Mau mana’o nō te ha’amaita’i i tā te ta’ata iho tuatāpapara’a pāpa’ira’a mo’a

Teie te tahi mau rāve’a ’ōhie nō te ha’amaita’i i tā te ta’ata iho tuatāpapara’a i te parau a te Atua i roto i te mau pāpa’ira’a mo’a.

E pure nō te fa’aurura’a

E parau nā te Atua te mau pāpa’ira’a mo’a, nō reira ’a ani iāna i te tauturu nō te māramarama i te reira.

’Imi i te parau mau nō ni’a ia Iesu Mesia

Tē ha’api’i nei te mau pāpa’ira’a mo’a ē, tē fa’a’ite pāpū nei te mau mea ato’a nō te Mesia (hi’o 2 Nephi 11:4 ; Mose 6:63), nō reira, e nehenehe e pāpa’i ’aore rā e tāpa’o i te mau ’īrava e fa’a’ite pāpū nei nō te Fa’aora, ’o tē fa’arahi i tō ’oe here nōna ’e ’o tē ha’api’i nāhea i te pe’e iāna.

’Imi i te mau ta’o ’e te mau pereota fa’auru

E ’ite paha ’oe ē, e mea fa’ahiahia nō ’oe te tahi mau ta’o ’e mau pereota i roto i te mau pāpa’ira’a mo’a, mai te huru ra ē, ’ua pāpa’i-ta’a-’ē-hia te reira nō ’oe. Penei a’e e ’ite ’oe i te huru ta’a ’ē o te reira ’e e fa’auru ’e e fa’aitoito ia ’oe. E nehenehe e fa’a’ū i te reira i roto i tā ’oe pāpa’ira’a mo’a ’aore rā e pāpa’i i te reira i roto i te hō’ē buka tuatāpapara’a.

’Imi i te mau parau mau o te ’evanelia

I te tahi taime e parau-’āfaro-hia mai te mau parau mau o te ’evanelia (tei parau-pinepine-hia te ha’api’ira’a tumu ’aore rā te mau parau tumu), ’e i te tahi atu taime, tei roto i te hō’ē hi’ora’a ’aore rā te hō’ē ’ā’amu. E ui ia ’oe iho ē : « E aha te mau parau mau mure ’ore i ha’api’ihia i roto i teie mau ’īrava ? »

Faʼaroʼo i te Vārua

E vai ara i te mau mana’o i roto i tō ’oe ferurira’a ’e i tō ’oe ’ā’au, noa atu ā ’aita e tū’atira’a i te mau mea tā ’oe e tai’o ra. Penei a’e ’o te reira mau mana’o te mea mau tā te Metua i te Ao ra e hina’aro ra ’ia ha’api’i mai ’oe.

Fa’aau i te mau pāpa’ira’a mo’a i tō ’oe orara’a

’A feruri nāhea te mau ’ā’amu ’e te mau ha’api’ira’a tā ’oe i tai’o e tū’ati ai i tō ’oe orara’a. ’Ei hi’ora’a, e ui ’oe i roto ia ’oe ē : « E aha te ’ohipa i tupu nō’u e tū’ati i te mea tā’u e tai’o ra ? » ’aore rā « Nāhea vau e nehenehe e pe’e i te hi’ora’a o teie ta’ata i roto i te mau pāpa’ira’a mo’a ? »

Ui i te mau uira’a ’a tuatāpapa noa ai

’A tuatāpapa ai ’oe i te mau pāpa’ira’a mo’a, e tae mai paha te tahi mau uira’a i tō ’oe ferurira’a. E tū’ati teie mau uira’a i te mea tā ’oe e tai’o ra ’aore rā i tō ’oe orara’a. E feruri i teie mau uira’a ’e e ’imi i te pāhonora’a ’a tāmau noa ai i te tuatāpapa i te mau pāpa’ira’a mo’a.

Fa’a’ohipa i te mau tauturu nō te tuatāpapa i te pāpa’ira’a mo’a

Nō te fa’arahi atu ā i tā ’oe ’apora’a mai nō ni’a i te mau ’īrava tā ’oe e tai’o ra, ’a fa’a’ohipa i te mau fa’ata’ara’a raro, te Arata’i nō te mau pāpa’ira’a mo’a (scriptures.ChurchofJesusChrist.org), ’e te tahi atu mau tauturu nō te tuatāpapa.

