Itok, Ļoor Eō—Karōk in Bōbrae Jorrāān eo an Irooj
Irooj ej kōpooj armej ro An ņae kakkure ko an rikapo eo. Itok, Ļoor Eō ej Karōk in Bōbrae Jorrāān eo an Irooj
Jej lan̄lōn̄ ilo ad kweilo̧k ippān doon ilo kweilo̧k in eļap an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ej juon kōjeraam̧m̧an n̄an bōk ļōmņak im ankilaan Irooj jān katak ko an rikanaan ro An im rijilōk ro. Būreejtōn Russell M. Nelson ej rikanaan eo emour an Irooj. Ewi jon̄an ad kam̧m̧oolol kōn ko̧o̧njeļ eo an em̧m̧an im tōl eo jekar bōke rainin.
Ij kobaik aō kam̧ool n̄an ro m̧oktaļo̧k rekar kwaļo̧k. Ij kwaļo̧k naan in kam̧ool kōn Anij, Jemed Indeeo. Ej mour im iakwe kōj im emejraane kōj. Karōk in m̧ōņōņō eo An ej letok kōjeraam̧m̧an eo an mour in im iien ro̧o̧l eo ad tokālik n̄an Im̧aan Mejān.
Ij bar kwaļo̧k aō naan in kam̧ool kōn Jisōs Kraist. E ej Nejin Anij Emake wōt. Ekar lo̧mo̧o̧ren kōj jān mej, im Ej lo̧mo̧o̧ren kōj jān jerawiwi n̄e jej kōjerbal tōmak ilo E im ukweļo̧k. Katok in pinmuur eo An eļap ilo etad ej bōktok kōjeraam̧m̧an ko an jab wabanban im mour indeeo. Em̧ool, Anij ekar kam̧m̧oolol kōn mennin letok eo ejjeļo̧k āinwōt kōn Nejin ekwojarjar” (“Kraist eo Emour: Naan in Kam̧ool an Rijilōk Ro,” Liaona, Apr 2017, tulowaan ilo kilin itum̧aan).
Armej ro Rekwojarjar ipeļaakin laļ in rej jeraam̧m̧an n̄an kabun̄jar n̄an Jisōs Kraist ilo tampeļ ko An. Juon iaan tampeļ ko ej kiiō pād ilo an ekkal ilo Winnipeg, Canada. Kōrā eo pāleeō, Ann Marie, im n̄a ekar wōr juon am̧ro iien loļo̧k jikin ekkal in ilo O̧kwōj in iiō in. Tampeļ eo eaibojooj em̧ōj jin̄n̄aiki im enaaj lukkuun aibojooj n̄e ededeļo̧k. Ijoke, kwoj jab maron̄ bōk juon tampeļ eaiboojoj ilo Winnipeg, ak jabdewōt jikin, eļan̄n̄e ejjeļo̧k juon bedbed eben im dim.
Emmōļoļo im kwoj im an erakrak bwidij eo ekwoj ej jekjek ko ilo Winnipeg im ekōm̧m̧an an apan̄ n̄an kōpooje bedbed eo an tampeļ eo. Kōn menin, kar ļamļame bwe bedbed eo n̄an tampeļ in enaaj kobain 70 biim steel ko rej libobo kōn jimāān. Biim kein rej 60 ne (18 m) aitokier im 12 n̄an 20 inej (30 to 50 cm) debakbakier. Rekar wanlaļļo̧k n̄an bwidej m̧ae iien reitaak ioon dōkā eo ilaļ, enan̄in 50 ne (15 m) lelļo̧k jān ioon bwidej. Ilo wāween in, 70 biim ko rej letok juon bedbed eo epen, dim n̄an tampeļ in enaaj aiboojoj ilo Winnipeg.
Āinwōt Armej ro Rekwojarjar, jej pukot ejja kain bedbed in edim im pen ilo mour ko ad—juon bedbed in jetōb aikuji n̄an ito itak eo an ilo mour in im ad ro̧o̧lļo̧k n̄an kapijuknen eo ad ilan̄. Bedbed in ej ejaake ioon bedbed in oktak tok eo ad n̄an Irooj Jisōs Kraist.
