mau ’utuāfare e tuatāpapa ra i te mau pāpa’ira’a mo’a

Mau mana’o nō te ha’amaita’i i tā te ’utuāfare tuatāpapara’a pāpa’ira’a mo’a

’Ua riro te tuatāpapara’a pāpa’ira’a mo’a tāmau ’utuāfare ’ei rāve’a nō te tauturu i tō ’outou ’utuāfare ’ia ha’api’i mai i te ’evanelia. E ’ere te rahira’a ’e te roara’a o te tai’ora’a ’utuāfare i te mea faufa’a a’e ’o te tāmaura’a ra i tā ’outou tauto’ora’a. ’A fa’ariro ai ’outou i te tuatāpapara’a pāpa’ira’a mo’a ’ei tuha’a faufa’a rahi nō tō ’outou orara’a ’utuāfare, e tauturu ato’a ïa ’outou i te mau melo o te ’utuāfare ’ia ha’afātata atu ā i te tahi ’e te tahi ’e ia Iesu Mesia ’e e patu i tō rātou ’itera’a pāpū i ni’a i te niu o tāna parau.

Feruri i teie mau uira’a i muri nei :

• Nāhea ’outou e nehenehe ai e fa’aitoito i te mau melo o te ’utuāfare ’ia tuatāpapa i te mau pāpa’ira’a mo’a i tō rātou iho pae ?

• E aha tā ’outou e nehenehe e rave nō te fa’aitoito i te mau melo o te ’utuāfare ’ia fa’a’ite mai i tā rātou i ha’api’i mai ?

• Nāhea ’outou nō te tūra’i i te mau parau tumu i ’apohia mai i roto i Te Parau Ha’api’ira’a ’e te mau Parau Fafau, i roto i te mau taime ha’api’ira’a ato’a, i te mau mahana ato’a ?

’A ha’amana’o ē, ’o te fare te vāhi tano roa a’e nō te ha’api’i mai i te ’evanelia. E nehenehe tā ’outou e ’apo mai ’e e ha’api’i i te ’evanelia i te fare ’o te ’ore roa e nehenehe i roto i te piha ha’api’ira’a. ’Ia riro ’ei ravera’a ’āpī ’a feruri ai ’outou i te mau rāve’a nō te tauturu i tō ’outou ’utuāfare ’ia ha’api’i mai i te mau pāpa’ira’a mo’a.

Mau mana’o ’ohipara’a

’A feruri i te tahi o te mau mana’o i muri nei nō te ha’amaita’i i tā tō ’outou ’utuāfare tuatāpapara’a pāpa’ira’a mo’a :

Fa’a’ohipa i te pehe

E hīmene i te mau hīmene e turu i te mau parau tumu i ha’api’ihia i roto i te mau pāpa’ira’a mo’a. ’Ua mana’ohia te hō’ē hīmene ’aore rā te hō’ē hīmene a te mau tamari’i i roto i te arata’i ha’api’ira’a o te hepetoma tāta’itahi. E nehenehe e ui i te mau uira’a nō ni’a i te mau ta’o ’e ’aore rā te mau pereota i roto i te hīmene. Ta’a ’ē noa atu te hīmenera’a, e nehenehe te ’utuāfare e rave i te mau ’ohipa e tū’ati i te mau hīmene ’aore rā e fa’ata’i marū noa i te mau hīmene ’a rave noa ai i te tahi atu mau ’ohipa ri’i.

Fa’a’ite i te faufa’a o te mau pāpa’ira’a mo’a

’A hōro’a i te taime i te mau melo o te ’utuāfare ’ia fa’a’ite mai i te tahi tuha’a tā rātou i ha’afaufa’a i roto i tā rātou iho tuatāpapara’a.

Fa’a’ohipa i tā ’outou iho mau parau

’A ani i te mau melo o te ’utuāfare ’ia ha’apoto mai nā roto i tā rātou iho mau parau i tā rātou i ’apo mai nā roto mai i te mau pāpa’ira’a mo’a i tuatāpapahia.

