Ālkin Mālijjon̄ in Ad Tōmak
Ilo ad ļoore ainikien Anij im iaļan bujen eo An, Enaaj kōkajoorļo̧k kōj ilo ad jelm̧ae mālijjon̄ ko ad.
Ke ikar juon ajri, Frank Talley, juon membōr ejouj an Kabun̄ in ekar jipan̄ n̄an bōkļo̧k baam̧le eo aō jān Puerto Rico n̄an Salt Lake City bwe kōm̧ en marōn liāp ilo tampeļ eo, ak ejjab to apan̄ ko rekar jino waļo̧k. Juon iaan Sister ro aō, Marivid, ekar jino nan̄inmej. Jan̄in allikar, jinō im jema rekar jar kōn ta eo renaaj kōm̧m̧ane im kar en̄jake wōt ke rej aikuj etal ilo iaļ eo. Rekar lōke bwe elan̄e renaaj lukkun ļoore im̧we eo an Irooj, baamļe eo am enaaj pād ilo kōjparok im jeraam̧m̧an— im kōm̧ ekar pād ilo kōjparok im jeraam̧m̧an.
Jekdo̧o̧n apan̄ ko jej iooni ilo mour in, jemaron̄ lōke bwe Jisōs Kraist enaaj kōpooje juon iaļ m̧aanļo̧k ilo ad etetal kōn tōmak. Anij ekar kallim̧ur bwe aolep ro rej lukkuun mour ekkar n̄an bujen ko rekar kōm̧m̧ane Ippān enaaj, ilo iien eo An, bōk aolep kōjeram̧m̧an ko An emōj an kallim̧ur kaki. Elder Holland eaar katakin, “Jet kōjeraam̧m̧an ko em̧ōkaj aer itok, im rej rum̧wij, im jet rejjab itok m̧ae lan̄, bōtaab ro rej kautiej gospel eo an Jisōs Kraist, rej itok1
Moronai ekar katakin bwe “tōmak ej men ko kōjatdikdik kaki im jab loi; kōn menin, jab jum̧ae kōnke kom̧ij jab lo, bwe kom̧ij bōk ejjeļo̧k kam̧ool m̧ae ālikin mālijjon̄ in ami tōmak.”2
Kajjitōk eo ej aikuj in, Ta eo jej aikuj kōm̧m̧ane n̄an jelm̧ae mālijjon̄ ko rej itok ilo iaļ ko ad?”
Ilo kōnono eo jinoin tata āinwōt Būreejtōn eo an Kabun̄ in, Būreejtōn Russell M. Nelson ekar katakin: “Āinwōt Būreejtōnji eo ekāāl, kōm̧ kōņaan jino jerbal eo kōn kōttōpar eo ilo ļōmņak. Kōn un in, kōmij kōnono n̄an kom̧ rainin jān juon tampeļ. Jemļo̧k eo me kōj kajjojo jej kajjieon̄ in erom̧ ej n̄an bōk menin letok eo ekwojarjar an kōn kajoor ilo juon em̧ im̧ōn Irooj, liāp āinwōt baam̧le ko, tiljek n̄an bujen ko jekar kōm̧m̧ani ilo juon tampeļ me ej kōkarbab kōj n̄an menin letok eo eļaptata an Anij—me an mour indeeo. Kain̄i ko an tampeļ im bujen ko kwoj kōm̧m̧ane rej kii n̄an kōkajoorļo̧k mour eo am̧, m̧are eo am̧, im am̧ maron̄ n̄an jum̧ae menin kapo ko an rikōjdāt eo. Am̧ kabun̄jar ilo tampeļ eo im am̧ jerbal in jipan̄ ijeņ kōn ro jibum̧ im jim̧m̧am̧ naaj kōjeraam̧m̧an eok im kōļapļo̧k revelesōn eo am̧ make im aenōm̧m̧an im naaj kokwojarjar kallim̧ur eo am̧ n̄an dim wōt ilo iaļan bujen eo.”3
Ilo ad ļoore ainikien Anij im ialan bujen eo An, Enaaj kōkajoorļo̧k kōj ilo ad jelm̧ae mālijjon̄ ko ad.
