaaj tōl Kabun̄ in m̧aanļo̧k. M̧an Rikanaan eo ekar jab maron̄ kōbōjrak jerbal eo an Anij.

Lale Saints, 1:521–52.

Ļōmņak ko n̄an Ekkatak Jeje Ko Rekwojarjar Ippam̧ Make

Katak im Bujen Ko 135; 136:37–39

Josep im Hyrum Smith rekar liāpi naan in kam̧ool ko aero kōn bōtōktōkier.

Baj pijaikļo̧k wāween am̧ naaj kar en̄jake eļan̄n̄e kwon kar mour ilo Nauvoo ilo tōre eo rekar m̧an Josep im Hyrum (lale Saints, 1:554–55). Ewi wāween ad kajjieon̄ kappukot aorōkin m̧akūtkūt in ekaburomōjmōj.? Katak im Bujen Ko 135, ekar jinoin publish edikļo̧k jān jilu allōn̄ ko ālkin mej eo an Josep im Hyrum, emaron̄ kar jipan̄. Kwomaron̄ kōkaļleiki naan ko me remaron̄ kar lewaj meļeļe im kam̧ool n̄an eok. Ta eo kwon kar ba n̄an juon eo ej kajjitōk, “Etke Anij ejaam maron̄ kōtlo̧k aer kar m̧an Rikanaan eo An?”

Barāinwōt lale Katak im Bujen Ko 5:21–22; 6:29–30; “Remembering the Martyrdom,” Revelations in Context, 299–306; Teachings of Presidents of the Church: Joseph Smith, 522–23, 529–40.

Katak im Bujen Ko 135:3

Josep Smith ekar kōm̧m̧an eļapļo̧k ijello̧kin wōt Jisōs, n̄an lo̧mo̧o̧r eo ad.

Ļōmņak kōn kōjeraam̧m̧an ko em̧ōj am̧ bōki āinwōt juon membōr in Kabun̄ eo an Jisōs Kraist. Ewi jon̄an iaer rej tōprakin mijen eo me ekar dedeļo̧k ippān Rikanaan Josep Smith? Katak im Bujen Ko 135:3 ej kwaļo̧k jet iaan men ko reļļap Josep Smith ekar kōm̧m̧ane ilo 24 iiō ālkin wōt Visōn eo Kein Kajuon. Ewi wāween an men kein jelet eok im jemjerā eo am̧ ippān Jemedwōj Ilan̄ im Jisōs Kraist? Ļōmņak in je naan in kam̧ool eo am̧ kōn Rikanaan Josep Smith. Wōn eo emaron̄ aikuj in ron̄ naan in kam̧ool eo am̧?

Katak im Bujen Ko 136

Irooj ej letok n̄an eō kapilōk kōn iaļ in “ito-itak” ko aō ilo mour in.

Ālkin kar kam̧akūt er jān Nauvoo, Armej ro Rekwojarjar rekar jelm̧ae juon iaļ eaitok n̄an Salt Lake Valley, im jejjo bukwi m̧ael ko jinoin rekar lukkuun kattoto im kauwōtata. Brigham Young, eo me ekar kiiō tōl Kabun̄ in āinwōt Būreejtōn eo an Doulul eo an Jon̄oulruo Rijilōk ro, ekar inepata kōn wāween an Armej ro Rekwojarjar naaj mour ilo aolepān iaļan ito itak eo aer. Ekar ejaake juon jikin kōttar an jem̧ļo̧k an̄ōnean̄ etan Winter Quarter im jar n̄an Irooj jipan̄ ilo tōl. Ilo uwaak in jar eo an, Irooj ekar leļo̧k n̄an e revelesōn, kiiō epād ilo jekjōn 136. Ilubwiljin men ko jet, revelesōn in ekar kakemeemej Armej ro Rekwojarjar “bwe m̧wilier ilo iaļ eo aer en lukkuun aorōk āinwōt m̧wilier ilo mejen kajjik eo aer” im “ekar jipan̄ ukot em̧akūt eo n̄an turōk jān juon menin eaikuj ekaburomōjmōj n̄an juon iminene ilo jetōb” (“This Shall Be Our Covenant,” Revelations in Context, 308).