Fa’a’ohipa i te mau pāpa’ira’a mo’a i roto i tō ’outou orara’a

’Ia oti te tai’ora’a o te hō’ē tuha’a ’īrava, ’a ani i te mau melo o te ’utuāfare ’ia fa’a’ite mai i te mau rāve’a e fa’a’ohipa i teie tuha’a ’īrava i roto i tō rātou orara’a.

Ui i te hō’ē uira’a

E ani i te mau melo o te ’utuāfare ’ia ui i te hō’ē uira’a nō ni’a i te ’evanelia ’e ’ei reira e ’imi atu ai i te tahi mau ’īrava e nehenehe e pāhono i te uira’a.

Pia i te hō’ē ’īrava pāpa’ira’a mo’a

E mā’iti i te hō’ē ’īrava faufa’a rahi nō ’outou ’e e pia i te reira i te vāhi e ’ite pinepine te mau melo o te ’utuāfare. E ani i te tahi atu mau melo o te ’utuāfare e fa’a’ohu nō te mā’itira’a i te ’īrava e pia.

Ha’amau i te hō’ē tāpura ’īrava

E mā’iti te ’utuāfare i te tahi mau ’īrava e paraparau i roto i te hepetoma i muri mai.

Tāmau ’ā’au i te mau ’īrava

’A mā’iti i te hō’ē tuha’a ’īrava faufa’a rahi nō te ’utuāfare, ’e ’a ani i te mau melo o te ’utuāfare ’ia tāmau ’ā’au i te reira nā roto i te fa’ahitira’a i te reira i te mau mahana ato’a ’aore rā nā roto i te tahi ha’uti nō te tāmau ’ā’au.

Fa’a’ohipa i te mau ha’api’ira’a tao’a

’A ’imi i te mau tao’a e tū’ati i te mau pene ’e te mau ’īrava tā te ’utuāfare e tai’o ra. E ani i te mau melo o te ’utuāfare ’ia parau mai nō ni’a i te huru te tao’a tāta’itahi e tū’ati ai i te mau ha’api’ira’a i roto i te mau pāpa’ira’a mo’a.

Mā’iti i te hō’ē tumu parau

E fa’a’ohu te mau melo o te ’utuāfare nō te mā’iti i te hō’ē tumu parau e tuatāpapa ’āmui te ’utuāfare. E fa’a’ohipa i te Arata’i nō te mau pāpa’ira’a mo’a (scriptures.lds.org) nō tē hi’o mai i te tahi mau tuha’a ’īrava nō ni’a i te reira tumu parau.

’A pāpa’i i te hō’ē hōho’a

E tai’o te ’utuāfare i te tahi mau ’īrava ri’i , ’ei reira e vaiiho i te tahi taime nō te mau melo o te ’utuāfare ’ia pāpa’i i te hō’ē hōho’a e tū’ati i te mea i tai’ohia. E fa’ata’a i te tahi taime nō te ’āparau nō ni’a i tā te tahi ’e tā te tahi hōho’a.

Ha’uti ta’ata ora i te hō’ē ’ā’amu

’Ia oti te hō’ē ’ā’amu i te tai’ohia, ’a ani i te mau melo o te ’utuāfare ’ia ha’uti ta’ata ora i te reira. I muri iho, e parau mai nō ni’a i te huru teie ’ā’amu e tū’ati ai i te mau ’ohipa e tupu ra nō te ta’ata hō’ē ’e nō te ’utuāfare.

