“ຄວາມເຫລື້ອມໃສ ຄືເປົ້າໝາຍຂອງເຮົາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ຄວາມເຫລື້ອມໃສ ຄືເປົ້າໝາຍຂອງເຮົາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
ຄວາມເຫລື້ອມໃສ ຄືເປົ້າໝາຍຂອງເຮົາ
ຄວາມມຸ້ງໝາຍຂອງການຮຽນຮູ້ ແລະ ການສິດສອນພຣະກິດຕິຄຸນຂອງເຮົາທັງໝົດ ແມ່ນເພື່ອເຮັດໃຫ້ຄວາມເຫລື້ອມໃສຂອງເຮົາເລິກຊຶ້ງຕໍ່ພຣະເຢຊູຄຣິດ ແລະ ຊ່ວຍເຮົາໃຫ້ກາຍເປັນເໝືອນດັ່ງພຣະອົງຫລາຍກວ່າເກົ່າ. ເພາະດ້ວຍເຫດນີ້, ເມື່ອເຮົາສຶກສາພຣະກິດຕິຄຸນ, ເຮົາຈຶ່ງບໍ່ພຽງແຕ່ຊອກຫາຂໍ້ມູນໃໝ່ເທົ່ານັ້ນ; ແຕ່ເຮົາຍັງຢາກກາຍເປັນ “ຄົນທີ່ຖືກສ້າງໃໝ່” ນຳອີກ (2 ໂກຣິນໂທ 5:17). ສິ່ງນີ້ໝາຍເຖິງການເພິ່ງອາໄສພຣະບິດາເທິງສະຫວັນ ແລະ ພຣະເຢຊູຄຣິດ ເພື່ອຊ່ວຍເຮົາໃຫ້ປ່ຽນໃຈ, ປ່ຽນຄວາມຄິດເຫັນ, ປ່ຽນການກະທຳ, ແລະ ປ່ຽນທຳມະຊາດຂອງເຮົາ.
ແຕ່ການຮຽນຮູ້ພຣະກິດຕິຄຸນທີ່ຈະເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາ ແລະ ນຳພາໄປສູ່ການເຫລື້ອມໃສທີ່ໜ້າອັດສະຈັນໃຈ ຈະບໍ່ເກີດຂຶ້ນໃນທັນທີ. ມັນຂະຫຍາຍຈາກຫ້ອງຮຽນເຂົ້າໄປສູ່ໃຈຂອງບຸກຄົນ ແລະ ເຂົ້າເຖິງບ້ານເຮືອນ. ມັນຮຽກຮ້ອງຄວາມພະຍາຍາມທີ່ໝັ້ນຄົງທຸກວັນ ເພື່ອຈະເຂົ້າໃຈ ແລະ ດຳລົງຊີວິດຕາມພຣະກິດຕິຄຸນ. ແຕ່ພຣະບິດາເທິງສະຫວັນບໍ່ຄາດໝາຍໃຫ້ເຮົາເຮັດມັນຕາມລຳພັງ—ພຣະອົງຈະສົ່ງພຣະວິນຍານບໍລິສຸດມາເພື່ອຊ່ວຍເຮົາໃຫ້ມີຄວາມເຫລື້ອມໃສ.
ພຣະວິນຍານບໍລິສຸດນຳພາເຮົາໄປສູ່ຄວາມຈິງ ແລະ ເປັນພະຍານເຖິງຄວາມຈິງນັ້ນ (ເບິ່ງ ໂຢຮັນ 16:13). ພຣະອົງໃຫ້ຄວາມຮູ້ແກ່ຄວາມຄິດ, ກະຕຸ້ນຄວາມເຂົ້າໃຈ, ແລະ ສຳພັດໃຈຂອງເຮົາ ດ້ວຍການເປີດເຜີຍຈາກພຣະເຈົ້າ, ຊຶ່ງເປັນແຫລ່ງຂອງຄວາມຈິງທັງໝົດ. ພຣະວິນຍານບໍລິສຸດຊຳລະໃຈຂອງເຮົາ. ພຣະອົງດົນໃຈເຮົາໃຫ້ມີຄວາມປາດຖະໜາທີ່ຈະດຳລົງຊີວິດໂດຍຄວາມຈິງ, ແລະ ພຣະອົງບອກວິທີທາງທີ່ຈະເຮັດສິ່ງນີ້ໄດ້. ແທ້ຈິງແລ້ວ, “ພຣະວິນຍານບໍລິສຸດ … ຈະສິດສອນ [ເຮົາ] ທຸກສິ່ງ” (ໂຢຮັນ 14:26).
ເພາະດ້ວຍເຫດຜົນເຫລົ່ານີ້, ໃນຄວາມພະຍາຍາມຂອງເຮົາທີ່ຈະດຳລົງຊີວິດ, ຮຽນຮູ້, ແລະ ສິດສອນພຣະກິດຕິຄຸນ, ທຳອິດເຮົາຕ້ອງສະແຫວງຫາຄວາມເປັນເພື່ອນຂອງພຣະວິນຍານກ່ອນ. ເປົ້າໝາຍນີ້ຄວນຄວບຄຸມການເລືອກຂອງເຮົາ ແລະ ນຳພາຄວາມຄິດ ແລະ ການກະທຳຂອງເຮົາ. ເຮົາຄວນສະແຫວງຫາສິ່ງໃດກໍຕາມທີ່ເຊື້ອເຊີນອິດທິພົນຂອງພຣະວິນຍານ ແລະ ປະຕິເສດສິ່ງໃດກໍຕາມທີ່ຂັບໄລ່ອິດທິພົນນັ້ນ—ເພາະເຮົາຮູ້ວ່າ ຖ້າຫາກເຮົາສາມາດມີຄ່າຄວນສຳລັບການສະຖິດຢູ່ຂອງພຣະວິນຍານບໍລິສຸດ, ແລ້ວເຮົາກໍສາມາດມີຄ່າຄວນທີ່ຈະດຳລົງຊີວິດຢູ່ໃນທີ່ປະທັບຂອງພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ.