Lōke ilo Irooj
Ad pedped wōt ioon ej n̄an lōke ilo Irooj im iakwe eo An n̄an ajri ro Nejin.
Ro jeiū im jatū rejitōnbōro, juon leta ikar bōke jet iien remootļo̧k ej kwaļo̧k kadkad in kōnono eo aō. Rijeje eo ekar kōļmenļo̧kjeņ kōn juon m̧are in tampeļ n̄an juon em̧m̧aan eo me eo m̧ōttōn indeeo ekar mej. Liin enaaj kar kōrā eo pāleen kein karuo. Liin ekar kajjitōk kajjitōk in: enaaj ke maron̄ wōr make m̧ōn ilo mour eo juon, ak enaaj ke kar mour ippān ļeo pāleen im kōrā eo pāleen kein kajuon? Ij kab ba n̄an e bwe en lōke ilo Irooj.
Ij wōnm̧aanļo̧k kōn juon en̄jake ikar ron̄ jān juon m̧ōtta ij kaorōke, eo im ij kwaļo̧k menin kōn mālim eo an. Ālkin mej eo an kōrā eo pāleen ejitōnbōro im jinen ajri ro nejin, em̧m̧aan in ekar bar m̧are. Jet iaan ajri ro nejū rerūtto rekar bōbrae aō bar eo im pukot naan in kapilōk jān juon nukier eo ekar juon ritōl an Kabun̄ in im eļap kautieje. Ālkin ron̄jake unin bōbrae ko aer, eo ekar pedped wōt ioon jekjek ko im kadkad ko ilo laļ eo an jetōb ak ilo aiboojoj an laļ ko me renej itok ālkin Ekajet eo Āliktata, ritōl in ekar ba: “Kom̧ij inepata kōn men ko rebōd. Kom̧ij aikuj in inepata kōn eļan̄n̄e kom̧ naaj tōpar jikin ko. Ļōmņak kōn men jab eo. Eļan̄n̄e kom̧ij tōpar ijeņ, men otemjej naaj lukkuun em̧m̧anļo̧k jān jon̄an ami maron̄ ļōmņak.”
Ej juon katak ekaenōm̧m̧an! Lōke ilo Irooj
Jān leta ko ikar būki, ijeļā bwe ro jet rej jab meļeļe kōn kajjitōk ko kōn laļ eo an jetōb jenaaj mour ie ālkin ad mej im m̧okta jān ad jerkakpeje. Jet rej antoone bwe laļ eo an jetōb enaaj wōnm̧aanļo̧k kōn elōn̄ jekjek ko an kanniōk im jekjek kein jej jelm̧ai ilo mour in kanniōk in. Ta eo jej lukkuun jeļā kōn jekjek ko ilo laļ eo an jetōb? Ij tōmak bwebwenato an rūkatakin kōn kabun̄ eo an BYU kōn unin kōnono in ewōr an jim̧we: “N̄e jej kajjitōk ippād make kōn ta eo jejeļā kōn laļ eo an jetōb jān jeje ko rekwojarjar, uwaak eo ej “ejjab ļap āinwōt an em̧akijkij ad ļōmņak.”1
Aaet, jejeļā jān jeje ko rekwojarjar bwe ālkin an ānbwinnid mej jej wōnm̧aanļo̧k wōt im mour āinwōt jetōb ko ilo laļ eo an jetōb. Jeje ko rekwojarjar rej barāinwōt katakin bwe laļ eo an jetōb ej ajej ikōtaan ro me raar “jim̧we” ak “jejjet” ilo mour in im ro rekar nana. Rej barāinwōt kōmeļeļeiki wāween an jetōb ko retiljek katakin gospel eo n̄an ro rekar nana ak kiplia (lale 1 Pter 3:19; Katak im Bujen Ko 138:19–20, 29, 32, 37). Eo eļaptata, revelesōn ko rekāāl rej kwaļo̧k bwe jerbal in lo̧mo̧o̧r ej wōnm̧aanļo̧k wōt ilo laļ eo an jetōb (lale Katak im Bujen Ko 138:30–34, 580 im men̄e jej bōk rōjan̄ n̄an jab to̧rto̧re m̧aanļo̧k iien ukweļo̧k eo ad ilo mour in (lale Alma 13:27), jej ekkatak bwe jet ukweļo̧k maron̄ ilo ijeņ (lale Katak im Bujen Ko 138:58).