Jej kakeememej tok katak ko an Hilamōn jān Bok in Mormon: “Im kiiō, ro nejū m̧aan, kememej, kememej bwe ej ioon ejm̧aan in an ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko ami; bwe n̄e devil enaaj jilkintok kōto an rekajoor, aaet, mōdi ko an ilo aire, aaet, n̄e aolep wōt dekā im lan̄ rekkajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄” (Hilamōn 5:12).
Kam̧m̧oolol eo, jej mour ilo juon tōre eo im rikanaan ro im rijilōk ro rej katakin kōj kōn Rilo̧mo̧o̧r Jisōs Kraist. Ļoor ko̧o̧njeļ ko aer ej jipan̄ kōj ejaake juon bedbed edim ilo Kraist.
Āinwōt an kar Būreejtōn Russell M. Nelson kōmeļeļeiki ilo Oktoba 2018 kweilo̧k eo eļap, “Jibadbad in kar an Kabun̄ in ium̧win juon iien eaitok ej n̄an jipan̄ aolep membōr ro kōļapļo̧k tōmak eo aer ilo ad Irooj Jisōs Kraist im ilo Pinmuur eo An, n̄an jipan̄ er ilo kōm̧m̧an im kōjparok bujen ko aer ippān Anij, im n̄an kōkajoorļo̧k im liāpe baam̧le ko aer.”20 Ilo rainin an tarpok laļ in, menin ejjab pidodo. Rikapo eo ej kōļapļo̧k an kakkure tōmak ko iood im baam̧le ko ad ilo juon wāween em̧ōkajļo̧k im ļapļo̧k. N̄an maron̄ mour ilo jetōb, jej aikuj jipan̄ jelm̧ae kakkure ko an rikapo eo im karōk karōk ko” (“Naan in Kōpeļļo̧k,” Liaona, Nov. 2018, 7; naan in eaorōk kar kobaiktok).
Ālkin ekōnono eo an Būreejtōn Nelson, Elder Quenin L. Cook jān Doulul eo an Jon̄oulruo Rijilōk ro rekar kwaļo̧k kadkad in Itok, Ļoor Eō kein jipan̄ n̄an kajjojo armej im baam̧le ko. Naan ko an ekitbuuj ļaajrak in ennaan kein:
-
Kein ekkatak eo ilo m̧weo ekāāl Itok, Ļoore Eō kein jipan̄ eo… kar ejaake n̄an jipan̄ membōr ro ekkatak gospel eo ilo m̧weo.”
-
“Kein jipan̄ in ej n̄an aolep armej im baam̧le ko ilo Kabun̄ in’ [Itok, Ļoor Eō—N̄an Kajjojo Armej im Baam̧le ko (2019), vi].”
-
“Jibadbad eo an ej n̄an kajokkuun wōt juon en̄jake ko ilo Kabun̄ in im m̧weo ilo juon wāween me enaaj kanooj kōļapļo̧k tōmak im ilo jetōb im kam̧wilaļļo̧k oktak eo n̄an Jemedwōj Ilan̄ im Irooj Jisōs Kraist.” (“Oktak eo Em̧wilaļ im Aitok Kitien n̄an Jemedwōj Ilan̄ im Irooj Jisōs Kraist.,” Liaona, Nob 2018, 9–10.)
Ijjino ilo Jānwōde in iiō in, Armej ro Rekwojarjar ipeļaakin laļ in renaaj jino ekkatak Kallim̧m̧ur Ekāāl, ippān Itok, Ļoor Eō kein jipan̄ eo āinwōt juon unin tōl. Ippān juon jikejuuļ an kajjojo wiik, Itok, Ļoor Eō ej jipan̄ kōj katak jeje ko rekwojarjar, katak ko an gospel eo, im katak ko an rikanaan ro im rijilōk ro. Ej juon kein jipan̄ em̧m̧an n̄an kōj aolep.
