Jab M̧oņe Eō
Ilo ad pokake kien ko an Anij, jenaaj bōk tōl aolep iien ilo wāween eo ejim̧we im jab po ilo m̧oņ.
Rainin, Ij tilmaake naan in kapilōk ko n̄an aolep, ak eļaptata n̄an kom̧ ro epepen tokālik —ajri in Būraimere, likao ro, im jiron̄ ro. Kom̧ eļap ami jitōn bōro ippān rikanaan eo an Irooj ilo raan kein ad, Būreejtōn Russell M. Nelson—jon̄an ekar kōnono n̄an elōn̄ iaami ilo iiō eo ļo̧k ilo juon iien nokon ejenoļo̧k an jodikdik ipeļaakin laļ in im ekar diwōjļo̧k imejatoto im kar unin kōnono eo “Kōjatdikdik an Israel.”1 Ekkā ad ron̄ an Būreejtōn Nelson kūr kom̧ ilo jejjetin—ke, “kōjatdikdik an Israel,” diktak in epepen im ilju im jekļaj eo an jepļaaktok eo Kabun̄ eo an Jisōs Kraist.
Ro m̧ōtta rūm̧m̧an ded, ikōņaan bwe in jino ilo aō kwaļo̧k ruo bwebwenato in baamļe.
102nd Dalmatian
Iiō ko rem̧ootļo̧k, ikar itaakļo̧k n̄an m̧weo jān jerbal im kar ilbōk ke ij lo ewūno aolep jikin—ilo laļ, kōjem in kōraaj eo, im kilin em̧ birōk eo mōm̧. Ikar etale menin ekar waļo̧k im lo bwe wūno ko rej tutu wōt. Juon jenkwon wūno eo ekar tōl ļo̧k n̄an nabōj in m̧weo itulik im ikar ļoor e. Ijen, ikar lo ļaddik eo nejū lalem an iiō kōn juon būraj in wūno ilo pein, im ej kipel kidu eo nejim. Labrador kidu eo nejim ekilmeej im aibojooj ekar wūno kōn enan̄n mouj jimaten in!
“Kwoj ita?” Ikar kajjitōk ilo juon ainikien emourur.
Ļaddik eo nejū, ekar reitok, reiļo̧k n̄an kidu eo, lale būraj in wūno eo ej pilpil kōn wūno, im ba, “Ikōņaan bwe en āinwōt juon kidu eo me ekilmejeej jiddik—kwojeļā, juon eo me āinwōt 101 Dalmatians.”
Ikar lukkun iakwe kidu eo nejim. Ikar ļōmņak ekar lukkun jejjet, ak raan eo ļaddik eo nejū ekar wōr juon an ļōmņak eoktak.
Juon Kuuj E lain niin Kilin
Bwebwenato eo juon aō ej kōn Unlepa eo em̧m̧an Grover, eo ekar jokwe, ilo juon em̧ eo ettoļo̧k jān taun. Unlepa Grover ekar ļōllap ļo̧k. Jekar ļōmņak bwe ļaddik ro nejim rej aikuj ioone m̧okta jān an mej. Kōn menin, juon ālkin raelep, jekar ettōr aeitok n̄an m̧weo imōn. Kōm kar jijjet ippān doon n̄an loļo̧k im kwaļo̧k kajjeen n̄an ļaddik ro nejim. Ejjab to ilo bwebwenato eo, ļaddik ro ruo nejim reddik, emaron̄ kar lalem im jiljino aer iiō, rekar kōņaan etal n̄an nabōj im ikkure.
Unlepa Grover, ekar ron̄ kajjitōk eo aer, ekar m̧al maanļo̧k im kepaake turin mejān n̄an turin mejāer. Turin mejān elukkun ļōllap im rejaje kajjien jon̄an ļaddik ro rekar mijak e jidik. Ekar ba n̄an er, ilo ainikien ekorkor, “Kōkm̧anm̧an wōt—bwe elukkuun lōn̄ skunk ijene nabōj.” Ke kōm ej ron̄ menin, Lesa im n̄a kom̧ro kar ikumļo̧k; kom̧ro kar ikumkum n̄e skunk eo ebaj kumatte er. Ļaddik ro ejjab to rekar etal n̄an nabōj ke kōm ej wōnm̧aanļo̧k wōt im bwebwenato.
