« គំនិតយោបល់ដើម្បីកែលម្អដល់ការសិក្សាព្រះគម្ពីរជាគ្រួសាររបស់អ្នក » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្តីសញ្ញា ឆ្នាំ ២០២១ ( ឆ្នាំ ២០២០ )
« គំនិតយោបល់ដើម្បីកែលម្អដល់ការសិក្សាព្រះគម្ពីរជាគ្រួសាររបស់អ្នក » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១
គំនិតយោបល់ដើម្បីកែលម្អដល់ការសិក្សាព្រះគម្ពីរជាគ្រួសាររបស់អ្នក
ការសិក្សាព្រះគម្ពីរជាគ្រួសារជាទៀងទាត់ គឺជារបៀបមួយដ៏មានអានុភាពដើម្បីជួយដល់គ្រួសាររបស់អ្នកឲ្យរៀនដំណឹងល្អ ។ ទោះបីជាអ្នកអានជាគ្រួសារច្រើន និងយូរប៉ុណ្ណាក៏ដោយ ក៏វាមិនសំខាន់ជាងការមានភាពខ្ជាប់ខ្ជួននៅក្នុងកិច្ចខិតខំរបស់អ្នកដែរ ។ នៅពេលអ្នកធ្វើឲ្យការសិក្សាព្រះគម្ពីរជាផ្នែកដ៏សំខាន់នៃជីវិតគ្រួសាររបស់អ្នក នោះអ្នកនឹងជួយសមាជិកគ្រួសាររបស់អ្នកឲ្យខិតមកកាន់តែជិតគ្នា និងព្រះយេស៊ូវគ្រីស្ទ ហើយស្ថាបនាទីបន្ទាល់របស់ពួកគេនៅលើគ្រឹះនៃព្រះបន្ទូលរបស់ទ្រង់ ។
សូមពិចារណាសំណួរខាងក្រោម ៖
-
តើអ្នកអាចលើកទឹកចិត្តសមាជិកគ្រួសាររបស់អ្នក ឲ្យសិក្សាព្រះគម្ពីរដោយខ្លួនគេតាមរបៀបណា ?
-
តើអ្នកអាចធ្វើអ្វីខ្លះដើម្បីលើកទឹកចិត្តដល់សមាជិកគ្រួសារឲ្យចែកចាយនូវអ្វីដែលពួកគេកំពុងរៀន ?
-
តើ អ្នកអាចគូសបញ្ជាក់អំពីគោលការណ៍ទាំងឡាយ ដែលអ្នកកំពុងរៀននៅក្នុងគម្ពីរគោលលទ្ធិ និង សេចក្តីសញ្ញា នៅក្នុងពេលបង្រៀនរៀងរាល់ថ្ងៃយ៉ាងដូចម្ដេច ?
សូមចាំថា គេហដ្ឋានគឺជាកន្លែងដ៏ពិសិដ្ឋមួយសម្រាប់ការរៀនសូត្រដំណឹងល្អ ។ អ្នកអាចរៀន និងបង្រៀនដំណឹងល្អនៅគេហដ្ឋានតាមរបៀបដែលពុំមាននៅក្នុងថ្នាក់រៀននៅឯព្រះវិហារ ។ សូមមានការឆ្នៃប្រឌិត នៅពេលអ្នកគិតអំពីរបៀបជួយដល់គ្រួសារអ្នកឲ្យរៀនសូត្រចេញមកពីបទគម្ពីរ ។
គំនិតសម្រាប់សកម្មភាព
សូមពិចារណាប្រើនូវគំនិតមួយចំនួនដូចខាងក្រោម ដើម្បីពង្រីកការសិក្សាបទគម្ពីរជាគ្រួសាររបស់ បងប្អូន ៖
ប្រើតន្ត្រី
