fafo o le Falepuipui o Karefasi

Falepuipui o Karefasi

22–28 Novema

Mataupu Faavae ma Feagaiga 135–136

Ua Ia “Faamau Faailogaina Lana Misiona ma Lana Galuega i Lona Lava Toto”

A o e sauni e aoao atu le Mataupu Faavae ma Feagaiga 135-36, vaavaai mo mataupu faavae na aafia ai lou olaga. Mafaufau pe faʻapefea ona fesoasoani ia manatu o loo i lenei otootoga i tamaiti e aʻoaʻo ma faʻaaoga nei mataupu faavae.

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Valaaulia tamaiti e faasoa mai se mea latou te manatua ua latou aoaoina i lenei tausaga e faatatau ia Iosefa Samita ma mea na ia ausia. Faaali atu ata mai le Sau, Mulimuli Mai ia te Au—Mo Tagata Taitoatasi ma Aiga o le tausaga lenei pe mai gaoioiga talu ai e fesoasoani ai ia i latou.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 135:1–2

Na tuuina atu e Iosefa Samita ma Ailama Samita o la ola mo le talalelei a Iesu Keriso.

O le tala i le maliliu faamaturo o Iosefa ma Ailama Samita e mafai ona fesoasoani i tamaiti ia lagona ai le loto faafetai mo molimau ma ositaulaga a nei tamalii maoae.

Gaoioiga e Mafai Ona Fai

• Faaaoga le “Mataupu 57: Ua Fasiotia le Perofeta” (Tala o le Mataupu Faavae ma Feagaiga, 201–5) e faamatala atu ai i tamaiti le auala na maliu ai le Perofeta o Iosefa Samita ma lona uso o Ailama Samita. Pe tuu atu i tamaiti e faamatala le tala. Faasoa atu lau molimau o Iosefa Samita o se perofeta moni ma na ia tuuina atu lona ola mo le Alii ma Lana talalelei.

• Faasoa ma tamaiti ni nai fuaitau mai le mau o le Tusi a Mamona lea na faitauina e Ailama Samita ao lei alu atu i le Falepuipui o Karefasi, o loo tusia i le Mataupu Faavae ma Feagaiga 135:5. Talanoa e uiga i le auala atonu na faamafanafanaina ai e lenei mau Ailama. Faasoa atu mau e aumaia ia te oe le mafanafana pe a e popole pe faanoanoa.

Mataupu Faavae ma Feagaiga 135:3

O Iosefa Samita o se Perofeta a le Atua.

I le gasologa o le tausaga, ua aoaoina ai e tamaiti mea na faaali mai e le Alii e ala mai i le Perofeta o Iosefa Samita. E mafai ona e fesoasoani latou te manatuaina ma talisapaia le auala na faamanuiaina ai e le galuega a Iosefa o latou olaga.

Gaoioiga e Mafai Ona Fai

• Faaali atu mea faitino e suitulaga i le galuega a le Perofeta o Iosefa Samita, e pei o le Tusi a Mamona, le Mataupu Faavae ma Feagaiga, po o se ata o faifeautalai po o se malumalu. I le faaaoga ai o fuaitau mai le Mataupu Faavae ma Feagaiga 135:3, faasoa atu i tamaiti nisi o mea na faia e le Alii e ala mai ia Iosefa Samita mo lo tatou faaolataga. Valaaulia tamaiti e filifili se tasi o nei mea ma faasoa mai pe aisea latou te faafetai ai mo lena mea.

• A o valivali e tamaiti le itulau o gaoioiga o lenei vaiaso, usu pe taina pese e uiga ia Iosefa Samita, e pei o le “Vi‘ia Lē na Fetaia‘i ma Ieova” (Viiga, nu. 15). Faasoa atu ou lagona e uiga i le Perofeta.

  Iosefa Samita

  O Le Perofeta Amerika, na saunia e Del Parson

Mataupu Faavae ma Feagaiga 136

Ua tuuina mai e le Atua poloaiga e fesoasoani ia i tatou.

Sa feagai le Au Paia ma le tele o tofotofoga i tausaga ina ua mavae le maliu o Iosefa Samita. E mafai faapefea e le fautuaga na tuuina atu e le Alii i le Au Paia ona fesoasoani i tamaiti o loo e aoaoina?

Gaoioiga e Mafai Ona Fai

• Faasoa atu i tamaiti nisi o luitau na feagai ma le Au Paia ao latou tuua Navu ma faapotopoto i Winter Quarters (tagai mataupu 60 ma le62 i totonu o le Tala o le Mataupu Faavae ma Feagaiga, 211–16, 222–24). Tuu se ata o le Malumalu o Navu i le tasi itu o le potu, ma fausia se malutaga faigofie i le isi itu—masalo e i ai se palanikeke ma ni nofoa po o se laulau. Valaaulia tamaiti e faapotopoto i autafa o le ata, ma tau atu ia i latou e tasi le tausaga ma le afa talu ona maliu Iosefa Samita, ae faamalosia le Au Paia e tuua Navu. Valaaulia tamaiti e savavali ese mai le malumalu ma faapotopoto i totonu o le malutaga e fai ma sui o le malaga i Winter Quarters.

• Faamalamalama atu na tuuina mai e le Alii se faaaliga ia Polika Iaga, o loo maua i totonu o le Mataupu Faavae ma Feagaiga 136, e fesoasoani ai i le Au Paia ao latou malaga atu i le Vanu o Sate Leki. Faitau ni nai fuaitau mai le vaega 136 o loo aofia ai le fautuaga lea e mafai ona malamalama i ai tamaiti laiti, ma valaaulia i latou e faatino pe tusi mea na poloaiina ai e le Alii le Au Paia e fai ao latou faimalaga. Mo se faataitaiga, e mafai e le fanau ona tusia i latou lava o toe faafoi se mea na latou nonoina mai se uo, pe e mafai ona latou usuina se pese o le Peraimeri ao latou sisiva faataamilo i se afi tolauapiga faafoliga (tagai fuaiupu 25, 28).

