Leddik ro Nejin Rejitōn Bōro

Jān Bonnie H. Cordon

Būreejtōn eo Eļap an Doulul eo an Jiron̄ ro

Ilo ioļapļap in aolep men jej kōm̧m̧ane ilo Doulul eo an Jiron̄ ro ej ikdeelel eo ad n̄an jipan̄ kom̧ bōk juon tōmak ilo Irooj Jisōs Kraist.

Sister ro jeiū im jatū jitōn bōro, ej juon lan̄lōn̄ n̄an pād ippāmi! Jej kam̧oole juon lutōk tok in revelesōn me ej jim̧or kajjieon̄ in jetōb im ekanooj kam̧ōņōņō.

Ilo ad ijjino, ikōņaan kwaļo̧k kadkad in n̄an kom̧ jet m̧ōtta; rej jiron̄ ro ejej uwaer ilo tōļan, m̧anit, im jekjek eo an kajjojo im baam̧le. Kajjojo iaer, āinwōt aolepāmi, raar im̧we eō ilo en̄jake.

M̧oktata, jeļā kajjien Bella. Liin ej jutak pen āinwōt jiron̄ eo de eo ilo branch eo an ilo Iceland.

Jeļā kajjien Josphine eo euwijlepļo̧k jān Africa, eo eaar bar kallim̧ur n̄an ekkatak Bok in Mormon eo aolep raan. Liin ej lo kajoor eo im kōjeraam̧m̧an ko me rej itok jān jerbal in eļam waan, etiljek.

Im āliktata, jeļā kajjien m̧ōtta eo ejitōn bōro Ashtyn, juon jiron̄ eo elukkuun kabwilōn̄lōn̄ eo ekar mej ālkin jiljino iiō ko in tariņae ippān kānjōr. Naan in kam̧ool eo an ekajoor kōn Pinmuur eo an Jisōs Kraist ekab de jelet būruwō.

Kom̧ij aolep jiron̄ ro rekabwilōn̄lōn̄. Ejej uwaami, kajjojo kōn menin letok ko ami make im en̄jake rekab de āinwōt juon wāween elukkuun in aorōk im indeeo.

Kom̧ij lukkuun in leddik in jetōb ro nejin Jemād im Jined Ilan̄, im ejjeļo̧k emaron̄ kōjepeļļo̧k kom̧ jān iakwe eo Aer im iakwe eo an ami Rilo̧mo̧o̧r.¹ Ilo ami kepaakļo̧k E, em̧ool bōk bun̄tōn ko reddik tata m̧aanļo̧k, kom̧ naaj lo aenōm̧m̧an eo aitok kitien me ej pād ilo jetōb eo ami āinwōt juon rikaļoor etiljek an ad Rilo̧mo̧o̧r, Jisōs Kraist.

Būreejtōn Russell M. Nelson, rikanaan eo ad ejitōn bōro, eaar kajjitōk bwe in kwaļo̧k jet oktak ko reim̧we me renaaj jipan̄ kom̧ “kaddōk kōjatdikdik eo an juon make eo [ami]”² im kōļapļo̧k kareel eo ami ejim̧we. Inaaj kōnono kōn emān eria ko an oktak eo joteen in.

Unin Tōl eo an Doulul eo an Jiron̄ ro

M̧oktata, ilo ioļapļap in aolep men jej kōm̧m̧ane ilo Doulul eo an Jiron̄ ro ej ikdeelel eo ad n̄an jipan̄ kom̧ bōk juon tōmak ilo Irooj Jisōs Kraist edim³ im juon jeļāļo̧kjeņ em̧ool kōn piktok kwojarjar eo ami āinwōt juon leddik nejin Anij.