សូមច្រៀងចម្រៀងដែលគាំទ្រដល់គោលការណ៍ដែលបានបង្រៀននៅក្នុងបទគម្ពីរ ។ ទំនុកតម្កើង ឬចម្រៀងថ្នាក់កុមារមួយដែលត្រូវបានផ្ដល់យោបល់ឲ្យប្រើ គឺត្រូវបានដាក់នៅក្នុងគម្រោងមេរៀននីមួយៗរាល់សប្តាហ៍ ។ អ្នកអាចសួរសំណួរអំពីពាក្យ ឬឃ្លានៅក្នុងទំនុកបទ ។ បន្ថែមពីលើការច្រៀង ក្រុមគ្រួសាររបស់អ្នកអាចធ្វើសកម្មភាពដែលត្រូវនឹងចម្រៀង ឬស្ដាប់ចម្រៀងដែលមានសាច់ភ្លេងផ្ទៃខាងក្រោយនៅពេលពួកគេកំពុងធ្វើសកម្មភាពដទៃទៀត ។
ចែកចាយបទគម្ពីរប្រកបដោយអត្ថន័យ
សូមផ្ដល់ពេលឲ្យសមាជិកគ្រួសារដើម្បីចែកចាយវគ្គបទគម្ពីរដែលពួកគេបានរកឃើញថាមានអត្ថន័យ អំឡុងពេលពួកគេសិក្សាព្រះគម្ពីរផ្ទាល់ខ្លួន ។
ប្រើពាក្យរបស់អ្នកផ្ទាល់
សូមអញ្ជើញសមាជិកគ្រួសារឲ្យសង្ខេបជាសម្ដីរបស់គេផ្ទាល់អំពីអ្វីដែលពួកគេបានរៀនចេញមកពីបទគម្ពីរដែលពួកគេបានសិក្សា ។
អនុវត្ដបទគម្ពីរមកក្នុងជីវិតរបស់បងប្អូន
បន្ទាប់ពីការអានវគ្គបទគម្ពីរមួយ ចូរសុំឲ្យសមាជិកគ្រួសារចែកចាយអំពីរបៀបដែលបទគម្ពីរអនុវត្តទៅក្នុងជីវិតរបស់ពួកគេ ។
សួរសំណួរមួយ
សូមអញ្ជើញសមាជិកគ្រួសារឲ្យសួរសំណួរដំណឹងល្អ បន្ទាប់មកចំណាយពេលរកមើលខគម្ពីរដែលអាចជួយឆ្លើយសំណួរនោះ ។
ដាក់តាំងបទគម្ពីរមួយ
សូមជ្រើសរើសខគម្ពីរមួយដែលអ្នករកឃើញថាមានអត្ថន័យ ហើយដាក់តាំងវានៅកន្លែងដែលសមាជិកគ្រួសារអាចមើលឃើញជាញឹកញាប់ ។ សូមអញ្ជើញសមាជិកគ្រួសារដទៃទៀតផ្លាស់វេណគ្នាជ្រើសរើសបទគម្ពីរមួយមកដាក់តាំង ។
ធ្វើបញ្ជីបទគម្ពីរមួយ
ជាក្រុមគ្រួសារ សូមជ្រើសរើសខគម្ពីរមួយចំនួនដែលអ្នកចង់ពិភាក្សាអំឡុងសប្ដាហ៍ក្រោយ ។
ទន្ទេញបទគម្ពីរ
សូមជ្រើសរើសវគ្គបទគម្ពីរមួយដែលមានអត្ថន័យចំពោះគ្រួសារអ្នក ហើយអញ្ជើញសមាជិកគ្រួសារឲ្យទន្ទេញវាដោយការសូត្រវាឡើងវិញប្រចាំថ្ងៃ ឬលេងល្បែងកំសាន្ដទន្ទេញចាំ ។
ចែកចាយមេរៀនដោយប្រើវត្ថុ
សូមស្វែងរកវត្ថុដែលទាក់ទងនឹងជំពូក និងខគម្ពីរទាំងឡាយដែលអ្នកកំពុងអានជាគ្រួសារ ។ សូមអញ្ជើញសមាជិកគ្រួសារឲ្យនិយាយអំពីរបៀបដែលវត្ថុនីមួយៗជាប់ទាក់ទងនឹងការបង្រៀននៅក្នុងបទគម្ពីរ ។
ជ្រើសរើសប្រធានបទមួយ