Feruri i te ’ohipa e tupu ra o te mau pāpa’ira’a mo’a.

E ’ite mai paha ’oe i te mau ha’amāramaramara’a faufa’a nō ni’a i te mau tuha’a o te mau pāpa’ira’a mo’a ’a feruri ai i te ’ohipa e tupu ra—te orara’a ’aore rā te tupura’a o te reira. ’Ei hi’ora’a, te ’itera’a i te mau huru tupura’a ’e te ti’aturira’a o te ta’ata tā te Atua e paraparau ra, e nehenehe e tauturu ia ’oe ’ia hāro’aro’a maita’i a’e i te tītaura’a a tāna mau parau.

Tāpa’o i te mau mana’o o tō ’oe ferurira’a ’e o tō ’oe ’ā’au

’Ua rau te rāve’a nō tē tāpa’o i te mau fa’aurura’a e tae mai i roto i te tuatāpapara’a. ’Ei hi’ora’a, e nehenehe tā ’oe e fa’a’ū i te hō’ē parau ’aore rā te hō’ē pereota faufa’a rahi ’e e tāpa’o i tō ’oe mau mana’o ’ei parau fa’ata’ara’a i roto i tā ’oe pāpa’ira’a mo’a. E nehenehe ato’a e tāpe’a i te hō’ē buka tāpa’ora’a nō te mau mea i ’apohia mai, te mau mana’o ’e te mau fa’aurura’a tā ’oe i fāri’i.

Tuatāpapa i te parau a te mau peropheta ’e a te mau ’āpōsetolo i te mau mahana hope’a nei

’A tai’o i tā te mau peropheta ’e tā te mau ’āpōsetolo i te mau mahana hope’a nei i ha’api’i nō ni’a i te mau parau tumu tā ’oe e ’ite ra i roto i te mau pāpa’ira’a mo’a (’ei hi’ora’a, hi’o conference.ChurchofJesusChrist.org ’e te mau ve’a a te ’Ēkālesia).

Fa’a’ite i te ta’ata i tā ’oe i ’apo mai

’Ua riro te ’āparaura’a i te mau mea i ’apohia mai i roto i tā ’oe tuatāpapara’a ’ei rāve’a maita’i nō te ha’api’i i te ta’ata, e ’ere noa rā terā, e tauturu ato’a te reira ’ia ha’apūai i tō ’oe māramaramara’a i te mea tā ’oe i tai’o.

Ora mai te au i te ha’api’ira’a tā ’oe i ’apo mai

’Eiaha te tuatāpapara’a pāpa’ira’a mo’a e fa’auru noa ia tātou—’ia arata’i ato’a rā ia tātou i te tauira’a i tō tātou orara’a. Fa’aro’o i te mea tā te Vārua e muhumuhu ia ’oe ’a tai’o ai ’oe, ’ei reira, ’a fafau ’ia rave mai te au i te reira mau muhumuhu.

’Ua parau Elder David A. Bednar : « ’Eiaha tātou e tīa’i nā te fa’anahora’a ’Ēkālesia e ha’api’i ’aore rā e parau ia tātou i te mau mea ato’a e tītauhia ia tātou ’ia ’ite ’e ’ia rave nō te riro mai ’ei pipi ha’apa’o ’e nō te fa’a’oroma’i itoito ē tae noa atu i te hope’a. ’Aita, tei ia tātou iho nei rā te hōpoi’a ’ia ha’api’i mai i tei tītauhia ’ia ha’api’i mai, ’ia ora mai tā tātou i ’ite e mea tītauhia ’ia ora, ’e ’ia riro mai tā te Fatu e hina’aro ’ia riro mai tātou. ’E tei te fare te vāhi mau nō te ’apo mai i te ha’api’ira’a, nō te ora ’e nō te riro mai i terā ta’ata » (« ’Ua ineine nō te fāri’i i te mau mea tāta’itahi tei hina’arohia », Ensign ’aore rā Liahona, Mē 2019, 102).