Nativity in Copper and Umber, jān J. Kirk Richards

Tijem̧ba 20–26

Kūriijmōj

Mennin Letok eo an Nejin Anij Ekwojajar eo Jejjab Maron̄ Keidi

Juon wāween n̄an mije ļōmņak eo am̧ ilo Rilo̧mo̧o̧r ilo Kūrijm̧ōj in ej n̄an katak “The Living Christ: The Testimony of the Apostles.” Laajrak in ej kwaļo̧k wāween ko kwomaron̄ kōm̧m̧ane naan in kam̧ool in kar ekkatak ko am̧ make im baam̧le eo am̧.

Je En̄jake ko Rej Im̧we Eok

Ilo 1838, Rikanaan Josep Smith ekar kwaļo̧k, “Pedped in katak ko an kabun̄ eo ad rej naan in kam̧ool eo an Rijilōk ro im Rikanaan ro, kōn Jisōs Kraist, bwe Eaar mej, kar kalbwini, im kar jerkak bar juon alen ilo raan eo kein kajilu, im wanlōn̄ļo̧k n̄an lan̄; im aolep men ko jet rej ekkar n̄an kabun̄ eo ad rej wōt men ko reddik n̄an e” (Teachings of Presidents of the Church: Joseph Smith, 49). Iiō ko tokālik, Būreejtōn Russell M. Nelson ekar je bwe “ekar lukkun enaan eo in an Rikanaan eo me ekar letok un ko 15 un ko kōn rikanaan ro, rilolo ro, ribōk revelesōn ro n̄an leļo̧k im jaini naan in kam̧ool ko aer n̄an kakemeemej 2,000 iiō jān ļotak eo an Irooj. Naan in kam̧ool ilo bwebwenato kar ņa etan ‘Kraist Eo Emour.’ Elōn̄ membōr ro rekar kakkilōklōk m̧ool ko ie. Ro jet rej kab jeļā bwe ewōr ad. Ilo am̧ kappukot n̄an ekkatak eļapļo̧k kōn Jisōs Kraist, ij kipel eok n̄an katak ‘The Living Christ’” (“Bōktok Kajoor eo an Jisōs Kraist ilo Mour ko Ad,” Ensign ak Liaona, Māe 2017, 40).

Āinwōt Armej ro Rekwojarjar ilo Raan Ko Āliktata, jej lan̄lōn̄ ilo kōjeraam̧m̧an in revelesōn ko rej wōnm̧aanļo̧k wōtkōn rikanaan im rijilōk ro raan kein. Jej kam̧m̧oolol kōn naan in kapilōk ko aer reim̧we, kakkōļ, im kapilōk. Ak eļaptata, jejeraam̧m̧an kōn naan in kam̧ool ko aer rekajoor kōn Jisōs Kraist—ilo iien Kūrijm̧ōj ilo aolepān iiō eo. Men kein reļļapļo̧k jān naan ko reim̧we an ro retijem̧ļo̧k ilo jeje ak ilo kōnono ilobōlej ak meļeļe ko jān ro retijem̧ļo̧k ilo jeje ko rekwojarjar. Rej naan ko an rikam̧ool ro kar kālet, kūr, im kōmālim “rikam̧ool ro rejenolo̧k kōn etan Kraist ilo aolepān laļ in” (Katak im Bujen Ko 107:23).

Ļōm̧ņak ko n̄an Ekkatak Jeje Ko Rekwojarjar Ippam̧ Make

“Ejjeļo̧k bar juon ekar en̄jake im̧we in ekabwūlōn̄lōn̄.”

