“Enero 21–27. Juan 1: Gikahibalag Namo ang Mesiyas,” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Enero 21–27. Juan 1,” Dali, Sunod Kanako—Alang sa mga Indibidwal ug mga Pamilya: 2019
Enero 21–27
Juan 1
Gikahibalag Namo ang Mesiyas
Samtang magbasa ug mamalandong ka sa Juan 1, irekord ang impresyon nga imong madawat. Unsa nga mga mensahe ang imong nakita nga labing bililhon nimo ug sa imong pamilya? Unsa ang imong ipakigbahin sa imong mga klase sa Simbahan?
Irekord ang Imong mga Impresyon
Nakahunahuna ka ba kon makaila ka ba ni Jesus sa Nazaret isip ang Anak sa Dios kon nabuhi ka sa panahon sa Iyang mortal nga pangalagad? Sulod sa katuigan, ang matinud-anong mga Israelite, lakip ni Andres, Pedro, Felipe, ug Natanael, naghulat ug nag-ampo sa pag-anhi sa gisaad nga Mesiyas. Sa dihang nahimamat nila Siya, giunsa nila sa pagkahibalo nga Siya mao ang Usa nga ilang gipangita? Sa samang paagi kitang tanan makaila sa Manluluwas—pinaagi sa pagdawat sa pagdapit sa “umari kamo ug makita ninyo” alang sa atong kaugalingon (Juan 1:39). Mabasa nato ang bahin Kaniya diha sa mga kasulatan. Madunggan nato ang Iyang doktrina. Maobserbahan nato ang Iyang paagi sa pagpuyo. Mabati nato ang Iyang Espiritu. Samtang magpadayon, madiskubrihan nato, sama ni Natanael, nga ang Manluluwas nakaila nato ug gusto nga maandam kita sa pagdawat og “labi pang dagkong mga butang” (Juan 1:50).
Mga Ideya alang sa Personal nga Pagtuon sa Kasulatan
Ang Ebanghelyo ni Juan
Kinsa si Juan?
Si Juan mao ang usa sa tinun-an ni Juan nga Bautista ug dayon nahimong usa sa mga sumusunod ni Jesukristo ug usa sa Iyang Napulog Duha ka mga Apostoles. Siya misulat sa Ebanghelyo ni Juan, pipila ka mga epistola, ug sa basahon sa Pinadayag. Sa iyang Ebanghelyo, iyang gipasabut ang iyang kaugalingon isip tinun-an “nga hinigugma ni Jesus” ug sa “usang tinun-an” (Juan 13:23; 20:3). Ang kadasig ni Juan sa pagsangyaw sa ebanghelyo hilabihan ka kusog nga mihangyo siya nga magpabilin sa yuta hangtud sa Ikaduhang Pag-anhi sa Manluluwas aron makadala siya og mga kalag ngadto ni Kristo (tan-awa sa D&P 7:1–6).
Tan-awa usab sa Giya ngadto sa mga Kasulatan, “Juan, Anak nga Lalaki ni Zebedeo.”
Si Jesukristo “sa sinugdan uban sa Dios.”
Gisugdan ni Juan ang iyang Ebanghelyo pinaagi sa paghulagway sa buhat nga gipahigayon ni Kristo sa wala pa Siya matawo: “Sa sinugdan … ang Pulong [Jesukristo] uban sa Dios.” Unsay imong nakat-unan gikan sa mga bersikulo 1–5 bahin sa Manluluwas ug sa Iyang buhat? Makakita ka og makatabang nga pagpatin-aw sa Hubad ni Joseph Smith, Juan 1:1–5 (sa Giya ngadto sa mga Kasulatan). Sa imong pagsugod sa pagtuon sa kinabuhi sa Manluluwas, ngano nga importante nga makahibalo sa Iyang buhat sa premortal nga kinabuhi?
Ang mga tinun-an ni Jesukristo magsaksi Kaniya.
Nadasig si Juan sa pagtinguha sa Manluluwas tungod sa pagpamatuod ni Juan nga Bautista, nga mideklarar nga siya “mianhi aron sa pagpanghimatuod … mahitungod sa Kahayag” (Juan 1:8–9, 15–18). Si Juan mismo mipamatuod og gamhanan nga saksi sa kinabuhi ug misyon sa Manluluwas.
Makapaikag tingali ang paghimo og lista sa mga kamatuoran nga gilakip ni Juan sa iyang pangbukas nga pagpamatuod ni Kristo (mga bersikulo 1–18; tan-awa usa sa Hubad ni Joseph Smith, Juan 1:1–19 [sa Giya ngadto sa mga Kasulatan]). Ngano kaha nga gisugdan ni Juan ang iyang Ebanghelyo niini nga kamatuoran? Ikonsiderar ang pagsulat sa imong pagsaksi ni Jesukristo—unsay gusto nimong ipakigbahin? Unsa nga mga kasinatian ang nakatabang kanimo nga mas makaila ug makasunod sa Manluluwas? Kinsa ang mapanalanginan sa pagkadungog sa imong pagpamatuod?
