Ribujen Ippān
N̄an m̧ōttan Anij im n̄an etetal ippān doon ilo iaļ in bujen eo An ej n̄an kōjeraam̧m̧an jān bujen eo an.
Brother im sister ro jeiū im jatū, bwebwenato eo ej kwaļo̧k kōn juon ajri in Būraimere ej ekkatak jar. “Kom̧m̧ool kōn leta A, leta B, … leta G.” jar eo an ajri eo ej wōnm̧aanļo̧k wōt, “Kom̧m̧ool kōn leta X, Y, Z. Jemedwōj Ilan̄ jitōn bōro, kom̧m̧ool kōn nōm̧ba 1, nōm̧ba 2.” Rūkaki in Būraimere eo ej inepata bōtaab māletlet in kōttar. Ajri eo ej ba, “Kom̧m̧ool kōn nōm̧ba 5, nōm̧ba 6—im kom̧m̧ool kōn rūkaki in Būraimere eo aō. E ej armej eo de eo me ej kōtļo̧k aō kam̧ōj jar eo aō.”
Jemedwōj Ilan̄ ej ron̄jake aolep jar ko an aolep ajri ro. Kōn iakwe eo ejjeļo̧k jem̧ļo̧kin, Ej kōketak kōj n̄an itok im tōmak im wōjān kōn bujen.
Laļ in ej obrak kōn riab, m̧oņ, deļo̧n̄ ilo aujiid. Elōn̄ men rejjab n̄an jem̧ļo̧kin im pijpij. N̄e jej kowaan paotok ko an riab, ļōkōm̧, errā ak jab errā eo an armej ilo media ko, eļapļo̧k ad jan̄unwade juon men eo ekareel itulik, jemjerā ko ekadu kitier, ak kōttōpar eo an laļ in kōn itok limo an juon make. Kam̧m̧oolol, ewōr juon wāween n̄an anjo̧ ioon jekjek jab in.
N̄e jej itok n̄an kien ko reļļap an Anij n̄an iakwe E im ro ipeļaakid kōn bujen, jej kōm̧m̧an āindein ejjab āinwōt ruwamāejet ak rilotok ak āinwōt juon ajri Nejin ilo kapijuknen.1 Meļeļein etto eo aaet ej em̧ool wōt. N̄e jej luuji itok limo ko ad ilo laļ in kōn bujen ko jaar kōm̧m̧ani, jej lo im erom̧ em̧m̧an tata ad indeeo2—anemkwoj, emourur, lukkuun—im kōmeļeļeik jemjerā ko ad raorōk tata. Ribujen Ippān ej n̄an kōm̧m̧an im kōjparok kallim̧ur ko rekwojarjar n̄an Anij im n̄an doon kōn kain̄i ko rekwojarjar me rej akjoketok kajoor in anij eo n̄an an waļo̧k ilo mour ko ad.3 N̄e jej bujen aolepād, ej ļapļo̧k ad erom̧ jān m̧okta. Wōjān ribujen ej letok jikid, bwebwenato, maron̄ n̄an erom̧. Ej kwaļo̧k tōmak n̄an mour im lo̧mo̧o̧r.4
Bujen ko rekwojarjar rej erom̧ juon wūnjen iakwe n̄an im jān Anij im kōn menin n̄an im ippān kajjojo. Anij, Jemedwōj Ilan̄, ej iakwe kōj eļapļo̧k im em̧m̧anļo̧k an jeļā kajjeed jān ad iakwe ak jeļā kajjeed make. Tōmak ilo Jisōs Kraist im oktak eo ad make (ukweļo̧k) ej bōktok meanwōd, jouj, jeorļo̧k bōd. Men kein rej kaenōm̧m̧an eo ej metak, ajimakeke, ekajet bōd eo jej en̄jake ilo mour in. Āinwōt juonAnij, Jemedwōj Ilan̄ ekōņaan bwe jen bōk menin letok eo an eļaptata an Anij—An lan̄lōn̄, An mour indeeo.5
Anij eo ad ej juon Anij in bujen. Kōn paotok eo An, Ej “kōjparok bujen im kwaļo̧k tūriam̧o.”6 Bujen ko An rej niknik “toun wōt an iien aikuj wōnm̧aanļo̧k, ak an laļ naaj jutak wōt, ak naaj aikuj wōr juon armej ioon mejān laļ n̄an lo̧mo̧o̧ren.”7 Kar jab karōk bwe jen mour ilo ejjeļo̧k meļeļe in ilo mour in ad kōn jab jeļā im pere, ak n̄an lan̄lōn̄ ilo kaorōk bujen jemjerā ko “kajoorļo̧k jān tomede ko an mej.”8