Joten in, ikōņaan kōjjeļā kōn juon oktak n̄an unin tōl eo an Doulul eo an Jiron̄ ro. Ij jar kom̧ naaj en̄jake Jetōb Kwojarjar an kam̧ool kōn m̧ool eo an naan kein ilo aō ba unin tōl eo ekāāl:

N̄aij juon leddik jitōn bōro nejin jemād im jined ilan̄,⁴ kōn juon piktok ekwojarjar im mejān kajjik indeeo.⁵

Āinwōt juon rikaļoor an Jisōs Kraist,⁶ Ij kajjieon̄ n̄an eromļo̧k āinwōt E.⁷ Ij kappukōt im jerbale revelesōn an juon make⁸ im jerbal in karejar n̄an ro jet ilo Etan ekwojarjar.⁹

Inaaj jutak āinwōt juon rikam̧ool an Anij ilo aolep iien ko im ilo aolep men otemjeļo̧k im ilo aolep jikin ko.¹⁰

Ilo aō kajjieon̄ n̄an karbōb n̄an mour āinwōt Anij,¹¹ Ij kaorōk menin letok eo an ukweļo̧k¹² Iim kappukōt n̄an em̧m̧anļo̧k kajjojo raan.¹³ Kōn tōmak,¹⁴ Inaaj kōkajoorļo̧k ijo ij jokwe ie im baam̧le eo,¹⁵ kōm̧m̧an im kōjparok bujen ko rekwojarjar,¹⁶ im bōk kain̄i ko¹⁷ im kōjeraam̧m̧an ko an tampeļ eo ekwojarjar.¹⁸

Kile oktak eo jān “jej” n̄an “Ij.” M̧ook kein rej jerbal n̄an kom̧ kajjojo. Kom̧ij juon leddik jitōn bōro nejin Jemād im Jined Ilan̄. Kom̧ij juon bujen rikaļoor an ad Rilo̧mo̧o̧r, Jisōs Kraist. Ij kajjitōk ippāmi n̄an ekkatak im kejekļo̧kjeņ kōn naan kein. Ijeļā bwe ilo ami kōm̧m̧ane, kom̧ naaj bōk juon naan in kam̧ool kōn tarlep in m̧ool eo aer. Meļeļe m̧ool kein renaaj ukōt wāween ami jelm̧ae apan̄ ko. Jeļā kōn piktok eo im jibadbad eo ami enaaj jipan̄ kom̧ kobaik ankilami ippān ankilan Rilo̧mo̧o̧r eo.

Kom̧ naaj lo aenōm̧m̧an im tōl ilo ami ļoor Jisōs Kraist.

Kūlaaj ko an Doulul eo an Jiron̄ ro

Eria eo kein karuo an oktak eo ejelet kūlaaj ko an Doulul eo an Jiron̄ ro. Elder Neal A. Maxwell eaar ba, “Ekanooj emakijkij ta eo armej eknooj ļap aer aikuji ej n̄an jālitak jān lan̄ ko an mour in ilo juon im̧ōn aer kone.”¹⁹ Kūlaaj ko ad raikuj in m̧ōn kone ko jān lan̄ ko, jikin ko rōkon an iakwe im wōjān. Ilo juon kijejeto n̄an kalōk eļapļo̧k ippān doon, kōkajoorļo̧k jemjerā ko, im kōļapļo̧k en̄jake eo an uwaan Doulul eo an Jiron̄ ro, kōmij kōm̧m̧ane jet oktak ko n̄an jekjek in kūlaaj.

Aitokļo̧k jān 100 iiō, jiron̄ ro rekar ajej n̄an jilu kūlaaj ko. Ijjino ilo iien eo em̧ōkaj tata, kōmij kajjitōk ippān ritōl ro an Doulul eo an Jiron̄ ro im bisop ro n̄an jar ilo ļōmņak kōn aikuj ko an kajjojo jiron̄ ro im karōk er ekkar n̄an jekjek ko rejeno̧lok an ward eo. Erkein rej jet waanjon̄ak ko kōn ekōjkan an menin maron̄ ejaak.

• Eļan̄n̄e ewōr wōt jejjo am̧ jiron̄ ro, emaron̄ wōr wōt juon am̧ kūlaaj an Doulul eo an Jiron̄ ro ilo an aolep kweilo̧k ippān doon.

• Bōlen ewōr juon am̧ kumi in jiron̄ ro 12 iiō dettaer innām juon kumi edik in jiron̄ ro me rōrūttoļo̧k. Komaron̄ kāālet n̄an kōm̧m̧ane ruo kūlaaj ko: Doulul eo an Jiron̄ ro 12 im Doulul eo an Jiron̄ ro 13–18.

