muqleb’aal sa’ li awimq

15–21 abril

Li Paswa

“At kamk, b’ar wank laa wankil?”

Naq nakawileb’ li esil chirix lix waklijik li Kolonel chi yo’yo sa’ li tusb’il aatin a’in, k’e reetal li eek’ahom ut li na’leb’ tixk’e aawe li Santil Musiq’ej.

Xtz’iib’ankil li nakak’oxla

Chiru lix raqikil xamaan lix yu’am li Kolonel, naab’aleb’ laj Judio yookeb’ chixb’aanunkil li k’anjel re li Paswa sa’ xsutam a’an. Ke’xk’uub’ li wa, ke’xb’ichaheb’ li b’ich, ut ke’ch’utla re xjultikankil chan ru naq ke’kole’ lix junkab’al laj Israel chiru li preexil wankeb’ wi’ chiruheb’ laj Egipto. Eb’ li junkab’al ke’rab’i li seraq’ chirix li anjel aj sachonel naq kinume’ sa’ xb’eeneb’ li rochocheb’ lix xe’ xtooneb’ li ke’xb’on xkik’el li karneer chiru rokeb’aal li rochocheb’. Sa’ xyi chixjunil li ninq’ehik a’in sa’ li wan wi’ k’iila reetalil li kole’k, ka’ch’in xk’ihaleb’ li ke’xnaw naq li Jesukristo, lix Karneer li Dios, ok re chixkolb’aleb’ chiru li preexil chiru li maak ut li kamk—rik’in lix rahil, lix kamik, ut lix waklijik chi yo’yo. Wankeb’ ajwi’ li ke’k’uluk re li Jesus jo’ lix Mesias li yeechi’inb’il chaq, li taakoloq reheb’ chi junelik. Chalen chaq sa’ li kutan a’an, eb’ lix tzolom li Jesukristo xe’xk’ut xyaalal chiru chixjunil li ruchich’och’ “naq li Kristo kikamk xb’aan li qamaak ... ; kimuqe’k ut kiwakliik chi yo’yo sa’ rox li kutan” (1 Korintios 15:3–4).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Mateo 21–28

Li Jesukristo wan xwankil re intenq’ankil chi numtaak sa’ xb’een li maak, li kamk, li yale’k wix, ut li majelal.

Jun na’leb’ re xk’oxlankil li osob’tesink nachal xb’aan lix tojb’al rix li maak xb’aan li Kolonel sa’ li xamaan a’in, a’an xnumsinkil li hoonal wulaj wulaj sa’ rilb’al resil lix raqikil xamaan lix yu’am li Jesus (wan arin jun tusleb’aal kutan re taawil). K’a’ru nakawil sa’eb’ li ch’ol a’in li nakatxtenq’a chireek’ankil naq raab’ilat xb’aan li Kolonel? K’a’ru nakatzol chirix lix wankilal a’an chakolb’al chiru li maak ut li kamk? K’a’ru nakatzol chirix xkuyb’aleb’ lix yalb’al aawix ut numtaak sa’ xb’een li majelal? Chan ru naq yookat chixk’anjelankil aapaab’aal chirix lix wankilal a’an chi kolok?

• Domingo: Ki’ok sa’ Jerusalen rik’in wankilal (Mateo 21:6–11)

• Lunes: Kixsaqob’resi ru li santil ochoch (Mateo 21:12–16)

• Martes: Kik’utuk sa’ Jersualen (Mateo 21–23)

• Miercoles: Toj yoo chi k’utuk (Mateo 24–25)

• Jueves: Li Paswa, ut li Kristo kixk’ul rahilal sa’ li Awimq Getsemani (Mateo 26)

• Viernes: Kiraqe’ aatin chirix, kikamsiik chiru krus, ut kimuqe’ (Mateo 27:1–61)