Ālkin ratimjuon allon in kijejeto n̄an ekkatak jeje ko rekwojarjar ipeļaakin laļ in, ta eo jej loe? Jej loe an Armej ro Rekwojarjar aolep jikin eddōkļo̧k ilo tōmak im wujlepļo̧k n̄an Irooj Jisōs Kraist. Jej loe an kajjojo armej im baam̧le ko kōjeno̧lo̧k juon iien ilo wiik eo n̄an ekkatak naan ko an Rilo̧mo̧o̧r eo ad. Jej loe em̧m̧anļo̧k in kōmeļeļe ko an gospel eo ilo kūlaaj in Jabōt Jikuuļ ko ad ilo ad ekkatak jeje ko rekwojarjar ilo m̧weo im kwaļo̧k ad ļōmņak ilo m̧ōnjar eo. Jej loe an ļapļo̧k an baam̧le eo lan̄lōn̄ im ippān doon ilo ad kar em̧m̧akūt jān baj riiti jeje ko rekwojarjar n̄an ekkatak jeje ko rekwojarjar ilo juon wāween em̧m̧an.
Ekar aō jeraam̧m̧an n̄an loļo̧k elōn̄ Armej ro Rekwojarjar im ron̄ lukkuun en̄jake ko aer kōn Itok, Ļoor Eō. Kōmeļeļe ko aer kōn tōmak ej kobrak būruwō kōn lan̄lōn̄. Erkein rej jejjo iaan ennaan ko ikar ron̄ jān elōn̄ ro uwaan Kabun̄ in ilo m̧ōttan ko reoktak ilo laļin:
-
Juon baba ekar ba: “Ij lan̄lōn̄ kōn Itok, Ļoor Eō ilo an letok juon iien em̧m̧an n̄an kam̧ool kōn Rilo̧mo̧o̧r eo n̄an Ajri ro nejū.
-
Ilo bar juon em̧: juon ajri ekar ba, “En̄in ej juon iien n̄an ron̄jake an jinō im jema kwaļo̧k naan in kam̧ool ko aer.
-
Bar juon m̧am̧a ekar ba: “Kōm̧ ar im̧we kōn wāween likūt Anij m̧oktata. Iien eo am [kōm̧ kar ļōmņak] bwe ejjeļo̧k ekar [obrak] kōn kōjatdikdik, lan̄lōn̄, aenōm̧m̧an, im tōprak ilo wāween ko kōm̧ ar jab jeļā ke remaron̄.”
-
Ruo ripālele rekar kwaļo̧k: “Kōm̧ij riiti jeje ko rekwojarjar im elukkuun oktak jān am kar riiti ippāer m̧okta. Kōm̧ij ekkatak eļapļo̧k jān am kar ekkatak m̧okta. Irooj ej kōņaan bwe jen loi men ko roktak. Irooj ej kōpooje kōj.”
-
Juon m̧am̧a ekar kōnono: “Ij m̧ōņōņō bwe kōm̧ij ekkatak ejja katak eo ippān doon. Jinoin, kōm̧ij riiti. Rainin, kōm̧ij ekkatak kake.”
-
Juon sister ekar kwaļo̧k loļo̧kjeņ in em̧m̧an: “M̧okta, ekar pād ippam katak eo im eoon ko rej ekkejel ippān. Kiiō, epād ippem eoon ko im katak eo ej ekkejel ippān.”
-
Bar juon sister ekar ba: “Ij en̄jake juon oktak n̄e ij kōm̧m̧ane [keidi n̄an] n̄e ijjab. Ij loe bwe epidodoļo̧k n̄an kōnono n̄an ro jet kōn Jisōs Kraist im tōmak ko ad.”
-
Juon bubu ekar ba: “Ij kūrtok ajri ro jibū im ajri ro jibū jibū im kwaļo̧k ļōmņak ko jān Itok, Ļoor Eō ippān doon.”
-
Juon sister ekar etale: “Itok, Ļoor Eō ej āinwōt n̄e Rilo̧mo̧o̧r eo ej jerbal in karejar n̄an n̄a. Ej im̧we jān lan̄.”
-
Juon baba ekar ba: “N̄e jej kōjerbal Itok, Ļoor Eō, jej āinwōt ajri ro nejin Israel, rej kōkkaļļeiki dibin kōjem̧ ko aer, kōjparoke baam̧le ko ad jān kareel ko an rikkakure eo.”
Ro jeiū im jatū, ej juon lan̄lōn̄ n̄an lowaj kom̧ im ron̄jake wāween an kijejeto ko ami kōn Itok, Ļoor Eō kōjeram̧m̧an mour ko ami. Kom̧ em̧m̧ool kōn wujlepļo̧k ko ami.
