Kōm̧m̧an Bwe Jetōb ko Ad ren Irooj ioon Ānbwinnid
Juon iaan men ko raorōk jemaron̄ jeļā ilo mour in ej wāween kaorōk piktokin jetōb eo ad indeeo im irooj ioon naan ko ad.
Ro jeiū im jatū, ke eaar epaaktok Oktoba kweilo̧k eo eļap iiō eo ļo̧k, iaar kōpooj katak eo aō n̄an keemem e kein 100th iiō in visōn eo kōn laļ eo an jetōb kar leļo̧k n̄an Bureejtōn Joseph F. Smith ilo Oktoba 3, 1918.
Jet raan ālkin aō kar jilkinļo̧k katak eo bween ukook, eo jerā ejitōn bōro, Barbara, eaar likūt mour in im ilo̧k n̄an laļ eo an jetōb.
Ilo an raan ko eļļā ilo wiik ko, innām allōn̄, im kiiō juon iiō jen ke Barbara eaar mej, ij lo eļapļo̧k aō kam̧m̧oolol kōn eoon in: “Kom̧in mour ippān doon ilo iakwe, jon̄an kom̧ naaj jan̄ kōn jako eo an er ro rej mej.”1 Kom̧ro Barbara eaar jeram̧m̧an n̄an “mour ippān doon ilo iakwe” ium̧win 67 iiō. Ak iaar jeļā ilo juon wāween ta meļeļe n̄an “jan̄ kōn jako” an ro jej iakwe er. O, ewi jon̄an aō iakwe im o̧n̄ kōn e!
Ijeļā bwe elōn̄ iaad rej likjab n̄an lukkuun kam̧m̧oolol kōn ta eo ro jet rej kōm̧m̧ane n̄an kōj m̧ae iien rejako. Iaar jeļā bwe Barbara eaar boub aolep iien, ak iaar jab lukkuun meļeļe ke baam̧le, kabun̄ in, im jukjuk in pād eo raar lukkun aikuji iien ko an. Rekar jet kijejeto ko rekwojarjar āliji taujin alen ilo aolepen iiō ko me ekōm̧m̧an bwe en ājimourur baam̧le eo am. Im kōn aolepān menin, ejjeļo̧k juon iaam ilo baam̧le eo eaar ron̄ an bōro̧n̄ im ba naan ko rejjab em̧m̧an.
Ememļo̧kjeņ ko raar itok n̄an eō ilo iiō in. Iaar ļōmņak kōn jon̄an pen in kālet eo eaar kōm̧m̧an bwe en juon jinen jiljimjuon ajri. Āinwōt juon rikōjparok m̧weo ekar jerbal eo de in ekar kōņaan, im ekar tijem̧ļo̧k ilo jerbal rōt in ilo jabdewōt wāween.
Ekkā aō bwilōn̄ elmen an mije ajri ro nejum̧ro im n̄a. Make kōppopo m̧ōn̄ā ekar juon jerbal epen, n̄an kakobaik jerbal ko jet āinwōt kwaļkwoļ bwijin nuknuk an baam̧le eo kajjojo wiik im leļo̧k juuj im jaij in nuknuk ko rekkar n̄an ajri ro. Kōmij reilo̧k wōt n̄an e kōn men ko jet me rekar aorōk n̄an kōm. Im kōnke raar aorōk n̄an kōm, raar bar aorōk n̄an e. E ekar, ilo juon naan, kabwilōn̄lōn̄—āinwōt lio pālele, juon m̧am̧a, juon m̧ōttad, im juon rituriir im āinwōt juon nejin Anij.
Kiiō ke em̧ōj an ilo̧k, ij m̧ōņōņō bwe iaar kālet n̄an jijet iturin ke iaar ro̧o̧l n̄an kapijuknen jān opiij eo ilo allōn̄ ko āliktata ilo mour eo an, n̄an jibwe pein ilo am̧ro alooji im ron̄jaki jemļo̧kin jet iaan al ko rem̧m̧an tata ippān—āliji im bar āliji kōnke ekar nan̄inmej in eppaļ im eban maron̄ keememej ke eaar alooji m̧oktaļo̧k. Ememļo̧kjeņ ko kōn am̧ro jibwe pein doon relukkuun aorōk n̄an n̄a.
