Falepuipui o Karefasi

22–28 Novema

Mataupu Faavae ma Feagaiga 135–136

Ua Ia “Faamau Faailogaina Lana Misiona ma Ana galuega i Lona Lava Toto”

A o e suesue i le Mataupu Faavae ma Feagaiga 135–36, atonu e uunaia oe e le Alii i malamalamaaga loloto e fesoasoani e te faaaoga ai mea e te faitauina. A tupu lena mea, tusi i lalo mea Na te aoaoina ai oe.

Tusifaamaumau Ou Lagona Uunaia

O le aoauli o le aso 27 o Iuni, 1844, na toe tuu ai foi Iosefa ma Ailama i le falepuipui, faatasi ai ma Ioane Teila ma Uiliata Risati. Sa latou talitonu sa le sala i latou i se solitulafono, ae sa latou uai atu ina ia pueina, ma le faamoemoe e taofia ai osofaiga faasaga i le Au Paia i Navu. Sa le ’o le taimi muamua lenei na tuu ai e fili o le Ekalesia le Perofeta o Iosefa i le falepuipui, peitai o le taimi lenei, sa foliga mai sa ia iloa lava o le a fasiotia o ia. Sa taumafai o ia ma ana uo e faamafanafana e le tasi le isi e ala i le faitau mai le Tusi a Mamona ma usuina viiga. Sa faalogoina le pāpā o fana, ma i totonu o ni nai minute, na faapea ona faamuta ai soifua i le olaga faitino o Iosefa Samita ma lona uso o Ailama.

Ae peitai, sa le o le mutaaga lea o le faamoemoe paia na la taliaina ma lagolagoina atoatoa. Ma sa le o le mutaaga lea o le Toefuataiga o le talalelei a Iesu Keriso. Sa tele le galuega e fai ma tele faaaliga o le a taiala ai le agai i luma o le Ekalesia. O le fasiotia o le Perofeta na le mafai ona fasiotia ai le galuega a le Atua.

Tagai Au Paia, 1:521–52.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 135; 136:37–39

Sa faamauina e Iosefa ma Ailama a laua molimau i o laua toto.

Vaai faalemafaufau pe faapeī ou lagona pe ana faapea sa e nofo i Navu i le taimi na fasiotia ai Iosefa ma Ailama (tagai Au Paia, 1:554–55). Mata na faapefea ona e taumafai ia iloa le uiga o lenei mea leaga na tupu? O le Mataupu Faavae ma Feagaiga 135, lea sa uluai lolomiina ae le’i atoa le tolu masina talu ona mavae le faamaturoina, atonu na fesoasoani [e iloa ai le uiga o le mea leaga na tupu]. Atonu e te faailogaina upu ma fuaitau o le a aumaia ia te oe le malamalamaaga ma le faamautinoaga. O le a sau tala e fai atu i se tasi e fesili, “Aisea o le a faataga ai e le Atua Lana Perofeta ina ia fasiotia?”

Tagai foi i le Mataupu Faavae ma Feagaiga 5:21-22; 6:29-30; “Manatuaina o le Maliu Faamaturo,” Revelations in Context, 299-306; Aoaoga a Peresitene o le Ekalesia: Iosefa Samita, 522-23, 529-40; M. Russell Ballard, “Tatou Te Le O Atu pea ea i Lenei Savali Sili?” Ensign po o le Liahona, Me 2020, 8-11.

Mataupu Faavae ma Feagaiga 135:3

E tele atu mea na faia e Iosefa Samita mo lo tatou faaolataga nai lo se isi lava tagata, vagana ai Iesu Keriso.

Mafaufau i faamanuiaga ua oo mai ia te oe i le avea ai o se tasi o le Ekalesia a Iesu Keriso. E fia o na faamanuiaga o se taunuuga o le misiona na ausiaina e le Perofeta o Iosefa Samita? O le Mataupu Faavae ma Feagaiga 135:3 o loo ta’ua ai nisi o mea maoae na ausiaina e Iosefa Samita i le 24 tausaga talu ona mavae le Uluai Faaaliga. O a ni auala ua e aafia ai ma aafia ai lou sootaga ma le Tama Faalelagi ma Iesu Keriso ona o ia mea? Mafaufau e tusifaamaumau lau molimau e uiga i le Perofeta o Iosefa Samita. O ai e ono manaomia ona faalogo i lau molimau?

Mataupu Faavae ma Feagaiga 136

E tuuina mai e le Alii ia te a’u ni fautuaga mo a’u “malaga” i le olaga.