• Ak eļan̄n̄e ward eo am̧ eļap kōn 60 jiron̄ ro rej pād ie, komaron̄ kōm̧m̧ane jiljino kūlaaj ko, juon n̄an kajjojo iiō dettan, karōke kōn iiō.

Ijo wōt ke kūlaaj ko ami rej ejaak, kom̧ jiron̄ raņ kom̧ij aorōk ilo kalōk ippān doon eo. Erom juon meram n̄an ro ipeļaakūmi. Erom unjen iakwe eo im kea eo kom̧ij kōjatdikdik n̄an bōk jān ro jet. Kōn juon jar ilo būruwōmi, wōnm̧aanļo̧k wōt n̄an kwaļo̧k jouj im erom kareel eo n̄an em̧m̧an. Ilo ami kōm̧m̧an āindein, mour eo ami enaaj obrak kōn jouj. Enaaj wōr juon en̄jake em̧m̧anļo̧k ami n̄an ro jet im naaj jino lo em̧m̧an eo aer n̄an kom̧.

Etan Kūlaaj ko an Doulul eo an Jiron̄ ro

Jilu, kōn ejaak in ekāāl an kūlaaj, aolep kūlaaj ko naaj kōnono kake kōn āt eo ej kakobaba an “Doulul eo an Jiron̄ ro.”²⁰ Enaaj bōjrak ad kōjerbal āt ko an “Beehive,” “Mai Maid,” im “Laurel.”

Kōkajoorļo̧k Būreejtōnji ko an Kūlaaj

Eria eo āliktata ikōņaan kōnono kake ej aorōk eo an būreejtōnji ko an kūlaaj. Jekdo̧o̧n ta ekōjkan an kūlaaj ko an Doulul eo an Jiron̄ ro ejaak, aolep kūlaaj aikuj wōr juon aer kūlaaj būreejtōnji!²¹ ej kōn karōk ekwojarjar bwe jiron̄ ro rej kūr n̄an tōl ilo aer jodikdik.

Jerbal eo im jibadbad eo an kūlaaj būreejtōnji ko ekar n̄an kōkajoorļo̧k im ļapļo̧k an kalikkar kōmeļeļeik. Jerbal in lo̧mo̧o̧r ej juon iaan eddo kein raorōk, eļap tata ilo eria ko an jerbal in karejar, jerbal in mijenede, jerbal in kōkajoorļo̧k, im jerbal an tampleļ im menmenbwij an baam̧le.²² Aaet, en̄in ej wāween ad aiintok Israel²³—juon jerbal eaiboojoj n̄an aolep jiron̄ ro āinwōt ro uwaan jarin tariņae eo an Irooj.

Āinwōt ami jeļā, Ilo aolep jon̄ak ko an Kabun̄ in, Irooj ej kūr būreejtōnji ko n̄an tōl armej ro An. Jiron̄ raņ, erom juon membōr in juon kūlaaj būreejtōnji emaron̄ in iien eo em̧m̧an am̧ kein kajuon n̄an bōk kuņam̧ ilo jon̄ak in eim̧we an ritōl. Ritōl ro rōrūtto, kōm̧m̧ane kūr eo an kūlaaj būreejtōnji ko juon kōttōpar aorōk tata innām tōl ippāer, katakin im tōl er bwe ren maron̄ tōprak.²⁴ Jekdo̧o̧n ta jon̄an in tōl eo an juon kūlaaj būreejtōnji kar, jino ijo rej pād ie im jipan̄ er kōļapļo̧k kapeel ko im lōke eo me enaaj kōjeraam̧m̧an er āinwōt ritōl ro. Pād epaake er, bōtaab jab kōjōbwebwe. Jetōb eo enaaj tōl eok ilo am̧ tōl er.

N̄an kwaļo̧k jerbal eo aorōk an ro jemān im jinen im ritōl ro āinwōt rikatakin ro, in jiron̄ kom̧ juon bwebwenato. Chole kar kūri n̄an jerbal āinwōt juon kūlaaj būreejtōn. Ritōl eo an ilo priesthood elo̧ļe eaar kōketak e n̄an kappukōt jipan̄ eo an Irooj ilo elmakote āt ko n̄an būreejtōnji eo an. Chole ekar jar im kar bōk im̧we eo kōn wōn ro n̄an elmakoti āinwōt rikakpilōklōk ro an ekar m̧ōkaj. Ke eaar wōnm̧aanļo̧k wōt n̄an kejekļo̧kjeņ im jar kōn juon rijeje, Jetōb eo ekar bar bōkļo̧k kōļmenļo̧kjeņ eo an n̄an juon jiron̄ eo ekar kabwilōn̄ e—juon eo me ejakutkut an kar itok n̄an jar ak m̧akūtkūt ko.