Jerbal in Lo̧mo̧o̧r eo ilo laļ eo an jetōb ekitbuuj an kanemkwoj jetōb ko jān ta eo im jeje ko rekwojarjar emakijkij an kōmeļeļeiki āinwōt “kōm̧akoko.” Aolep ro ilo laļ eo an jetōb rej pād ium̧win juon jekjek in kōm̧akoko Būreejtōn Joseph F. Smith revelesōn eo an eļap, eo ekar erom jeje ko rekwojarjar ilo jākjen 138 in Katak im Bujen Ko, ej kwaļo̧k bwe rimej ro rewānōk, ro rekar pād ilo juon mejatoto in “aenōm̧m̧an” (Katak im Bujen Ko 138:22) ilo aer kar kōtmāne Jerkakpeje eo (lale Katak im Bujen ko 138:16.), “rekar watōke jon̄an aetokan jako eo an jetōb ko aer jān ānbwinnier āinwōt juon lokjak”Katak im Bujen ko 138:50).
Ro renana rej barāinwōt en̄taan kōn bar juon damoļo̧k in kōm̧akoko. Kōnke jerawiwi ko rejjan̄in ukweļo̧k jāni, rej pād ilo ta eo Rijilōk Paul ej kōnono kake āinwōt “kalbuuj” an jetōb (1 Piter 3:19bar lale Katak im Bujen Ko 138:42 Jetōb kein kōmeļeļeiki er āinwōt “lokjak” ak āinwōt “rikalbuuj” (Katak im Bujen ko 138:31, 42) ak āinwōt “joļo̧k er ilo kapin marok” ippān “jan̄, im lim̧ō, im n̄i ļaļļaļ” ilo aer kōttar jerkakpeje im ekajet (Alma 40:13–14)
Jerkakpeje eo n̄an aolep ilo laļ eo an jetōb ej kam̧ool jān Jerkakpeje eo an Jisōs Kraist (lale 1 Korint 15:22), men̄e ej waļo̧k ilo iien ko roktak n̄an kūrub in armej ro roktak. M̧ae i iien eo em̧ōj karōke, ta eo jeje ko rekwojarjar rej jiron̄ kōj kōn m̧akūtkūt eo ilo laļ eo an jetōb ej kōn jerbal in Lo̧mo̧o̧r eo. Jidik men ej bar waļo̧k. Gospel eo kwaļo̧k kake n̄an ro rejajeļo̧kjeņ, ro rejjan̄in ukweļo̧k, im rinana ro bwe ren maron̄ anemkwoj jān kalbuuj im wōnm̧aanļo̧k n̄an kōjeraam̧m̧an ko an Jemedwōj Ilan̄ ej iakwe ekar kakuņi n̄an kōj.
Kōm̧akoko eo an laļ eo an jetōb im ej kōm̧m̧an n̄an jetōb ko rej rioktak tok ro rewānōk ej aikuj eo aer in n̄an kōttar—im bōlen aaet kōtļo̧k iien n̄an kōm̧ōkaje—kōm̧m̧an ko an kain̄i ko aer ilo jerbal kōn er ioon laļ in bwe ren maron̄ peptaij im lan̄lōn̄ kōn kōjeraam̧m̧an ko an Jetōb Kwojarjar (lale Katak im Bujen Ko 138:30–37, 57–58).2 Kain̄i kein jerbali n̄an ro remej ilo mour rej barāinwōt kōkajoor er n̄an wōnm̧aanļo̧k wōt ium̧win mālim eo an priesthood eo n̄an kōļapļo̧k wūj an ro rewānōk ro remaron̄ kwaļo̧k gospel eo n̄an ro ilo kalbuuj ilo laļ eo an jetōb.
