Tatou faatasi ma Latou ma Latou faatasi ma Tatou, saunia e Caitlin Connolly

Novema 1–7

Mataupu Faavae ma Feagaiga 125–128

“O Se Leo o le Fiafia mo e o Ola ma e ua Oti”

Afai e te aʻoaʻoina tamaiti laiti ma manaʻomia se fesoasoani faaopoopo, tagai i le “Taulimaina o Manaoga o Tamaiti Laiti” i le amataga o le punaoa lenei.

Tusi Faamaumau Ou Lagona Uunai

Valaaulia le Fefaasoaai

Fesoasoani i tamaiti e mafaufau i se mea na latou aoaoina i lenei vaiaso i le fale po o le Peraimeri. Tuu atu ia i latou ni nai minute e tusi ai se ata o mea na latou mafaufau i ai ma faasoa atu i le vasega.

Aoao atu le Aoaoga Faavae: Tamaiti Laiti

Mataupu Faavae ma Feagaiga 126:3

Ou te alofa i lo’u aiga.

Ina ua mavae le foi mai o Polika Iaga i le fale mai le talaiina atu o le talalelei, sa tau atu e le Alii ia te ia e taulai atu i le tausiga o lona aiga.

Gaoioiga e Mafai Ona Fai

• Faasoa atu i tamaiti le faamatalaga e uiga ia Polika Iaga i le “Mataupu 50: O le Au Paia i Navu” (Tala o le Mataupu Faavae ma Feagaiga,184), pe aotele le Mataupu Faavae ma Feagaiga 126 i au oe lava upu. Ona faitau lea o le Mataupu Faavae ma Feagaiga 126:3 i tamaiti, ma faamamafa atu le fuaitau “tausi faapitoa lelei lou aiga.” O le a le uiga o le tausia o o tatou aiga? Fesoasoani i tamaiti e mafaufau i ni auala e mafai ona latou faaali atu ai le alofa i tagata o o latou aiga.

• A o lei amataina le vasega, valaaulia tamaiti e aumai se ata o lo latou aiga (pe fai atu ia i latou e tusi ni ata). Ona fai atu lea ia i latou e faasoa mai se mea latou te alolofa i ai e uiga i o latou aiga. Faasoa atu se ata o lou aiga, ma faia foi faapena. Faamatala pe aisea e finagalo ai le Tama Faalelagi ia tatou tausia tagata o o tatou aiga. Usu se pese o aoao mai ai lenei upumoni, e pei o le “Pe A Tatou Fesoasoani” (Tusipese a Tamaiti,108).

Mataupu Faavae ma Feagaiga 128:5, 12

E manaomia e fanau uma a le Atua le avanoa e papatiso ai.

I le faaopoopo atu i le fesoasoani i tamaiti e saunia e osia a latou lava feagaiga o le papatisoga, aoao i latou e mafai ona tatou fesoasoani ia i latou o e ua maliliu ae lei papatisoina ia maua ia lava faamanuiaga tutusa.

Gaoioiga e Mafai Ona Fai

• Faaali atu se ata o Iesu Keriso o loo papatisoina (tagai Tusi Ata o le Talalelei, nu. 35), pe faaali le vitio “The Baptism of Jesus” (ChurchofJesusChrist.org). Fesili atu i tamaiti pe na latou vaai i se tagata ua papatisoina. O le a se mea o latou manatua e uiga i ai? Faaaoga le ata po o le vitio e faaali ai i tamaiti pe a tatou papatiso, tatou te o atoa i lalo o le vai ona toe o a’e lea i luga, e pei lava ona sa faia e Iesu. Susue i le Mataupu Faavae ma Feagaiga 128:12, ma faamatala atu na aoao mai Iosefa Samita o le papatisoina e faamanatu mai ai ia i tatou le Toetu.

• Taʻu i tamaiti se tasi e te iloa (pei o se tuaa) na maliu ae le’i papatisoina. Faitau le Mataupu Faavae ma Feagaiga 128:5, ma tuu atu ia i latou e auauai i le uuina o se ata o se vai papatisoga o le malumalu (tagai otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Molimau atu ua faatagaina i tatou e le Tama Faalelagi ina ia papatisoina i le lalolagi mo tagata ua maliliu. O lenei auala e mafai ai ona papatisoina fanau uma a le Atua ma osia feagaiga ma Ia.

Mataupu Faavae ma Feagaiga 128:18

E finagalo le Tama Faalelagi ou te aoao e uiga i loʻu talafaasolopito o aiga.

E i ai auala faigofie e mafai ai e tamaiti laiti ona auai i le galuega o talafaasolopito o aiga. Fesoasoani ia latou lagona le alofa mo tagata i totonu o o latou aiga.

Gaoioiga e Mafai Ona Fai

• Fai se filifili pepa e i ai igoa o tagata o lou aiga (tagaʻi i le itulau o gaoioiga o lenei vaiaso), ma aumai e faʻaali i le vasega. Tau atu ni nai mea e uiga i tagata o i luga o lau filifili. Faitau atu i tamaiti le Mataupu Faavae ma Feagaiga 128:18, ma faamatala atu na aoao mai Iosefa Samita “ua i ai se ituaiga o sooga mau … i le va o tamā ma fanau.” Fesoasoani i tamaiti e fai a latou lava filifili faaleaiga, ma valaaulia i latou e ave filifili i le fale ma tuu atu i o latou matua e fesoasoani ia i latou e faaopoopo igoa o tuaa.

• Fai atu i tamaiti e faasoa mai se mea e uiga i se tasi o o latou matua matutua. Faamatala atu se tasi o tala e te fiafia i ai e uiga i ou matua po o matua o matua. Faaali atu ata, pe a mafai. Uunaia tamaiti e aoao atili e uiga i o latou matua matutua ma isi tuaa.