Tūrāāp eo an Baam̧le eo aō n̄an tampeļ iiō ko rem̧ootļo̧k ekar pen, ak ke kōm ekar epaakeļo̧k tampeļ eo ilo Salt Lake City, Utah, jinō, eo eobrak kōn lan̄lōn̄ im tōmak, ekar ba, “Aolep men renaaj Em̧m̧an; Irooj enaaj kōjparok kōj.” Kōm kar liāp āinwōt juon baam̧le, im sister eo aō ekar mour jān nan̄inmej. Menin ekar waļo̧k ālikin mālijjon̄ in tōmak eo an jinō im jema im ilo an kar jinō im jema ļoore im̧we ko an Irooj.
Waanjon̄ak in an ro jinō im jema rej im̧we wōt mour ko am rainin. Waanjon̄ak eo ekar katakin kōj etke katak ko ilo gospel in im ej jipan̄ kōj meļeļe meļeļe in, unin, im kōjeraam̧m̧an ko me gospel eo ej bōktok n̄an kōj. Meļeļe etke gospel eo an Jisōs Kraist emaron̄ jipan̄ kōj jelm̧ae mālijjon̄ ko ippān tōmak eo ad.
Ilo m̧ool, aolep men Anij ej karuwaineneik im kakien kōj n̄an kōm̧m̧ane ej kwaļo̧k kōn An iakwe n̄an kōj im An ikdeleel n̄an letok n̄an kōj kōjeram̧m̧an ko emōj kōpooji kadede n̄an ro rej tōmak. Jeban kaju ba ke ajri ro nejid renaaj make ekkatak n̄an iakwe gospel eo; ej ad eddo n̄an katakin er. Ilo ad jipan̄ ajri ro nejid katak elmen kōjerbale anemkwōj in kālet eo aer, waanjon̄ak ko ad emaron̄ kareel er n̄an kōm̧m̧an make kālet ko rejim̧we. Mour in tōmak eo aer enaaj oktakļo̧k n̄an jipan̄ ajri ro nejier n̄an jeļā m̧ool eo kōn gospel eo n̄an er make.
Likao im Jiron̄ ro, ron̄jake rikanan eo rainin ej kōnono n̄an kom̧. Kappukot n̄an ekkatak m̧ool ko rekwojarjar im kappukot n̄an meļeļe gospel eo ippam̧ make. Būreejtōn Nelson ekar kapilōk: “Māletlet rōt ejabwe ippem̧? … Ļoor waanjon̄ak eo an Rikanaan Josep. Pukot juon jikin ejjeļo̧k keroro ie. … Kōttāik eok make im̧aan Anij. Leļo̧k aolepān būruwōm̧ n̄an Jemedwōj Ilan̄. Etal n̄an E n̄an uwaak ko.”4 Ilo am kapukkot tōl jān Jemedwōj Ilan̄ eļap iakwe ippān, ron̄jake ko̧o̧njeļ ko an rikanaan ro remour, im lale waanjon̄ak ko an m̧am̧a im baba rekwojarjar, kwe barāinwōt komarōn erom̧ kajoor ilo tōmak ilo baam̧le eo am̧.
N̄an m̧am̧a im baba ro ippān ajri ro nejier remaron̄ jako jān iaļan bujen in, rej jidikdik ro̧o̧l tok. Jipan̄ er meļeļe kōn m̧ool eo an gospel in. Jinoe kiiō; jab rum̧wij.
Waanjon̄ak ko ad kōn mour kwojarjar emaron̄ kōm̧m̧an eļap oktak. Būreejtōn Nelson ekar ba: “Āinwōt Armej ro Rekwojarjar, em̧ōj ad erom̧ imminene n̄an ļōmņak kōn ‘kabun̄’ āinwōt juon men eo ej waļo̧k ilo im̧ōn kweilo̧k ko ad, rie jān ta eo ej waļo̧k ilo m̧weo. Jej aikuj juon oktak n̄an jon̄ak in. Ej iien n̄an juon jikin-kabun̄ jar ilo M̧weo, ej bōk jipan̄ jān ta eo ej bōk jikin ilowaan branch eo ad, ward eo, im mōn jar ko an stake.”5
Jeje ko Rekwojarjar rej katakin “Katakin juon ajri ilo iaļ eo en etal ie: im n̄e e rūtto ejāmin iļo̧k jān e.”6
Rej barāinwōt ba, “Im kiiō, kōnke kwaļo̧k kōn naan eo eaar ļap an̄in n̄an tōl armej ro n̄an kōm̧m̧ane men eo ejim̧we—aaet, eaar ļapļo̧k kajoor in an jelōt ļōmņak ko an armej ro jān jāje eo, ak jabdewōt men, eo eaar waļo̧k n̄an er—kōn menin Alma eaar ļōmņak eaar emennin aikuj bwe ren kajjion̄ jelōt ewānōk an naan in Anij.”7
Ewōr juon bwebwenato kōn juon kōrā ekar inepata bwe ļaddik eo nejin eļap an mōn̄ā tōn̄al. Jekdoon ewi jon̄an an ba n̄an e bwe en bōjrak, ekar wōnm̧aanļo̧k wōt kōn kōņaan eo an n̄an mōn̄ā tōn̄al. Ilo eļap illu, ekar kālet n̄an bokļo̧k ļaddik eo nejin n̄an loļo̧k juon em̧m̧aan ekapāāl eo eļap an kautiej e.
Ekar jibadōkļo̧k e im ba, “Sir, eļap an ļaddik in nejū mōn̄ā tōn̄al. Komarōn ke jouj im ba n̄an e bwe en bōjrak an mōn̄ā?”
Ekar lukkuun ron̄jake innem eba n̄an ļaddik eo nejin, “Jepļaak n̄an m̧weo im̧ōm̧ im ro̧o̧l tok ilo ruo wiik.”
Ekar bōk ļaddik eo nejin im bar ro̧o̧l, ekar pok etke ekar jab kajjitōkin ļaddik eo n̄an bōjrak jān an m̧ōn̄ā tōn̄āl.
Ruo wiik tokālik rekar bar ro̧o̧l ļo̧k. Em̧m̧aan eo ekapeel ekar kalimjōk ļaddik eo im ba, “Ļaddik, kwoj aikuj bōjrak am̧ mōn̄ā tōn̄al. Ejjab em̧m̧an n̄an ājmour eo am̧.”
Ļaddik eo ekar emajedjed im kallim̧ur ke enaaj bōjrak.
Jinen ļaddik in ekar kajjitōk, “Etke kwar jab ba n̄an e men in ruo wiik emootļo̧k?”
Em̧m̧aan eo emāletlet ekar ettōn̄ dikdik. “Ruo wiik emootļo̧k ikar barāinwōt mōn̄ā tōn̄al ippa make.”
Em̧m̧aan in ekar mour kōn m̧ool jon̄an ekar jeļā bwe naan in kapilōk eo an ej aikuj wōr kajoor in eļan̄n̄e ej mour kaki naan in kapilōk ko an make.
Kareel ko ad n̄an ajri ro nejid eļapļo̧k an kajoor ilo aer lo ad etetal ilo tiljek ilo iaļan bujen eo. Rikaņaan Jekab jān Bok in Mormon ej juon waanjon̄ak kōn kwojarjar. Leo nejin Inōs ekar jeje kōn katak ko an jemen:
“N̄a, Inōs, kōn jeļā in bwe jema eaar juon armej ejim̧we—bwe eaar katakin eō ilo kajin eo an, im barāinwōt ilo kōkaajriri im katak ko an Irooj—im en jeraam̧m̧an etan aō Anij kōn menin. …
“… Im naan ko ekkutkut aō kar ron̄ an jema kōnono kōn mour indeeo, im kōn lan̄lōn̄ an ro doon, raar deļo̧n̄ ilo m̧wilaļ in buruō.”8
Jinen ritariņae ro, ro rekar mour kōn gospel eo, im ajri ro nejier rekar obrak kōn lōke. Ritōl eo aer ekar riboot:
“Raar ekkatak jān ro jineer, bwe eļan̄n̄e reban pere, Anij enaaj lo̧mo̧o̧ren er.