សូមឲ្យសមាជិកគ្រួសារផ្លាស់វេណគ្នាជ្រើសរើសប្រធានបទមួយដែលគ្រួសារនឹងសិក្សារួមគ្នា ។ សូមប្រើ Topical Guide, Bible Dictionary ឬ សេចក្ដីណែនាំដល់បទគម្ពីរទាំងឡាយ ( នៅលើគេហទំព័័រ scriptures.ChurchofJesusChrist.org ) ដើម្បីស្វែងរកវគ្គបទគម្ពីរអំពីប្រធានបទ ។
គូររូបភាព
សូមអានខគម្ពីរពីរបីជាគ្រួសារ បន្ទាប់មកទុកពេលឲ្យសមាជិកគ្រួសារគូររូបអ្វីមួយ ដែលជាប់ទាក់ទងនឹងអ្វីដែលអ្នកអាន ។ សូមចំណាយពេលពិភាក្សាអំពីគំនូររបស់គ្នាទៅវិញទៅមក ។
សម្ដែងជារឿងមួយ
បន្ទាប់ពីអានរឿងមួយចប់ សូមអញ្ជើញសមាជិកគ្រួសារឲ្យសម្ដែងរឿង ។ បន្ទាប់មក និយាយអំពីរបៀបដែលរឿងនោះទាក់ទងនឹងអ្វី ដែលអ្នកកំពុងជួបប្រទះជាបុគ្គលម្នាក់ៗ ឬជាគ្រួសារ ។
ការបង្រៀនកុមារ
ប្រសិនបើអ្នកមានកូនតូចៗនៅក្នុងគ្រួសាររបស់អ្នក នេះគឺជាសកម្មភាពមួយចំនួនដែលអាចជួយពួកគេឲ្យរៀន ៖
ច្រៀង
ទំនុកតម្កើង និងចម្រៀងចេញមកពី សៀវភៅចម្រៀងកុមារ បង្រៀនអំពីគោលលទ្ធិយ៉ាងមានអានុភាព ។ គម្រោងមេរៀននីមួយៗនៅក្នុងធនធាននេះរួមមាននូវចម្រៀងដែលត្រូវបានផ្ដល់យោបល់ឲ្យប្រើ ។ អ្នកក៏អាចប្រើ មាតិកាប្រធានបទនៅខាងក្រោយ សៀវភៅចម្រៀងកុមារ ដើម្បីរកមើលចម្រៀងដែលទាក់ទងនឹងគោលការណ៍ដំណឹងល្អដែលអ្នកកំពុងបង្រៀនផងដែរ ។ សូមជួយកូនៗរបស់អ្នកឲ្យភ្ជាប់សារលិខិតនៃចម្រៀងនោះទៅនឹងជីវិតរបស់ពួកគេ ។
ស្ដាប់ ឬសម្ដែងរឿង
កុមារតូចៗចូលចិត្តរឿងនិទាន—ចេញមកពីព្រះគម្ពីរ ចេញមកពីជីវិតរបស់អ្នក ចេញមកពីប្រវត្តិសាសនាចក្រ ឬមកពីទស្សនាវដ្តីសាសនាចក្រ ។ សូមស្វែងរកមើលនូវវិធីនានាដើម្បីឲ្យពួកគេចូលរួមនៅក្នុងការនិយាយប្រាប់រឿងនិទានទាំងឡាយ ។ ពួកគេអាចកាន់រូបភាព ឬវត្ថុអ្វីមួយ គូររូបភាពអ្វីដែលពួកគេស្ដាប់ឮ សម្ដែងរឿង ឬ ជួយនិទានរឿង ។ សូមជួយកូនៗរបស់អ្នកឲ្យស្គាល់សេចក្ដីពិតនៃដំណឹងល្អនៅក្នុងរឿងដែលអ្នកចែកចាយ ។
អានបទគម្ពីរមួយ
កុមារតូចៗពុំអាចអានបានច្រើនទេ ប៉ុន្តែអ្នកអាចនៅតែឲ្យពួកគេចូលរួមនៅក្នុងការរៀនសូត្រចេញមកពីបទគម្ពីរបាន ។ អ្នកអាចចាំបាច់ត្រូវផ្ដោតទៅលើខគម្ពីរមួយ ឃ្លាគន្លឹះ ឬពាក្យគន្លឹះ ។