Dāpij meļeļein ilo kōļmenļo̧kjeņ ilo am̧ ekkatak jekjōn 136. Ta kapilōk eo me kwoj lo me emaron̄ jipan̄ eok ukot juon mālijjoñ eo epen ilo mour eo am̧ “n̄an juon iien aarōk … ilo jetōb”? Kwomaron̄ barāinwōt kejo̧kļo̧kjeņ kōn wāween an kapilōt in maron̄ jipan̄ eok kadedeikļo̧k ankilaan Irooj ilo mour eo am̧ make, āinwōt an kar jipan̄ Armej ro Rekwojarjar etto anjo̧ ilo iaļan ito-itak eo n̄an Turōk.

Barāinwōt lale “This Shall Be Our Covenant,” Revelations in Context, 307–14; Church History Topics, “Succession of Church Leadership,” ChurchofJesusChrist.org/study/history/topics.

Winter Quarters, jān Greg Olsen

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Katak im Bujen Ko 135:1, 3.N̄an jipan̄ ro uwaan baam̧le eo meļeļe ta meļeļein an Josep Smith “kar sili mijen eo an im jerbal ko an kōn bōtōktōkin make,” baam̧le eo am̧ emaron̄ kar alooje bitio in “Testimony of the Book of Mormon” (ChurchofJesusChrist.org; barāinwōt lale Jeffrey R. Holland, “Safety for the Soul,” Ensign or Liahona, Nov. 2009, 88–90). Ta ko raar im̧we kōj kōn waanjon̄ok eo an Nipai ilo eoon kein? Ewi wāween an maron̄ ļapļo̧k ad tiljek n̄an naan in kam̧ool ko ad, jekdo̧o̧n n̄e rejjab kajjitōk bwe jen mej kōn er?

Katak im Bujen Ko 135:3.N̄an kōmeļeļeik ta meļeļe naan in me Josep Smith ekar kōm̧m̧ane “eļapļo̧k, ijello̧kun wōt Jisōs, n̄an lo̧mo̧o̧r eo an armej ilo laļ in, jān bar jabdewōt armej, ļōmņak in etale ta eo baam̧le eo am̧ ekar ekkatak kōn Josep Smith ilo iiō in. Kwomaron̄ kōjerbal pija ko jān bok in n̄an jipan̄ er kemeemej ta eo rekar ekkatak im kūr er n̄an kwaļo̧k bwebwenato ko aer rem̧m̧an tata ak katakin ko. Etke jej kam̧m̧oolol kōn Rikanaan Josep Smith im kōn ta eo Irooj ekar kadedeikļo̧k ilo an kar kōjerbal e? Kwomaron̄ barāinwōt alooje bitio in “Joseph Smith: The Prophet of the Restoration” (ChurchofJesusChrist.org).

Katak im Bujen Ko 136.Ke Irooj ekar kwaļo̧k jekjōn 136, Armej ro Rekwojarjar ekar lukkuun aitok, im pen iaļ in ito-itak eo aer epād im̧aan, rekar pād ium̧win tōl eo an Brigham Young (lale jepta ko 58, 60, im 62 ilo Bwebwenato ko ilo Katak im Bujen Ko, 206–8, 211–16, 222–24). Ilo am̧ riit jekjōn 136 ippān doon, ļōmņak kōn men ko reppen me baam̧le eo am̧ remaron̄ kar aikuj jelm̧aeiki. Ta kapilōk eo me jej loe ilo revelesōn in me emaron̄ jipan̄ kōj bōk jipan̄ im kajoor an Irooj?

Katak im Bujen Ko 136:4.Ta meļeļein n̄an “etetal ilo aolep kain̄i ko an Irooj”? Ewi wāween an kain̄i ko me jej bōki jelōt mour ko ad kajjojo raan?

N̄an ļōmņak ko reļļapļo̧k n̄an katakin ajri ro, lale laajrak eo an wiik in ilo Itok, Ļoor Eō—N̄an Būraimere.

Al eo kar elmakote: “Jenaj Kautej Nōn Eman Eo,” Al, nō. 32.

Kōkōm̧anm̧anļo̧k Am̧ Ekkatak Ippem Make

Pukot iakwe eo an Anij. Būreejtōn M. Russell Ballard ekar katakin, “Gospel eo ej juon gospel in iakwe—iakwe n̄an Anij im iakwe n̄an doon” (“God’s Love for His Children,” Ensign, May 1988, 59). Ilo am̧ riiti jeje ko rekwojarjar, ļōmņak in je ak kakōļļeik kein kam̧ool ko kōn iakwe eo an Anij.

Ejjeļo̧k Yokwe Ippān Armej Eļap jān Yokwe in, jān Casey Childs