“1–14 abril. Mateo 16–17; Markos 9; Lukas 9: “Laa’at li Kristo” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“1–14 abril. Mateo 16–17; Markos 9; Lukas 9,” Kim, Taaqehin—choq’ reheb’ li komon ut li junkab’al: 2019
Li jaltesiik-u, xb’aan laj Carl Heinrich Bloch
1–14 abril
Mateo 16–17; Markos 9; Lukas 9
“Laa’at li Kristo”
Chiru li wiib’ xamaan li te’chalq, k’oxla lix ch’olob’ahom laj Pedro, li natawman sa’ Mateo 16:15–17, ut lix ch’olob’ahomeb’ li profeet ut li apostol li taawab’i sa’ li jolomil ch’utub’aj-ib’.
Xtz’iib’ankil li nakak’oxla
Ma ink’a’ sachol ch’oolej naq eb’ laj Fariseo ut eb’ laj Saduceo ke’relaji naq li Jesus tixk’ut chiruheb’ “junaq eetalil taachalq sa’ choxa”? Ma ink’a’ tz’aqaleb’ li k’iila sachb’a-ch’oolej li ak xb’aanu chaq? Ma ink’a’ xk’ut ajwi’ li na’leb’ nim xwankil, ut kixtz’aqob’resi ru k’iila profeetil aatin re najter? Ke’relaji a’in, moko rik’in ta naq maak’a’eb’ li eetalil ke’k’utman, rik’in b’an naq ink’a’ ke’ru chixk’eeb’al reetaleb’ li eetalil ut chixk’ulub’ankileb’. (Chi’ilmanq Mateo 16:1–4.)
Laj Pedro, jo’eb’ laj Fariseo ut eb’ laj Saduceo, kirileb’ li sachb’a-ch’oolej kixb’aanu li Kolonel, ut kirab’i li k’a’ru kixk’ut. A’b’anan lix nawom xch’ool laj Pedro li kixch’olob’, “Laa’at li Ralal li yo’yookil Dios,” moko kichal ta rik’in li k’a’ru ilb’il xb’aan li tz’ejwalej ut li kik’elej. Lix nawom xch’ool kiwan chi k’utb’esinb’il chiru xb’aan “lix Yuwa’ li wan sa’ choxa.” Li k’utb’esink a’an li pek li naxkab’la wi’ li Kolonel lix Iglees sa’ li kutan a’an jo’ sa’eb’ li kutan a’in—li na’leb’ k’utb’esinb’il chalen chaq sa’ choxa chiruheb’ lix moos. Ut a’in li pek li naqakab’la wi’ li qawanjik jo’ tzolom—li k’utb’esihom naq li Jesus a’an li Kristo, ut naq eb’ lix moos xe’xk’ul “xlaawil li awa’b’ejihom.” Naq wanko chi kab’lanb’il sa’ xb’een li k’ojleb’aal a’in, “lix wankil li xb’alb’a ink’a’ taanumtaaq sa’ qab’een.” (Mateo 16:15–19.)
Li na’leb’ re xtzolb’aleb’ li loq’laj hu aajunes
Nachal xnawom qach’ool chirix li Jesukristo chi k’utb’esinb’il.
Wi ta li Jesukristo tixpatz’ reheb’ li kristiaan sa’ li kutan a’in, “Ani li K’ajolb’ej naq neke’xye eb’ li tenamit?” jalan wi’ raj li te’xsume chiru li ke’xsume chaq sa’ xkutankil a’an. K’a’ru li k’oxlanb’il chirix li Jesus sa’ li kutan a’in, jo’ xawil laa’at? K’a’ raj ru taaye wi ta li Jesus tixpatz’ aawe, “Anihin laa’in naq nakaye?” (Chiʼilmanq Mateo 16:13–15.)
K’oxla lix nawom aach’ool chirix li Kolonel, ut chan ru naq xak’ul. K’a’ru nakatzol sa’ Mateo 16:15–17 li taaruuq chixkawob’resinkil? Wi taawaj xtawb’al chik aana’leb’ chirix li xnawom ch’oolej ut li k’utb’esink chiru li junjunq, tz’ileb’ rix li raqal a’in: Jwan 15:26; 1 Korintios 12:3; 2 Nefi 31:18; Alma 5:45–48; ut Tzol’leb’ ut Sumwank 8:2–3.