Ha’api’i i te mau tamari’i

Mai te peu e tamari’i ri’i tā ’outou i roto i te ’utuāfare, teie te tahi mau ’ohipara’a e nehenehe e tauturu ia rātou ’ia ’apo mai i te ha’api’ira’a :

Hīmene

Tē ha’api’i pūai nei te mau hīmene ’e te mau hīmene o te buka Chants pour les enfants i te ha’api’ira’a tumu. Tē hōro’a nei te arata’i ha’api’ira’a tāta’itahi i roto i teie rāve’a tauturu i te hō’ē hīmene tei mana’ohia. E nehenehe ato’a e fa’a’ohipa i te fa’ahorora’a nō te mau tumu parau i muri i te buka Chants pour les enfants nō te hi’o mai i te mau hīmene e tū’ati i te mau parau tumu o te ’evanelia tā ’outou e ha’api’i ra. Tauturu i tā ’outou mau tamari’i ’ia fa’aau i te poro’i i roto i te mau hīmene i tō rātou orara’a.

Fa’aro’o ’aore ra ha’uti ta’ata ora i te hō’ē ’ā’amu

E mea au nā te mau tamari’i ri’i te mau ’ā’amu—nō roto mai ānei i te mau pāpa’ira’a mo’a, i tō ’outou orara’a, i te ’ā’amu o te ’Ēkālesia, ’aore rā nō roto mai i te mau ve’a a te ’Ēkālesia. E ’imi i te mau rāve’a nō te rave ’e ’o rātou i te fa’ati’ara’a ’ā’amu. E ti’a ia rātou ’ia tāpe’a i te mau hōho’a ’aore rā te mau tao’a, e pāpa’i i te hōho’a nō te mau mea tā rātou e fa’aro’o ra, e ha’uti ta’ata ora i te ’ā’amu ’aore rā e tauturu e fa’ati’a i te ’ā’amu. E tauturu i tā ’outou mau tamari’i ’ia ’ite mai i te mau parau mau o te ’evanelia i roto i te mau ’ā’amu tā ’outou e fa’ati’a.

Tai’o i te hō’ē ’īrava pāpa’ira’a mo’a

E’ita paha te mau tamari’i e ’ite i te tai’o, e nehenehe rā ’outou e ani ia rātou ’ia ha’api’i mai nā roto mai i te mau pāpa’ira’a mo’a. E hina’aro paha ’outou e rōtahi i ni’a iho hō’ē ’īrava, hō’ē pereota faufa’a, ’aore rā, hō’ē ta’o.

Hi’o i te hō’ē hōho’a ’aore rā māta’ita’i i te hō’ē video

’A ui i te mau uira’a nō ni’a i te hō’ē hōho’a ’aore rā te hō’ē video e tū’ati i te hō’ē parau tumu tā ’outou e ’āparau. ’Ei hi’ora’a, e nehenehe e ui : « E aha te ’ohipa e tupu ra i ni’a i te hōho’a ? E aha te mana’o e tae mai ? » E vāhi tano te Vaira’a buka ’evanelia i ni’a ia ChurchofJesusChrist.org, ’e te children.ChurchofJesusChrist.org nō tē hi’o mai i te mau hōho’a ’e te mau video.

Hāmani

E nehenehe te mau tamari’i e patu, e pāpa’i ’aore rā e fa’a’ū i te hō’ē mea e tū’ati i te ’ā’amu ’aore rā i te parau tumu tā rātou e ha’api’i mai.

Fa’aō mai i roto i te mau ha’api’ira’a tao’a

E nehenehe te hō’ē ha’api’ira’a tao’a ’ōhie e tauturu i tā ’outou mau tamari’i ’ia māramarama i te hō’ē parau tumu o te ’evanelia e ’ere i te mea ’ōhie ’ia māramarama. ’Ia fa’a’ohipa ’outou i te mau ha’api’ira’a tao’a, e ’imi i te rāve’a ’ia ’āmui ato’a mai tā ’outou mau tamari’i. E ha’api’i rahi mai atu ā rātou nā roto i te ’ohipara’a, rahi atu ā i te hi’o-noa-ra’a i te hō’ē fa’a’itera’a.