Ijjelo̧kin pedped in katak kein, katak ko ilo jeje ko rekwojarjar rej letok jidik wōt meļeļe ko kōn laļ eo an jetōb eo ej itok ālkin mej im m̧okta jān Ekajet eo Āliktata.3 Kōn menin ta ko jet jejeļā kōn laļ eo an jetōb? Elōn̄ ro uwaan Kabun̄ in rekar elolo visōn ko ak im̧we ko jet rej kwaļo̧k n̄an er wāween an men ko jerbal ak ejaak ilo laļ eo an jetōb, ak en̄jake kein aer make ilo jetōb jab maron̄ meļeļe kaki ak katakin āinwōt lukkuun katak ko an Kabun̄ in. Im, aaet, ewōr ron̄ luiaļ ko rellōn̄ jān membōr ro im ro jet ilo bok ko em̧ōj jeiki āinwōt bok ko kōn en̄jake ko kōn mej.4
Āinwōt n̄an men kein aolep, kakkōl eo em̧m̧an jān Elder D. Todd Christofferson im Neil L. Andersen ilo ennaan ko m̧oktaļo̧k ilo kweiļo̧k eo eļap rej aorōk n̄an keememeji. Elder Christofferson ekar katakin: “Aikuj in keememej bwe ejjab aolep ennaan ko litok jān juon ritōl an Kabun̄ in, m̧okta ak kiiō, aikuj in m̧ōttan katak ko. Ekkā ad meļeļe ilo Kabun̄ in bwe juon ennaan letok jān juon ritōl ilo juon iien make emakijkij an bōk jikin juon ļōmņak em̧m̧an an juon make ejjab meļeļe in ej erom̧ juon ennaan m̧weien ak pen n̄an aolepān Kabun̄ in.”5
Ilo kweilo̧k eo eļap tokālik, Elder Andersen ekar katakin pedped in: “Katak ko rej katakin jān aolep 15 ro uwaan Būreejtōnji eo Kein Kajuon im Doulul eo an Jon̄oulruo ro Rijilōk ro. Ejjab ņojak ilo juon pārokūrāāp ejalikkar an juon kōnono.”6 Naan in kean̄ eo an baam̧le, ekar jain jān aolep 15 rikanaan ro, rilolo ro, im rikwaļo̧k revelesōn ro, ej juon kōmeļeļe eo em̧m̧an an pedped in katak in.
Ijjelo̧kin bar juon men āinwōt naan in kean̄eo an baam̧le, katak in kanaan ko jān Būreejtōn ro an Kabun̄ in, rej kapini jān rikanaan ro jet im rijilōk ro jet, rej barāinwōt juon waanjon̄ak an menin. Āinwōt n̄an jekjek ko ilo laļ eo an jetōb, Rikanaan Josep Smith ekar letok ruo katak ko ilo jem̧ļo̧kin iien jerbal eo an im emakijkij an ro tokālkin katakin. Juon iaan katak ko an ilo kwaļo̧k eo an ilo King Follett bwe ro uwaan baam̧le eo me raar jim̧we naaj ippān doon ilo laļ eo an jetōb ko.7 Bar juon ennaan ilo kar juon iien kallib ilo iiō eo āliktata in an kar mour: “Jetōb ko an kajjojo armej rej wanlōn̄ļo̧k n̄an jerbal eo eļapļo̧k im aiboojojļo̧k … [ilo] laļ eo an jetōb ko. … Er rejjab ettoļo̧k jān kōj, im jeļā im meļeļe ļōmņak ko ad, en̄jake ko, im kōm̧m̧an ko, im rej emakijkij aer pen kōn wōt er.”8
Kōn menin, ak kiiō kajjitōk eo ikar kwaļo̧k m̧oktaļo̧k im ia eo jetōb ko rej mour ie? Eļan̄n̄e kajjitōk in einwōt kōjak ak jejtokjen n̄an eok, ļōmņak kōn kajjitōk ko am̧ make rellōn̄, ak aaet kar mālijjon̄e eok kaki n̄an uwaaki kōn jet men ko kwaar ron̄ jān bar juon armej jet iien remootļo̧k. Kōn aolep kajjitōk ko kōn laļ eo an jetōb, ij lewaj ruo uwaak ko. Juon, keememej bwe Anij ej iakwe ajri ro Nejin im em̧ool Enaaj kōm̧m̧ane ta eo em̧m̧antata n̄an kōj. Ruo, keememej katakin jān Baibōļ eo kōj wōj jeļā kake, eo ekar ļap an jipan̄ eō ilo tōroro in kajjitōk ko ijjan̄in uwaaki:
“Kwōn lōke Irooj kōn aolepen būruōm̧; im kwōn jab atartar ioon jeļāļo̧kjeņ ko am̧.
“Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.” (Jabōn Kōnnaan Ko 3:5–6
Āinļo̧k wōt, Nipai ekar kōjem̧ļo̧k al eo an eļap kōn naan kein, “O Irooj, iaar likūt aō lōke ilo Kwe, im inaaj lōke Kwe indeeo.” Ij jamin likūt aō lōke ioon pein kanniōk.” (2 Nipai 4:34).
