Iosefa Samita o loo aoao atu i Navu

Iosefa Samita i Navu, 1840, saunia e Theodore Gorka

Novema 8–14

Mataupu Faavae ma Feagaiga 129–132

“A Tatou Maua Se Faamanuiaga mai le Atua, E Maua i le Usiusitai”

Na faamalamalama mai e Elder David A. Bednar: “O le na’o le talanoa ma le ta’u atu e le o le aʻoaʻo atu lea. O le talai atu o le talalelei i le ala a le Alii e aofia ai le matauina ma le faalogo ma le iloatino” (“Becoming a Preach My Gospel Missionary,” New Era, Oct. 2013, 6). O le a se mea e aoao ai oe e le Agaga ao e matau ma faalogo i tamaiti o loo e aoaoina?

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Filifili se autu mai vaega 129--32, ma tuu atu i tamaiti e taʻu atu ia te oe mea ua uma ona latou aoaoina e uiga i lena autu. Mo se faataitaiga, o le a se mea latou te iloa e uiga i le Tama Faalelagi po o le Aiga Atua? e uiga i le faaipoipoga e faavavau? e uiga i le malo selesitila?

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 130:20–21; 132:5

O faamanuiaga e maua mai i le usiusitai i le Atua.

Na aoao mai Iosefa Samita o faamanuiaga uma mai le Atua e faavae i lo tatou usiusitai i Ana tulafono. E faapefea ona e aʻoaʻo atu lenei mataupu i se auala o le a malamalama ai tamaiti?

Gaoioiga e Mafai Ona Fai

• Faasoa atu se faʻataʻitaʻiga faigofie ma tamaiti e faʻaalia ai le taua o le mulimuli i faatonuga; mo se faataitaiga, talanoa ma i latou e uiga i laasaga e tatau ona tatou mulimuli ai e saunia ai meaai pe taaalo i se taaloga pe fausia se mea. O le a le mea e tupu pe a tatou le mulimuli i faatonuga? (Masalo e i ai sou aafiaga patino e mafai ona e faʻasoa atu.) Faitau le Mataupu Faavae ma Feagaiga 130:21, ma faatusatusa nei faatonuga i poloaiga e tatau ona tatou mulimuli ai ina ia maua faamanuiaga mai le Tama Faalelagi.

• Fai atu i tamaiti pe mafai ona latou mafaufau i se taimi na latou usiusitai ai i se tasi o poloaiga a le Atua. O a ni o latou lagona? Usu faatasi se pese e faatatau i le usitai, e pei o le “Tausi Poloaiga” (Tusipese a Tamaiti,68), ma faailoa mai faamanuiaga o le usiusitai o loo taua i le pese. Talanoaina nisi o mea ua poloaiina i tatou e le Atua e fai. E faapefea ona faamanuiaina i tatou e le Atua pe a tatou tausia na poloaiga?

Mataupu Faavae ma Feagaiga 130:22

O le Tama Faalelagi ma Iesu Keriso e i ai tino ola pea faaletino.

A tatou malamalama o le Atua le Tama ma Iesu Keriso e i ai tino e pei o tatou, tatou te lagona le vavalalata ia i Laua, ma ua faamalosia ai lo tatou sootaga ma i Laua.

Gaoioiga e Mafai Ona Fai

• Faaali atu i tamaiti se ata o Iesu Keriso, ma valaaulia i latou e tusi i Ona mata, gutu, ma isi vaega o Lona tino. Ona valaaulia lea o i latou e tutu ma faasino i na lava vaega o o latou lava tino. Faitau mai le Mataupu Faavae ma Feagaiga 130:22: “Ua i le Tama se tino o aano ma ivi …; ua faapea foi le Alo.” Molimau atu o o tatou tino e pei o tino o le Tama Faalelagi ma Iesu.

• Usu faatasi se pese e faatatau i o tatou tino, e pei o le “Ulu, Tauau, Tulivae, ma Tamaivae” (Tusipese a Tamaiti,129), ma valaaulia tamaiti e fai taga e fetaui ma upu. Fai atu i tamaiti e taʻu atu ia te oe ni mea e mafai ona latou faia i o latou tino. Faailoa atu lou agaga faafetai mo le tino ua tuuina atu e le Atua ia te oe. E faʻapefea ona tatou faaali atu tatou te loto faʻafetai mo lenei meaalofa faapitoa?

• Valaaulia tamaiti e tusi ata o le Tama Faalelagi, Iesu Keriso, ma i latou lava. Fesoasoani ia i latou ia iloa pe faapefea ona pei o tatou tino o tino o le Tama Faalelagi ma Iesu.

Mataupu Faavae ma Feagaiga 132:19

Na faia e le Tama Faalelagi ia mafai e aiga ona faatasia e faavavau.

E ala mai i le mana o le faamauga a le Alii ma sauniga o le malumalu, e mafai ona faavavau a tatou sootaga faaleaiga pe afai tatou te tausia a tatou feagaiga.

Gaoioiga e Mafai Ona Fai

• Fesoasoani i tamaiti e mafaufau i faataitaiga o mea e le tumau e faavavau—o meaai e leaga, fugalaau e mamae, ma isi. Faaali atu se ata o lou aiga, ma faasoa mai ou lagona e uiga ia i latou. Molimau atu o le Alii ua mafai ai, e ala i sauniga o le malumalu, e aiga ona tumau e faavavau.

• Susue le Mataupu Faavae ma Feagaiga i le vaega 132, ma taʻu i tamaiti o se faaaliga lenei ia Iosefa Samita e uiga i le faaipoipoga ma aiga. Faaali atu ia i latou le fuaiupu 19, ma faasino i upu nei “i le faavavau atoa” ao e faitauina. Valaaulia tamaiti e faitau faatasi ma oe nei upu.