Kain̄i ko im bujen ko an Anij rej jerbal n̄an aolep ilo menin aorōk eo aer im kūrm̧ool ilo jon̄an eo an kajjojo. Ilo jokkun wōt juon eo an Anij, kajjojo armej ilo aolep jikin im dettan remaron̄ bōk kain̄i in lo̧mo̧o̧r ko. Anemkwoj in kāālet ej jerbal—kajjojo armej ej kāālet eļan̄n̄e ej bōke kain̄i ko litok. Kain̄i ko an Anij rej letok kakōļļe ilo iaļ in bujen ko An. Jej ņa etan karōk eo an Anij n̄an bōkļo̧k ajri ro Nejin n̄an kapijuknen eo karōk in pinmuur, karōk in lo̧mo̧o̧r, karōk in m̧ōņōņō. Pinmuur, lo̧mo̧o̧r, m̧ōņōņō ilo aiboojoj eo an aļ rej pidodo kōnke Jisōs Kraist “kar jerbale jān pinmuur eweeppān.”9
N̄an m̧ōttan Anij im n̄an etetal ippān doon ilo iaļ in bujen eo An ej n̄an kōjeraam̧m̧an jān bujen eo an.
M̧oktata, bujen eo an ej pedped ilo Jisōs Kraist āinwōt “rijojomar eo an bujen eo ekāāl.”10 Aolep men ko remaron̄ jerbal ippān doon n̄an em̧m̧an eo ad n̄e jej “kokwōjarjar ilo Kraist … ilo bujen eo an jemān.”11 Aolep em̧m̧an im kōjeraam̧m̧an kar kallim̧ur kaki rej itok n̄an ro me rej pād wōt ilo tiljek n̄an jem̧ļo̧kin. “jekjek eo an ro raar kōjparok kien ko an Anij” ej n̄an erom̧ “jeraam̧m̧an ilo aolep men ko otemjeļo̧k, jim̧or ilo kanniōk im jetōb,” im n̄an “jokwe ippān Anij … ilo ejjeļo̧k jem̧ļo̧kin.”12
Ilo ad kautiej bujen ko ad, jemaron̄ jet iien en̄jake ad pād ippān kumi in enjeļ ro. Im jenaaj pād—ippān ro jej iakwe er im ro rej kōjeraam̧m̧an kōj ilo turejet in nuknuk rōn̄ōl eo im ro me rej iakwe im kōjeraam̧m̧an kōj jān iturejet eo juon an rōn̄ōl eo.
Ejjab to Sister Gong im n̄a kar lo juon waanjon̄ak aorōk im iakwe an bujen eo an ilo juon ruum̧ ilo aujpitōļ. Juon baba eo edik eaar kanooj in kar aikuji juon kidney eo ejmour. Baam̧le eo an raar jan̄, jitlo̧k, im jar kōn e n̄an bōk juon kidney. Ke kar bōk ennaan eo bwe kidney eo n̄an kōmour ej kab wōr, lio pāleen eaar ba ilo mera, “Ij kōjatdikdik EM̧M̧AN an baam̧le eo juon pād.” N̄an erom̧ ribujen kōn bujen ej, ilo naan ko an Paul, “bwe in aenōm̧m̧an ippemi, kōj otemjej kōn tōmak an doon, ami im kab aō.”13
Ilo iaļ eo an mour in, emaron̄ jako ad tōmak ilo Anij, bōtaab Eban wōt im ban jako an tōmak ilo kōj. Ejja āinwōt, meram̧ eo An ej uruur aolep iien. Ej karuwaineneik kōj n̄an itok ak bar ro̧o̧l n̄an bujen ko me rej kakōļļeik iaļ eo An. E epojak kadede n̄an atbakwōj kōj, jekdo̧o̧n n̄e jej “ettoļo̧k wōt.”14 N̄e jej reilo̧k kōn mejān tōmak n̄an jon̄ak ko, kupōl, ak tiltil in en̄jake eo ad, jemaron̄ lo An meanwōd ejouj im ekōketak, eļap tata ilo mālijjon̄ ko ad, būrom̧ōj ko, im apan̄ ko, barāinwōt ilo lan̄lōn̄ ko ad. Jekdo̧o̧n ewi emakijkij in ad tūbbo̧k ak wōtlo̧k, eļan̄n̄e jej bun̄ m̧aanļo̧k wōt n̄an E, Enaaj jipan̄ kōj, juon bun̄tōn ilo juon iien.
