Kom̧in Ekkōl im Jar Iien Otemjej (Alma 34:39; Moronai 6:4; Luk 21:36)
Lukkuun mejmej karuo ej wōr tokjen n̄an jutak ņae aepādpād im pādwaan.
Ij jar kōn bōro em̧ool kōn jipan̄ eo an Jetōb Kwojarjar n̄an kom̧ im n̄a ilo ad m̧ōņōņō im kabun̄jar ippān doon.
Ilo Eprōļ 1976, Elder Boyd K. Packer eaar kōnono eļaptata n̄an jodikdik ro an Kabun̄ in ilo kweilo̧k eo eļap. Ilo taitōļ in ennaan eo an “Jetōbin Aļkita,” eaar kōmeļeļeik ilo juon eaar kōm̧m̧an jerbal in ijjitōn eo an ilo Africa ijo eaar alooje an aļkita ko anaan tok kijeer. Innām eaar keidi aļkita ko n̄an Setan, eo ej kakijene jodikdik ro n̄an tōlļo̧k er n̄an jerawiwi.
Ekar 23 aō iiō ke Elder Packer eaar kwaļo̧k katak in, Susan im n̄a kom̧ro kar pojak in neji, m̧aanje eo nejum̧ro jejjo̧ wōt raan. Kom̧ro kar ilbōk kōn naan in katak eo an n̄an bōbrae jerawiwi im wāween kapeel eo eaar kōjerbale kōn piktokin in mennin mour ko n̄an kwaļo̧k juon jetōbin katak eaorōk.
Kom̧ro Susan eaar etal n̄an Africa n̄an kōm̧m̧an jerbal in ijjitōne ko. Im ekar wōr am̧ro iien em̧m̧an n̄an alooje mennin mour ko raiboojoj me rej jokwe ilo laļ en. Keememej katak eo an Elder Packer ilo mour ko am̧ro, kom̧ro eaar kajjieon̄ etale im ekkatak katak ko jān piktokin im menin mour in Africa.
Ikōņaan kōmeļeļeik m̧wilin im kadkadin cheetah ko ruo me Susan im n̄a kar alooje aer kakijen kijeer im keidi jet iaan men ko jej loi ilo kajjojo mour ilo gospel eo an Jisōs Kraist.
Cheetah im Topi ko
Cheetah ko rej mennin mour ko rem̧ōkajtata ioon laļ in im jon̄an aer m̧ōkaj āinwōt 75 mita juon awa (120 kilomita/juon awa). Mennin mour kein reaiboojoj em̧ōkaj aer oktak jen jikier im ettōr m̧ōkaj āinwōt 68 mita juon awa (109 kilomita/juon awa) edikļo̧k jen jilu jekōn. Cheetah ko rej rikakijen ro me rej ajjādikik ilo aer kakijen kijeer im ettōr kadu n̄an kōpļe im m̧ane.
Susan im n̄a kar joļo̧k enan̄in ruo awa im alooje an cheetah kein ruo apāde jarlepju in topi ko, menin mour ko rej make wōt ilo Africa ippān ļo̧k antelope ko. Ujooj m̧ōrā ko raetok, ilo Africa savanna rekar aiboojoj im aaet rekar pinej rikakijen ro ilo aer jibadōkļo̧k jarlepju in topi ko. Cheeta ko rekar ejjeplōklōk jen doon emaron̄ 100 iaat (91 mita) ak raar jerbal ippān doon ilo iien kakijen.
Ilo an juon cheetah jijet im kankan ilo ujooj ko im jab m̧akūtkūt, cheetah eo juon ej tabōļbōļ dikdik ioon laļ im ajjādikdik ļo̧k n̄an topi ko. Innām cheetah eo me eaar jijet ejako jen ujooj eo ilo ejja iien eo wōt me cheetah eo juon ej jijet. Ilo jekjek in an cheetah eo juon tabōļbōļ dikdik im tabōļ m̧aanļo̧k ilo an cheetah eo juon to an jijet ioon ujooj eo. Jekjek in jibadbad eo ej n̄an kakkure im m̧ōņe topi ko im kōm̧ad er jān aer lo menin kauwōtata repaaki. Kijenmej im pād wōt, cheetah kein ruo raar jerbal ippān doon n̄an kōjparok nej m̧ōn̄ā eo kijeer.
Jutak kōtaan jarlepju in topi ko im an jādetok cheetah ko me rōrūtto im topi ko rekajoor raar jutak āinwōt ruwaj ioon to̧l eo. N̄an reilo̧k n̄an ujooj ko jān to̧l ko reddik n̄an kōjparok topi kein n̄an leļo̧k kōkkaļļe ko rekauwōtata.
