taupou popoto e toalima

Ua Afio Mai le Faatoafaiavā, saunia e Elizabeth Gibbons

15–21 Novema

Mataupu Faavae ma Feagaiga 133-134

“Ia Outou Saunia mo le Afio Mai o le Faatoafaiavā”

Na aoao mai Peresitene Henry B. Eyring: “O le Toefuataiga o le talalelei na amata i se fesili faatauvaa na mafaufauina loloto i totonu o se fale faatauvaa, ma e mafai ona faaauau pea i totonu o o tatou fale taitasi” (“O Se Aiga e Afio ai le Agaga o le Alii,” Ensign po o le Liahona, Me 2019, 25).

Tusifaamaumau Ou Lagona Uunai

Ina ua faatoa atoa lava le 19 masina o le Ekalesia, na faataatitia ai e le Perofeta o Iosefa Samita ma isi taitai o le Ekalesia ni fuafuaga pulunaunau e tuufaatasia ai faaaliga a le Atua i aso e gata ai i se voluma e tasi ma lolomi ni kopi se 10,000—ua faaluaina le numera o kopi o le lomiga muamua o le Tusi a Mamona. O le mea e faanoanoa ai, o le taugata na faaleagaina ai nei fuafuaga, ma na osofaia e vaega leaga le ofisa lomitusi a le Ekalesia a’o faagasolo le lolomiga. Sa latou faasalalauina itulau sa le’i nonoaina, ma e ui ina sa faasaoina e le Au Paia lotototoa nisi o mea, ae e leai ni kopi atoatoa o le Tusi o Poloaiga o iloa na faasaoina mai ai.

O le mea ua tatou iloa nei o le vaega 133 o le Mataupu Faavae ma Feagaiga sa tatau ona avea ma faaopoopo i le Tusi o Poloaiga, e pei o se faaiuga malosi i le faaiuga o faaaliga lomiaina a le Alii. O loo lapatai mai ai e uiga i se aso o le a oo mai o le faamasinoga ma toe ta’u mai ai le valaau o loo maua i faaaliga uma i ona po nei: sosola ese mai le faalelalolagi, e pei ona faatusaina e Papelonia; atinae Siona; saunia mo le Afio Mai Faalua, ma faasalalau atu lenei savali “i atunuu uma, ma ituaiga, ma gagana, ma nuu” (fuaiupu 37). E ui sa le’i faataunuuina uluai fuafuaga mo le Tusi o Poloaiga, o le faaaliga lenei o se faamanatu ma o se molimau e le mafai ona taofia le galuega a le Alii, “Auā o le a faaali e ia lona aao paia … , ma o le a vaai tuluiga uma o le lalolagi i le olataga a lo latou Atua” (fuaiupu 3).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 133

O upumoni o loo i le Mataupu Faavae ma Feagaiga e mafai ona saunia ai a’u e fai le galuega a le Atua.

O tusi o nisi taimi e faaiu ai i se faaiuga e toe ta’ua ai pe aotele ai manatu taua o le tusi. O le vaega 133 sa uluai fuafuaina e avea ma faaiuga o le Tusi o Poloaiga, ma atonu e taua le faitau o le vaega lenei ma mafaufau i lena mea. O a ni manatu ua faamamafa mai e le Alii e uiga i Lana galuega? O a ni mea ua aoao ai oe e fuaiupu 57–62 e uiga i le matafaioi o loo finagalo le Alii e te faia i Lana galuega?

Mataupu Faavae ma Feagaiga 133:1–19

E finagalo le Alii ia ou saunia mo Lona Afio Mai Faalua

O le vaega 1, o le faatomuaga a le Alii i le Mataupu Faavae ma Feagaiga, ma le vaega 133, o le uluai faaopoopoga i le tusi, o loo amata i le augani lava lea e tasi mai le Alii: “Faalogo mai ia, E, outou e tagata o laʼu ekalesia” (Mataupu Faavae ma Feagaiga 1:1; 133:1). O le a le uiga o le faalogo mai ia? (tagai Taiala i Tusitusiga Paia, “Faalogo,” scriptures.ChurchofJesusChrist.org). O a valaaulia po o poloaiga o loo finagalo le Alii e te faalogo mai ia i ai i le Mataupu Faavae ma Feagaiga 133:1–19? O le a se mea ua musuia oe e fai e saunia lelei ai mo Lona afio mai? E mafai faapefea ona e fesoasoani ia i latou o loo siomia oe ia saunia?

Tagai foi Mataio 25:1–13; D. Todd Christofferson, “Saunia mo le Toe Afio Mai o le Alii,” Ensign po o le Liahona, Me 2019, 81–84.

Mataupu Faavae ma Feagaiga 133:19–56

O le Afio Mai Faalua o se fiafiaga mo e amiotonu.