Ha’utira’a ta’ata ora

’Ia ha’uti ta’ata ora te mau tamari’i i te hō’ē ’ohipa i tupu i roto i tō rātou iho orara’a, e māramarama maita’i a’e rātou i te huru te hō’ē parau tumu o te ’evanelia e tano ai nō tō rātou orara’a.

Nā ni’a iho fa’ahou te mau ’ohipara’a.

Penei a’e tītauhia ’ia fa’ahiti e rave rahi taime i te hō’ē ha’api’ira’a i te mau tamari’i ri’i ’ia māramarama maita’i rātou i te reira. ’Ei hi’ora’a, e fa’ati’a i te hō’ē ’ā’amu o te pāpa’ira’a mo’a e rave rahi taime, e fa’ati’a ta’a ’ē rā—tai’o i roto i te mau pāpa’ira’a mo’a, ha’apoto nā roto i tā ’outou iho mau parau, vaiiho i te mau tamari’i ’ia tauturu mai i te fa’ati’ara’a i te ’ā’amu, ani ia rātou ’ia ha’uti ta’ata ora i te ’ā’amu, ’e tē vai atu ra.

Hi’o i te tū’atira’a ’e tā rātou iho mau fā

E nehenehe te tuatāpapara’a pāpa’ira’a mo’a a te ’utuāfare e hōro’a i te fa’aurura’a i te feiā ’āpī ’e i te tamari’i, nō te ha’amau i tā rātou mau fā nō tō rātou tupura’a pae vārua, pae tino, pae ferurira’a ’e pae sōtiare (hi’o Luka 2:52).

e ’utuāfare e ’ata’ata ’āmui ra

Ha’api’i i te feiā ’āpī

Mai te peu e feiā ’āpī tā ’outou i roto i te ’utuāfare, teie te tahi mau ’ohipa ri’i e nehenehe e tauturu ia rātou ’ia ’apo mai i te ha’api’ira’a :

Ani ia rātou ’ia hōro’a i te ha’api’ira’a

I te rahira’a taime ’ia ha’api’i ana’e tātou i te ta’ata e ’apo rahi mai atu ā tātou i te fa’aro’o-noa-ra’a. ’A hōro’a i te feiā ’āpī i te taime nō te fa’atere i te mau ’āparaura’a ’utuāfare nō ni’a i te mau pāpa’ira’a mo’a.

Hi’o i te tū’atira’a ’e te séminaire

I teie matahiti, e tuatāpapa te mau pīahi séminaire i Te Parau Ha’api’ira’a ’e te mau Parau Fafau. Mai te mea tē haere ra tā ’outou feiā ’āpī i te séminaire, ’a ani ia rātou ’ia fa’a’ite mai i te mea tā rātou i ha’api’i mai i te séminaire.

Fa’aau i te mau pāpa’ira’a mo’a i te orara’a

I te tahi taime, e mea fifi nō te feiā ’āpī ’ia ’ite e aha te tū’atira’a o te ha’api’ira’a tumu ’e te mau parau tumu i roto i te mau pāpa’ira’a mo’a ’e tō rātou orara’a. ’A tauturu ia rātou ’ia ’ite nāhea te mau ’ā’amu ’e te mau ha’api’ira’a i roto i te mau pāpa’ira’a mo’a e tū’ati ai i te mau ’ohipa tā rātou e fa’aruru nei i te fare, i te fare ha’api’ira’a ’aore rā i pīha’i iho i tō rātou mau hoa.

Ui i te mau uira’a e fa’aferuri i te ta’ata

E mea pāhono maita’i te feiā ’āpī e rave rahi i te mau uira’a ’o te vaiiho ia rātou ’ia fa’a’ite mai i te mana’o o tō rātou ferurira’a ’e o tō rātou ’ā’au nō ni’a i te mau pāpa’ira’a mo’a, ’eiaha rā i te fa’ahiti noa mai i tei pāpa’ihia. ’Ei hi’ora’a, e nehenehe e ui atu : « E aha tā te Fatu e ha’api’i ra ia ’outou i roto i teie mau ’īrava ? » ’aore rā « I tō ’outou mana’o, nō te aha e mea faufa’a teie heheura’a nō te feiā mo’a i te mau matahiti 1830 ra ? »