មើលរូបភាព ឬមើលវីដេអូមួយ
សូមសួរសំណួរអំពីរូបភាព ឬវីដេអូមួយ ដែលទាក់ទងនឹងគោលការណ៍ដំណឹងល្អដែលអ្នកកំពុងពិភាក្សា ។ ឧទាហរណ៍ អ្នកអាចសួរថា « តើមានរឿងអ្វីកើតឡើងនៅក្នុងរូបភាពនេះ ? តើរឿងនោះធ្វើឲ្យកូនមានអារម្មណ៍យ៉ាងណា ? » កម្មវិធីបណ្ណាល័យដំណឹងល្អ Gospel Media Library នៅលើគេហទំព័រ ChurchofJesusChrist.org និង children.ChurchofJesusChrist.org គឺជាកន្លែងដ៏ល្អដើម្បីរកមើលរូបភាព និងវីដេអូនានា ។
ច្នៃប្រឌិត
កុមារតូចៗអាចសង់ គូរ ឬផាត់ពណ៌អ្វីមួយដែលទាក់ទងនឹងរឿង ឬគោលការណ៍ដែលពួកគេកំពុងរៀន ។
ចូលរួមក្នុងមេរៀនដែលមានវត្ថុបង្ហាញ
មេរៀនដែលមានវត្ថុបង្ហាញដ៏សាមញ្ញមួយ អាចជួយកូនៗរបស់អ្នកឲ្យយល់គោលការណ៍ដំណឹងល្អមួយ ដែលពិបាកយល់ ។ នៅពេលប្រើមេរៀនដែលមានកម្មវត្ថុបង្ហាញ សូមរកវិធីដើម្បីឲ្យកូនតូចៗរបស់អ្នកចូលរួម ។ ពួកគេនឹងរៀនបន្ថែមចេញមកពីបទពិសោធន៍អន្តរកម្មជាជាងគ្រាន់តែមើលចេញមកពីការបង្ហាញ ។
ដើរតួសម្ដែង
នៅពេលកុមារតូចៗសម្តែងអំពីស្ថានភាពមួយ ដែលពួកគេទំនងជានឹងជួបក្នុងជីវិតពិត នោះពួកគេនឹងអាចយល់បានល្អប្រសើរអំពីរបៀបដែលគោលការណ៍នៃដំណឹងល្អអនុវត្តនៅ ក្នុងជីវិតរបស់ពួកគេ ។
ធ្វើសកម្មភាពសារឡើងវិញ
កុមារតូចៗអាចនឹងត្រូវការស្ដាប់គំនិតនានាឲ្យបានច្រើនដងដើម្បីយល់វា ។ ឧទាហរណ៍ អ្នកចែកចាយរឿងបទគម្ពីរមួយច្រើនដងតាមរបៀបផ្សេងៗគ្នា ដូចជា—ការអានចេញមកពីបទគម្ពីរ ការសង្ខេបតាមសម្ដីរបស់អ្នកផ្ទាល់ ការទុកឲ្យកូនរបស់អ្នកជួយនិទានរឿង និងការអញ្ជើញពួកគេឲ្យសម្ដែងរឿងជាដើម ។
ភ្ជាប់ទំនាក់ទំនងទៅនឹងគោលដៅអភិវឌ្ឍន៍ផ្ទាល់ខ្លួន
ការសិក្សាព្រះគម្ពីរជាគ្រួសារ អាចផ្តល់ការបំផុសគំនិតដល់យុវវ័យ និងកុមារឲ្យដាក់គោលដៅ សម្រាប់ការរីកចម្រើន ខាងវិញ្ញាណ ខាងរូបកាយ ខាងប្រាជ្ញា និងខាងសង្គម ( សូមមើល លូកា ២:៥២ ) ។
ការបង្រៀនយុវវ័យ