Ro jeiū im jatū, jouj im jab likjab in kalimjōk mejen ro uwaan baam̧le eo am̧ kōn iakwe. Ajri ro im ro jinen im jemen, pukot doon im kwaļo̧k am̧i iakwe im kam̧m̧oolol. Āinwōt n̄a, jet iaami remaron̄ rujļo̧k ilo juon raan im lo bwe eiien n̄an bwebwento ak kam̧m̧ao̧ ko reaorōk remootļo̧k. Mour kajjojo raan kōn bōro ko reobrak kōn kam̧m̧oolol, ememļo̧kjeņ ko rem̧m̧an, jerbal in jipan̄, im iakwe.
Ilo iiō in, iaar lukkuun kōļmenļo̧kjeņ jān kar m̧okta kōn karōk eo an Jemedwōj Ilan̄. N̄an katakin ļeo nejin Korianton, Alma eaar ņa etan “karōk in m̧ōņōņō eo eļap.”2
Naan eo me ekutkut an itok n̄an kōļmenļo̧kjeņ eo aō ilo aō ļōmņake karōk eo ej “bar ippān doon.” Ej juon karōk, kar kōm̧anm̧an jān Jemedwōj Ilan̄ eo ej iakwe kōj, bwe kar letok im aiboojoj eo ekkar bwe baam̧le ren bar ippān doon—kōn bar ippān doon indeeo an ļeo im lieo pālele, ro jinen im jemen im ajri ro, epepen ioon epepen ilo im̧ōn Anij.
Menin eboktok n̄an eō aenōm̧m̧an im lōke bwe inaaj bar pād ippān Barbara bar juon alen. Men̄e liin eaar lukkuun en̄taan ilo jem̧ļo̧kin mour eo an, jetōb eo an ekar kajoor, aiboojoj, im kwojarjar. Eaar kōpooj e make ilo aolep men otemjeļo̧k bwe n̄e raan eo ej itok, emaron̄ jutak im̧aan “ilo m̧ōņōņō im̧aan jikin ekajet an Anij,”3 obrak kōn lōke im aenōm̧m̧an. Ak n̄a in ijin, ruo raan jān kiiō 91 iiō rūttoū, im ij kōļmenļo̧kjeņ, “Ipojak ke? Ij ke kōm̧m̧an men otemjej ij aikuj in kōm̧m̧ane bwe in bar jibwe pein juon alen?
Men eo de in, jekjek eo an mour in en̄in: Jenaaj aolep mej. Men̄e jej mej dik ak rūtto, pidodo ak pen, m̧weeie ak jeram̧ōļ, jitōn bōro ak ajimakeke, ejjeļo̧k juon ej ko jen mej.
Jet iiō remootļo̧k, Būreejtōn Gordon B. Hinckley eaar ba jet men me relukkuun aorōk kōn menin: “Ewi jon̄an lōke in, ewi jon̄an inem̧m̧an ej aenōm̧m̧an eo me ej itok jān jeļāļo̧kjeņ bwe eļan̄n̄e jej m̧are jim̧we im mour jim̧we, jemdoon eo ad enaaj wōnm̧aanļo̧k wōt, jekdoon mej ak mootļo̧k in iien.”4
Ejim̧we aō kar m̧are. Ejjeļo̧k pere kake. Ak ejjab bwe, ekkar n̄an Būreejtōn Hinckley. Ij aikuj in bar mour jim̧we.5
Rainin, “mour jim̧we” emaron̄ in juon katak eo epok, eļaptata eļan̄n̄e kwoj joļo̧k eļap iien ilo social media, ijo jabdewōt ainikien remaron̄ kwaļo̧k m̧ool ko ak riab in katak ko kōn Anij im karōk eo An n̄an ro Nejin. Kam̧m̧oolol, membōr ro an Kabun̄ in ewōr ippāer pedped in katak ko rem̧ool indeeo n̄an jeļā kilen mour bwe en em̧m̧anļo̧k ad kōppopo n̄e jemej.
Jet allōn̄ m̧okta jen aō kar ļotak, Rijilōk eo jim̧m̧aō, Elder Melvin J. Ballard, ekar kwaļo̧k juon katak me, elōn̄ armej, kar kōmeļeļeik ta meļeļe mour jim̧we. Ņa etan “Apan̄ ilo Jetōb,” kōnono eo an kar pedped ioon tariņae eo ikōtaan ānbwin im jetōb ko ad indeeo.