• Sabado: Kikana lix tib’el li Kristo sa’ li muqleb’aal (Mateo 27:62–66) ut lix musiq’ kik’anjelak sa’ li ruchich’och’ reheb’ li musiq’ej (Tz. ut S. 138)

• Domingo: Kik’utun li Kristo chi waklijenaq chi yo’yo (Mateo 28:1–10)

li wa’ak sa’ roso’jik

Li wa’ak sa’ roso’jik, xb’aan laj Carl Heinrich Bloch

Mateo 28:1–10; Lukas 24:13–35; Jwan 20:19–29; 1 Korintios 15:1–8, 55

K’iila aj yehol nawom ke’xch’olob’ xyaalal lix waklijik li Jesukristo chi yo’yo.

K’oxla chan ru naq kiwan choq’ reheb’ li tzolom naq ke’ril li Jesus chi eetz’uuk, chi rahob’tesiik, ut chi kamsiik chiru krus. Eb’ a’an ke’ril chaq lix wankilal, ke’reek’a chaq naq yaal li raatin, ut ke’wan xpaab’aal naq a’an li Ralal li Dios. Sa’ rilb’al lix kamik, ke’yale’ rix lix paab’aal li junjunq, a’b’anan sa’ junpaat ke’wan choq’ aj ilol re li xnimal ru sachb’a-ch’oolej re lix waklijik chi yo’yo.

K’a’ru naru nakatzol rik’in li esil li ke’xtz’iib’a li ani ke’ilok re li Kolonel chi waklijenaq chi yo’yo? K’e reetalil malaj tz’iib’a li k’a’ru kixk’ul li junjunq sa’ Mateo 28:1–10; Lukas 24:13–35; Jwan 20:19–29; ut 1 Korintios 15:1–8, 55. (K’e reetal naq neke’tawman xkomoneb’ chik li ke’ilok re li Kristo naq waklijenaq chi yo’yo sa’ 3 Nefi 11; Mormon 1:15; Eter 12:38–39; Tzol’leb’ ut Sumwank 76:19–24; 110:1–10; ut Jose Smith—Resilal 1:15–17.) Sa’eb’ li raqal a’in, k’a’ru naxkawob’resi laa paab’aal chirix naq tz’aqal yaal lix waklijik li Qaawa’ chi yo’yo? Chirix naq kiwakli li Kolonel chi yo’yo, wankeb’ chik li ke’wakli chi yo’yo ut ke’xk’ut rib’ chiru naab’al (chi’ilmanq Mateo 27:52–53; 3 Nefi 23:9). K’a’ut naq nakaweek’a laa’at naq kitz’iib’aman resil a’in sa’ li Santil Hu jo’ ajwi’ sa’ lix Hu laj Mormon?

Chi’ilmanq ajwi’ “Jesús resucita,” “El Señor resucitado se aparece a los Apóstoles,” “Bienaventurados los que no vieron y creyeron” (eb’ li video, LDS.org).

1 Pedro 1:3–11

Li Jesukristo naxk’e inyo’onihom ut xsahil inch’ool.

Li xAlisa, xrab’in li Elder Paul V. Johnson, li kikam rik’in cancer ut k’iila sut kicho’e’ chaq, kixk’ut xyaalal li “yo’yookil oyb’enink” li yeeb’il resil xb’aan laj Pedro sa’ 1 Pedro 1:3–11. Li Elder Johnson kixwotz jun hu kixtz’iib’a li xAlisa sa’ xkutankil li Paswa, ka’ch’in chik ma nakam: “Li Paswa a’an jun jultikahom re chixjunil li k’a’ru nawoyb’eni choq’ we. Naq sa’ jun kutan tink’iraaq ut tz’aqalaq inxaqalil. Sa’ junaq kutan maak’a’aq sa’ lin tib’el li ch’iich’ chi moko li plástico. Sa’ junaq kutan ach’ab’anb’ilaq li waam chiru li xiw ut maak’a’aq li rahil k’a’uxl wik’in. ... Jwal nim xsahil inch’ool chixpaab’ankil chi yaal jun chaq’al ru yu’am chirix li yu’am a’in” (“Ut ink’a’ chik taawanq li kamk,”  Jolomil Ch’utub’aj-ib’ re abril 2016).