Tokālik, ke kōm kar tōpar ilo wa eo n̄an etal n̄an m̧weo, ikar kajjitōk ippān ļaddik ro, “Kom̧ kar ke ello skunk? Juon iaer ekar uwaak, “Jaab, kōm kar jab ello skunk, ak kōm kar lo juon kuuj kilmeej me e lain niin kilen ilo ilikin!”
Rim̧oņ eo Eļap
Bwebwenato kein kōn ajri ro re jajeļo̧kjeņ rej lo men ko kōn mour im lukkuun m̧ool in emaron̄ kōm̧m̧an bwe jen ettōn dikdik, ak rej kwaļo̧k juon katak eo em̧ūlaļ.
Ilo bwebwenato eo kein kajuon, ļaddik eo nejim edik ej nejnej kidu; ilo ad jab jeļā, ekar bōk juon kōļan in wūno im, kōn būraj in wūno eo ilo pein, ļōme n̄an ejaake juon men ej pijaikļo̧k lukkun m̧ool.
Ilo bwebwenato eo kein karuo, ļaddik ro rekar jab jeļā kōn kauwōtata ko renana renkar jelm̧ae jān juon skunk. Jab maron̄ jejjet aer kile ta eo rekar lukkuun jelm̧ae, rekar pād ilo kauwōtata in jelm̧ae ajāllik ko me rekar jab kōtmeni. Bwebwenato kein me rej itok jān bōd in kakilen—ļōmņak bwe men ko ilo m̧ool in rej bar jet men. Ilo jekjek ko kajjojo, ajāllik ko reiiōt.
Ijoke, elōn̄ rainin rej jelm̧ae ejja jorrāān kein wōt ilo jon̄an eo ļapļo̧k. Rekar jab maron̄ loe men ko eļan̄n̄e rej lukkuun kar ak maron̄ jab ju būruweer kōn m̧ool. Eļapļo̧k, elōn̄ kajoor ko rainin em̧ōj ļōmi elōn̄ unin n̄an tōl kōj jān lukkuun m̧ool eo. M̧oņ im riab kein rej eļļā ioon bōd ko me jejjab jeļā kaki m ekkā an wōr ajāllik ko reļļap, ejjab jidik wōt.
Setan, jemān riab otemjej im rim̧oņ eļap, enaaj kōm̧m̧an bwe jen kajjitōkin men ko āinwōt aer lukkuun waļo̧k im bar kajjej tokjen m̧ool ko an mour indeeo ak bōk jikin n̄an men ko me eļapļo̧k aer kareel kōj. “Ej kōm̧m̧an tariņae ippān ro rekwōjarjar an Anij”2 im ekar joļo̧k elōn̄ iien ko n̄an karōk im kamelmel maron̄ n̄an kipel aolep ajri ro nejin Anij n̄an tōmak bwe nana em̧m̧an im em̧m̧an n̄an nana.
Kar jeļā kake e kōn an kareel armej bwe skunk rej jet kuuj jiddik ak bwe, kōn kōjerbal wūno paint, komaron̄ ukot juon Labrador kidu n̄an juon Dalmatian!
Jen kiiō oktakļo̧k n̄an juon waanjon̄ak in katak in me ej waļo̧k ilo jeje ko rekwojarjar, ke Moses rikanaan an Irooj ekar jelm̧ae mej n̄an mej ejja melejon̄ in wōt. “Moses eaar weaak lōn̄ļo̧k ilo juon toļ eutiej otem utiej, … im eaar lo Anij jelm̧ae doon, im eaar ekkōnono ippān.”3 Anij ekar katakin Moses kōn kadkad eo an indeeo. Ekar ba bwe men̄e Moses ekar juon armej im ekar jab wānōk, e ekar “ilo jekjekin Nejū Iaar Make Keotake; im Nejū Iaar Make Keotake … naaj Rilo̧mo̧o̧r eo.”4
N̄an kwaļo̧k ilo tukaduin, ilo vison in ekabwilōn̄lōn̄, ekar lo Anij, im ekar bar ekkatak juon men eaorōk kōn e make: men̄e ekar armej bōtōktōk im kanniōk, e kar nejin Anij.
