Iosefa Samita i Navu, 1840, saunia e Theodore Gorka

8–14 Novema

Mataupu Faavae ma Feagaiga 129–132

“A Tatou Maua Se Faamanuiaga mai le Atua, E Maua i le Usiusitai”

Ovaega 129–32 o loo aoao mai ai le tele o mataupu faavae taua, e na’o ni nai mataupu faavae ua faamatalaina i le otootoga lenei. O a nisi upumoni ua e mauaina?

Tusifaamaumau Ou Lagona Uunaia

Sa saunoa Polika Iaga i se tasi o taimi e uiga ia Iosefa Samita, “E mafai ona ia faamalamalamaina mea faalelagi ina ia malamalama i ai le tagata soifua” (i le Aoaoga a Peresitene o le Ekalesia: Iosefa Samita, 499–500). O lenei mea e foliga mai e faapitoa le moni i aoaoga a le Perofeta i Navu i le vaitaimi o le 1840, lea ua tusifaamaumauina nisi o ia mea i le Mataupu Faavae ma Feagaiga 129-32. E faapeī le Faaola? “O Ia o se tagata e pei lava o i tatou.” E faapeī le lagi? “O lea lava mafutaga ua i ai ia te i tatou iinei o le a i ai ia te i tatou iina,” (Mataupu Faavae ma Feagaiga 130:1–2), ma o a tatou mafutaga aupito faapelepele i lenei olaga, pe afai e faamauina e ala i le pule tatau, “o le a taulia atoatoa” i le lalolagi a sau (Mataupu Faavae ma Feagaiga 132:19). O upumoni e pei o nei e mafai ona avea ai le lagi ma mea e le mamao—e mamalu, ae mafai ona oo i ai.

Ae peitai, e i ai taimi e fai mai ai le Atua tatou te faia ni mea e matuai le logolelei lava lea e foliga mai ai e le mafai ona [tatou] oo atu i ai. Mo le toatele o le Au Paia anamua, o faaipoipoga autaunonofo sa o se tasi lea o na poloaiga. O le poloaiga e faaipoipo i ni avā faaopoopo sa o se tofotofoga ogaoga o le faatuatua mo Iosefa Samita, lona faletua o Ema, ma le toetoe o i latou uma o e na mauaina. Ina ia faamanuiaina i lenei tofotofoga, sa latou manaomia ai le sili atu nai lo na’o ni lagona lelei e uiga i le talalelei toefuataiina; sa latou manaomia le faatuatua sa sili atu le malosi i le Atua nai lo o ni manao o le tagata lava ia pe faaituau. Ua le o toe i ai lea poloaiga i aso nei, ae o le faataitaiga faamaoni a i latou o e sa soifua ai o loo i ai pea. Ma o lena faataitaiga e musuia ai i tatou pe a talosagaina i tatou e faia a tatou lava “taulaga i le usiusitai” (Mataupu Faavae ma Feagaiga 132:50).

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 130–31

Ua faaali mai e Iosefa Samita upumoni e uiga i le Aiga Atua ma le “lalolagi a sau.”

Atonu e te maitauina o vaega 130–31 e tau ese laitiiti lona tusiga mai isi vaega o le Mataupu Faavae ma Feagaiga. O le mafuaaga ona o vaega 130–31 o loo faavae i faamatalaga na tausia e Viliamu Clayton, o se tasi o failautusi a Iosefa Samita, o mea sa ia faalogo o aoao atu e Ie Perofeta. O se taunuuga, o nei vaega e matele ina pei o ni tuufaatasiga o upumoni nai lo o ni faaaliga soofaatasi faatonuina. E ui i lea, o loo i ai nisi o autu masani i le tele o nei upumoni. Mo se faataitaiga, atonu e te faitau i vaega 130–131 faapea ma ni fesili faapenei i lou mafaufau: O le a se mea ua ou aoaoina e uiga i le Atua? O le a se mea ua ou aoaoina e uiga i le olaga pe a mavae le olaga lenei? E faapefea ona aafia lo’u olaga i lenei malamalamaaga?

Tagai foi “Our Hearts Rejoiced to Hear Him Speak,” Revelations in Context, 277–80.

Mataupu Faavae ma Feagaiga 131:1–4; 132:7, 13–25

Na faia e le Tama Faalelagi ia mafai ona faavavau aiga.

O le tasi o upumoni aupito sili ona faalaeiau ua toefuatai mai e ala i le Perofeta o Iosefa Samita o le, e mafai ona tumau e faavavau ia mafutaga faalefaaipoipoga ma faaleaiga. E ala mai ia Iosefa Samita, na toefuatai mai ai e le Alii sauniga ma le pule e manaomia ia faia ai nei sootaga ia faavavau (tagai Mataupu Faavae ma Feagaiga 132:7, 18–19). Mafaufau i au sootaga faaleaiga o loo i ai pe faamoemoe ia i ai i le lumanai ao e faitau i le Mataupu Faavae ma Feagaiga 131:1–4; 132:7, 13–15. E mafai faapefea e nei fuaiupu ona aafia ai le ala e te mafaufau ai e uiga i nei sootaga?

