tagata i le lalolagi o agaga

Ua vaai Iosefa i lona tama, tina, ma [lona] uso i le malo selesitila (Joseph Smith’s Vision of the Celestial Kingdom, Robert Barrett).

29 Novema--5 Tesema

Mataupu Faavae ma Feagaiga 137–138

“O Le Faaaliga o le Togiolaina o Ē ua Maliliu”

Ua aoao mai Peresitene M. Russell Ballard: “Ou te valaaulia ai outou ina ia faitau maeaea lelei ma le manatunatu i le [Mataupu Faavae ma Feagaiga 138]. A o outou faia lea mea, ia faamanuia le Alii ia te outou ina ia malamalama atoatoa atili ma talisapaia le alofa o le Atua ma Lana fuafuaga o le faaolataga ma le fiafia mo Ana fanau” (“O Le Faaaliga o le Togiolaina o Ē ua Maliliu,” Ensign po o le Liahona, Nov. 2018, 73).

Tusifaamaumau Ou Lagona Uunai

O faaaliga ua tusifaamaumauina i le Mataupu Faavae ma Feagaiga 137 ma le 138 e silia ma le 80 tausaga ma le 1,500 maila o loo va a’i. O le vaega 137 sa maua e le Perofeta o Iosefa Samita i le 1836 i totonu o le Malumalu sa le’i mae’a o Katelani, ae o le vaega 138 na maua e Iosefa F. Samita, o le Peresitene lona ono o le Ekalesia, i le 1918 i le Aai o Sate Leki. Ae i le faaleaoaoga faavae, o nei faaaliga vaaia e lua e fesootai lelei lava. Ua tau fai tali ai fesili e uiga i le faasinomaga o fanau a le Atua i le olaga a sau. Ma e tau fai loloto foi o la uiga pe a tatou mafaufau i aafiaga o soifuaga o perofeta na mauaina.

O le faaaliga a Iosefa Samita na fesoasoani ia te ia e malamalama ai i le faasinomaga e faavavau o lona uso peleina o Alavini, o lē na maliu i le ono tausaga a’o lei toefuataiina mai le pule e papatiso ai. Talu mai lava lena taimi, sa i ai pea lava ia Iosefa ia fesili e uiga i le faaolataga e faavavau o Alavini. O le faaaliga a Iosefa F. Samita ua faaalia mai ai upumoni matagofie e uiga i le lalolagi o agaga—e mautinoa lava o se faaaliga faamafanafana i se tagata sa faavauvau i le maliliu o le toatele o tagata vavalalata o lona aiga. O Iosefa F. Samita na maliu lona tama o Ailama Samita, a’o 5 ona tausaga, ma lona tina o Mele Filitia Samita, a’o 13 ona tausaga. E oo ane i le taimi o lana faaaliga i le 1918, na faanoanoa o ia i le maliliu o lana fanau e toa 13.

O le tele o fesili a tagata e uiga i le olaga pe a mavae le oti sa taliina i nei faaaliga. O le vaega 137 ua tuuina mai ai se malamalamaaga amata i fesili faapena, ae o le vaega 138 ua tuuina mai ai se malamalamaaga sili atu. Ua molimau faatasi mai [nei faaaliga] e uiga i “le alofa tele ma le ofoofogia na faaali mai e le Tamā ma le Alo” (Mataupu Faavae ma Feagaiga 138:3).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 137

O le a maua e tagata uma le avanoa e filifili ai le mamalu selesitila.

O le malamalamaaga masani sa i ai i le au Kerisiano i le 1836 sa faapea, afai e oti se tagata ae le’i papatisoina—e pei ona sa i ai Alavini le uso o Iosefa Samita—e le mafai ona alu lena tagata i le lagi. Ae na vaai Iosefa ia Alavini i se faaaliga e uiga i le malo selesitila. A o e faitau i le vaega 137, mafaufau loloto i mea ua e aoaoina e uiga i le Tama Faalelagi, Lana fuafuaga o le faaolataga, ma le malo selesitila.

Tagai foi Au Paia, 1:232–35.

Mataupu Faavae ma Feagaiga 138:1–11, 25–30

O le faitau ma le mafaufau loloto i tusitusiga paia e saunia ai a’u e maua faaaliga.

O nisi taimi e oo mai ai faaaliga e tusa lava pe tatou te le sailia. Ae o le tele o taimi, e oo mai ai ona o loo tatou sailia ma le maelega ma sauni i ai. A o e faitau i le Mataupu Faavae ma Feagaiga 138:1–11, 25–30, ia maitau le mea sa faia e Peresitene Iosefa F. Samita i le taimi “sa tatalaina [ai] mata o [lona] malamalama,” ina ia malamalama lelei ai i le misiona laveai a le Faaola. Ona mafaufau lea pe faapefea ona e mulimuli i le faataitaiga a Peresitene Samita. Mo se faataitaiga, o a ni suiga e mafai ona e faia i au suesuega o tusitusiga paia ina ia mafai ai ona tele atu le “mafaufau loloto i tusitusiga paia” ma ia tele atu le “manatunatu i le taulaga togiola tele na faia e le Alo o le Atua”? (fuaiupu 1–2).