Lukkuun ron̄jake kōn ta eo ekar waļo̧k ilo vison in ekabwilōn̄lōn̄. “Im ālikin men kein … Setan eaar itok im kapo e,” im ba: “Moses, nejin armej, kwōn kabun̄-jar n̄an e!”5 Moses ekar peran an uwaak: “Wōn kwe? Bwe lo, N̄aij juon nejin Anij, ilo jekjekin Nejin Eaar Make Keotake; im ewi aiboojoj eo am, bwe in aikuj kabun̄-jar n̄an eok?6
Ilo bar jet naan, Moses ekar ba, “Kwojjab maron̄ m̧oņe eō, bwe Ijeļā wōn n̄a. Kar kōm̧anm̧an eō ilo nememein wōt Anij. Ejjeļo̧k ippam̧ meram eo An im An aibojooj. Kōn menin etke ij aikuj kabun̄ jar n̄an eok ak po ilo m̧oņ ko am̧?
Kiiō lukkuun lale wāween an Moses kar uwaak. Ekar kwaļo̧k, “Ilo̧k jān ijin, Setan; jab m̧oņe eō.7
Elōn̄ men jemaron̄ ekkatak jān kajoor in uwaak eo an Moses n̄an kapo eo jān eo enana. Ij kūr kom̧ n̄an kōm̧m̧an ejja wāween in wōt n̄e kwoj en̄jake kareel in kapo. Kakien rikōjdat eo an jetōb eo am̧ ilo am̧ ba, Ilo̧k! Ejjeļo̧k am̧ aibojooj. Jab kapo ak riab e eō! Bwe ijeļā wōn n̄a—nejin Anij. Im inaaj aolep iien kūr n̄an aō Anij kōn jipan̄ eo An.
Rikapo eo, mekarta, ejjab pidodo an kōjekdoon unin kakkure ko an n̄an m̧oņ im kaenepataik kōj. Ekar jab āindein n̄an Moses, ijjelokin ikdeleel n̄an kōm̧m̧an bwe Moses en meļo̧kļo̧k wōn e ilo kadkadin indeeo.
Āinwōt n̄e ekar e juon ajri jidikdik, “Setan ar lam̧ōj kōn ainikien eo eļļaaj, im elam̧ōjm̧ōj ioon laļ, im ar jiron̄, im ba: N̄aij eo Nejin Eaar Make Keotake, kabun̄-jar n̄an eō.”8
Jen etale. Kwaar ke ron̄ ta eo ekar ba? “N̄aij eo Nejin Eaar Make Keotake. Kabūn Jar n̄an eō!”
Rim̧oņ eo eļap ekar ba, ilo jekjek in “Jab inepata, iban kōmetak eok—Ejjab n̄a juon skunk; N̄a juon kuuj eo elain niin kilmeej mouj im ejjeļo̧k men ejeļā kake.
Moses ekar tokālik kūr Anij im kar bōk kajoor eo An ekwojarjar. Men̄e rikapo eo ekar wudiddid im laļ ekar em̧akūtkūt, Moses ekar jab ebbweer. Ainiken ekar lukkuun alikkar. “Etal jān iō, Setan, ekar ba,” juon wōt Anij inaaj kabun̄ n̄ane, eo ej Anij in aiboojoj.”9
Āliktata, ekar “ilo̧k … jān im̧aan mejān Moses.”10
Ālkin an Irooj kar waļo̧k im kōjeram̧m̧an Moses kōn an pokake, Irooj ekar ba:
“Kwe kwo jeraam̧m̧an, Moses, bwe … naaj kōkajoorļo̧k eok jān elōn̄ dān ko. …
“Im lo, N̄aij pād ippam̧, em̧ool mae jem̧ļo̧k in raan ko am.”11
Anjo̧ eo an Moses ej ioon rikapo eo ej juon waanjon̄ak eļap dipdikin im ekōketak kōj kajjojo, jekdoon jekjek ta ko jepād ie ilo mour in. Ej juon enaan ekajoor n̄an eok make n̄an jeļā ta n̄an kōm̧m̧ane n̄e ej kajjieon̄ m̧oņe eok. Kōnke kwe, āinwōt Moses, em̧ōj kōjeraam̧m̧an eok kōn juon menin letok eo ej jipan̄ jān lan̄.
