Josep ej lo jemān, jinen, im brother eo an ilo aelōn̄ selestial (Visōn eo an Josep Smith kōn aelōn̄ Selestial, Robert Barrett).

Nobōm̧ba 29–Tijem̧ba 5.

Katak im Bujen Ko 137–138

“Visōn eo kōn Lo̧mo̧o̧r eo an ro Remej”

Būreejtōn M. Russell Ballard ekar katakin: “ij kūr kom̧ n̄an lukkuun riiti im kejokļo̧kjeņ kake [Katak im Bujen Ko 138]. Ilo am̧ kōm̧m̧ane āindein, Irooj en kōjeraam̧m̧an eok kōn eļapļo̧k meļeļe im kam̧m̧oolol kōn iakwe eo an Anij im karōk in lo̧mo̧o̧r im m̧ōņōņō eo n̄an ro Nejin” (“Visōn eo kōn Lo̧mo̧o̧r eo an ro Remej,” Ensign ak Liaona, Nob. 2018, 73).

Je En̄jake ko Rej Im̧we Eok

Revelesōn ko kar je ilo Katak im Bujen Ko 137 im 138 rettoļo̧k kōttaer kōn elōn̄ļo̧k 80 iiō ko im 1,500 m̧ael ko. Jekjōn 137 Rikanaan Josep Smith ekar bōke ilo 1836 ilo Kirtland Tampeļ me ejjan̄in kar dedeļo̧k, im jekjōn 138 Josep F. Smith ekar bōke, kein kajiljino Būreejtōn an Kabun̄ in, ilo 1918 ilo Salt Lake City. Ak ilo katak ko, visōn kein ruo rej ekkeijel ippān doon. Rej jim̧or uwaaki kajjitōk ko kōn mejān kajjik eo an ajri ro nejin Anij ilo mour eo ej tok. Im jim̧or kakobaik meļeļe ko rem̧ūlaļ n̄e jej kile en̄jake ko an rikanaan ro rej bōki revelesōn kein.

Visōn eo an Josep Smith ekar jipan̄ e meļeļe kōn mejān kajjik eo an mour indeeo ippā brother eo an ejitōnbōro, Alvin, eo me ekar mej jiljino iiō ko m̧okta jān an kar jepļaaktok mālim eo n̄an peptaij. Kajjitōk ko kōn lo̧mo̧o̧r eo indeeo an Alvin eto an pād ilo ļōmņak eo an Josep. Visōn eo an Josep F. Smith ekar kwaļo̧k m̧ool ko reaibojooj kōn laļ eo an jetōb m̧ool juon revelesōn in kaeņōm̧m̧an n̄an juon armej eo me ekar būromōj kōn mej eo an elōn̄ ro uwaan baam̧le eo an me rejitōnbōro. Josep F. Smith ekar mej jemān, Hyrum Smith, ke ej 5 an iiō im jinen, Mary Fielding Smith, ke ej 13 an iiō. Ilo tōre eo an vison eo an ilo 1918, ekar būrom̧ōj kōn jako eo an ajri ro nejin 13.

Elōn̄ kajjitōk ko me armej rej kajjitōk kaki kōn mour eo ālkin mej rekar uwaak ilo revelesōn kein. Jekjōn 137 ekar letok jet meļeļe ko realikkar kōn kajjitōk kein, im jekjōn 138 ej letok meļeļe ko reļļapļo̧k. Ippān doon, rekar kam̧ool kōn “iakwe eo eļap im em̧m̧an kar kaalikkare jān Jemān im Nejin” (Katak im Bujen Ko 138:3).

Ļōmņak ko n̄an Ekkatak Jeje Ko Rekwojarjar Ippam̧ Make

Katak im Bujen Ko 137

Aolep jetōb renaaj wōr aer iien n̄an kālet aiboojoj eo an selestial.

Jeļāļo̧kjeņ eo me jejeļā kake ilubwiljin rikūriijtin ilo 1836 ekar bwe eļan̄n̄e juon armej ej mej ilo an jab peptaij—āinwōt brother eo an Josep Smith etan Alvin—armej eo eban deļo̧n̄e aelōn̄ in lan̄. Aaet Josep ekar loe Alvin ilo juon vison an aelōn̄ selestial. Ilo am̧ riiti jekjōn 137, kejōkļo̧kjeņ kōn ta eo kwoj ekkatak kōn Jemedwōj Ilan̄, karōk in lo̧mo̧o̧r eo An, im aelōn̄ selestial.

Barāinwōt lale Saints, 1:232–35.

Katak im Bujen Ko 138:1–11, 25–30

Riit im kejōkļo̧kjeņ kōn eoon kein ej kōpooj eō n̄an bōk revelesōn.

Jet iien revelesōn ej itok men̄e jejjab kappukote. Ak ekkā an, itok kōnke jej tiljek ilo kappukot im kōppopo n̄ane. Ilo am̧ riiti, Katak im Bujen Ko 138:1–11, 25–30, je ta eo Būreejtōn Josep F. Smith ekar kōm̧m̧ane bwe en em̧m̧anļo̧k an meļeļe kōn mijen in lo̧mo̧o̧r eo an Rilo̧mo̧o̧r. Innem ļōmņak kōn ekōjkan am̧ maron̄ ļoor waanjon̄ak eo an Būreejtōn Smith. N̄an waanjon̄ak, ta oktak ko kwomaron̄ kōm̧m̧ani n̄an kilen am̧ ekkatak jeje ko rekwojarjar n̄an kōtļo̧k bwe kwon “kōļmānļo̧kijeņ kōn jeje ko rekwōjarjar” im eļapļo̧k “kejōkļo̧kjeņ kōn katok in pinmuur eo eļap an [Rilo̧m̧o̧o̧r]”? (eoon ko 1–2).