Innām, ilo iien eo wōt cheetah ko rej jādetok jen ettoļo̧k, aolepen topi ko rej oktakļo̧k im ko. Ijjab jeļā eļan̄n̄e ak elmen an topi kein kōnono n̄an jarlepju in eļap, ak bōlen kar leļo̧k juon kakkōļ, im aolep topi ko raar etal n̄an juon jikin kone.
Im ta eo tokālik cheetah ko rej kōm̧m̧ane? Ilo jab karum̧wijļo̧k, cheetah kein ruo raar bar ajjādikdik im tabōl m̧aanļo̧k ilo an cheetah eo juon jijet im kankan ioon ujooj ko. Jekjek in ej etal wōt. Raar jab bōjrak. Raar jab kakkije ak bōjrak. Raar jab m̧ōk in ļoor jekjek in n̄an kakkure im lukwōrkwōr. Susan im n̄a kar alooje an Cheetah kein jako ļo̧k, aolep iien raar epaake im bar epaake ļo̧k kurup in topi ko.
Joteen eo Susan im n̄a kom̧ro kar bwebwenato juon bwebwenato me ban meļo̧kļo̧k kōn ta eo kom̧ro eaar loe im ekkatak. Kom̧ro eaar bar kōnono kōn en̄jake in ippān ajri ro nejūm̧ im jibum̧ im kar kalikkar elōn̄ katak ko raorōk. Kiiō inaaj kōmeļeļeik jilu katak ko.
Katak #1—Kom̧in Ekkōļ kōn Kareel ko an Devil
N̄an n̄a, cheetah ko remeeoeo, rikakijen, mennin kōm̧m̧anm̧an eo ekabwilōn̄lōn̄. Ānbwinin cheetah eo eeiaļo̧ mouj im kilmej jidik āinwōt eaiboojoj me ekōm̧m̧an bwe mennin mour kein rein juon ilo aer kakijen ilo ujooj ko ilo Africa.
Āinwōt ilo juon wāween, jetōbin kauwōtata ko an ļōmņak im m̧akūtkūt ko ekkā aer maron̄ waļo̧k n̄an kakkure, kōņaan, ak kam̧ōņōņō. Aaet, ilo mour in, kajjojo iaad eaikuj in ekkōļ kōn kareel eo enana me kōtōnn̄e em̧m̧an. Āinwōt Aiseia ekar kakkōļ, “Wo n̄an ro rej ņa etan nana em̧m̧an, ro rej likūt marok n̄an meram, im meram n̄an marok, ro rej likūt meo̧ n̄an tōn̄al, im tōn̄al n̄an meo̧!”1
Ilo iien eo n̄e elōn̄ rej kakkure mour an armej n̄an rie āinwōt juon jim̧we im juon bōd ej waļo̧k āinwōt anemkwoj, ewi jon̄an ad jeraam̧m̧an ilo ad mour ilo raan kein āliktata me em̧ōj an meram in gospel eo me em̧ōj an jepļaaktok maron̄ kōmeram mour ko ad im jipan̄ kōj n̄an kile m̧ōņ im kakkure ko remarok an rikapo eo.
“Bwe ro remālōtlōt im rekar bōk m̧ool eo, im rekar bōk Jetōb Kwōjarjar bwe en aer ritōl, im rekar jab po ilo m̧oņ—em̧ool Ij ba n̄an kom̧, rejamin naaj juoklaļļo̧k er im joļo̧k er ilo kijeek eo, ak renaaj mour ilo raan eo”2
Katak #2—Jumemej im Pepojakjak
N̄e juon topi, ilo iien eo ejjab kōjparok ak pojak emaron̄ po ippān juon cheetah. Barāinwōt, jetōbin aepādpād im pādwaan ekōm̧m̧an bwe jen m̧ōjņo̧ n̄an m̧ōņ ko an rikapo eo. Jetōbin jaje kuņaan ej bōktok kauwōtata eļap n̄an mour ko ad.