Kien ko im Kōjeraam̧m̧an ko
Ewi wāween am̧ maron̄ lo jipan̄ in jān lan̄, ejja wāween eo Moses ekar kōm̧m̧ane, im jab m̧oņ ak po ilo kapo? Juon kein jipan̄ eo ealikkar kōn jipan̄ ko rekwojarjar kar kapene ilo epepen in jān Irooj Make ke Ekar ba: “Kōn menin, N̄a Irooj, kōn Aō jeļā kōn ko̧kkure eo enaaj itok ioon ro rej pād ioon laļ, Iaar kūr rikarejera Josep Smith, Jun., im kar kōnono n̄an e jān lan̄, im kar leļo̧k n̄an e kien ko.”12 Ilo kōjerbal naan ko repidodo, jemaron̄ ba bwe Irooj, eo ejeļā “jem̧ļo̧kin eo jān jinoin,”13 ejeļā kōn apan̄ ko ad remake wōt ilo raan kein ad. Kōn menin, Ekar kōpooj juon iaļ n̄an kōj n̄an anjo̧ jān apan̄ im kapo, elōn̄ iaer rej itok āinwōt juon tōprak ej waļo̧k jān kareel in riab ko an rinana eo im kakkure ko an.
Wāween in epidodo. Kōn ro Karejaran, Anij ej kōnono n̄an kōj, ro Nejin, im letok n̄an kōj kien ko. Jemaron̄ kar āliji eoon eo ikar kout jāne im lan̄lōn̄ bwe Anij em̧ōj an “N̄a Irooj kar kūr …ioon An karejaran [Būreejtōn Russell M. Nelson], im ekar kōnono n̄an e jān lan̄, im leļo̧k n̄an e kien ko.” Ej ke juon m̧ool eo eaibojooj?
Ij kwaļo̧k aō kam̧ool em̧ool bwe Irooj ekar kōm̧m̧an ilo m̧oolin an ekōnono n̄an Josep Smith jān lan̄, ijjino kōn Visōn eo Kein Kajuon ekabwilōn̄lōn̄. Ej barāinwōt kōnono n̄an Būreejtōn Nelson ilo tōre kein ad. Ij kam̧ool bwe Anij ej kōnono ippān rikanaan ro ilo tōre ko etto im ekar leļo̧k kien ko me kar ļōme n̄an tōl ajri ro Nejin n̄an m̧ōņōņō ilo mour in im aibojooj ilo mour eo tok juon.
Anij ej wōnm̧aanļo̧k wōt n̄an leļo̧k kien ko n̄an rikanaan eo ad emour rainin. Waanjon̄ak ko rellōn̄—juon em̧ eo eļapļo̧k an pedped im rejtake Kabun̄ in im beļane ilo katak ko an gospel; penej jenkwan katak in loļo̧k m̧ōko im jerbal in karejar; okoktak ko n̄an jekjek in jerbale kain̄i ko an tampōļ; im būrokūraam eo ekāāl an Ajri im Jodikdik ro. Ij lokjenaō kōn em̧m̧an im tūriam̧o̧ eo an Jemedwōj Ilan̄ eo ej iakwe kōj im eo Nejin, Jisōs Kraist, eo ekar kōjepļaaktok Kabun̄ eo An n̄an laļ in bar juon alen im kar kūr juon rikanaan ilo raan kein ad. Jepļaaktok eo an gospel eo an Jisōs Kraist penej jenkwan iien ko renana kōn iien ko re jejjet.
Jerawiwi Ejamin Kar M̧ōņōņō
Pokake kien ko me leļo̧k n̄an rikanaan ro ad ej juon men emenin aikuj ejjab n̄an kōjekdoon wōt kareel ko an ri m̧on eo ak barāinwōt ilo en̄jake lan̄lōn̄ im m̧ōņōņō eo ejjeļo̧k jem̧ļo̧kin. Jon̄ak eo ekwojarjar eļam waan: etiljek, ak pokake kien ko, ej bōk kōjeram̧m̧an ko, im kōjeram̧m̧an ej bōktok m̧ōņōņō, ak lan̄lōn̄, ilo mour ko ad.