“Im raar kōmmeļeļeik n̄an eō naan ko an ro jineer, im ba: Kōmij jab pere ke ro jinem raar jeļā.”9
Inōs im ritariņae ro rekar kajoorļo̧k kōn tōmak eo anro jineer im jemeer, eo ekar jipan̄ er jelm̧ae mālijjon̄ in tōmak ko aer.
Jeraam̧m̧an kōn jepļaaktok eo an gospel eo an Jisōs Kraist ilo raan kein, eo ej kotak kōj elan̄n̄e jej en̄jake jab peran ak pok. Jej kam̧oole bwe kon kijejeto ko ad jenaaj bok leen io iien eo me Irooj enaaj karoke elanne jej bun maanlok nan jelm̧ae mālijjon̄ ko ad.
Kōrā eo ippa im n̄a, ippān Eria Jiljilimjuonn̄oul, kom̧ro ekar etal jet raan emootļo̧k ippān Elder David A. Bednar n̄an aje eo an tampeļ eo ilo Haiti Port-au-Prince Temple. Ļaddik eo nejim, eo ekar itok ippam, ekar ba kōn en̄jake eo an: “Elukkuun kabūlōn̄lōn̄, Papa! Iien eo Elder Bednar ekar jino kōn jar in kōjeram̧m̧an eo, ikar en̄jake ilo ruum eo ekar obrak kōn okmāāņāņ im meram. Jar eo ekar letok eļap melele kōn unin tampeļ ko. Ej lukkuun m̧weo im̧ōn Irooj.”
Ilo Bok in Mormon, Nipai ej katakin bwe ilo ad ikdeelel n̄an jeļā ankilaan Anij, Enaaj kōkajoor kōj. Ekar jeje, “N̄a, Nipai, āinwōt ke iaar inono otem inono … im barāinwōt ļap aō ikdeelel n̄an jeļā kōn men ko rettino an Anij, iaar kūr n̄an Irooj; im lo Eaar lotok eō, im Eaar kōm̧m̧an bwe buruō en bārōk bwe in maron̄ tōmak naan ko jema eaar kōnono; kōn menin, iaar jab jum̧ae jema āinwōt ļōm̧aro jeiū.”10
Ro jeiū im jatū, jān jipan̄ ajri ro nejid im ipeļaakid n̄an ļoore ialan bujen eo an Anij bwe jetōb en maron̄ katakin er im kameraik būrueer n̄an ikdeelel n̄an ļoor E ilo aolepān mour eo ko aer.
Ke ij ļōmņake waanjon̄ak eo an ro jinō im jema, ikar kile bwe tōmak eo ad ilo Irooj Jisōs Kraist enaaj kwaļo̧k n̄an kōj iaļ eo enaaj karo̧o̧l kōj n̄an m̧weo im̧ōd ilan̄. Ijeļā bwe kabūlon̄lon̄ ko rej itok ālkin mālejjon̄ in tōmak eo ad.
Ij kwaļo̧k aō naan in kam̧ool kōn Jisōs Kraist im Pinmuur eo An. Ijeļā E ej ad Rilo̧mo̧o̧r im Rikanemkwoj. E im Jemedwōj Ilan̄ rekar itok ilo jibbon̄in 1820 eo n̄an Josep Smith ke ekar dik, rikanaan eo an Jepļaaktok eo. Būreejtōn Russell M. Nelson ej rikanaan eo ad rainin. Ilo etan Jisōs Kraist, amen.