Ennaan eo, Meļeļe eo, im Jarlepju eo
Kōn ainikien ko reļļaaj im tarpok ko ejjeļo̧k jem̧ļo̧kier ilo raan kein, jemaron̄ ke kajjieon̄ kalimjōk Kraist āinwōt pedped eo an mour ko ad, tōmak ko ad, im jerbal in jipan̄ ko ad.
Ro jeiū im jatū, en̄in ej Sammy Ho Ching, jiljilimjuon an allōn̄, ej alooje kweiļo̧k eo eļap ilo tipi ilo m̧weo im̧ōn Eprōļ eo ļo̧k.
Ke ekar epaaktok iien n̄an reejtake Būreejtōn Russell M. Nelson im Ritōl ro jet Routiej, pā ko pein Sammy raar boub in jibwe bato eo nimen. Kōn menin ekar kōm̧m̧ane men eo tok juon em̧m̧an tata.
Sammy eaar letok juon meļeļe ekāāl kōn ļōmņak eo n̄an bout kōn neem̧.
Kom̧ ruwainene tok n̄an m̧ōttan eo kein karuo an kweilo̧k eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata. N̄an kwaļo̧k kadkadin juon ekōnono kōn meļeļein kuktok kein ruo alen juon iiō, ij kwalok juon bwebwenato jān bwebwenato eo an Luk ilo Kallim̧ur Ekāāl:1
“Im ke [Jisōs] Ej kepaak n̄an Jeriko, juon armej e pilo ej jijet iturin iaļ im owar:
“… Ej ron̄ [juon] jar eo rej kijoone, ej kajjitōk ta jein.
“… Rej kōnnannōk e, Jisōs ri Nazeret Ej kijoone.
“Im ej lam̧ōj im ba, Jisōs Nejin Devid, Kwōn tūriam̧okake eō.”
Ļo̧kjeņ aer kōn an kajju, jarlepju eo eaar kajjieon̄ kaikōn̄ em̧m̧aan eo, bōtaab “a eļapļo̧k an lam̧ōj,” ej ba. Āinwōt juon tōprak in kijenmej, kar bokļo̧k e n̄an Jisōs, wōn eo ekar ron̄ kajjitōk eo an eobrak kōn tōmak n̄an kaloļo̧kjeņ e im kar kōmour e.2
Ij ebōkak kōn en̄jake in ekadu ealikkar ilo pijaikļo̧k aolep iien ij riiti. Jemaron̄ en̄jake liaajlọḷ eo an em̧m̧aan eo. Jon̄an jemaron̄ kar ron̄ an lam̧ōj bwe Rilo̧mo̧o̧r en elļo̧k n̄an e. Jej ettōn̄ dikdik kōn an makoko in ikōn̄—em̧ool, an kijejeto n̄an kōļapļo̧k ainikien ke aolep raar ba bwe en kadikļo̧k ainikien. Ej, ilo im kōn e make, juon bwebwenato em̧m̧an kōn lukkun kije ilo tōmak. Bōtaab ejja āinwōt ilo aolep jeje ko rekwojarjar, an ļapļo̧k ad riiti, eļapļo̧k ad meļeļe.