Ijoke, ilo ejja wāween eo wōt me rikapo eo ekar kajjieon̄ m̧oņe Moses, ej kappukōt n̄an kapoik eok. Ej kōtōnn̄e aolep iien n̄an erom̧ men eo ejjab e. Ej kajjieon̄ aolep iien n̄an ņooje wōn lukkuun e. Ekar likūt bwe pokake enaaj kōm̧m̧an an nana mour eo am̧ im bwe enaaj bōbrae eok jān am̧ m̧ōņōņō.
Komaron̄ ke ļōmņak kōn jet iaan wāween m̧oņ ko an? N̄an waanjon̄ak, ej kōjekdoon kakkure ko an uno ko rekajoor im kadōk ak ijjeļo̧k ej ba bwe enaaj bōktok m̧ōņōņō. Ej liaakļo̧k kōj ilo elōn̄ wāwen ko renana me remaron̄ waļo̧k ilo social media, ekoba ilo ad keidi kōj n̄an bar jet im ukot mo̧rar jān lukkun m̧ool in. N̄an kakkobaba, ej likūt marok eo juon n̄an kakkure meļeļeko rej waļo̧k ilo online, āinwōt pija ko renana, jerbal ko renana ilo ittino n̄an ro jet ilo wāween kaleln̄o̧n̄, im kajedeed meļeļe ko rebōd n̄an kōm̧m̧an pere im mijak ilo buruōd im kōļmenļo̧kjeņ ko ad. Etanwadik ilo an unoojdikdik, “Baj ļoor eō, im kwonaaj lukkuun m̧ōņōņō.”
Naan ko kar jei elōn̄ iiō ko rem̧ootļo̧k jān juon rikanaan an Bok in Mormon eļap aer aorōk ilo raan kein ad: “Jerawiwi ejamin kar m̧ōņōņō.”14 Ij kōjatdikdik bwe jenaaj kile m̧oņ an Setan im meļeļe kaki. Jemaron̄ ke dim im kile riab im kareel ko an eo me ej kappukot n̄an kakkure jetōb ko ad im ko̧o̧te kōj jān lan̄lōn̄ eo ad kiiō im ad aibojooj ilju im jekļaj.
Ro jeiū im jatū jitōn bōro, jej aikuj wōnm̧aanļo̧k ilo ad tiljek im mejmejkaruo, tōmak im kile kōkaļļe in kauwōtata ko, bwe āindein ej wāween eo de in n̄an kile m̧ool im n̄an ron̄ ainikien Irooj jān ro Karejaran. “Bwe jetōb ej kōnono m̧ool eo im jab riab. … Men kein rej kwaļo̧k naan n̄an kōj ilo alikkar, n̄an lo̧mo̧o̧ren jetōb ko ad. Bwe Anij eaar barāinwōt kōnono kaki n̄an rikanaan ro etto.”15 Kōj ro Rekwojarjar an Anij Ekajoor Pōtata, kōjadikdik an Israel! Jenaaj ke āliklik? “Jenaaj ke kajjieon̄ kajjej tokjen ak jelm̧ae tariņae? Jaab! … N̄an kien ko an Anij kōn aolepān ad, būruōd, peid, ilo tōmak im m̧ool jenaaj dim wōt.”16
Ij kwaļo̧k aō kam̧ool kōn Ri Kwōjarjar eo an Israel—em̧ool Jisōs Kraist. Ij kam̧ool kōn iakwe eo An edim, m̧ool, im lanlōn̄ rekar kōm̧m̧an bwe en kūrm̧ool kōn pinmuur eo An ejjeļo̧k jem̧ļo̧kin im ej n̄an indeeo. Ilo ad pokake kien ko An, jenaaj bōk tōl aolep iien ilo wāween eo ejim̧we im jamin po ilo m̧oņ. Ilo et eo ekwojarjar etan ad Rilo̧mo̧o̧r, Jisōs Kraist, amen.