iStock.com/Angelika
Nipai eaar kōmeļeļeik ilo raan ko āliktata Setan enaaj kajjieon̄ jojoon im m̧ōņe ro nejin Anij ilo riab im ba, “bwe em̧m̧an: Men otemjej ej em̧m̧an ilo Zaion; aaet Zaion ej jeraam̧m̧an, men otemjej em̧m̧an—im āindein devil enaaj m̧oņe jetōb ko aer, im tōļļo̧k er ilo tiljek n̄an hell.”3
Lukkuun mejmej karuo ej wōr tokjen n̄an jutak ņae aepādpād im pādwaan. N̄an mejmej karuo ilo jekjek in ak m̧akūtkūt n̄an lukkuun lale n̄an kauwōtata ak apan̄ ko. N̄an lukkuun lale ej kōmeļeļeik jerbal eo an jumemej n̄an tōle im kōjparoke. Ilo jetōbin ekōnono, jej aikuj in jumemej im pojak n̄an im̧we ko an Jetōb Kwojarjar im kōkkaļļe ko me rej itok jān riwaj ro an Irooj ioon tawōr eo.4
“Aaet, im ij barāinwōt kōketak kom̧ … bwe kom̧in ekkōl im jar iien otemjej, bwe kom̧in jamin etal ilo kapo ko an devil, … bwe lo, e ejjab kajinōkjej kom̧ kōn jabdewōt em̧m̧an.”5
Mije wōt mour ko ad ippān im ilo Rilo̧mo̧o̧r im gospel eo An ekōmaron̄ kōj n̄an anjo̧ jen armej ilo lukkuun biktokin an jetōbin jab pojak im jowan. Ilo ad jeraam̧m̧an kōn mejed n̄an loe im lojiln̄id n̄an ron̄,6 Jetōb Kwojarjar emaron̄ kōļapļo̧k maron̄ eo ad n̄an loe im ron̄jake n̄e jemaron̄ jab lukkuun ļōmņake jej aikuj in loe im ron̄jake ak n̄e jej jab ļōmņake jabdewōt men jemaron̄ loe ak ron̄.
“Ekkōl, kōn menin, bwe kom̧in maron̄ pojak.”7
Katak #3—Meļeļe kōn Kareel eo an Rikōjdāt
Cheetah eo ej juon rikakijen me ej kakijen jen mennin mour ko jet. Aolep raan, kajjojo raan, cheetah eo ej juon rikakijen.
Setan “ej rikōjdāt eo an jim̧we im an ro rej kappukot n̄an kōm̧m̧an ankilaan Anij.”8 Aolep raan, kajjojo raan, kareel eo wōt an im jibadbad eo ej n̄an kōm̧m̧an bwe ļaddik ro im leddik ro nejin Anij ren būrom̧ōj āinwōt e make.9
Karōk in m̧ōņōņō eo an Jemed eaar ejaak n̄an kake tōl n̄an ro Nejin, n̄an jipan̄ er en̄jake m̧ōņōņō, im bōktok er n̄an kapijuknen eo ejokne Ippān ilo ānbwin ko rewāppen nan indeeo me em̧ōj aer jerkakpeje. Rijerbal eo an devil rej n̄an kōm̧m̧an bwe ļaddik ro im leddik ro nejin Anij ren pok im jab m̧ōņōņō im n̄an dāpij eddōkļo̧k eo aer indeeo. Rikapo eo ejjab bōjrak an jodiki m̧ōttan ko an Karōk eo an Jemed me ej make wōt dike tata.
Setan ejjeļo̧k ānbwinin, im ebōjrak an eddōkļo̧k. Āinwōt an dān bōjrak an ito-itak ilo juon reba, kōn menin eddōkļo̧k eo an rikapo eo ebōjrak kōnke ejjeļo̧k ānbwinin. Kōn an jum̧ae, Lucifer eaar kaarmejete make aolep kōjeraam̧m̧an ko an kanniōk im en̄jake ko kar kōm̧m̧ani ilo kanniōk im dii. Juon iaan meļeļe ko ilo naan in bōjrak ej kōmeļeļeik ke ejjeļo̧k an maron̄ in eddōkļo̧k n̄an erom̧ āinwōt Jemedwōj Ilan̄.