Ilo ennaan eo an “Visōn eo kōn Lo̧mo̧o̧r eo an ro Remej” (Ensign ak Liaona, Nob. 2018, 71–74), Būreejtōn M. Russell Ballard ekar kwaļo̧k jet ļōmņak kōn wāween ko jet me Būreejtōn Smith ekar kōppopo n̄an bōk revelesōn in. Ļōmņak kōn ekōjkan am̧ kar kōppopo n̄an en̄jake ko kwoj en̄jaki ak naaj en̄jaki ilju im jekļaj.

Barāinwōt lale “Ministry of Joseph F. Smith: A Vision of the Redemption of the Dead,” video, ChurchofJesusChrist.org.

Joseph F. Smith, jān Albert E. Salzbrenner

Katak im Bujen Ko 138:25–60

Jerbal in lo̧mo̧o̧r ej bōk jikin ilo turājet ko ruo an ran̄ōl eo.

Būreejtōn Russell M. Nelson ekar katakin, “Ennaan eo ad n̄an laļ in epidodo im m̧ool: jej kūr aolep ro nejin Anij jim̧or ilo turājet ko an rōn̄ōļ eo n̄an itok n̄an Rilo̧mo̧o̧r eo aer, bōk kōjeraam̧m̧an ko an tampeļ eo, im kijenmej, bōnjān ko rem̧m̧an an mour indeeo.” (“Jen Wōnm̧aanļo̧k Wōt,” Ensign ak Liaona, Māe 2018, 118–19). Kejo̧kļo̧kjeņ kōn enaan in āinwōt am̧ riiti Katak im Bujen Ko 138:25–60. Kwomaron̄ barāinwōt ļōmņake kajjtōk kein:

• Ta eo kwoj ekkatak jān eoon kein kōn wāween an jerbal in lo̧mo̧o̧r dedeļo̧k ilo laļ eo an jetōb? Etke eaorōk n̄an eok n̄an jeļā bwe jerbal in ej bōk jikin? Ekōjkan an eoon kein kōkajoorļo̧k tōmak eo am̧ ilo Pinmuur eo an Rilo̧mo̧o̧r?

• Ta eo eoon kein rej katakin kōn ro rej bōk koņaer ilo jerbal in lo̧mo̧o̧r ilo laļ eo an jetōb? Etke eaorōk bwe jen meļeļe bwe jerbal in lo̧mo̧o̧r eo ej dedeļo̧k ilo turājet ko jim̧or ilo ran̄ōl eo?

Barāinwōt lale Dallin H. Oaks, “Lōke ilo Irooj,” Ensign ak Liaona, Nob. 2019, 26–29; “Susa Young Gates and the Vision of the Redemption of the Dead,” Revelations in Context, 315–22.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Katak im Bujen Ko 137:1–5.Karuwaineneik baam̧le eo am̧ n̄an jin̄n̄aiki ta eo rej ļōmņak kōn aelōn̄ selestial ej āinwōt pedped ioon eoon kein. Ta eo kwoj loe ilo eoon kein me ejipan̄ eok kijoroor n̄an mour ilo aelōn̄ selestial. Ta eo jej kōm̧m̧ane kiiō n̄an kōpooj kōj n̄an mour ilo aelōn̄ selestial ippān Jemedwōj Ilan̄ im Jisōs Kraist?

Katak im Bujen Ko 137:5–10.N̄an ekkatak kōn ta meļeļein ippān Josep Smith n̄an loe jejjo ro uwaan baam̧le eo an ippān doon ilo aelōn̄ selestial, baam̧le eo am̧ emaron̄ alooje bitio in “Ministry of Joseph Smith: Temples” (ChurchofJesusChrist.org). Bōlen kwomaron̄ barāinwōt kōnono kōn juon eo me kwojeļā ekar mej ilo an kar jab wōr iien n̄an an peptaij. Ta eo Katak im Bujen Ko 137:5–10 ej katakin kōj kōn armej eņ?

Katak im Bujen Ko 138:12–24.Ta eo Katak im Bujen Ko 138:12–24 ej katakin kōj kōn armej ro me Rilo̧mo̧o̧r ekar loļo̧k er ilo laļ eo an jetōb? Ta kōjeraam̧m̧an ko me rej bōki? Ta eo jej ekkatak jān waanjon̄ak ko aer?

Katak im Bujen Ko 138:38–55.Eoon kein rej kōmeļeļeik ro me Būreejtōn Joseph F. Smith ekar lo er ilo laļ eo an jetōb im kōmeļeļe ko rekadu kōn er. Bōlen baam̧le eo am̧ emaron̄ kōlaajraki etan ro jibūmi im jim̧m̧ami etto me repād ilo laļ eo an jetōb, ippān ļo̧k kōmeļeļe ko rekadu kōn mour ko aer.

N̄an ļōmņak ko reļļapļo̧k n̄an katakin ajri ro, lale laajrak in katak eo an wiik in ilo Itok, Ļoor Eō—N̄an Būraimere.

Al eo kar elmakote: “Search, Ponder, and Pray,” Children’s Songbook, 109.

Kōkm̧anm̧anļo̧k Ad Katakin

Kejōkļo̧kjeņ kōn jeje ko rekwojarjar. Būreejtōn David O. McKay kar likūt meditation “juon iaan … kōjem̧ ko eļap aer ekwojarjar eo me jej deļo̧n̄e n̄an im̧aan mejān Irooj” (Teachings of Presidents of the Church: David O. McKay [2003], 32).

Kar Kappe, jān Harold I. Hopkinson. Jisōs Kraist ekar kappeik jetōb ko rekwojarjar n̄an kwaļo̧k gospel eo ilo laļ eo an jetōb.