Eaar ba, “Tariņae eo eļap me jabdewōt em̧m̧aan ak kōrā naaj bōke … naaj tariņae eo me kōn e make” kōmeļeļeik bwe Setan rikōjdāt n̄an jetōb ko ad naaj jum̧ae kōn “ļōn̄, m̧oņ, im m̧ōm̧ an kanniōk.”6 Kōn menin unin tariņae in ej ikōtaan piktokid ekwojarjar ilo jetōb im m̧ōm̧ an kanniōk ilo pitokin armej. Ro jeiū im jatū, keememej, jemaron̄ bōk jetōb in jipan̄ kōn im̧we eo an Jetōb Kwojarjar me emaron̄ “katakin eok men otemjeļo̧k.”7 Jipan̄ emaron̄ bar itok kōn kajoor im kōjeram̧m̧an ko an priesthood eo.
Kiiō, ij kajjitōk, “ejet tariņae in ippam̧?
Būreejtōn David O. McKay ekar ba: “Mour an armej ioon laļ in ej juon mālijjon̄ n̄an lale n̄e enaaj mije kijejeto ko an, an ļōmņak, an jetōb, ioon men ko me rej letok aenōm̧m̧an im m̧ōņōņō kōn piktokin armej, ak lale n̄e enaaj kōm̧m̧an m̧ōttanļo̧k [kōttōbar] ilo mour eo an n̄an bōk karbab ko an mour in jetōb.”8
Tariņae in ikōtaan m̧ōm̧ an kanniōk ilo pitokin armej im piktok ilo jetōb eo ad ejjab juon men ekāāl. Ilo katak eo an āliktata n̄an armej ro an, Kiin̄ Benjamin eaar kwaļo̧k bwe “armej ilo lukkuun biktokin ej rikōjdat n̄an Anij, im eaar jān wōtļo̧k eo an Adam, im enaaj, indeeo im indeeo, m̧ae an naaj kōtļo̧k e n̄an karreelel ko an Jetōb Kwojarjar, im utūkļo̧k armej eo ilo lukkuun biktokin im erom juon rikwōjarjar kōn pinmuur eo an Kraist Irooj.”9
Rijilōk Paul eaar kwaļo̧k bwe “ro rej ekkar n̄an kanniōk rej ļōmņak men ko an kanniōk; a ro rej ekkar n̄an Jetōb men ko an Jetōb.
“Bwe ļōmņak an kanniōk mej; a ļōmņak an Jetōb mour im aenōm̧m̧an.”10
Ealikkar n̄an eō bwe juon iaan men ko raorōk jemaron̄ jeļā ilo mour in ej wāween kaorōk piktok ilo jetōb eo ad indeeo im irooj ioon nana ko ad. Menin ejjab aikuj lukkun pen. Ālkin aolep men kein, jetōb eo ad, eo me eto ekar ejaak wōt moktaļo̧k jān ānbwiniid, eto an baj tiljek ilo an kālet wōt wānōk ioon nana ko ilo mour eo m̧okta. M̧okta jān an kar laļ in ejaak, jaar mour im̧aan mejen Jined im Jemed Ilan̄, ro raar iakwe kōj im rej iakwe wōt kōj kiiō.
Im aaet, jaar kōm̧m̧ane jokālet ko me enaaj ukōt mour im kālet ko ilo mour eo m̧okta. Kajjojo armej ro raar mour ak renaaj mour ilo laļ in rekar kōm̧m̧ane juon jokālet eaorōk n̄an kālet n̄an errā kōn karōk eo an Jemedwōj Ilan̄ kōn lo̧mo̧o̧r eo ad. Kōn menin jaar aolep itok n̄an laļ in kōn juon reko̧o̧t em̧ōj kam̧oole kōn juon piktokin jetōb eo etiljek im kōn mejen kajjik eo indeeo.
