“Enero 14–20. Lucas 2; Mateo 2: Nanganhi Kami aron sa Pagsimba Kaniya,” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Enero 14–20. Lucas 2; Mateo 2,” Dali, Sunod Kanako—Alang sa mga Indibidwal ug mga Pamilya: 2019
Dali Simbahon Nato Siya, ni Dana Mario Wood
Enero 14–20
Lucas 2; Mateo 2
Nanganhi Kami aron sa Pagsimba Kaniya
Sugdi pinaagi sa pagbasa sa Lucas 2 ug Mateo 2, ug bantayi ang bisan unsa nga espirituhanong mga panabut nga imong madawat. Ang mga ideya sa pagtudlo niini nga outline makatabang nimo sa pag-ila sa labing importante ug mahinungdanong mga baruganan niini nga mga kapitulo.
Irekord ang Imong mga Impresyon
Gikan sa adlaw sa Iyang pagkaanak, klaro nga si Jesus dili ordinaryo nga bata. Dili lang kadtong bag-ong bitoon sa kalangitan o malipayong pamahayag sa anghel nga nakahimo sa pagkabata ni Jesus nga talagsaon. Mao usab ang kamatuoran nga ang nagkalain-laing matinud-anong mga tawo—gikan sa lain-laing mga nasud, mga propesyon, ug mga kahimtang—mibati nga nadani ngadto Kaniya. Bisan sa wala pa Niya isulti ang Iyang pagdapit nga “dali, sunod kanako,” miabut sila (Lucas 18:22). Dayag lang nga dili ang tanan misunod Kaniya—dunay daghan nga wala manumbaling Kaniya, ug gani ang masinahon nga tigmando nagtinguha sa Iyang kinabuhi. Apan ang mapainubsanon, putli, mahalaron nga tingpangita sa matarung nakakita unsay ilang gipangita Kaniya. Ang ilang debosyon nakadasig kanato, kay ang “maayong balita sa dakong kalipay” miabut ngadto sa magbalantay sa karnero alang sa “tanang mga tawo,” ug ang “Manluluwas, nga si Kristo ang Ginoo” natawo nianang adlawa alang kanatong tanan (tan-awa sa Lucas 2:10–11).
Mga Ideya alang sa Personal nga Pagtuon sa Kasulatan
Si Jesukristo natawo sa ubos nga mga kahimtang.
Bisan og si Jesukristo adunay himaya uban sa Dios nga Amahan “sa wala pa ang kalibutan” (Juan 17:5), andam Siya nga matawo sa ubos nga mga kahimtang ug magpuyo uban nato dinhi sa yuta. Samtang imong basahon ang Lucas 2:1–7, unsay imong namatikdan bahin sa ubos nga mga kahimtang sa Iyang pagkaanak? Paningkamuti ang pag-ila sa mga detalye o panabut niini nga istorya nga wala nimo mamatikdi kaniadto. Unsay imong nakat-unan bahin sa Manluluwas gikan sa mga kahimtang sa Iyang pagkaanak? Sa unsa nga paagi nga kini nga mga panabut makaapekto sa imong mga pagbati ngadto Kaniya?
Dunay daghang mga saksi sa pagkaanak ni Kristo.
Ang pagkaanak ug pagkabata ni Kristo gikumpirma sa mga saksi ug sa mga tigsimba gikan sa sosyal ug ekonomikanhong kahimtang—mapainubsanong magbalantay sa karnero nga mibisita sa pasungan, ang adunahan nga mga Mago nga nagdala og mga gasa ngadto sa Iyang panimalay, ang usa ka biyuda nga nagserbisyo sa templo, ug ang usa ka matinud-anong tinun-an nga madasigong nagpaabut sa Mesiyas. Samtang magsusi ka sa ilang mga istorya, unsay imong nakat-unan bahin sa mga pamaagi sa pagsimba ug pagsaksi ni Kristo?
|
Saksi ni Kristo |
Unsay imong nakat-unan bahin sa pagsimba ug pagsaksi? |
|---|---|
Saksi ni Kristo Mga magbalantay sa karnero (Lucas 2:8–20) | Unsay imong nakat-unan bahin sa pagsimba ug pagsaksi? |
Saksi ni Kristo Simeon (Lucas 2:25–35) | Unsay imong nakat-unan bahin sa pagsimba ug pagsaksi? |
Saksi ni Kristo Ana (Lucas 2:36–38) | Unsay imong nakat-unan bahin sa pagsimba ug pagsaksi? |
Saksi ni Kristo Mga Mago (Mateo 2:1–12) | Unsay imong nakat-unan bahin sa pagsimba ug pagsaksi? |
Tan-awa usab sa 1 Nephi 11:13–23; 3 Nephi 1:5–21;.
Ang mga ginikanan makadawat og pagpadayag sa pagpanalipod sa ilang mga pamilya.