Aoao atu le Aoaoga Faavae: Tamaiti Matutua

Mataupu Faavae ma Feagaiga 126

E mafai ona ou fesoasoani e tausi loʻu aiga.

E faʻapefea ona e fesoasoani i tamaiti o loo e aoaoina e auauna atu i tagata o latou aiga i auala anoa?

Gaoioiga e Mafai Ona Fai

• Faitau faatasi le Mataupu Faavae ma Feagaiga 126:3. Aisea atonu na fetalai atu ai le Tama Faalelagi ia Polika Iaga ia “tausi faalelei [lona] aiga”? E faʻapefea ona tatou faia foi lenei mea mo o tatou aiga? Fai se lisi o mea e mafai ona tatou faia nei e auauna atu ai i o tatou aiga. E faapefea e le faia o nei mea ona fesoasoani ia i tatou ia avea atili e faapei o le Tama Faalelagi?

• Faasoa atu i tamaiti le tala a Sister Carole M. Stephens e uiga i le tama a lana tama o Porter (tagai “E I Ai se Mafuaaga Sili mo i Tatou e Olioli Ai,” Ensign po o le Liahona, Nov. 2013, 115). O le a le mea a Porter na fai e tausia ai lona aiga? E mafai faapefea ona tatou mulimuli i lana faataitaiga?

Mataupu Faavae ma Feagaiga 128:1, 15–18

O le papatisoga mo e ua maliliu e fatuina ai se “sootaga mau” i le va o aʻu ma o’u tuaa.

Na aoao mai Iosefa Samita o le papatisoga mo e ua maliliu e fusia ai tatou i o tatou tuaa e pei o ni sootaga i se filifili. E faʻapefea ona e fesoasoani i tamaiti ia lagona le fiafia e maua mai le aʻoaʻoina e uiga i o tatou augatuaa ma ia mautinoa ua faia galuega faalemalumalu mo i latou?

Gaoioiga e Mafai Ona Fai

• Vaelua le vasega i ni vaega se lua, ma fai atu i le vaega muamua e faitau le Mataupu Faavae ma Feagaiga 128:1 e saili po o le a le mataupu na i ai le mafaufau o Iosefa Samita. Fai atu i le isi vaega e faitau le fuaiupu 17 ma saili po o le a le mataupu na ia manatu e “sili ona mamalu.” Tuu atu ia i latou e faasoa mai mea latou te maua, ma talanoa e uiga i le mafuaaga e matuai mamalu ai lenei mataupu. Afai e mafai, valaaulia se talavou na faia ni papatisoga mo e ua maliliu e faasoa mai lona aafiaga ma faamatala pe aisea tatou te faia ai lenei galuega.

• Mafaufau e faʻaaoga se lesona faitino e faʻaalia ai e tatau ona tatou fesoasoani i o tatou tuaa o e leʻi papatisoina. Mo se faʻataʻitaʻiga, faʻaali atu se meaalofa poʻo se meaʻai, ae tuʻu i se mea e le au i ai se tasi o tamaiti. Ta’u atu i lena tamaititi e mafai ona ia maua le mea ae le mafai ona alu ese mai lona nofoa. Fesili atu i isi tamaiti pe o a mea e mafai ona latou faia e fesoasoani ai ia maua e le tamaitiiti. Faitau faatasi le Mataupu Faavae ma Feagaiga 128:15, ma talanoa pe faapefea ona fesootaʻi ma le lesona faatino.

• Valaaulia tamaiti e fai se filifili pepa i igoa o o latou matua, matua matutua, matua o matua matutua, ma alu ai lava faapena (tagai i le itulau o gaoioiga mo lenei lesona). Afai e le iloa e tamaiti igoa o latou tuaa, ia uunaia i latou e saili igoa ma tusi i luga o le filifili i le fale. Faitau faatasi le Mataupu Faavae ma Feagaiga 128:18 ia iloa po o le a le “sootaga mau” lea e faia a tatou talafaasolopito o aiga ia “o’oo’o ma atoatoa.” Faamatala se tala e uiga i se tuaa e fesoasoani ia te oe e te lagona ai le fesootaʻi atu ia te ia. Pe faaali foi le vitio “Courage: I Think I Get It from Him” (ChurchofJesusChrist.org).

• Faaali atu i tamaiti se pepa faataga o le malumalu, ma ta’u i ai pe faapefea ona e mauaina se pepa faataga. Fesoasoani ia i latou e tulimatai atu i le mauaina o a latou lava pepa faataga o le malumalu ina ia latou o atu i le malumalu ma ia papatisoina mo o latou lava tuaa.

  

  E mafai ona tatou mauaina igoa o o tatou tuaa ma faia sauniga o le malumalu mo i latou.

Uunaia le Aoaoina i le Aiga

Valaaulia tamaiti e fai atu i se tasi i le fale e fesoasoani ia latou aoao atili e uiga i o latou talafaasolopito o aiga. E mafai ona latou fesili e faʻalogo i tala e uiga i se tuaa pe faʻaoga le FamilySearch.org e sue ai igoa o tuaa o e leʻi papatisoina.

Faaleleia o Lo Tatou Aoao Atu

Fesoasoani i tamaiti e faailoa lo latou fatufatuai. Pe a fausiaina e tamaiti, tusi, pe valivali se mea e fesootaʻi ma le tala poʻo le mataupu o loʻo latou aʻoaʻoina, e masani ona latou manatuaina lelei. E mafai foi ona latou faaaogaina lo latou fatufatuai e aoao ai isi. (Tagai Aoao Atu i le Ala a le Faaola,25.)