A o e faitau i le Mataupu Faavae ma Feagaiga 133:19–32 e uiga i mea e tutupu o le a o mai faatasi ma le Afio Mai Faalua o le Faaola, atonu e te mafaufau loloto i mea e fautuaina atu ia te oe e faamatalaga o nei mea o le a tutupu e uiga i le Faaola ma Lana galuega. O a ni faaaogaaga faaleagaga e mafai ona e mauaina i nei faamatalaga?

A o e faitau i le faamatalaga o le toe afio mai o le Faaola i fuaiupu 32–56, o le a se mea e mafua ai ona e tulimatai atu i lena aso tele? O a upu po o fuaitau o loo faamatala ai le alofa o le Alii i Lona nuu? Mafaufau e tusifaamaumau ou aafiaga patino i “le alofa agalelei o [lou] Alii, ma mea uma ua ia faaeeina i [ou] luga e tusa ma lona lelei” (fuaiupu 52).

Mataupu Faavae ma Feagaiga 134

“Sa faatutuina e le Atua malo mo le lelei o tagata.”

O sootaga a le Au Paia anamua ma le malo sa faigata. Ina ua tutuli faamalosia i fafo le Au Paia mai le Itumalo o Siakisone, Misuri, i le 1833, sa leai se lagolago po o se taui na latou maua mai le malo i le lotoifale po o le atunuu e ui i a latou talosaga mo se fesoasoani. I le taimi lava foi lea, sa faauigaina ai e nisi o tagata i fafo o le Ekalesia ia aoaoga e uiga ia Siona e faauigaina faapea, na teena e le Au Paia le pule a malo faalelalolagi. O le Mataupu Faavae ma Feagaiga 134 sa tusia, o se vaega, e faamanino ai le tulaga o le Ekalesia e faatatau i le malo.

O a ni lagona e tatau ona i ai i tagata o le Ekalesia e uiga i malo? A o e suesue i le vaega 134, mafaufau e fai ni lisi se lua: e tasi le lisi o mataupu faavae ua e aoaoina e uiga i malo ma le isi o tiutetauave o tagatanuu. Na ono mafai faapefea ona fesoasoani nei manatu i le Au Paia anamua? O faapefea ona faatatau i le mea o loo e nofo ai?

Tagai foi Mataupu Faavae o le Faatuatua 1:11–12; Autu o le Talalelei, “Religious Freedom,” topics.ChurchofJesusChrist.org.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 133:4–14.O le faafeagai faaleagaga o Siona o Papelonia—o se aai anamua o loo faapea ona faatusalia i tusitusiga paia atoa i le amioleaga ma le pologa faaleagaga (tagai D. Todd Christofferson, “O Mai i Siona,” Ensign po o le Liahona, Nov. 2008, 37; Taiala i Tusitusiga Paia, “Papelu, Papelonia,” scriptures.ChurchofJesusChrist.org). E i ai se mea e tatau ona outou faia o se aiga ina ia, i se vaaiga faaleagaga, “o ese … i fafo mai Papelonia” (fuaiupu 5) ma “o atu ia … Siona”? (fuaiupu 9).

Mataupu Faavae ma Feagaiga 133:20–33.A o outou faitaua faatasi nei fuaiupu, e mafai e lou aiga ona tusi ni ata o le tulaga latou te manatu o le a i ai le Afio Mai Faalua. E mafai foi ona outou taaalo pe usu se pese e uiga i le Afio Mai Faalua, e pei o le “Pe a Ia Toe Afio Mai” (Tusipese a Tamaiti, 46–47), ma talanoa i mea e mafai ona fai e lou aiga e saunia ai mo Lona Afio Mai.

Mataupu Faavae ma Feagaiga 133:37–39.Mata o le a fiafia lou aiga e faitau nei fuaiupu “ma le leo tele”? (fuaiupu 38). O le a le uiga o le faasoa atu o le talalelei ma le leo tele? O a ni upumoni e mafai ona tatou faasoa atu?

Mataupu Faavae ma Feagaiga 134:1–2.Ina ia fesoasoani i lou aiga ia malamalama i le taua o le malo, e mafai ona tou talanoa i fesili e pei o nei: Ua faapefea ona faamanuiaina lou aiga e ala i le i ai o tulafono? Ua faapefea ona faamanuiaina lou atunuu i le i ai o tulafono? E mafai foi ona e faia pe valiina se ata o le fu’a a lou atunuu po o le taulotoina i lou mafaufau le sefulutasi ma le mataupu faavae o le faatuatua sefululua.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Mai, Fanau a le Alii,” Viiga, nu. 24.

Faaleleia o Suesuega Faaletagata Lava Ia

Aoao atu aoaoga faavae manino ma faigofie. Ua faamatalaina e le Alii Lana talalelei i upu e pei o le “manino” ma le “faigofie” (Mataupu Faavae ma Feagaiga 133:57). O le a se mea ua fautua atu e nei upu ia te oe e uiga i le aoao atu o le talalelei i lou aiga?

O Keriso i le ofu talaloa lanumumu

O Keriso i Lona Ofu Talaloa Lanumumu, saunia e Minerva Teichert