Dili unta mahimo ni Jose unsay gisugo kaniya nga buhaton—sa pagpanalipod ni Jesus sa Iyang pagkabata—kon wala pay tabang sa langit. Sama sa mga Mago, nakadawat siya og papadayag nga nagpasidaan kaniya sa kakuyaw. Samtang magbasa ka sa kasinatian ni Jose, hunahunaa ang bahin sa pisikal ug espirituhanong mga kakuyaw nga giatubang sa mga pamilya karon. Palandunga ang mga kasinatian sa dihang gibati nimo ang giya sa Dios sa pagpanalipod kanimo ug sa imong pamilya o mga minahal. Ikonsiderar ang pagpakigbahin niini nga mga kasinatian ngadto sa uban. Unsay imong mabuhat aron makadawat sa maong giya sa umaabut?
Bisan sa pagkabatan-on, si Jesus nagtutok sa pagbuhat sa kabubut-on sa Amahan.
Isip usa ka batan-ong lalaki, ang Manluluwas mitudlo sa ebanghelyo sa gamhanan kaayong paagi nga bisan ang mga magtutudlo sa templo natingala sa Iyang “pagpanabut ug pagpanubag” (Lucas 2:47). Unsay imong nakat-unan niini nga mga bersikulo bahin sa Manluluwas isip usa ka batan-ong lalaki? Sa mga batan-on nga imong nailhan unsa may ilang gibuhat “bahin sa buhat sa [ilang] Amahan”? (Lucas 2:49). Sa unsa nga paagi nga ang kabatan-onan ug mga bata nakatabang nimo nga makaangkon og mas lawom nga panabut sa ebanghelyo? Unsa pay imong nakat-unan gikan sa ehemplo sa pagkabata ni Jesus Lucas 2:40–52 ug sa Hubad ni Joseph Smith, Mateo 3:24–26 (sa Giya ngadto sa mga Kasulatan)?
“Wala ba diay kamo mahibalo nga kinahanglan anhi gayud ako sa balay sa akong Amahan?” (Lucas 2:49).
Unsa ang Hubad ni Joseph Smith?
Tungod sa “daghan nga yano ug bililhon” nga mga kamatuoran nawala gikan sa Biblia sa milabayng mga katuigan (1 Nephi 13:28; tan-awa usab sa Moises 1:41), misugo ang Ginoo ni Joseph Smith sa paghimo og dinasig nga rebisyon sa Biblia, nailhan nga Hubad ni Joseph Smith. Daghang mga rebisyon ang gihimo sa Propeta gilakip sa apendiks sa mga Santos sa Ulahing mga Adlaw nga edisyon sa mga kasulatan. Ang LDS edisyon sa King James Version sa Biblia naglakip usab og mga footnote uban sa mga rebisyon sa Propeta. Ang hubad ni Joseph Smith sa Mateo 24, nga nailhan nga Joseph Smith—Mateo, makita sa Perlas nga Labing Bililhon. Alang sa dugang nga impormasyon, tan-awa sa Giya ngadto sa mga Kasulatan “Hubad ni Joseph Smith”Gospel Topics,topics.lds.org.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Dapita ang mga sakop sa pamilya sa pagpili og usa ka tawo nga gihulagway sa Lucas 2, pagbasa sa pipila ka mga bersikulo bahin sa inter-aksyon sa mga tawo uban sa Manluluwas, ug pagpakigbahin og butang nga ilang nakat-unan nga nakapadugang sa ilang pagtuo kang Jesukristo. Kantaha pagdungan ang “Lullaby ni Maria” o “Awit sa Pagkatawo,” Songbook sa mga Bata, 44–45, 52–53. Unsay atong nakat-unan gikan niini nga mga kanta bahin sa pagkaanak sa Manluluwas?
Unsa ang “buhat sa Amahan”? (tan-awa sa Moises 1:39). Unsay atong makat-unan bahin niana nga buhat gikan niini nga istorya ug gikan sa ubang mga butang nga gihimo ni Jesus ug gitudlo sa Iyang tibuok kinabuhi? Ikonsiderar ang pagsulat sa pipila ka paagi nga ang imong pamilya makaapil sa buhat sa Amahan ug pagbutang niini sa usa ka sudlanan. Sa umaabut nga semana, kon ang imong pamilya mangita og mga paagi sa paghimo sa buhat sa Langitnong Amahan, makapili sila og mga ideya gikan sa sudlanan. Pagplano og panahon nga ikaw mopakigbahin og mga kasinatian.
Unsay atong makat-unan gikan sa Lucas 2:52 bahin kon giunsa ni Jesus pagpalambo ang Iyang kinabuhi? Sa unsa nga mga paagi nga madugangan ang “kaalam ug gidak-on, ug kahimuot sa Dios ug sa tawo”?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Gamita ang mga tabang sa pagtuon sa kasulatan. Aron makaangkon og dugang nga mga panabut samtang magtuon ka sa mga kasulatan, gamita ang mga kapanguhaan sama sa,Giya ngadto sa mga Kasulatan, ug sa ubang mga tabang sa pagtuon sama sa LDS.org ug sa Manwal sa Estudyante sa Bag-ong Tugon(manwal sa Church Educational system manwal, 2014).
Ang Manluluwas sa Kalibutan mianhi sa yuta sa ubos nga mga kahimtang.