En̄jake jidik jab jeļā kōn im̧we eo, Chole ekar kōnono ippān jinen, eo ekar kōmeļeļeik bwe juon iaan wāween ko jemaron̄ bōk revelesōn ej kōn ļōmņak ko rej peddo waļo̧k. Kōn juon lōke ekāāl, Chole ekar en̄jake ke emaron̄ in leļo̧k etan jiron̄ in. Bisop eo ekar leļo̧k kūr eo, im jiron̄ eo ekar bōke. Ālkin kar kōjeno̧loke, rijeje in em̧m̧an ekar ba, “Kwojeļā, ijjan̄in kar en̄jake āinwōt ekar wōr jikin n̄an n̄a ak kar aikuji jabdewōt jikin. Iaar en̄jake aō jab koņ ilo aolep jikin. Bōtaab kōn kūr in, ij en̄jake āinwōt Jemedwōj Ilan̄ ewōr juon an kōttōpar im jikin n̄an n̄a.” Ke Chole im jinen rekar ilo̧k jān kweilo̧k eo, Chole ekar ro̧o̧lļo̧k n̄an jinen im kar ba kōn dān in kōmejaaļal ko ilo mejān, “Revelesōn ej m̧ool in! Revelesōn ej lukkuun jerbal!”

Kūlaaj būreejtōnji ko, em̧ōj kar kūr kom̧ jān Anij im kar lōke n̄an tōl juon kumi in leddik ro Nejin. “Irooj ejeļā kom̧. … Ekar kāālet kom̧.”²⁵ Em̧ōj kar kōjeno̧lok kom̧ jān juon eo ewōr mālim in priesthood eo; meļeļe in ilo ami kōm̧m̧ane jerbal ko ami an kūr eo ami, kom̧ij kōjerbal mālim in priesthood eo. Ewōr juon ami jerbal aorōk n̄an kōm̧m̧ane. En pidodo ami kile im jerbale im̧we ko an Jetōb Kwojarjar. Ilo ami kōm̧m̧ane āindein, kom̧ maron̄ jerbal kōn lōke, bwe kom̧ij jab jerbal makeļo̧k!

Kūlaaj būreejtōn ro, kōmij aikuj mālōtlōt eo ami, ainikiōmi, im kajoor eo ilo ward ko̧o̧njeļ an jodikdik ro ekāāl me Elder Quentin L. Cook ekar kōjjeļā kake rainin. Kom̧ij juon m̧ōttan aorōk an uwaak eo n̄an tōpar aikuj ko an ro jeimi im jatimii.²⁶

Oktak kein ilo doulul eo an kūlaaj im ritōl emaron̄ ijjino ilo iien eo wōt ward ko im branch ko rej pojak bōtaab aikuj in bōk jikin ilo Jānwōde 1, 2020.

Sister ro aō rejitōn bōro, ij kwaļo̧k kam̧oool bwe oktak kein iaar kōnono kaki rainin tōl eo eim̧we jān Irooj. Ilo ad tiljek kōjerbal oktak kein, ij kōjatdikdik jej jamin meļo̧klo̧k jibadbad eo ad: n̄an kōkajoorļo̧k uwaak eo ad n̄an ļoor Jisōs Kraist, im jipan̄ ro jet itok n̄an E. Ij kam̧ool bwe en̄in ej Kabun̄ eo An. Eļap aō kam̧m̧oolol bwe Ej kōtļo̧k bwe jen erom juon m̧ōttan eo ekanooj aorōk an jerbal kwojarjar eo An.

Ij jar bwe ejja Jetōb in wōt me ekar tōl oktak kein naaj tōl kom̧ ilo ami bun̄ m̧aanļo̧k ioon iaļ in bujen eo. Ij lukkuun kam̧ool ilo etan Jisōs Kraist, amen.