I lana savali “O le Faaaliga o le Togiolaina O E ua Maliliu” (Ensign po o le Liahona, Nov. 2018, 71–74), sa fautuaina mai ai e Peresitene M. Russell Ballard isi auala sa faapea ona saunia ai Peresitene Samita ia maua lenei faaaliga. Mafaufau pe ua faapefea ona e saunia mo aafiaga o loo e mauaina pe o le a maua i le lumanai.

Tagai foi i le vitio “Ministry of Joseph F. Smith: A Vision of the Redemption of the Dead,” ChurchofJesusChrist.org.

atavali o Iosefa F. Samita

Iosefa F. Samita, saunia e Albert E. Salzbrenner

Mataupu Faavae ma Feagaiga 138:25–60

O le galuega o le faaolataga o loo tupu i itu uma e lua o le veli.

Na aoao mai Peresitene Russell M. Nelson e faapea, “O la tatou savali i le lalolagi e faigofie ma faamaoni: tatou te valaauliaina fanau uma a le Atua i itu uma e lua o le veli ia o mai i lo latou Faaola, maua faamanuiaga o le malumalu paia, maua le olioli tumau, ma agavaa mo le ola e faavavau” (“A’o Tatou Agai Faatasi Atu i Luma,” Ensign po o le Liahona, Me 2018, 118–19). Mafaufau loloto i lenei faamatalaga a o e faitau i le Mataupu Faavae ma Feagaiga 138:25–60. E mafai foi ona e mafaufau i fesili nei:

• O a ni mea ua e aoao mai i nei fuaiupu e uiga i le ala ua ausiaina ai le galuega o le faaolataga i le lalolagi o agaga? Aisea e taua ai ona e iloa o loo faia lenei galuega? E faapefea ona faamalosia e nei fuaiupu lou faatuatua i le Togiola a le Faaola?

• O a ni mea ua aoao mai e nei fuaiupu e uiga ia i latou o e o loo auai i le galuega o le faaolataga i le lalolagi o agaga? Aisea e taua ai le malamalama, o loo faia le galuega o le faaolataga i itu uma e lua o le veli?

Tagai foi Dallin H. Oaks, “Faalagolago i le Alii,” Ensign po o le Liahona, Nov. 2019, 26–29; “Susa Young Gates and the Vision of the Redemption of the Dead,” Revelations in Context, 315–22.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 137:1–5.Valaaulia lou aiga e tusi se ata o le mea latou te manatu e foliga a’i le malo selesitila e faavae i na fuaiupu. O a ni mea ua e maua i nei fuaiupu ua fesoasoani e te tulimata’i atu ai e nofo iina? O a ni mea o tatou faia i le taimi nei e saunia ai e nonofo i le malo selesitila faatasi ma le Tama Faalelagi ma Iesu Keriso?

Mataupu Faavae ma Feagaiga 137:5–10.Ina ia iloa po o le a le uiga ia Iosefa Samita i le vaaia faatasi o nisi o lona aiga i le malo selesitila, e mafai ona matamata lou aiga i le vitio “Ministry of Joseph Smith: Temples” (ChurchofJesusChrist.org). Atonu foi e mafai ona outou talanoa e uiga i se tasi tou te iloa na maliu e aunoa ma le avanoa e papatiso ai. O le a le mea o loo aoao mai e le Mataupu Faavae ma Feagaiga 137:5–10 ia i tatou e uiga i lena tagata?

Mataupu Faavae ma Feagaiga 138:12–24.O le a le mea ua aoao mai e le Mataupu Faavae ma Feagaiga 138:12-24, e uiga i tagata na asiasi i ai le Faaola i le lalolagi o agaga? O a faamanuiaga na latou mauaina? O le a se mea ua tatou aoao mai i la latou faataitaiga?

Mataupu Faavae ma Feagaiga 138:38–55.O fuaiupu nei o loo faamatala ai i latou o e sa vaai i ai Peresitene Iosefa F. Samita i le lalolagi o agaga ma ni faamatalaga pupuu e uiga ia i latou. Atonu e mafai e lou aiga ona faia se lisi o tou tuaa o loo i le lalolagi o agaga, faatasi ai ma ni faamatalaga e uiga i o latou olaga.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Saili, Mafaufau Loloto, ma Tatalo,” Tusipese a Tamaiti,66).

Faaleleia o Lo Tatou Aoao Atu

Mafaufau loloto i mau. Na ta’ua e Peresitene Tavita O. MaKei le manatunatu loloto, “o se tasi o faitotoa … e sili foi ona paia tatou te ui atu ai i le afioaga o le Alii” (Aoaoga a Peresitene o le Ekalesia: Tavita O. MaKei [2003], 32).

O Iesu Keriso i le lalolagi o agaga

O le Tofiaina, saunia e Harold I. Hopkinson. Na tofiaina e Iesu Keriso agaga amiotonu e talai atu le talalelei i le lalolagi o agaga.