K’a’ru li aatin malaj li raqal chi aatin sa’ 1 Pedro 1:3–11 li naxk’e aayo’onihom sa’ xk’ab’a’ li Jesukristo? Jo’q’e xaweek’a li yo’onink a’an? Chan ru naru taawotz’ rik’ineb’ li raab’ileb’ aab’aan li yo’onink li wan aawik’in sa’ xk’ab’a’ li Jesukristo?

Chi’ilmanq ajwi’ Alma 27:28; 36:1–24; 3 Nefi 9:11–17; Moroni 7:40–41.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:

Mormon.org

Sa’ li raqal “Semana Santa” sa’ mormon.org/spa/pascua wan jun tusleb’aal kutan wan wi’ resil li k’a’ru kik’ulman sa’ li junjunq kutan re li roso’jikil xamaan sa’ lix yu’am li Kolonel. Chiru li junjunq kutan re li xamaan, texruuq chirilb’al li tz’iib’anb’il, re rilb’al k’a’ru kixb’aanu li Kolonel sa’ li kutan a’an, malaj texruuq chi ilok chirix li xamaan a’an sa’ li Santil Hu jo’ junkab’al (chi’ilmanq li k’a’ru tz’iib’anb’il sa’ li raqal “Li na’leb’ re xtzolb’aleb’ li loq’laj hu aajunes”).

Eb’ li B’ich ut B’ichleb’aal choq’ reheb’ li Kok’al

K’oxla xb’ichankil sa’ komonil eb’ li b’ich chirix lix tojb’al rix li maak ut lix waklijik li Kolonel chi yo’yo chiru li xamaan a’in, ut jo’kan ajwi’ eb’ li b’ich li ink’a’ nawb’ileb’ ru eeb’aan (chi’ilmanq li tusleb’aal na’leb’ sa’ Eb’ li B’ich malaj B’ichleb’aal choq’ reheb’ li Kok’al, rub’eleb’ li na’leb’ jo’ “Jesukristo—Kolonel,” “Rahil kutan,” ut “Wakliik chi yo’yo”). Re xtenq’ankileb’ li komon chixtzolb’aleb’ li b’ich, naru taak’uteb’ li jalam-uuch li neke’xk’am rib’ rik’in li aatin.

“Li Yo’yookil Kristo: Lix Ch’olob’ahomeb’ li Apostol”

Jo’ junkab’al, ilomaq “Li Yo’yookil Kristo: Lix Ch’olob’ahomeb’ li Apostol” (Liahona, abril 2000, 2–3; chi’ilmanq ajwi’ LDS.org), ut tz’aama re li junjunq chi komon sa’ li junkab’al naq tixtaw junaq esil chirix li Paswa sa’ li ch’olob’ank a’in re xwotzb’al rik’ineb’ chik li kristiaan. Jo’ jun eetalil, taaruuq raj taak’uub’ jun li k’utleb’ aatin re xk’eeb’al chiru li redes sociales, chiru rokeb’aal laa wochoch, malaj sa’ rilob’aal laa wochoch.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Xk’eeb’al li jayalihom li nakatru chixb’aanunkil. Wi ta raj taanumsi yal junjunq k’asal wulaj wulaj re xtzolb’aleb’ li loq’laj hu, taaruuq taa’osob’tesiiq laa yu’am. K’e aach’ool chi tzolok wulaj wulaj, ut k’oxla k’a’ru taab’aanu re taajultiko’q aawe, ut yal aaq’e chixb’aanunkil.

li Kristo sa’ Getsemani

Getsemani, xb’aan laj Adam Abram