Juon kōļm̧enļo̧kjen eaar jiktok ippa ej māletlet an em̧m̧aan in kōn armej ro ipeļaakin me remeļeļe kōn mour in jetōb. Aolepān aorōkin bwebwenato in ej pedped ioon boub an bwijin kōrā im em̧m̧aan ro me jab jeļā kake er, ke kar kajjitōk jān ro m̧ōttaer, “Ta meļeļe in ikūtōltōl in?” ekar im̧we, eļan̄n̄e konaaj, kile Kraist āinwōt un eo n̄an kajjitōk in; E eo ekar Unleplep in ikūtōltōl in. Ewōr juon katak ilo kōnono in ekadu n̄an kōjwōj aolep. Ikkijeen tōmak im kijejeto, ejipan̄ n̄an bokļo̧k kajjitōk eo am̧ n̄an ro me ilo m̧ool ewōr aer tōmak im kijejeto! “Ripilo emaron̄ ke tōl ripilo?” Juon iien Jisōs ekar kajjitōk. “[Eļan̄n̄e āindein,] Rejro jāmin bun̄ ilo ro̧n̄ ke?”3
Jibadbad kōn tōmak im kijejeto ej kōttōpar eo ad ilo kweilo̧k in eļap, im ilo ami kobatok ippād rainin, konaaj kile bwe etale in ej juon kijejeto n̄an kōttōpar. Reito Reitak ipeļaakim̧. Ijin ilo meļan im̧ōn kweilo̧k in kwoj lo baam̧le ko kōn aolep dettan ko rej itok jān aolep jikin. Ro m̧ōttad jān jemaan rej atbo̧kwōj doon ilo bar ippān doon in ekam̧ōņōņō, juon kumi in al ekabwilōn̄lōn̄ rej kōpooj er n̄an al, im rijum̧ae ro rej lam̧ōj jān ioon bo̧o̧k in jutak eo aer em̧m̧an tata ippāer. Mijenede ro etto rej kappukot ro kar m̧ōttaer, ilo an mijenede ro rej kab ro̧o̧l rej kappukot ro m̧ōttaer rekāāl (n̄e komeļeļe ta in ij ba!). Im pija ko? Lan̄ en jipan̄ kōj! Kōnke aolep ewōr aer cell phone, jibadbad eo ad em̧ōj an oktak jān “aolep membōr rej mijenede” n̄an “aolep membōr rej ripija.” Ilo ioļapļap in aolep ikūtōltōl in ekam̧ōņōņō, juon emaron̄ kajjitōk ilo em̧m̧an “Ta meļeļe in aolepān men in?”
Āinwōt ilo bwebwenato eo ad ilo Kallim̧ur Ekāāl, ro kar kōjeraam̧m̧an er kōn loļo̧kjeņ renaaj kile bwe, kōjekdo̧o̧n aolep men ko jet kweilo̧k in iminene kake maron̄ letok n̄an kōj, enaaj dik meļeļe in ak ejjeļo̧k mae iien jej mije Jisōs āinwōt pedped eo io̧ļapļap in men otemjej. N̄an maron̄ bōk meļeļe eo jej kappukote, kōmour eo me Ej kallim̧ur kake, aorōk eo me jejeļā kake epād ijin, jej aikuj m̧ad ilo ikūtōltōl in—m̧ōņōņō āinwōt an kam̧ōņōņō—im kam̧ad ad n̄an Ippān. Jar eo an aolep rikōnono, kōjatdikdik eo an aolep ro rej al, kautiej eo an aolep rilo̧tok—aolep rej ajeļo̧k n̄an kūrtok Jetōb eo An Eo me an Kabun̄ in—Kraist eo emour, Ļaam̧ eo an Anij, Irooj in Irooj raņ.
Bōtaab jejjab aikuj in pād ilo imōn kweilo̧k in n̄an lo E. N̄e ej kab kein kajuon in an juon ajri riiti Bok in Mormon im ej kanooj lem̧ōņōņō kōn peran eo an Abinadai ak etal eo an 2,000 ritariņae ro, jemaron̄ jouj im kobaikļo̧k bwe Jisōs ej iien otemjej pedped eo ilo ļo̧o̧k in ekabwilōn̄lōn̄, jutak āinwōt kakōļļe ioon enan̄in aolep peij ko an im ej letok ekkeijel eo an n̄an aolep jekjek ko je n̄an kōkōm̧anm̧an tōmak eo ie.