Ina ua mavae ona tutuliese mai Navu, sa fetaiai le Au Paia ma se malaga umi e agai atu i le Vanu o Sate Leki, ma o nai selau maila muamua sa telegese ma faanoanoa. Sa popole Polika Iaga, o le sa taitaia nei le Ekalesia o se Peresitene o le Korama a Aposetolo e Toasefululua, pe o le a faapefea ona feola le Au Paia i le taimi atoa na totoe o le savaliga umi. Sa ia faatuina se nofoaga le tumau na ta’ua o Uinita Kuota ma augani atu mo le taitaiga. I le tali mai, na tuuina mai ai e le Alii ia te ia se faaaliga, lea ua avea nei ma le vaega 136. Faatasi ai ma isi mea, o lenei faaaliga na faamanatu mai ai i le Au Paia “o a latou amioga i le malaga sa tutusa lava le taua ma lo latou taunuuga” ma “na fesoasoani e suia le malaga agai i sisifo mai se manaoga le fiafia i se aafiaga faaleagaga taua na laugatasia ai” (“This Shall Be Our Covenant,” Revelations in Context, 308).

Manatua le tulaga lenei a o e suesue i le vaega 136. O le a se fautuaga e te maua e mafai ona fesoasoani e liliu ai se tofotofoga faigata i lou olaga “i se aafiaga faaleagaga … taua”? Atonu foi e te mafaufau loloto i auala e mafai ona fesoasoani ai le fautuaga e te ausia ai le finagalo o le Alii i lou lava olaga, e pei ona sa fesoasoani i uluai Au Paia e fai le malaga umi faigata i Sisifo.

Tagai foi “This Shall Be Our Covenant,” Revelations in Context, 307–14; Church History Topics, “Succession of Church Leadership,” ChurchofJesusChrist.org/study/history/topics.

Uinita Kuota, saunia e Greg Olsen

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 135:1, 3.Ina ia fesoasoani i tagata o le aiga ia malamalama i le uiga o le, “na faamauina e Iosefa Samita lana misiona ma ana galuega i lona lava toto,” e mafai ona matamata lou aiga i le vitio “Testimony of the Book of Mormon” (ChurchofJesusChrist.org; tagai foi Jeffrey R. Holland, “Saogalemu mo le Agaga,” Ensign po o le Liahona, Nov. 2009, 88–90). O le a se mea e faagaeetia ai i tatou e uiga i nei fuaiupu? E mafai faapefea ona tatou faamaoni atili i a tatou molimau, e tusa lava pe le talosagaina i tatou e tuuina atu o tatou ola mo i latou?

Mataupu Faavae ma Feagaiga 135:3.Ina ia talanoa i le uiga o le faamatalaga e faapea, o Iosefa Samita “e tele atu mea na ia faia, vagana ai lava Iesu, mo le faaolataga o tagata i lenei lalolagi, nai lo se isi lava tagata,” mafaufau e toe iloiloina mea ua aoaoina e le tou aiga i le tausaga lenei e uiga ia Iosefa Samita. E mafai ona outou faaaogaina ata mai lenei punaoa e fesoasoani ia latou manatua ai mea na latou aoaoina ma valaaulia i latou e faasoa mai ni tala po o ni aoaoga e sili ona fiafia i ai. Aisea tatou te faafetai ai mo le Perofeta o Iosefa Samita ma mo mea na ausiaina e le Alii e ala mai ia te ia? E mafai foi ona outou matamata i le vitio “Joseph Smith: The Prophet of the Restoration” (ChurchofJesusChrist.org).

Mataupu Faavae ma Feagaiga 136.Ina ua faaali mai e le Alii le vaega 136, sa i ai le Au Paia i se malaga umi, ma faigata i luma atu o i latou, i lalo o le taitaiga a Polika Iaga (tagai mataupu 58, 60, ma le 62 i le Tala o le Mataupu Faavae ma Feagaiga, 206–8, 211–16, 222–24). A o outou faitau faatasi i le vaega 136 , mafaufau i ni mea faigata atonu e mafai ona fetaiai ma lou aiga. O le a se fautuaga tatou te maua i lenei faaaliga e mafai ona fesoasoani tatou te maua ai le fesoasoani ma le mana o le Alii?

Mataupu Faavae ma Feagaiga 136:4.O le a le uiga o le “savavali i sauniga uma a le Alii”? E faapefea ona aafia o tatou olaga i aso taitasi i sauniga ua tatou mauaina?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Viia Le na Fetaia’i ma Ieova,” Viiga, nu.15.

Faaleleia o Suesuega Faaletagata Lava ia

Mauaina o le alofa o le Atua. Na aoao mai Peresitene M.Russell Ballard, “[O le] talalelei o se talalelei o le alofa—alofa i le Atua ma le alofa i le tasi ma le isi” (“God’s Love for His Children,” Ensign, Me 1988, 59). A o e faitau i tusitusiga paia, mafaufau e maitau pe faailoga ia faamaoniga o le alofa o le Atua.

E Le Sili Lava le Alofa o Se Tasi i Lenei Alofa, saunia e Casey Childs