ប្រសិនបើអ្នកមានយុវវ័យនៅក្នុងគ្រួសាររបស់អ្នក ទាំងនេះគឺជាសកម្មភាពមួយចំនួនដែលអាចជួយពួកគេឲ្យរៀន ៖
សូមអញ្ជើញពួកគេឲ្យបង្រៀន
ជាធម្មតាយើងអាចរៀនបន្ថែមទៀត នៅពេលយើងបង្រៀនអ្វីមួយ ជាងអ្វីដែលយើងគ្រាន់តែឮអំពីវា ។ សូមផ្ដល់ឱកាសឲ្យយុវវ័យរបស់អ្នកដឹកនាំក្រុមគ្រួសារពិភាក្សាអំពីព្រះគម្ពីរ ។
ភ្ជាប់ទំនាក់ទំនងជាមួយថ្នាក់សិក្ខាសាលា
ឆ្នាំនេះសិស្សថ្នាក់សិក្ខាសាលា កំពុងសិក្សាព្រះគម្ពីរគោលលទ្ធិ និងសេចក្តីសញ្ញា ។ ប្រសិនបើយុវវយ័របស់អ្នកកំពុងចូលរួមក្នុងថ្នាក់សិក្ខាសាលា សូមអញ្ជើញពួកគេឲ្យចែកចាយអំពីអ្វីដែលពួកគេកំពុងរៀននៅទីនោះ ។
ប្រៀបប្រដូចព្រះគម្ពីរ
ពេលខ្លះយុវវ័យមានបញ្ហាមើលឃើញអំពីរបៀបដែលគោលទ្ធិ និងគោលការណ៍នានានៅក្នុងព្រះគម្ពីរទាំងនេះទាក់ទងនឹងជីវិតរបស់ពួកគេ ។ សូមជួយពួកគេឲ្យមើលឃើញពីរបៀបដែលដំណើររឿងនៅក្នុងព្រះគម្ពីរ ទាក់ទងនឹងស្ថានភាពដែលពួកគេប្រឈមមុខនៅផ្ទះ នៅសាលារៀន ឬជាមួយមិត្តភក្តិរបស់ពួកគេ ។
សួរសំណួរដែលលើកទឹកចិត្តឲ្យមានការពិចារណា
យុវវ័យភាគច្រើនឆ្លើយតបនឹងសំណួរបានល្អ ដែលអនុញ្ញាតឲ្យពួកគេបង្ហាញគំនិត និងអារម្មណ៍របស់ពួកគេអំពីព្រះគម្ពីរ ជាជាងការសូត្រឡើងវិញធម្មតានូវអ្វីដែលព្រះគម្ពីរនិយាយ ។ ឧទាហរណ៍អ្នកអាចសួរ « តើព្រះអម្ចាស់អាចបង្រៀនអ្វីខ្លះដល់អ្នកនៅក្នុងខគម្ពីរទាំងនេះ ? » ឬ « ហេតុអ្វីអ្នកគិតថា វិវរណៈនេះមានអត្ថន័យចំពោះពួកបរិសុទ្ធនៅក្នុងទសវត្សរ៍ឆ្នាំ ១៨៣០ ? »
ភ្ជាប់ទំនាក់ទំនងទៅនឹងគោលដៅអភិវឌ្ឍន៍ផ្ទាល់ខ្លួន
ការសិក្សាព្រះគម្ពីរជាគ្រួសារ អាចផ្តល់ការបំផុសគំនិតដល់យុវវ័យ និងកុមារឲ្យដាក់គោលដៅ សម្រាប់ការរីកចម្រើន ខាងវិញ្ញាណ ខាងរូបកាយ ខាងប្រាជ្ញា និងខាងសង្គម ( សូមមើល លូកា ២:៥២ ) ។
បើកចិត្តចំពោះសំណួររបស់ពួកគេ
សំណួរមួយពីយុវវ័យគឺជាឱកាសដ៏មានតម្លៃដើម្បីចែកចាយសេចក្តីពិត និងស្វែងរកការយល់ដឹងនៅលើប្រធានបទដែលគេចាប់អារម្មណ៍ពិតប្រាកដ ។ សូមកុំខ្លាចសំណួរ ឬច្រានសំណួរទាំងនោះចោល ទោះបីជាវាហាក់បីដូចជាមិនទាក់ទងនឹងប្រធានបទនៃការពិភាក្សានេះក្តី ។ កុំបារម្ភប្រសិនបើអ្នកមិនដឹងពីចម្លើយទាំងអស់ ។ គេហដ្ឋានគឺជាកន្លែងដ៏ល្អបំផុតដើម្បីរកមើល ចម្លើយទំាងអស់គ្នា ។