Unsay ipasabut sa “pagkahimong mga anak sa Dios”?
Bisan og kitang tanan espiritu nga mga anak sa Dios, kon makasala ta mahilayo o mabulag kita gikan sa Dios. Si Jesukristo mitanyag nato og paagi nga makabalik. Pinaagi sa Iyang maulaong sakripisyo ug sa atong pagkamasulundon sa mga pakigsaad sa ebanghelyo, Siya “[mihatag nato] og gahum nga mahimong mga anak nga lalaki [ug mga babaye] sa Dios” sa makausa pa. Matawo kita pag-usab ug mapasig-uli ngadto sa atong Amahan, takus sa Iyang mahangturong kabilin ug manununod sa tanan nga anaa Kaniya (tan-awa sa Mga Taga-Roma 8:14–18; Jacob 4:11).
Aduna bay nakakita sa Dios?
Ang Daang Tugon nagrekord sa mga ehemplo sa mga tawo nga nakakita sa Dios (tan-awa sa Genesis 32:30; Exodo 33:11; Isaias 6:5). Kon mao nganong si Juan nga Bautista miingon nga “wala pa gyuy tawo nga nakakita sa Dios”? Ang Hubad ni Joseph Smith niini nga bersikulo nagklaro nga ang Dios nga Amahan magpakita ngadto sa mga tawo ug kon Siya magpakita, magpamatuod Siya sa Iyang Anak. Pananglit, sa dihang nagpakita Siya ngadto ni Joseph Smith sa Sagrado nga Kakahoyan, miingon Siya ngadto ni Joseph, “Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17; tan-awa usab sa D&P 76:23). Adunay daghang laing narekord nga mga higayon diin ang mga tawo nakakita sa Dios nga Amahan sa panan-awon (tan-awa sa Mga Buhat 7:55–56; Pinadayag 4:2; 1 Nephi 1:8; D&P 137:1–3) o nakadungog sa Iyang tingog nga nagsaksi sa Anak (tan-awa sa Mateo 3:17; 17:5; 3 Nephi 11:6–7).
Kinsa si Elias, ug kinsa “kana nga propeta”?
Ang mga lider sa Judeo nagduha-duha kon si Juan nga Bautista mao ba ang katumanan sa karaang panagna bahin sa mga propeta kinsa sa umaabut moabut diha sa katawhan. Nangutana sila kaniya kon siya ba si Elias, nga Gresyanhon nga ngalan ni Elijah, ang ngalan sa propeta nga gipanagna nga mopahiuli sa tanang mga butang (tan-awa sa Malaquias 4:5–6). Nangutana usab sila kon siya ba “kana nga propeta,” nga nagpasabut sa “Propeta” nga gihisgutan sa Deuteronomio 18:15. Gipasabut ni Juan nga dili siya mao bisan asa nila apan siya ang propeta nga gisulti ni Isaias nga moandam alang sa pag-anhi sa Ginoo (tan-awa sa Isaias 40:3).
Tan-awa usab Ang Giya ngadto sa mga Kasulatan, Elias.”
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Samtang magtuon kita sa mga kasulatan, makadawat kita og inspirasyon alang sa atong kinabuhi.
Unsaon nimo sa pagtabang ang imong pamilya sa paghanduraw unsay ilang nabasahan bahin sa kahayag niini nga mga bersikulo? Mahimo nimong papulipulihon ang mga sakop sa pamilya pagpasiga og suga sa ngit-ngit nga kwarto ug mopakigbahin kon sa unsa nga paagi ang Manluluwas mao ang Kahayag sa ilang mga kinabuhi. Dayon, samtang magbasa ka sa Juan 1:4–10, tingali ang mga sakop sa pamilya adunay dugang nga nasabtan sa pagpamatuod ni Juan bahin ni Jesukristo, ang Kahayag sa Kalibutan.
Tan-awa ang pagpamatuod ni Juan nga Bautista sa bersikulo 36. Unsa ang mga resulta sa iyang pagpamatuod? (tan-awa ang mga bersikulo 35–46). Unsay nakat-unan sa imong pamilya gikan sa mga tawo nga gihulagway niini nga mga bersikulo bahin kon unsaon sa pagpakigbahin sa ebanghelyo?
Unsay gibuhat ni Natanael nga nakatabang niya nga makaangkon og pagpamatuod sa Manluluwas? Giunsa nato pag-angkon ang atong mga pagpamatuod?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Ipakigbahin ang mga object lesson Dapita ang mga sakop sa pamilya sa pagpangita og mga butang nga ilang magamit sa pagtabang nila nga makasabut sa mga baruganan nga makita sa mga kasulatan nga inyong gibasa isip usa ka pamilya. Pananglit, mahimo silang mogamit og kandila nga nagrepresentar sa Kahayag ni Kristo (tan-awa sa Juan 1:4).
Si Jehova Milalang sa Yuta, ni Walter Rane