Kakeememej ko

1. Lale Rom 8:35–39.

2. Russell M. Nelson, “Witnesses, Aaronic Priesthood Quorums, and Young Women Classes,” Liahona, Nov. 2019, 39.

3. Lale Jabōn Kōnnaan Ko 3:5–7; Jekab 7:5.

4. Lale Rom 8:16–17; Katak im Bujen Ko 76:24; “Baam̧le Eo: Juon Naan in Kean̄ n̄an Laļ in,” Liaona, Māe 2017, 145.

5. Lale 2 Piter 1:3–4; Alma 37:44; Katak im Bujen Ko 78:18; “Baam̧le Eo: Juon Naan in Kean̄ n̄an Laļ in.”

6. Lale Jon 13:14–15, 35.

7. Lale Matu 22:37–39; 25:40; 3 Nipai 12:48.

8. Lale Jhn 16:13; 3 Nipai 14:7–8; Moronai 7:13; 10:5; Katak im Bujen Ko 8:2; 9:8; 11:13.

9. Lale Matu 20:26–28; 22:37–39; 25:34–40; 3 Nipai 26:19.

10. Lale Aiseia 43:10; Mosaia 18:9; Katak im Bujen Ko 14:8.

11. Lale Rom 8:17; 2 Nipai 9:18; 31:20; Katak im Bujen Ko 84:38; 132:49; Moses 1:39.

12. Lale Helamōn12:23; Moronai 10:33; Katak im Bujen Ko 58:42.

13. Lale Alma 34:33; Katak im Bujen Ko 82:18.

14. Lale Hebru 11; 2 Nipai 31:19–20; Alma 32:21.

15. Lale Joshua 24:15; Katak im Bujen Ko 109:8; 132:19.

16. Lale Exodus 19:5; 1 Nipai 14:14; 2 Nipai 11:5; Katak im Bujen Ko 54:6; 66:2; 90:24.

17. Lale Mosaia 13:30; Alma 30:3; Katak im Bujen Ko 84:20–22; Laajrak in Tōmak ko 1:3.

18. Lale Sam Ko 24:3; Aiseia 2:3; Ezekiel 37:26.

19. Neal A. Maxwell, All These Things Shall Give Thee Experience (1979), 55.

20. Kūlaaj ko aikuj kōnono kaki kōn taitōl in ippān doon eo “Doulul eo an Jiron̄ ro.” N̄an kile juon kūlaaj ejeno̧lok, ekoba iiō dettan—n̄an waanjon̄ak “Doulul eo an Jiron̄ ro 12–14”; “Doulul eo an Jiron̄ ro 15–18” (lale Bok in Bōk Meļeļe 2: Tōl Kabun̄ eo, 10.1.5, ChurchofJesusChrist.org).

21. Juon kūlaaj būreejtōnji aikuj in kūr n̄an kajjojo kūlaaj an Doulul eo an Jiron̄ ro Ijo emaron̄, juon būreejtōnji eo eun̄ kipden aikuj in kūr, kōn juon būreejtōn, ruo rikakpilōklōk ro,im juon rijeje. Eļan̄n̄e emenin aikuj, juon būreejtōnji eo ejaun̄ maron̄ kūr (lale Bok in Bōk Meļeļe 2, 10.3.5).

22. Lale Bok in Bōk Meļeļe 2, 10.3.5.

23. Lale Russell M. Nelson “Hope of Israel” (worldwide youth devotional, June 3, 2018), HopeofIsrael.ChurchofJesusChrist.org.

24. Damoļo̧k in naan in kōmeļeļ rej pojak n̄an ritōl ro an Doulul eo an Jiron̄ ro (lale Bok in Bōk Meļeļe 2, jebta 10.

25. Henry B. Eyring, “Rise to Your Call,” Liahona, Nov. 2002, 76.

26. Eļan̄n̄e ewōr wōt juon am̧ kūlaaj im juon kūlaaj būreejtōnji, būreejtōnji eo eun̄ kipden emaron̄ bōk kuņaan ilo ward ko̧o̧njeļ eo an jodikdik ippān būreejtōn ro an doulul eo Priesthood eo an Aron bween wōr jokkun wōt juon eo an jiron̄ ro im likao ro (lale Bok in Bōk Meļeļe 2, 18.2.9).