Ejja āinwōt, n̄e juon m̧ōttad ej ekkatak kōn kabun̄ in ad, emaron̄ in pok jidik kōn jet iaan m̧ōttan ko reoktak im naan ko jab jeļā kaki an kabun̄ in ad—mo̧ ko ikkijeen idaak im m̧ōn̄ā, kein jipan̄ ko an un̄n̄are-peid make, iaļ ko an bainieer, menmenbwij an baam̧le ilo digital, kōn kanooj lōn̄ in stake jāntōr ko ijo jet rej ļōmņak imōn m̧ōn̄ā ijo rej kōmat stake ko, jon̄an aer mat ekkar n̄an kōņaan an ro rej m̧ōn̄ā. Kōn menin, ilo an ro m̧ōttad lo im ron̄ elōn̄ men ko me rej kāāl n̄an er, jej aikuj jipan̄ er meļeļe kōn meļeļe in im jibadbad eo an aolep kapokpok ko im menin kam̧ad ko rej loi im ron̄, pedped ioon kalimjōk wōt gospel eo indeeo—iakwe eo an ro Jined im Jemed Ilan̄, menin letok eo an pinmuur eo an Nejin ekwojarjar, tōl in kaenōm̧m̧an an Jetōb Kwojarjar, jepļaaktok eo ilo raan ko āliktata an aolep m̧ool kein im elukkuun bar lōn̄.
N̄e juon ej etal n̄an tampeļ eo ekwojarjar ej kab kein kajuon, emaron̄ ilo juon wāween tarpok kōn en̄jake eo. Jerbal eo ad ej n̄an kanooj lale bwe kakōļļe ko rekwojarjar im m̧akūtkūt ko rej waļo̧k, nuknuk ko kōņaki im iien kwaļo̧k pija ko, rej jab kein kam̧ad jān ak ijello̧kin jipan̄ armej eo n̄an mije wōt Rilo̧mo̧o̧r, Eo jej pād ijen n̄an kabun̄jar n̄an E. Tampeļ eo ej m̧weo Im̧ōn, im E eo ej aikuj ilōn̄tata ilo ļōmņak ko ad im būruōd—katak eo eaibojooj an Kraist ej walo̧k ilo aolep m̧ōttan ko ilo kōj ejja āinwōt an waļo̧k ilo aolep m̧ōttan ko ilo kain̄i ko an tampeļ—jān iien eo jej riiti jān ioon m̧aan kōjām eo n̄an iien eo āliktata jej joļo̧k ilowaan m̧win. Ioļapļap in aolep kabwilōn̄lōn̄ kein iooni, jej aikuj loe, eļapļo̧k jān men otemjej, meļeļe eo an Jisōs ilo tampeļ eo.
Kōļmeļo̧kjen kōn lōn̄ in wōnm̧aanļo̧k ko rekajoor im ennaan ko rekāāl ilo Kabun̄ in ilo allōn̄ ko rej jem̧ļo̧kļo̧k. Ilo ad jerbal in karejar n̄an doon, ak kōkōm̧anm̧anļo̧k en̄jake eo ad kōn Jabōt, ak kaorōk juon būrookraam̧ kāāl n̄an ajri ro im jodikdik ro, jenaaj likjab jān lukkuun un eo n̄an oktak kein itok lo revelesōn eļan̄n̄e jej loi āinwōt reeinjuon, m̧ōttan ko roktak ijello̧kin kijejeto ko rej ekkeijel n̄an jipan̄ kōj ekkaļ pen ioon Dekā in Lo̧mo̧o̧r eo ad.4 Em̧ool, em̧ool, en̄in ej ta jibadbad eo an Būreejtōn Russell M. Nelson bwe jen kōjerbal āt eo kar kwaļo̧k etan Kabun̄ in.5 Eļan̄n̄e Jisōs—Etan, An katak, An waanjon̄ak, An kwojarjar—emaron̄ erom̧ m̧ōttan eo eaorōk tata ilo ad kabun̄jar, jenaaj bar kōkajoorļo̧k m̧ool eo eļap me juon iien Alma ekar katakin: “Enaaj lōn̄ men ko renaaj itok; [bōtaab] lo, e wōr juon e aorōkļo̧k jān aolep— … Ripinmuur [eo] e mour im ej itok ilubwiljin armej ro an.”6