Mateo 17:1–9; Markos 9:2–10; Lukas 9:28–36
K’a’ru kik’ulman sa’ xb’een li tzuul najt xteram?
Naq li Jesus kixk’am laj Pedro, laj Santiago, ut laj Jwan chirix sa’ “jun li tzuul najt xteram,” a’an kijaltesiik ru (malaj kik’ehe’ xloq’al) chiruheb’. Laj Moises ut laj Elias ke’xk’ut rib’ ut ke’xq’axtesi xlaawil li tijonelil sa’ xb’eeneb’ li apostol. Rik’ineb’ li laaw a’in ke’ru chixjolominkil lix Iglees li Kristo sa’ li ruchich’och’ chirix lix waklijik li Jesus chi yo’yo (chi’ilmanq li K’utul Raqal reheb’ li Loq’laj Hu, “Jaltesiik ru”). Eb’ li laaw a’in wankeb’ chi k’ojob’anb’il wi’chik sa’ li qakutan (chi’ilmanq Tz. ut S. 110).
K’a’ru “xlaawil lix nimajwal wankilal li choxa”?
Lix “laawil lix nimajwal wankilal li choxa” li kixye li Kolonel naq tixk’e re laj Pedro, a’an xlaawil li tijonelil (Mateo 16:19). “Lix laawil li tijonelil a’an li wankilal k’eeb’il xb’aan li Dios reheb’ laj jolominel sa’ li tijonelil re xb’eresinkil, xtaqlankil, ut rawa’b’ejinkil chanru na’oksiman lix tijonelil sa’ ruchich’och’. Li k’anjel li nab’aanuman rik’in xwankil li tijonelil, wan chi jolominb’il xb’aaneb’ li neke’k’amok re lix laawil (chi’ilmanq Tz. ut S. 65:2; 81:2; 124:123). Eb’ li neke’k’amok re lix laawil li tijonelil neke’ru chixjolominkil ut chixb’eresinkil li Iglees sa’ jun li na’ajej” Manual 2: Administración de la Iglesia [2010], 2.1.1).
Lix “laawil li awa’b’ejihom re choxa” a’an xlaawil li tijonelil.
Eb’ lix laawil li tijonelil li ke’k’ehe’ re laj Pedro ut xkomoneb’ chik li apostol sa’ xb’een li tzuul najt xteram ke’k’ehe’ wi’chik sa’ li qakutan laa’o (chi’ilmanq Tz. ut S. 110:11–16). Eb’ li neke’k’amok reheb’ lix laawil li tijonelil a’aneb’ li Xb’eenil Awa’b’ejil ut lix Molameb’ li Kab’laju chi Apostol ut xkomoneb’ chik li jolomil aj b’eresinel, eb’ li awa’b’ej reheb’ li santil ochoch, li mision, li oqech, ut li distrito, ut eb’ li obispo, li awa’b’ej re uq’ej, ut li awa’b’ej reheb’ li molam re li tijonelil.
Chi’ilmanq ajwi’ Neil L. Andersen, “Poder en el sacerdocio,” Liahona, noviembre 2013, 92–95; Leales a la Fe, 166–167; “Las llaves del sacerdocio: La restauración de las llaves del sacerdocio” (video, LDS.org).
Mateo 17:14–21; Markos 9:14–29
Sa’ xsik’b’al xnimal chik lin paab’aal, tento xb’een wa tinwanq chi chapcho chiru li paab’aal li ak wan we.
Li yuwa’b’ej li yeeb’il resil sa’ Mateo 17 ut Markos 9 kiru raj chi wank xkab’il xch’ool naq li Jesus taaruuq chixk’irtesinkil li ralal. Ak kixpatz’ chaq reheb’ lix tzolom li Jesus naq te’xk’irtesi li ralal, ut ink’a’ kiru chiruheb’. A’b’anan naq li Kolonel kixye re naq tixk’anjela li paab’aal, a’an ink’a’ kixk’oxla lix kab’il lix ch’ool. “Qaawa’, ninpaab,” chan, ut sa’ xk’eeb’al reetal naq moko tz’aqal ta re ru lix paab’aal kixye, “Tenq’ahin sa’ xmajelal inpaab’aal.”