Ļōmņak kake jidik. En̄in ej wōn lukkuun kwe im n̄a im wōn eo me kar baj kwe wōt jān jinoin: juon ļaddik ak leddik nejin Anij, kōn pedped in jetōb indeeo im juon jekļaj eo eobrak kōn men ko reļļap jemaron̄i. Kwoj—juon armej in jetōb—jinoin, eļaptata, im iien otemjej. Im kōn menin n̄e juon ej kālet n̄an likūt m̧ōm̧ an kanniōk ilo pitokin armej im̧aan in men ko an jetōb eo ad, jej kālet jet men me ej jum̧ae lukkuun, m̧ool, jejjet in wōn kōj ilo jetōb.
Aaet, ejjeļo̧k kajjitōk bwe kanniōk im kōņaan ko an laļ in rej kapen ad kōm̧m̧ani kālet ko. Kōn ron̄ōl in kōmeļo̧kļo̧k eo ikōtaan laļ eo an jetōb m̧okta im laļ in, juon emaron̄ in jerwane jemdoon eo ad n̄an Anij im piktokid ilo jetōb, im m̧ōm̧ an kanniōk ilo pitokin armej emaron̄ bōk jikin n̄an ta eo jej kōņaan kiiō. Ekkatak n̄an jeļā kālet men ko an Jetōb ilōn̄ in men ko an kanniōk ej juon iaan un ko raorōk unin an laļ in m̧ōttan karōk eo an Jemedwōj Ilan̄. Ej barāinwōt karōk eo ej ekkal ioon juon pedped epen, pedped eo kōn Pinmuur eo an ad Irooj im Rilo̧mo̧o̧r, Jisōs Kraist, bwe jerawiwi ko ad, ekoba likjab ko jej kōm̧m̧ani ne jej kōmālim men ko an kanniōk, maron̄ in anjo̧ jāni ilo ad ukweļo̧k emakijkij im jemaron̄ mour in mije wōt jetōb eo. Kiiō ej iien n̄an irooj ioon kōņaan ko an ānbwin bwe jen mour ekkar n̄an jetōb in katak eo an Kraist. En̄in ej unin ad aikuj jab aipādpād kōn raan in ukweļo̧k eo ad.11
Ukweļo̧k, kōn menin, ej erom̧ juon kein tariņae eo emake wōt ilo tariņae in ad make. Ilo kweilo̧k eo eļap ļo̧k, Būreejtōn Russell M. Nelson eaar kōnono kōn tariņae in im kar kakeememej kōj bwe “n̄e jej kālet n̄an ukweļo̧k, jej kālet n̄an oktak! Jej kōtļo̧k an Rilo̧mo̧o̧r eo ukot kōj n̄an juon nememe eo ekāāl ad make. Jej kāālet n̄an eddōkļo̧k ilo jetōb im bōk lan̄lōn̄—lan̄lōn̄ eo jān pinmuur ilo E. N̄e jej kālet n̄an ukweļo̧k, jej kālet n̄an erom̧ āinwōt Jisōs Kraist!”12
Aolep bon̄ ke ij etale raan eo aō ilo jar n̄an Jema Ilan̄, ij kajjitōk jeo̧rļo̧k bōd eļan̄n̄e ikar kōm̧m̧an jabdewōt bōd im kallim̧ur bwe in kajjeon̄ in em̧m̧anļo̧k ilju. Ij tōmak imminene in ukweļo̧k in kajjojo raan ejipan̄ jetōb eo aō n̄an kakeememej ānbwinnū kōn wōn eo ej eddoik eō.
Bar jet menin jipan̄ ej iien ko rem̧m̧an kajjojo wiik ilo ad aolep kōkāāl kōj make ilo mour in jetōb ilo ad bōk m̧ōttan kwojkwoj eo im kakeememej Pinmuur eo im iakwe eo eweeppān an ad Irooj im Rilo̧mo̧o̧r, Jisōs Kraist, n̄an kōj.
Ro jeiū im jatū, ij rōjan̄ kom̧ n̄an kadikdik im ļōmņak kōn ijo kwoj pād ie kiiō n̄an kajejtokjen m̧ōm̧ an kanniōk ilo piktokin armej im lōn̄aj lōn̄tak kwojarjar eo am̧, men ko an jetōb bwe n̄e iien eo ej itok, kwomaron̄ in eļļā jān laļ eo an jetōb n̄an juon bar ippān doon eo elan̄lōn̄ ippān ro rejitenbōro—kōn menin ij kam̧ool im jar ilo ettā ilo etan Jisōs Kraist, amen.