លើកទឹកចិត្តពួកគេឲ្យចែកចាយអ្វីដែលនៅក្នុងចិត្តពួកគេ
យុវវ័យមានទស្សនៈវិស័យ និងការយល់ដឹងជាពិសេសដែលរួមចំណែកដល់ការសិក្សាបទគម្ពីរជាគ្រួសារ ។ សូមឲ្យពួកគេដឹងថា អ្នកចាប់អារម្មណ៍នឹងអ្វីដែលព្រះវិញ្ញាណកំពុងបង្រៀនពួកគេអំពីព្រះគម្ពីរ ។ អ្នកក៏អាចសុំពួកគេឲ្យចែកចាយគំនិតរបស់ពួកគេពីការសិក្សាព្រះគម្ពីរផ្ទាល់ខ្លួនផងដែរ ។
មានភាពបត់បែន
ប្រសិនបើអ្នកមានយុវវ័យដែលមិនមានឆន្ទៈចូលរួមនៅក្នុងការសិក្សាព្រះគម្ពីរជាគ្រួសារ សូមរកវិធីផ្សេងដើម្បីភ្ជាប់ទំនាក់ទំនងនឹងពួកគេ ។ ឧទាហរណ៍ អ្នកអាចលើកឡើងពីព្រះសិក្ខាបទ នៅក្នុងការសន្ទនាធម្មតា ឬចែកចាយព្រះគម្ពីរដ៏មានអត្ថន័យតាមរបៀបមួយដែលហាក់ដូចជាមិនមែនជាការផ្សព្វផ្សាយ ឬបង្ខិតបង្ខំ ? ការសិក្សាព្រះគម្ពីរមិនចាំបាច់មានរបៀបតែមួយនៅគ្រប់ក្រុមគ្រួសារនោះទេ ។ កុមារខ្លះអាចឆ្លើយតបបានល្អជាងក្នុងការសិក្សាព្រះមួយទល់នឹងមួយ ។ សូមពោរពេញដោយការអធិស្ឋាន និងធ្វើតាមការបំផុសគំនិតពីព្រះវិញ្ញាណ ។
ប្រធាន រ័សុល អិម ណិលសុន បានមានប្រសាសន៍ថា ៖ « ខ្ញុំសន្យាថា នៅពេលបងប្អូនធ្វើការដោយឧស្សាហ៍ព្យាយាម ដើម្បីស្ថាបនាគេហដ្ឋានរបស់បងប្អូនឲ្យក្លាយទៅជាមជ្ឈមណ្ឌលនៃការរៀនសូត្រដំណឹងល្អ នោះយូរៗទៅ ថ្ងៃឈប់សម្រាករបស់បងប្អូននឹងបានជាទីរីករាយចិត្តយ៉ាងពិតប្រាកដ ។ កូនចៅរបស់បងប្អូននឹងមានចិត្តរំភើបក្នុងការរៀនសូត្រ និងរស់នៅតាមការបង្រៀនរបស់ព្រះអង្គសង្គ្រោះ ហើយឥទ្ធិពលរបស់មារសត្រូវនៅក្នុងជីវិតរបស់បងប្អូន និងគេហដ្ឋានរបស់បងប្អូន នឹងត្រូវសាបរលាប ។ ការផ្លាស់ប្តូរនៅគ្រួសាររបស់បងប្អូននឹងមានច្រើន ហើយក៏ជាការគាំទ្រយ៉ាងពេញទំហឹងផងដែរ » ( « Becoming Exemplary Latter-day Saints » «Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ១១៣ ) ។