• Fesoasoani i tamaiti e fai ni pepe meataalo i pepa e suitulaga i tagata o latou aiga (tagai i le itulau o gaoioiga mo lenei vaiaso). Oti ese, ma tuu i totonu o se teutusi pe faapipii faatasi i se kilipa e suitulaga i le mana o faamauga lea e mafai ai ona faamauina faatasi e faavavau o tatou aiga.

  tamaitai ma se teineitiiti i laufanua o le malumalu

  O sauniga o le malumalu e mafai ai ona tuufaatasia aiga e faavavau.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 130:18-19

E finagalo le Tama Faalelagi ia ou maua le poto ma le tomai sili.

O le tele o mea tatou te maua i le olaga nei e le o ma tatou i le isi olaga. Ae o le tatou “poto ma le tomai sili” e mafai (Mataupu Faavae ma Feagaiga 130:19).

Gaoioiga e Mafai Ona Fai

• Fai atu i tamaiti e faasoa mai se mea ua latou aoaoina i le aoga pe mai o latou matua. Valaaulia i latou e faitau le Mataupu Faavae ma Feagaiga 130:18--19 e saili ai po o le a le mea o le a tupu i lo tatou poto ma atamai i le isi olaga.

• O le a le mea o loo aoao mai e le fuaiupu e 19 e uiga i le auala e mafai ai ona tatou maua le poto ma le atamai? E mafai faapefea ona tatou filiga ma usiusitai ao tatou saili e aoao? (Mo nisi faamatalaga i lenei autu, tagai “Aoga” i le Mo Le Malosi o le Autalavou [itulau 9-10].)

Mataupu Faavae ma Feagaiga 130:20–21; 132:5, 21–23

O faamanuiaga e oo mai i le usiusitai i le Atua.

Manatunatu i le auala e faamanuia ai oe e le Alii pe a e usitaia Ana tulafono. O a aafiaga e mafai ona e faasoa atu i tamaiti ia musuia ai i latou?

Gaoioiga e Mafai Ona Fai

• Usu faatasi se pese e faatatau i le usiusitai, e pei o le “Tausi Poloaiga” (Tusipese a Tamaiti,68), ma valaaulia tamaiti e faitau le Mataupu Faavae ma Feagaiga 130:20–21 ma le 132:5. Fesoasoani ia i latou e saili upu ma fuaitau i le mau e talitutusa i upu ma manatu i le pese. E faapefea ona tatou maua faamanuiaga mai le Atua? Valaaulia tamaiti e faasoa mai pe na faapefea ona faamanuiaina i latou i le usitaia o poloaiga a le Atua.

• Faitau faatasi le Mataupu Faavae ma Feagaiga 132:21-23, ma valaaulia tamaiti e tusi ni ata e faatatau i mea latou te aoaoina mai nei fuaiupu. Uunaia i latou ia fatufatuai, ma fautua atu e faaaofia i totonu o a latou ata tulafono po o poloaiga e fesoasoani ia i tatou e tumau ai i le ala vaapiapi agai i le ola e faavavau.

Mataupu Faavae ma Feagaiga 131:1–4; 132:15, 19

Na faia e le Tama Faalelagi ia mafai e aiga ona faatasia e faavavau.

E tusa lava po o le a le tulaga o i ai o tatou aiga, e mafai ona tatou faia filifiliga i le taimi nei o le a saunia ai i tatou e maua faamanuiaga o se aiga e faavavau i le lumanai.

Gaoioiga e Mafai Ona Fai

• Tofi le afa o le vasega e faitau le Mataupu Faavae ma Feagaiga 131:1-4 ma le isi afa e faitau le 132:15. Fesoasoani ia i latou e saili vaega o loo aoao mai e nei fuaiupu e faatatau i faaipoipoga. Filifili fuaitau autu mai le 132:19 (e pei o le “afai e faaipoipo e se tane se ava,” “feagaiga … tumau-faavavau,” “faamauina,” “ola … i la’u feagaiga,” “i le faavavau atoa,” ma le “faavavau ma faavavau”), ma fai atu i tamaiti e saili nei fuaitau i totonu o le fuaiupu. O a ni mea o loo aoao mai e nei fuaitau ia i tatou e uiga i faaipoipoga?

• Usu le “E Mafai Ona Faavavau Aiga” (Tusipese a Tamaiti,98), pe iloilo le “Mataupu 55: O se Faaaliga e faatatau i le Faaipoipoga” (Tala o le Mataupu Faavae ma Feagaiga,198). Fai atu i tamaiti e faalogo ma ia saunia e faasoa po o a mea e tatau ona tatou faia ina ia mafai ona faavavau o tatou aiga. Molimau atu e tusa lava po o le a le tulaga o i ai o tatou aiga, e mafai ona saunia i tatou e avea ai o se vaega o se aiga e faavavau.

aikona o le aoaoina

Uunaia le Aoaoina i le Aiga

Valaaulia tamaiti e ta’u atu i o latou aiga le tele o lo latou alolofa ia i latou ma le latou manao e tuufaatasia o se aiga e faavavau.

Faaleleia o Lo Tatou Aoao Atu

Ia nofouta i tulaga faaleaiga. “O tamaiti i nei aso ua i ai i latou i le tele o foliga eseese ma lavelave faaleaiga. … E manaomia ona [tatou] aapa atu ia i [latou] o loo lagonaina le tuuatoatasi, faagaloina, pe tuulafoaiina i tuāpā” (Neil L. Andersen, “Ai Se Talia i Latou ua Talia A’u,” Ensign po o le Liahona, Me 2016, 49, 52).

itulau o gaoioiga: e mafai ona faatasi aiga e faavavau