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 135

Na tuuina atu e Iosefa Samita ma Ailama Samita o la ola mo le talalelei a Iesu Keriso.

O le faalogo e uiga i osigataulaga a Iosefa Samita ma Ailama Samita e mafai ona faamalosia ai le faatuatua o tamaiti ma lo latou naunau ina ia faamaoni i a latou molimau.

Gaoioiga e Mafai Ona Fai

• Fai atu i tamaiti e faasoa mai mea latou te iloa e uiga i le ala na fasiotia ai Iosefa ma Ailama Samita. Afai latou te manaomia le fesoasoani, faasino atu i latou i le Mataupu Faavae ma Feagaiga 135:1 po o le “Mataupu 57: Ua Fasiotia le Perofeta” (Tala o le Mataupu Faavae ma Feagaiga, 201-5). Valaaulia tamaiti e vaai faalemafaufau na latou nonofo i Navu ina ua maliu le Perofeta. Fai atu ia i latou e faasoa mai pe ono faapeī ni o latou lagona. Tuuina atu lau molimau e uiga ia Iosefa Samita, ma valaaulia tamaiti e faia foi faapena.

• Faaali ni ata o perofeta (tagai Tusi Ata o le Talalelei, nu. 14, 18, 67). O a nisi o mea ua fetalai mai ai le Atua i perofeta e fai? Faamalamalama atu ua folafola mai e le Alii e faamanuia Ana perofeta mo osigataulaga latou te faia i Lana galuega (tagai Mataio 10:39).

Mataupu Faavae ma Feagaiga 135:3

O Iosefa Samita o se Perofeta a le Atua.

E pei o perofeta uma, sa molimau Iosefa Samita e uiga ia Iesu Keriso ma aoao i tatou i le auala e o mai ai ia te Ia. Fesoasoani i tamaiti e vaai pe faapefea ona ausia e Iosefa Samita lana misiona.

Gaoioiga e Mafai Ona Fai

• Faitau faatasi le Mataupu Faavae ma Feagaiga 135:3, ma fai atu i tamaiti e faailoa mai mea na ausia e Iosefa Samita. Tusi i luga o le laupapa mea latou te maua. Valaaulia tamaiti e filifili se tasi o nei mea ma faasoa mai pe aisea latou te faafetai ai mo lena mea.

• Uunaia tamaiti e mafaufau i se uo po o se tasi e le tele sona iloa e uiga ia Iosefa Samita. O le a se latou tala e fai pe afai e fesili lena tagata, “Aisea e taua tele ai Iosefa Samita ia te oe?” Valaaulia tamaiti e faataitai mea o le a latou fai atu ai i lenei tagata.

Mataupu Faavae ma Feagaiga 136:4, 10–11, 18–30

E mafai ona faamanuiaina au e le Alii pe a ou tauivi.

Ina ua mavae le fasiotia o Iosefa Samita, sa tuliesea le Au Paia mai Navu. Na taitai atu i latou e Polika Iaga i Winter Quarters, lea na latou saunia ai mo se malaga umi atu i le Vanu o Sate Leki.

Gaoioiga e Mafai Ona Fai

• Aotele aafiaga o le Au Paia ina ua mavae le fasiotia o le Perofeta o Iosefa Samita (tagai mataupu 58, 60, ma le 62 i totonu o le Tala o le Mataupu Faavae ma Feagaiga, itulau 206–8, 211–16, 222–24). Valaaulia tamaiti e mafaufau pe o le a so latou lagona pe afai e tatau ona latou tuua o latou fale ma saili se nofoaga fou e nonofo ai i le vaomatua. Faamalamalma atu i le Mataupu Faavae ma Feagaiga 136, na tuuina mai ai e le Alii ni fautuaga e fesoasoani ai i le Au Paia i la latou faigamalaga. Tufa i tamaiti taitoatasi ni nai fuaiupu mai lenei faaaliga, e pei o fuaiupu 4, 10–11, 18–30, ma fai atu i tamaiti ia latou sailia se mea e mafai ona fesoasoani ia i latou i o latou popolega poʻo mea e fefefe ai.

• Fesoasoani i tamaiti e mafaufau i tofotofoga o feagai ma tagata i aso nei. Valaaulia i latou e saili se mea i le vaega 136 atonu e mafai ona latou faʻasoa atu e faʻamalosiau ai i se tasi o loʻo feagai ma se faʻafitauli. E mafai foi ona maua e tamaiti ni savali faamalosiau i totonu o le “O Mai, Outou o le ‘Au Pa‘ia” (Viiga, nu. 17), o se viiga na lagiina e le Au Paia i le latou malaga.

aikona o le aoaoina

Uunaia le Aoaoina i le Aiga

Valaaulia tamaiti e faasoa ma o latou aiga po o se uo pe aisea latou te faafetai ai mo le Perofeta o Iosefa Samita.

Faaleleia o Lo Tatou Aoao Atu

E tiotio tamaiti. E i ai taimi atonu e te manatu e faalavelaveina le aoaoina o tamaiti ona o lo latou malolosi. Ae e mafai ona e atinae i o latou natura malolosi e ala i le valaauliaina o i latou e tusi, pepese, pe faatino se mataupu faavae o le talalelei (tagai Aoao Atu i le Ala o le Faaola, 25–26).

itulau o gaoioiga: O Iosefa Samita o se perofeta a le Atua