K’a’ru xk’ut li Musiq’ej chawu naq xawil resil li sachb’a-ch’oolej a’in? Chan ru naq laa Choxahil Yuwa’ xatxtenq’a chixnimob’resinkil laa paab’aal? K’a’ru naru taab’aanu re kab’lak sa’ xb’een li paab’aal li ak wan aawe? Maare tatruuq chixtz’iib’ankil junjunq li raqal sa’eb’ li loq’laj hu, li aatin sa’ li jolomil ch’utub’aj-ib’, malaj li k’a’aq chik re ru li xnimob’resink re laa paab’aal.
Chi’ilmanq ajwi’ Jeffrey R. Holland, “Creo,”Liahona, mayo 2013, 93–95.
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Re xk’utb’al li na’leb’ chirix lix laawil li tijonelil chiruheb’ laa kok’al, taaruuq taaye li esil kixye li Elder Gary E. Stevenson chirix naq kikana chi tz’aptz’o rik’in laaw re lix b’eleb’aal ch’iich’ (chi’ilmanq “B’ar wankeb’ xlaawil ut xwankilal li tijonelil?” Jolomil Ch’utub’aj-ib’ re abril 2016). Naru taakanab’eb’ laa kok’al chiroksinkil li laaw re xteeb’al li kab’l, li b’eleb’aal ch’iich’, malaj jalaneb’ chik li tz’apleb’. Naru taak’ut xjalam-uuch li awa’b’ej re li Iglees, ut taach’olob’ xyaalal naq a’an nak’amok re chixjunil lix laawil li tijonelil, jo’ chanru ajwi’ laj Pedro.
Eb’ li profeet li wankeb’ xpaab’aal chirix li Jesukristo xe’xjal xna’ajeb’ li tzuul (chi’ilmanq Jakob 4:6; Moises 7:13). Lix ch’olob’ahom li Obispo Richard C. Edgley naru chixtenq’ankileb’ li wankeb’ sa’ laa junkab’al chixtawb’al ru li raqal a’in: “Laa’in maajun wa xwil chi numsimank jun li tzuul. A’b’anan sa’ xk’ab’a’ li paab’aal, xwil chi isimank li tzuul re kab’ rix ch’oolej ut xmaak’a’il li yo’onink, ut chi k’eemank li yo’onink ut li oyb’enink sa’ xna’aj. Rik’in li paab’aal, wilom jun tzuul re maak isinb’il ut xwil chi k’utunk li jalb’a-k’a’uxlej ut li kuyuk maak sa’ xna’aj. Ut rik’in li paab’aal, xwil jun tzuul re rahilal isinb’il, ut xwil chi k’utunk li tuqtuukilal, li oyb’enink, ut li b’antioxink sa’ xna’aj. Yaal ajwi’ naq xwil chi isimank eb’ li tzuul” (“Fe—tú escoges,” Liahona, noviembre 2010, 33). K’a’ruheb’ li tzuul sa’ li qayu’am li taa’ajmanq ru risinkil? Chan ru naq naru naqak’ut li qapaab’aal naq li Dios wan xwankil chiqatenq’ankil re risinkileb’ li tzuul a’in?
K’a’ru xyaalalil li ilok wi’chik chiqix naq ak xqachap li k’anjeleb’aal? K’a’ut naq xb’aan a’in moko usaqo ta choq’ re lix nimajwal awa’b’ejihom li Dios?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Ch’utlaak chi kok’ aj xsa’. Li Awa’b’ej Henry B. Eyring kixye, “Maakanab’ chi nume’k li hoonal taaruuq wi’ taach’utub’eb’ li kok’al re te’xtzol li tzol’leb’ chirix li Jesukristo. Moko k’iheb’ ta li hoonal a’an, ut k’a’jo’ naq k’eek’o xch’ool li xik’ na’ilok qe” (“El poder del enseñar la doctrina,” Liahona, julio 1999, 87).
At Tzolonel, xink’am chaq aawik’in li walal, xb’aan laj Walter Rane