Fa’a’ohipa i te Mai, pe’e mai—nō te ta’ata hō’ē ’e te ’utuāfare

Nā vai teie rāve’a tauturu ?

Nā te mau ta’ata ato’a ’e te mau ’utuāfare i roto i te ’Ēkālesia. ’Ua hāmanihia te reira nō te tauturu ia ’outou ’ia ha’api’i mai i te ’evanelia—’outou ana’e iho ’aore rā ’ei ’utuāfare. Mai te peu ’aita nā ’outou i tuatāpapa pinepine i te ’evanelia nā mua a’e, e nehenehe teie rāve’a e tauturu ia ’outou ’ia ha’amata. Mai te peu ’ua mātau maita’i ’outou i te tuatāpapa i te ’evanelia, e nehenehe teie rāve’a e tauturu ia ’outou ’ia ’ora i te mau ’itera’a faufa’a atu ā.

Nāhea i te fa’a’ohipa i teie rāve’a ?

Nā ’outou e hi’o i te fa’a’ohipara’a o te reira, ’ia tauturu ho’i te reira ia ’outou. E nehenehe te reira e tauturu ’ei arata’i ’aore rā ’ei tauturu tuatāpapara’a pāpa’ira’a mo’a nō te ta’ata hō’ē ’e te ’utuāfare. E nehenehe ato’a e fa’a’ohipa i te reira nō te purera’a pō ’utuāfare. E tūra’i te mau arata’i ha’api’ira’a i te mau parau tumu faufa’a rahi i roto i Te Parau Ha’api’ira’a ’e te mau Parau Fafau, ma te tu’u i te tahi mau mana’o tuatāpapara’a ’e te tahi mau ’ohipa e rave nō te ta’ata hō’ē ’e te ’utuāfare, ma te fa’afāna’o ato’a i te vāhi nō te tāpa’ora’a i te mau mana’o e tae mai.

E ’ere te Mai, pe’e mai—nō te ta’ata hō’ē ’e te ’utuāfare nō te mono ’aore rā nō te fa’ahemo i te tahi atu mau mea maitata’i tā ’outou e rave ra. E pe’e i te arata’ira’a a te Vārua nō te fa’aoti nāhea i te rave i tā ’outou iho tuatāpapara’a i te parau a te Atua.

E aha te tū’atira’a o teie mātēria ’e te mea e tupu ra i roto i te ’Ēkālesia ?

’Ua fa’anahohia te mau arata’i ha’api’ira’a o teie mātēria nā ni’a i te tai’ora’a tāhepetoma. Tē pe’e ato’a nei te Mai, pe’e mai—nō te Paraimere ’e te Mai, pe’e mai—nō te Ha’api’ira’a Sābati i te reira tārena. Nō te turu i te mau tauto’ora’a i te fare nō te ha’api’i mai ’e nō te ora i te ’evanelia, e hōro’a tō ’outou mau ’orometua i te fare purera’a i te taime nō tē fa’a’ite mai i te mau ’ohipa i tupu nō ’outou, tō ’outou mau mana’o ’e tā ’outou mau uira’a nō ni’a i te mau tuha’a pāpa’ira’a mo’a i tuatāpapahia i te fare.

Nō te mea e ha’api’i-noa-hia te Ha’api’ira’a Sābati e piti taime i te ’āva’e hō’ē, e ti’a i te mau ’ōrometua Ha’api’ira’a Sābati ’ia mā’iti e ’ōu’a i te tahi mau arata’i ha’api’ira’a ’aore rā e ’āmui i te reira nō te pe’e i te tārena o te hepetoma. E tītau-ato’a-hia paha te reira i te mau hepetoma e’ita te mau purera’a e fa’atupuhia nō te ’āmuira’a titi ānei ’e nō te tahi atu tumu. I terā mau hepetoma, tē fa’aitoitohia nei ’outou ’ia tāmau ā i te tuatāpapa i Te Parau Ha’api’ira’a ’e te mau Parau Fafau i te fare.

Tītauhia ānei ’ia pe’e i te tārena ?

E tauturu te tārena ’ia fa’aoti i te tai’o i Te Parau Ha’api’ira’a ’e te mau Parau Fafau i te hope’a o te matahiti. Hau atu, ’ia pe’e tātou i te hō’ē ā tārena ’e te tahi atu mau ta’ata, e fa’atupu te reira i te mau ’ohipa fa’ahiahia i te fare, i te fare purera’a ’e i te mau vāhi ato’a. ’Eiaha rā ’outou e mana’o ē, e fa’ahepora’a te tārena ’aore rā ’ua tītauhia ’ia tai’o pauroa te mau ’īrava ; ’ua riro noa te reira ’ei arata’i nō te tauturu ia ’outou ’ia tātuha’a i te ha’api’ira’a. Te mea faufa’a rahi, ’o te ha’api’ira’a ïa i te ’evanelia ’ei ta’ata hō’ē ’e ’ei ’utuāfare.