Hi’o i te tū’atira’a ’e tā rātou iho mau fā

E nehenehe te tuatāpapara’a pāpa’ira’a mo’a a te ’utuāfare e hōro’a i te fa’aurura’a i te feiā ’āpī ’e i te tamari’i, nō te ha’amau i tā rātou mau fā nō tō rātou tupura’a pae vārua, pae tino, pae ferurira’a ’e pae sōtiare (hi’o Luka 2:52).

Vai matara i tā rātou mau uira’a

Te uira’a a te feiā ’āpī, e rāve’a faufa’a rahi ïa nō te fa’a’ite i te parau mau ’e nō te māramarama i te hō’ē tumu parau tāna e ’ana’anatae ra. ’Eiaha e mata’u i te mau uira’a, ’aore rā e tu’u i te hiti, noa atu ā e au ē, ’aita e tū’atira’a ’e te tumu parau o te ’āparaura’a. ’Aita e fifi mai te mea ’aita tā ’outou e mau pāhonora’a ato’a. ’O te fare te vāhi maita’i roa nō te ’imi ’āmui i te mau pāhonora’a.

Fa’aitoito ia rātou ’ia fa’a’ite mai i tā rātou e feruri ra

E mau hi’ora’a ta’a ’ē hō’ē roa ’e te ferurira’a tō te feiā ’āpī e nehenehe e tauturu i te tuatāpapara’a pāpa’ira’a mo’a. ’Ia ’ite rātou ē, e ’ana’anatae ’outou ’ia ’ite e aha tā te Vārua e ha’api’i ra ia rātou nō ni’a i te mau pāpa’ira’a mo’a. E nehenehe ato’a e ani ia rātou ’ia fa’a’ite mai i tā rātou i feruri i roto i tā rātou tuatāpapara’a ta’ata hō’ē.

Vai apuapu noa

Mai te mea e taure’are’a ’aita e hina’aro e ’āmui mai i te tuatāpapara’a pāpa’ira’a mo’a a te ’utuāfare, ’a ’imi i te tahi atu mau rāve’a e tū’ati ai ’outou iāna. ’Ei hi’ora’a, e nehenehe ānei tā ’outou e paraparau nō te ’evanelia mai te huru ē e ’ohipa mātau, ’aore rā, e fa’a’ite i te hō’ē ’īrava faufa’a rahi ma te ’ore te reira ’ia riro ’ei ’ohipa porora’a ’aore rā ’ei fa’ahepora’a ? E ’ere ē hō’ē noa huru tuatāpapara’a pāpa’ira’a mo’a nō te tā’āto’ara’a o te mau ’utuāfare. Tē vai nei te mau tamari’i e haere maita’i a’e te tuatāpapara’a pāpa’ira’a mo’a hō’ē hō’ē. ’A pure ’e ’a pe’e i te mau muhumuhu a te Vārua.

’Ua parau te peresideni Russell M. Nelson : « Tē parau fafau atu nei au ē, ’ia ha’a itoito noa ’outou nō te fa’aau i tō ’outou ’utuāfare ’ei pū nō te ha’api’ira’a ’evanelia, ’āraua’e, e riro mai ïa tā ’outou mau sābati ’ei mahana hina’arohia. E ’ana’anatae roa mai tā ’outou mau tamari’i i te ha’api’i mai ’e i te ora i te mau ha’api’ira’a a te Fa’aora, ’e e iti noa mai te mana o te ’enemi i roto i tō ’outou orara’a ’e tō ’outou ’utuāfare. E taui roa mai tō ’outou ’utuāfare ’e e vai noa mai te reira maita’i. (« Riro ’ei feiā mo’a hi’ora’a maita’i », Ensign ’aore rā Liahona, Nov. 2018, 113).