Ta ļōmņak ko am̧ rejiktok ippam̧ ilo am̧ riiti Luk 2:10–11 ippānļo̧k pārokūrāāp eo jinoin ilo “Kraist Eo Emour”? Ta eo kwonaaj ba n̄an rie enaan in me “ejjeļo̧k juon ewōr an kajoor in im̧we [āinwōt Jisōs Kraist] ilubwiljin aolep ro rekar mour im renaaj mour ioon laļ in”? Kappukot m̧ool ko ilo “Kraist Eo Emour” me ej kōmeļeļeik kajoor in im̧we an Rilo̧mo̧o̧r. Ewi wāween An kar im̧we eok im boktok n̄an eok “lan̄lōn̄ eļap”? (Luk 2:10).

“Ekar jerkak jān lōb.”

Ilo “Kraist Eo Emour,” Rijilōk ro rej kam̧ool kōn Jerkakpeje eo an Rilo̧mo̧o̧r, kwaļo̧k kōn jilu iien waļo̧k ko an Irooj eo em̧ōj an jekakpeje (lale pārokūrāāp ļalem). Ļōmņak in riit kōn loļo̧k kein ilo Jon 20–21; 3 Nipai 11–26; im Josep Smith—Bwebwenato 1:14–20. Ta eo kwoj ekkatak kōn Rilo̧mo̧o̧r jān naan ko An im kōm̧m̧an ko ilo iien kein ekar waļo̧k?

“Priesthood eo An im Kabun̄ in An em̧ōj aer bar jepļaaktok.”

Ilo iien am̧ katak kōn Katak im Bujen ko ilo iiō in, em̧ōj an kar wōr am̧ iien n̄an ekkatak eļapļo̧k kōn wāween an “priesthood eo an Rilo̧mo̧o̧r im Kabun̄ eo An kar bar jepļaaktok.” Ewi wōt m̧ool ko rekar jepļaaktok ak pedped in katak ko me ekar lukkuun ļap meļeļeier n̄an kwe? Ļōmņak in etale jet iaan eoon kein rej elaajrak me ej katakin kōn Jepļaaktok eo: Katak im Bujen Ko 1:17–23; 13; 20:1–12; 65; 110; 112:30–32; 124:39–42; 128:19–21. Kejo̧kļo̧kjem̧ kōn wāween an m̧ool ko an gospel eo em̧ōj an jepļaaktok jipan̄ eok jeļā im kabun̄-jar n̄an Jisōs Kraist (lale Katak im Bujen Ko 93:19).

“E enaaj bar juon raan jepļaaktok n̄an laļ in.”

Kūrijm̧ōj ej juoniien jim̧or n̄an kemeemej raan eo Jisōs Kraist ekar bar ļotak im n̄an erreim̧aanļo̧k n̄an raan eo E enaaj bar itok juon alen. Ta eo kwoj ekkatak kōn jepļaaktok eo An jān pārokūrāāp eo kein karuo āliktata ilo “Kraist Eo Emour”? Emaron̄ barāiwōt kaitoktok limo n̄an riit, al, ak ron̄jake al ko an Kūrijm̧ōj me ej katakin kōn Itok eo Kein Karuo, āinwōt “Joy to the World” ak “It Came upon the Midnight Clear” (Hymns, nos. 201, 207).

“E ej meram, mour, im kōjatdikdik eo an laļ in.”

Ilo pārokūrāāp eo āliktata in “Kraist Eo Emour,” je m̧wil im taitōļ ko kar ņa etan Rilo̧mo̧o̧r eo kaki. Eoon kein rej elaajrak remaron̄ jipan̄ eok kejo̧kļo̧kjeņ kōn wāween an Jisōs Kraist ej “meram, mour eo, im kōjatdikdik eo an laļ in”: Luk 2:25–32; 1 Korint 15:19–23; Moronai 7:41; Katak im Bujen ko 50:24; 84:44–46; 93:7–10. Ewi wāween an E ami meram, mour, im kōjatdikdik? Ta m̧wil im taitōļ ko jet an Rilo̧mo̧o̧r me eļap meļeļein n̄an kwe?

Ekōjkan an katak “Kraist Eo Emour” jelōt tōmak eo am̧ ilo im iakwe eo am̧ n̄an Rilo̧mo̧o̧r?