Juon lōmņak n̄an kōjemļo̧ke: Ilo 19th bukwi iiō an Josep Smith kōtaan peļaak ko eaar m̧ōkaj an ajedik kōn jarlepju in rikam̧ool in Rikūrijtin ro rej jie ippān doon.7 Bōtaab ilo elam̧ōjm̧ōj eo raar ejaake, rein rej tōmak ilo kabun̄ reitok limoer, pen aer loe ejja Rilo̧mo̧o̧r eo wōt me Josep eo edik eaar lukkuun pukote. Tariņaeik ta eo ekar ņa etan “marok im pok,”8 eaar bokļo̧k e n̄an juon jikin emakeļo̧k ilo bukwin wōjke ko ijo eaar lo im ron̄ juon kam̧ool aiboojoj kōn aorōk eo an Rilo̧mo̧o̧r n̄an gospel eo jān jabdewōt ta ko kar kōnono kaki ijin ke ej jibbon̄. Kōn juon menin letok an loļo̧kjeņ eo me ekar jab kōtmene ak ļōmņak emaron̄ kar waļo̧k, Josep eaar lo Jemen Ilan̄ ilo visōn, Anij ļapļap eo an aolepān laļ, im Jisōs Kraist, Nejin Emake Wōt Jitōn Bōro eweppān. Innām eo Jemed eaar kōm̧m̧ane waanjon̄ak in ta eo me kar ekōnono kaki kiiō jibbon̄: Ekar jitōn̄ļo̧k Jisōs, im ba, “En̄iin ej Neju Jitōn bōro. “Ron̄jake E!”9 Ejjeļo̧k en̄jake eļapļo̧k kōn paotok kwojarjar eo an Jisōs, aorōk eo eutiej pōtata An ilo karōk in lo̧mo̧o̧r eo, im ļōmņak eo an Anij kōn E emaron̄ ļapļo̧k jān naan ko jiljilimjuon.
Ikūtōltōl im kapokpok? Jarlepju ko im iakweleel? Elukuun lōn̄ men kein aolep ilo laļ in ad. Aaet, rijum̧ae im ritōmak ro rekab de iakwelel kōn visōn in im enan̄in aolep men ko jet iaar kōnono kaki rainin. Eļan̄n̄e kwoj kajjieon̄ in bwe en lo an alikkarļo̧k im kappukot meļeļein ilo ioļapļap in juon kōro̧ro in ļōmņak ko, ij kōketak eok n̄an kappukot uwaak eo ippān ejja Jisōs in wōt im kwaļo̧k kam̧ool an rijilōk kōn en̄jake eo an Josep Smith, itok āinwōt an kar waļo̧k jet 1,800 jim̧a iiō ko ālkin an eo m̧ōttad epilo kar bar loļo̧kjeņ ilo iaļ eo ļo̧k n̄an Jericho eo etto. Ij kam̧ool kōn men kein ruo im ekanooj lōn̄ ro jet ilo aolep tōre me em̧ool loļo̧kjeņ eo im ainikien eo an mour in ekanooj kōbalbal ej bwe Jisōs ejjab eļļāļo̧k wōt jān10 ak Ej itok n̄an kōj, bōjrak itu rejetiid, im pād ippād wōj.11
Ro jeiū im jatū, kōn ainikien ko reļļaaj im tarpok ko ejjeļo̧k jem̧ļo̧kier ilo raan kein, jemaron̄ ke kajjieon̄ kalimjōk Kraist āinwōt pedped eo an mour ko ad, tōmak ko ad, im jerbal in jipan̄ ko ad. En̄in ej ijo m̧ool eo ej pād ie. Im eļan̄n̄e jet raan vison eo ad ewōr jon̄an, ak ad lōke ej dikļo̧k, ak ad tōmak ej idajon̄jon̄ im kōkāāle—āinwōt em̧ool enaaj—ij kōjatdikdik jenaaj lam̧ōj em̧ool eperanļo̧k, “Jisōs Nejin Devid, Kwōn tūriam̧okake eō.”12 Ij kallim̧ur kōn ellowetak eļap an rijilōk im kam̧ool eo an rikanaan bwe E enaaj ron̄jake eok im naaj ba, kiiō ak tokālik, “Kwōn loļo̧kjeņ: am̧ tōmak ej kemour eok.”13 Kom̧wōj ruwainene n̄an kweilo̧k eo eļap. Ilo etan Jisōs Kraist, amen.