Kōnke juon āinbwin ej io̧lapen karōk in m̧ōņōņō eo an Jemed im jetōb eo ad n̄an eddōkļo̧k, Lucifer eaar pukot n̄an kakkure kōj n̄an kōjerbal ānbwinnid ilo jab jim̧we. Būreejtōn Russell M. Nelson eaar kwaļo̧k bwe jetōbin jokne epād ilo “‘jamin bōke bun̄tōn eo im̧aantata m̧aanļo̧k ijo me kwon kar jab etal ie im kōm̧m̧ane ta eo kwon kar jab kōm̧m̧ane. … Āinwōt juon armej ewōr ippād [ānbwin] ōōn eo ekkar n̄an ad mour. ‘Ōōn kein aaet relukkuun aorōk n̄an mour. Kōn menin, ta eo rikapo eo ej kōm̧m̧ane? … Ej kakkure ōōn ko ilo kōj. Ej kapo kōj n̄an m̧ōn̄ā men eo jen kar jab m̧ōn̄ā, idaak men eo jen kar jab idaake, im n̄an iakwe men eo jen kar jab iakwe!’”10
Juon iaan kōttōbar ko reļļap an mour indeeo ej bwe rikapo eo, eo ej būrom̧ōj kōnke ejjeļo̧k āinbwinin, ej kūr im kareel kōj n̄an kwaļo̧k būrum̧ōj eo an n̄an jab kōjerbal āinbwinid ilo jim̧we. Lukkuun kein jerbal eo ejjeļo̧k an im eban kōjerbale em̧ool jibadbad n̄an anne kōj n̄an kakkure ānbwinid im jetōb eo ad.
Meļeļe kōn kareel eo an rikōjdāt eaorōk n̄an kōpopo eo ebolemen ilo iien amijkur ko.11 Kōn an Kapen Moronai kar jeļā kōn kōpeļaak eo an RiLeman ro, eaar pojak n̄an ioon er ilo iien eo ke raar itok im kar anjo̧.12 Ilo ejja pedped in katak in im kallim̧ur in ej jerbal n̄an kōj kajjojo.
“Eļan̄n̄e kom̧ij pojak, kom̧ jamin mijak.
“Im bwe kom̧in maron̄ deor jān kajoor eo an rikōjdāt eo.”13
Kūr, Kallim̧ur, im Naan in Kam̧ool
Āinwōt an aorōk katak ko me maron̄ ekkatak jeni baj lale m̧wilin cheetah ko im topi ko, āindein kōj kajjojo jemaron̄ lo katak ko im kakkōl ko me jej loi ilo m̧akūtkūt ko kajjojo aolep raan in mour. Ilo ad kappukot kōn juon ikdeleel in ļōmņak im bōro n̄an bōk tōl an lan̄ kōn kajoor eo an Jetōb Kwojarjar, innām jet iaan kōmeļeļe ko reļļap me jemaron̄ bōk im elōn̄ iaan kakkōl ko rekajoor me remaron̄ kōjparok kōj renaaj waļo̧k ilo en̄jake ko ad make. Būrabōļ ko rekajoor repād ilo jim̧or jeje ko rekwojarjar im ilo mour ko ad kajjojo raan.
Em̧ōj aō kalikkar jilu iaan katak ko rellōn̄ me remaron̄ in alikkar ilo jam̧bo im alooje eo am̧ro Susan ļo̧k n̄an Africa. Ij kūr im rōjan̄ kom̧ n̄an ļōmņake bwebwenato in kobaļo̧k cheetah ko im topi ko im kalikkar katak ko jet n̄an kwe im baam̧le eo am̧. Jouj iien otemjej keememej bwe kapijuknen eo am̧ ej lukkuun unleplep eo em̧ool n̄an ekkatak gospel in n̄an mour kake.
Ilo am̧ jerbal kōn tōmak n̄an kūr in, ļōmņak ko reim̧we renaaj itok n̄an ļōmņak eo am̧, jetōbin en̄jake renaaj un̄ūir būruwōm̧, im kwonaaj kile m̧akūtkūt ko me reaikuj in bōk jikier ak wōnm̧anļo̧k bwe kwon maron̄ “bōk ioomi [kein] tariņae [an Ani], bwe kom̧in maron̄ jutak ņae raan eo enana, im ālkin men otemjej, bwe kom̧in maron̄ jutak.”14
Ij kallim̧ur bwe kōjeraam̧m̧an ko rejejjet an kōppopo im jetōbin kōjparok renaaj iwōj n̄an mour eo am̧ ilo am̧ ekkōl im jar iien otemjej.
Ij kam̧ool bwe bun̄ m̧aanļo̧k ilo iaļen bujen eo ej letok jetōbin jokne im karuwaineneiktok m̧ōņōņō ilo mour ko ad. Im ij kam̧ool bwe Rilo̧mo̧o̧r eo em̧ōj an jerkakpeje im emour enaaj rie im kōkajoorļo̧k kōj ilo iien ko rem̧m̧an im nana. Men kein ij kam̧o̧ol ilo āt eo ekwojarjar etan Irooj Jisōs Kraist, amen.