Meram in Laļ, jān Howard Lyon

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

“Kraist Eo Emour.”N̄an jipan̄ baam̧le eo am̧ meļeļe kōn m̧ool ko kar katakin jān Rilo̧mo̧o̧r ilo “Kraist Eo Emour,” kwomaron̄ kālet jet iaan ki in naan ko im jerbal ippān doon n̄an pukot im jin̄n̄aik jin̄n̄a ko me rej kōmeļeļeik naan ko. Innem kwomaron̄ kobaik pija ko im naan ko ilo juon bok.

“Jej kwaļo̧k ad naan in kam̧ool.”Ta eo jej ekkatak jān “Kraist Eo Emour” kōn ta meļeļein n̄an kwaļo̧k naan in kam̧ool? Komaron̄ kōņaan je naan in kam̧ool ko am̧ kōn Kraist ilo keememe ļotak eo an Rilo̧mo̧o̧r eo.

“Eo ej etetal im kōm̧anm̧an em̧m̧an.”Ewi wāween an baam̧le eo am̧ maron̄ ļoor waanjon̄ak eo an Rilo̧mo̧o̧r kōn jerbal in jipan̄ ilo Kūrijm̧ōj in? Ewi wāween am̧ naaj kajedeed “aeņōm̧m̧an im jipan̄” ilo baam̧le eo am̧ im jukjuk in pād eo? Ewi wāween am̧ jipan̄ boktok “kōmour [n̄an] ro renan̄inmej”? Kwomaron̄ lo ļōmņak ko ilo jet iaan bitio in Kūrijm̧ōj ko ilo Gospel Media app ak Gospel Media library (medialibrary.ChurchofJesusChrist.org).

“Kam̧m̧oolol n̄an Anij kōn mennin letok eo an Nejin Anij Ekwojajar eo Jejjab Maron̄ Keidi.”Ta menin letok ko jekar bōki kōn Jisōs Kraist? Bōlen ro uwaan baam̧le eo remaron̄ lo uwaak ko ilo “Kraist Eo Emour” innem kitimi m̧weik ko letok me rej bōk jikin menin letok ko jān Rilo̧mo̧o̧r Kwomaron̄ kōpeļļo̧k menin letok ko ilo raan in Kūrijm̧ōj ak ilo aolepān wiik eo im riiti eoon ko me rej iookļo̧k kōj kajjojo. Erkein rej jet iaan eoon ko rekkar, men̄e baam̧le eo am̧ emaron̄ lo elōn̄ļo̧k: Luk 2:10–14; 1 Piter 2:21; Mosaia 3:8; Alma 11:42–43; Katak im Bujen ko 18:10–12. Kwomaron̄ barāinwōt al juon al kōn Rilo̧mo̧o̧r, āinwōt “He Sent His Son” (Children’s Songbook, 34–35), n̄an kappukot menin letok ko me rej itok jān E.

N̄an ļōmņak ko reļļapļo̧k n̄an katakin ajri ro, lale laajrak eo an wiik in ilo Itok, Ļoor Eō—N̄an Būraimere.

Al eo kar elmakote: “Hark! The Herald Angels Sing,” Hymns, no. 209.

Kōkm̧anm̧anļo̧k Am̧ Ekkatak Ippam̧ Make

Mije wōt Rilo̧mo̧o̧r. “Niknik jar ilo riiti ‘Kraist Eo Emour’ ej āinwōt riiti naan in kam̧ool ko an Matu, Mark, Luk, Jon, im rikanaan ro an Bok in Mormon. Enaaj kōļāpļo̧k am̧ tōmak ilo Rilo̧mo̧or im jipan̄ eok pād wōt ilo kalimjōk E” (M. Russell Ballard, “Bar Ro̧o̧l im Bōk,” Ensign ak Liaona, Māe 2017, 65).