Peitai, o nisi taimi e tau le faalaeiau ai le mataupu faavae o aiga e faavavau—e mafai ona aumaia ai le popolevale, e oo lava i le faanoanoa, pe a le fetaui o tatou tulaga faaleaiga o loo i ai nei ma le ituaiga sootaga e i ai i le selesitila. Ina ua popole Peresitene Henry B. Eyring i se tulaga faapena i lona lava aiga, sa ia maua se fautuaga atamai mai se tasi o le Korama a Aposetolo e Toasefululua: “Tau lava o lou ola agavaa mo le malo selesitila, ma o le a sili atu le matagofie o faatulagaga o le aiga nai lo le mea e mafai ona e mafaufauina” (i le “O se Aiga e Afio ai le Agaga o le Alii,” Ensign po o le Liahona, Me 2019, 25). E mafai faapefea ona fesoasoani lenei fautuaga e faamanuia ai oe i le tulaga o loo i ai nei lou aiga?

Tagai foi Kristen M. Oaks, “To the Singles of the Church” (Faigalotu a le Ofisa o Aoga a le Ekalesia mo talavou matutua, 11 Sete, 2011), broadcasts.ChurchofJesusChrist.org.

O sootaga faaleaiga e mafai ona faia ia faavavau e ala i sauniga o le malumalu.

Mataupu Faavae ma Feagaiga 132:1–2, 29–40

O le faaipoipoga autaunonofo e faatoa taliaina e le Atua pe a poloai mai ai o Ia.

Soo se tasi ua faitau i le Feagaiga Tuai atonu sa mafaufau e uiga ia Aperaamo, Iakopo, Mose, ma isi na faaipoipo i ni avā e tele. Pe na mulilulua ea nei tamalii lelei? Pe na faatagaina e le Atua a latou amioga? Vaavaai mo tali i le Mataupu Faavae ma Feagaiga 132:1–2, 29–40.

O le faaipoipoga i le va o se alii e toatasi ma se tamaitai e toatasi o le tulaga faatonuina lea a le Atua mo le faaipoipoga (tagai i le ulutala o le vaega o le Folafolaga Aloaia 1; tagai foi Iakopo 2:27, 30). Ae ui i lea, sa i ai vaitaimi o le talafaasolopito na poloaiina ai e le Atua Lana fanau ina ia faia faaipoipoga autaunonofo.

O tausaga amata o le Ekalesia toefuataiina o se tasi lea o na vaitaimi o le tuusaunoaga. Ina ua maua mai lenei poloaiga, sa faia loa e Iosefa Samita ma isi o le Au Paia o Aso e Gata Ai faaipoipoga autaunonofo. Afai e te fia iloa atili e uiga i faaipoipoga autaunonofo i le Au Paia o Aso e Gata Ai anamua, tagai i le “Mercy Thompson and the Revelation on Marriage” (Revelations in Context, 281–93); Au Paia, 1:290–92, 432–35, 482–92, 502–4; “Plural Marriage in The Church of Jesus Christ of Latter-day Saints” (Gospel Topics, topics.ChurchofJesusChrist.org); “Why Was It Necessary for Joseph Smith and Others to Practice Polygamy?” (vitio, ChurchofJesusChrist.org).

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 130:2, 18–19; 132:13, 19.E mafai faapefea ona e faaaogaina nei fuaiupu e fesoasoani ai i lou aiga e faamuamua mea e faavavau ona tumau? Atonu e mafai ona e tapenaina se atopau po o se atofaafafa faatasi ma aitema e fai ma sui o mea na, e tusa ma le Mataupu Faavae ma Feagaiga 130:2, 18–19; 132:19, e mafai ona tatou aveina atu i le isi olaga, e pei o ata o le aiga po o tusitusiga paia. O le a le mea o loo aoao mai e le Mataupu Faavae ma Feagaiga 132:13 ia i tatou e uiga i le lalolagi? E mafai ona taitai atu lenei mea i se talanoaga e taulai atu i mea e faavavau le taua.

Mataupu Faavae ma Feagaiga 130:20–21.E mafai ona outou usuina se pese e uiga i le faafetai e pei o le “Faitau Ou Manuia” (Viiga, nu.151), ma fai se lisi o faamanuiaga ua maua e lou aiga mo le usitaia o tulafono a le Atua. O a ni faamanuiaga ua tatou faamoemoe ia maua? E mafai faapefea ona tatou maua na faamanuiaga?

Mataupu Faavae ma Feagaiga 131:1–4; 132:15-19.Atonu e fesoasoani le vitio “Marriage Is Sacred” (ChurchofJesusChrist.org) i lou aiga e talanoa ai i upumoni o loo i ai i nei fuaiupu. O le a se lagona o le Alii e uiga i le faaipoipoga? E faapefea ona tatou—pe ua tatou faaipoipo pe nofotoatasi—saunia ia i ai se faaipoipoga e faavavau?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “E Mafai Ona Faavavau Aiga,” Tusipese a Tamaiti, 98.

Faaleleia o Suesuega Faaletagata Lava Ia

Vaavaai mo upumoni o le talalelei. O nisi taimi o upumoni e tuusa’o mai lava, o nisi taimi e faaalia mai e ala i se faataitaiga po o se tala. A o e faitau, fesili ifo ia te oe lava, “O le a le upumoni e faavavau o loo aoao mai i nei fuaiupu?”

O se potu mo faamauga i totonu o le Maumalu o Pale Farani.