Karuo, Bok in Mormono ej juon kein kam̧ool jemaron̄ jibwe ilo peid kōn bujen eo an. Bok in Mormon ej juon kein jerbal kar kallim̧ur kake n̄an aiintok ajri ro nejin Anij, kar kanaan kake āinwōt juon bujen kāāl.15 Ilo ad riiti Bok in Mormon, ippād make im ippān ro jet, men̄e ilo ikōn̄ ak elaaj, jemaron̄ kajjitōk ippān Anij “kōn juon bōro em̧ool, kōn lukkuun kōttōpar, im wōr tōmak ilo Kraist” im bōk jān kajoor eo an Jetōb Kwojarjar kam̧oool eo an Anij bwe Bok in Mormon ej m̧ool.16 Menin ekoba kam̧ool eo bwe Jisōs Kraist ej ad Rilo̧mo̧o̧r, Josep Smith ej rikanaan eo an Jepļaaktok eo, im Kabun̄ eo an Irooj kar kūri kōn Etan—Kabun̄ eo an Jisōs Kraist im Armej ro Rekwojarjar ilo Raan Ko Āliktata.17
Bok in Mormon ej kōnono kōn bujen eo raan ko etto im raan kein n̄an kom̧ ro me rej nejin Liai, “nejin rikanaan ro.”18 Ro jemāmi etto raar bōk juon bujen kallim̧ur eo me kom̧, ro ineer, maron̄ kile āinwōt juon ainikien āinwōt eļan̄n̄e jān būn̄aln̄al ilo Bok in Mormon.19 Ainikien eo kom̧ij en̄jake ilo ami riit ej kam̧ool n̄an kom̧ ro rej “nejin bujen eo”20 im Jisōs ej Jabōt Em̧m̧an eo ami.
Bok in Mormon ej kūr kajjojo iaad, ilo naan ko an Alma, n̄an “deļo̧n̄e juon bujen ippān [Irooj], bwe [jenaaj] jerbal n̄an e im kōjparok kien ko an, bwe e en maron̄ lukōtleplep eļapļo̧k Jetōb eo an [iood].”21 N̄e jej kōņaan oktak n̄an em̧m̧anļo̧k—ānwōt an juon armej kar ba, “n̄an bōjrak jān en̄taan im erom m̧ōņōņō ej m̧ōņōņō”—jemaron̄ ruwaineneik jabdewōt tōl, jipan̄, im kōkajoor. Jemaron̄ itok kōn bujen n̄an ippān Anij im juon jukjuk in pād an rittōmak ro retiljek im bōk kōjeraam̧m̧an ko kar kallim̧ur kake ilo katak eo an Kraist22—kiiō.