Kōj aolep jemaron̄ kōļmenļo̧kjeņ ippād make kōn jekjek ko ilo laļ eo an jetōb ak aaet ekōnono kōn men kein ak kajjitōk ko jet rejjan̄in uwaak ilo baam̧le ak ilo jekjek ko jet an ro m̧ōttad. Ak jen jab katakin ak kōjerbale āinwōt lukkuun katak ko an Kabun̄ in ko me rejjab tōpar jon̄ak ko an lukkuun katak ko an Kabun̄ in. N̄an kōm̧m̧an āindeineban kōwōnm̧aanļo̧k jerbal eo an Irooj im bōlen maron̄ kabweer kajjojo jān aer pukot aenōm̧m̧an eo aer make ak kajim̧we jān revelesōn ko ad make Irooj ej karōk in litok n̄an kōj kajjojo. An ļap ad pedped wōt ioon katak ko ad make ak elmakot ko me remaron̄ kattoļo̧k kōj jān ekkatak im kijejeto ko me renaaj kōļapļo̧k ad meļeļe im jipan̄ kōj wōnm̧aanļo̧k ilo iaļ in bujen eo.
Lōke ilo Irooj ej juon katak jeļā im em̧ool ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ekar katak eo an Josep Smith ke Armej ro Rekwojarjar m̧okta rekar jelm̧ae eļap kakkure im apan̄ ko reppen.9 En̄in ej pedped in katak eo em̧m̧antata jemaron̄ kōjerbale n̄e kijejeto ko ad n̄an ekkatak ak kajjieon̄ ko ad n̄an pukot aenōm̧m̧an rej ioon apan̄ ko ilo jekjek kein rejjan̄in waļo̧ktok ak jab kōjerbali āinwōt lukkuun katak ko an Kabun̄ in.
Ejja pedped in katak kein wōt rej jerbal n̄an kajjitōk ko ejjeļo̧k uwaakier kōn liāp ko ilo mour eo tok juon ak kōņaan kōm̧m̧an oktak ko kōnke m̧akūtkūt ko ak bōd ko reļļap ilo mour in. Eļap ijo jejjab jeļā kaki im bwe ad pedped wōt ioon ej n̄an lōke ilo Irooj im iakwe eo An n̄an ajri ro Nejin.
Ilo kōjem̧ļo̧ke, ta eo jejeļā kōn laļ eo an jetōb ej bwe Jemād im jerbal in lo̧mo̧o̧r eo an Nejin rej wōnm̧aanļo̧k wōt ijōņ. Rilo̧mo̧o̧r eo ad ekar jinoe jerbal in kwaļo̧k anemkwoj n̄an rikōm̧akoko ro (lale 1 Piter 3:18–19; 4:6; Katak im Bujen Ko 138:6–11, 18–21, 28–37), im bwe jerbal eo ej wōnm̧aanļo̧k āinwōt rikwoj meļan ro rereeo im ekkar rej wōnm̧aanļo̧k im kwaļo̧k gospel eo, ekoba ukweļo̧k, n̄an ro rej aikuji karreo eo an (lale Katak im Bujen Ko 138:57). Jibadbad eo an aolepān menin ej kōmeļeļeiki ilo lukkuun katak ko an Kabun̄ in, kar letok ilo revelesōn ko raan kein.
“Ro remej im rej ukeļo̧k renaaj bōk lo̧mo̧o̧r, kōn pokake n̄an kain̄i ko an m̧weo im̧ōn Anij,
“Im ālikin aer kar kōļļāiki bakkiin̄ in bōd ko aer, im kar kwaļ er erreo, renaaj bōk juon wōņāān ekkar n̄an jerbal ko aer, bwe er rej rijolōte lo̧mo̧o̧r” (Katak im Bujen Ko 138:58–59).
Eddo eo adwōj kajjojo ej n̄an katakin katak ko an jepļaaktok eo an gospel eo, kōjparok kien ko, iakwe im jipan̄ bar juon, im kōm̧m̧ane jerbal in lo̧mo̧o̧r eo ilo tampeļ ko rekwojarjar.
Ij kam̧ool kōn m̧ool in an ta ko ikar ba ijin im kōn m̧ool ko kar katakin im maron̄ katakin ilo kweilo̧k in eļap. Menin ej pidodo n̄an aolep kōnke Pinmuur eo an Jisōs Kraist. Ilo ad jeļā jān revelesōn ko raan kein, E “ej kaiboojoj Jemān, im kōjparok aolep jerbal ko an Pein” (Katak im Bujen Ko 76:43; eoon eo eaorōk kar kobaiktok). Ilo etan Jisōs Kraist, amen.