Ekkatak jeje ko rekwojarjar ippān Itok, Ļoor Eō āinwōt juon unin tōl ej kōkajoorļo̧k oktak eo ad n̄an Jisōs Kraist im gospel eo An. Kōj jejjab baj jāniji juon awa ekaduļo̧k ilo m̧ōnjar eo ilo Jabōt n̄an juon awa eļapļo̧k n̄an ekkatak jeje ko rekwojarjar ilo m̧weo. Ekkatak gospel eo ej juon kijejeto aolep iien ilo aolepān wiik eo. Āinwōt an juon sister kar kwaļo̧k ippa, “Kōttōbar eo ejjab n̄an kōkaduļo̧k juon awa ilo m̧ōnjar eo, ej n̄an kaitokļo̧k awa in katak jiljino raan aeitokan!”
Kiiō, ļōmņak kōn kakkōl eo an rikanaan eo, Būreejtōn Nelson, ekar kwaļo̧k ilo iien kōppeļļo̧k eo ilo Oktoba 2018 kweilo̧k eo eļap.
“Rikapo eo ej kōļapļo̧k an kakkure tōmak ko iood im baam̧le ko ad ilo juon wāween em̧ōkajļo̧k im eiiemļo̧k. N̄an mour ilo jetōb, jej aikuj jipan̄ jelm̧ae kakkure ko an rikapo eo im karōk karōk ko” (Naan in Kōppeļļo̧k ko,” 7).
Innem (tarrin 29 awa tokālik) ilo ālikin raelep in Jabōt, ekar kilōk kweilo̧k eo kōn kallim̧ur in: “Ilo ami tiljek jerbal n̄an bar kōkāāl m̧weo im̧ōmi n̄an juon jikin ekkatak gospel eo, … kareel ko an rikapo eo ilo mour eo ami im ilo m̧weo imōmi enaaj dikļo̧k” (“Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” Liaona, Nob. 2018, 113).
Ewi wāween an kakkure ko an rikapo eo ļapļo̧k im eiiemļo̧k ilo ejja iien eo wōt kareel ko an rikapo eo ej lukkuun dikļo̧k? Emaron̄ waļo̧k, im ej waļo̧k ilo aolepān Kabun̄ in, kōnke Irooj ej kōpooje armej ro An ņae kakkure ko an rikapo eo.. Itok, Ļoor Eō ej karōk in bōbrae jorrāān eo an Irooj. Āinwōt an Būreejtōn Nelson katakin, “Kein katak eo ekāāl an m̧weo, im Kabun̄ in ej rie ewōr an kajoor n̄an kōļapļo̧k kajoor eo an baam̧le ko.” Ijoke, ej kōm̧m̧ane im enaaj aikuji kijejeto ko ad rem̧m̧antata, jej aikuj in “[ļoore] aolepān iien in kijejeto im kōjparok n̄an ukōt m̧ōko m̧weer n̄an juon jikin kone an tōmak” (“Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” 113).
Āliktata, āinwōt an Būreejtōn kar bar ba, “Kōj kajjojo rej bōk eddo in eddōkļo̧k eo ad kajjojo ilo jetōb (“Naan in Kōppeļļo̧k ko,” 8).
Kōn Itok, Ļoor Eō kein jipan̄ eo, Irooj ej kōpooje kōj “n̄an iien ko renana me jej kiiō jelm̧ai” (Quentin L. Cook, “Oktak eo Em̧wilaļ im Aitok Kitien n̄an Jemedwōj Ilan̄ im Irooj Jisōs Kraist,” 10). Ej jipan̄ kōj ejaake bwe “pedped em̧ool, pedped eo eļan̄n̄e armej rej ekkal ioon rej jamin bun̄” (Hilamōn 5:12)—pedped in juon naan in kam̧ool ej an̄kō edim ilo dōkā ilo pedped in ekōnono ko ad ippān Irooj Jisōs Kraist.
Kijejeto ko ad aolep raan ilo ad ekkatak jeje ko rekwojarjar rej karreoik kōj im kam̧ool ad erreo kōn kallim̧ur kein kar kallim̧ur kaki. Ij jar ilo etan Jisōs Kraist, amen.