Mālim an priesthood eo kar bar kōjepļaaktok im kajoor eo n̄an kōjeraam̧m̧an aolep ajri ro Nejin ej m̧ōttan eo kein kajilu an bujen. Ilo epepen in, Jon Ripeptaij im Rijilōk ro Piter, Jemes, im Jon raar itok āinwōt rikwoj meļan ro raiboojoj jān Anij n̄an kōjepļaaktok mālim an priesthood eo An.23 Priesthood eo an Anij im kain̄i ko An rej kōm̧m̧an bwe en aorōkļo̧k kadkad ko ioon laļ in im maron̄ liāpe bujen jemjerā ko ilo lan̄.24
Priesthood eo emaron̄ lukkuun kōjeraam̧m̧an jān ļotak n̄an mej—jan leļo̧k juon āt im kōjeraam̧m̧an juon nin̄nin̄ n̄an aje juon lōb. Kōjeraam̧m̧an ko an priesthood rekamour, kaenōm̧m̧an, kapilōk. Juon baba eaar illu ippān ļaddik eo nejin m̧ae iien eo iakwe in jeorļo̧k bōd ekar itok ke eo jemen ekar leļo̧k n̄an ļaddik eo nejin juon kōjeraam̧m̧an an priesthood em̧m̧an. E wōt kar membōr in Kabun̄ in ilo baam̧le eo an, juon jiron̄ jitōn bōro eaar jab kanooj jeļā kōn iakwe eo an Anij n̄an e m̧ae iien eo eaar bōk juon kōjeraam̧m̧an an priesthood eo eim̧we. Ipeļaakin laļ in, petriak ro rem̧m̧an rej m̧aanjabpopo ilo jetōb n̄an leļo̧k kōjeraam̧m̧an ko an petriak. Ilo an petriak eo likūt pein ion bōram̧, ej en̄jake im ej kwaļo̧k iakwe eo an Anij n̄an eok. Ej kwaļo̧k menmenbwij eo am̧ ilo m̧weo im̧ōn Israel. Ej kalikkar kōjeraam̧m̧an ko jān Irooj. Ilo kōļmenļo̧kjeņ, lio pāleen juon petriak eaar jiron̄ eō ekōjkan an im baam̧le eo an akjo̧ketok Jetōb eo, eļap tata ilo raan ko eo jemeer ej leļo̧k kōjeraam̧m̧an ko an petriak.
Āliktata, kōjeraam̧m̧aan ko an ribujen ippān rej itok n̄e jej ļoor rikanaan eo an Irooj im lem̧ōņōņō ilo mour kōn bujen tampeļ, ekoba ilo m̧are. Bujen m̧are eo ej erom̧ ekwojarjar im indeeo ilo ad raan otemjej kāālet m̧ōņōņō eo an eo pāleed im baam̧le eo m̧okta jān eo ad make. Āinwōt “n̄a” ej erom̧ “kōj,” jej eddōkļo̧k ippān doon. Jej rūttoļo̧k ippān doon; jej iddikļo̧k ippān doon. Ilo ad kōjeraam̧m̧an doon ilo to̧o̧n wōt ad mour ilo meļo̧kļo̧k kōj make, jenaaj lo kōjatdikdik ko ad im lan̄lōn̄ in kōkwojarjar ko ilo iien in im indeeo.
Ilo an jekjek ko oktak, n̄e jej kōm̧m̧ane ta eo jemaron̄ kōm̧m̧ane, jon̄an wōt ad maron̄, im kajjitōk ilo m̧ool im pukot jipan̄ eo An ilo iaļ eo ļo̧k, Irooj enaaj jinete kōj, ilo iien eo An im jekjek eo ekōņaan, jān Jetōb Kwojarjar eo.25 Bujen m̧are ko rej lukōji kōn kāālet eo errā kake jān ro rej kōm̧m̧ani—juon kakeememej kōn kautiej eo an Anij im ad kōn anemkwoj in kāālet im kōjeraam̧m̧an eo kōn jipan̄ eo An n̄e jej ippān doon ilo kappukōte.
Kōjeraam̧m̧an ko an bujen eo an aolepān epepen ko an baam̧le rej en̄jaki ilo kapijuknen ko ad im būruwōd. Jouj im kōtļo̧k bwe in kōmeļeļeik kōn waanjon̄ak ko aō make.
Ke Sister Gong im n̄a kar ejake en̄jake in iakwe kōn doon n̄an m̧are, iaar ekkatak kōn anemkwoj in kāālet im jokāālet ko. Ium̧win juon tōre, kōm kar pād ilo jikuuļ ilo ruo āne ko roktak jān doon ilo ruo laļ ko. En̄in ej etke imaron̄ ilo m̧ool ba iaar bōk PhD eo aō ilo international relations.
Ke ikar kajjitok, “Jemedwōj Ilan̄, iaikuj in ke m̧areiki Susan?” Ikar en̄jake aenōm̧m̧an. Bōtaab ekar iien eo ikar ekkatak n̄an jar kōn lukkuun kōttōpar, “Jemedwōj Ilan̄, ij iakwe Susan im ikōņaan m̧areiki. Ij kallim̧ur inaaj ļeo pālele im baba eo em̧m̧an tata imaron̄ in”—ke iaar jerbal im kōm̧m̧ani jokāālet ko aō rem̧m̧an tata, innām ekar iien eo ekajoor tata ke eaar itok kamool eo jān jetōb.
Kiiō Gong im Lindsay FamilySearch family tree ko am, bwebwenato ko, im pija rej jipan̄ kōm lo im kobaļo̧k ippān kōn en̄jake ko an mour an ribujen ippān an epepen ko.26 N̄an kem, rūtto reutiej ippam̧ ekoba:
Jibūn-jibū Alice Blauer Bangerter, eo kar kajjitōke jilu alen n̄an m̧areik ilo juon raan, tok ālik kar kajjitōk ippān ļeo pāleen n̄an kōļaak juon kein patōļ ilo neen n̄an kein kōm̧m̧an bōta eo an bwe en maron̄ kōm̧m̧an bōta, āj, im riit ilo ejja iien eo wōt.
Jim̧m̧a-jim̧m̧aō Loy Kuei Char eaar kakukuik ajri ro nejin im jejjo m̧weien baam̧le eo an ioon juon tan̄ki ke raar kijoon lava field ko ilo Hawaii Big Island. Epepen ko an Char baam̧le im aeer kallim̧uri im kaarmejet rekōjeraam̧m̧an baam̧le eo am rainin.
Bubu Mary Alice Powell Lindsay kar likūt ippān ļalem ajri ro reddik ke ļeo pāleen im ļaddik eo erūtto tata nejin erro jim̧or kar jidimkij aer mej jejjo raan kōtaer. Juon kōrā eo emej pāleen ium̧win 47 iiō ko, Būbū ekar karrūtoļo̧k baam̧le eo an kōn iakwe rejtak eo an jān ritōl ro ijo ekar jokwe ie im membōr ro. Ilo iiō ko relōn̄, Būbu ekar kallim̧uri Irooj bwe eļan̄n̄e Enaaj kar jipan̄ e, innām eban ellotaan. Irooj ekar jipan̄e. Ekar jab ellotaan.
M̧aan im Kōrā ro jeiū im jatū rejitōn bōro, āinwōt kar kam̧ool jān Jetōb Kwojarjar, aolep men rem̧m̧an im indeeo ekar ioļapļap in lukkuun mour eo an Anij Jemed Indeeo im Nejin, Jisōs Kraist, im Pinmuur eo An. Ad Irooj, Jisōs Kraist, ej Rijojomar eo an bujen eo ekāāl. Kam̧ool kōn Jisōs Kraist ej juon bujen jibadbad eo an Bok in Mormon.27 Kōn kallim̧ur im bujen, an Anij ekar kōjepļaaktok mālim an priesthood eo ej ļōmņak in kōjeraam̧m̧an aolep ajri ro nejin Anij, ekoba kōn bujen m̧are, epepen an baam̧le, im kōjeraam̧m̧an ko an kajjojo.
Ad Rilo̧mo̧o̧r ej kean̄, “N̄aij Alpa im Omega, Kraist Irooj; aaet, em̧ool N̄aij E, jinoin im jem̧ļo̧kin, Ripinmuur eo an laļ.”28
Pād ippād ilo jinoin, E ej pād ippād, ilo aolep bujen ko an, n̄an jem̧ļo̧kin. Ij lukkuun in kam̧ool ilo ekwojarjar im kwojarjar etan Jisōs Kraist, amen.