15-21 abril

Li Paswa

“At kamk, b’ar wank laa wankil?”

Oksi li hoonal rik’ineb’ li kok’al re xtenq’ankileb’ chirilb’al li Paswa jo’ jun li hoonal re saho’k ch’oolej chirix li Kolonel ut xnimob’resinkil lix b’antioxihomeb’ xb’aan lix mayej. Eb’ li na’leb’ sa’ li tusleb’ aatin a’in naru neke’oksiman re aatenq’ankil chixtzolb’aleb’ li kok’al a’ yaal jarub’ chihab’ wan reheb’.

Xtz’iib’ankil li nakak’oxla

Xkanab’ankileb’ chi wotzok

Re xtenq’ankileb’ li kok’al chiwotzb’al li k’a’ru neke’xnaw chirix li Jesukristo ut lix tojb’al rix li maak kixb’aanu, naru nakak’uteb’ li jalam-uuch re li Kolonel sa’ Getsemani, chiru li krus ut chirix lix waklijik chi yo’yo (chi’ilmanq li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li Komon ut li Junkab’al ut Libro de obras de arte del Evangelio,  56, 57, 58, 59 ut 60).

Xk’utb’al li tzol’leb’

Kok’al toj ka’ch’ineb’ xyu’am

Li Jesukristo a’an lin Kolonel.

Naq yookat chirilb’al ru li esil chirix lix tojb’al rix li maak xb’aan li Jesukristo, tz’il rix chan ru naru nakatenq’aheb’ li kok’al chireek’ankil lix rahom li Jesus.

Kok’ k’anjel naru chi b’aanumank

• K’ut chiruheb’ li kok’al naq xb’aan naq chiqajunilo nokomaakob’k, ink’a’ tooruuq chi q’ajk rik’in li Dios wi maak’a’ jun Kolonel li ak xk’ulum xrahilal li qamaak. Li Jesukristo naru nokoxkol chiruheb’ li qamaak wi naqajal qak’a’uxl. Chap jun li lem chi kutankil ut kanab’eb’ naq chixjunileb’ li kok’al te’ril rib’ chi sa’. Rajlal sut naq taaril rib’ jun li ch’ina al, laa’at taaye, “Li Jesus naxra laj/lix [xk’ab’a’ li ch’ina al malaj ch’ina xqa’al], ut naru naxkol laj/lix [xk’ab’a’ li ch’ina al malaj ch’ina xqa’al].”

• K’ut li jalam-uuch Jesús ora en Getsemaní (Libro de obras de arte del Evangelio, 56) naq taaye li seraq’ naq li Jesus kixk’ul rahilal sa’ Getsemani xb’aan lix maakeb’ li ruchich’och’ (chi’ilmanq Mateo 26:36–46; Lukas 22:39–44). Ch’olob’ naq sa’ xk’ab’a’ naq li Jesus kixnumsi rahilal, naru nakuye’ qamaak naq xqasik’ ru li ink’a’ us. Naru ajwi’ nakawoksi “Ch’ol 51: Li Jesus naxnumsi rahilal sa’ li awimq Getsemani,” Eb’ li Esilal sa’ li Ak’ Chaq’rab’, 129–32, malaj li video sa’ (LDS.org).

• B’ichahomaq sa’ komonil “Ninnaw naq raab’ilin,72> B’ichleb’aal choq’ reheb’ li Kok’al, 42–43. K’a’ chi aatinul re li b’ich naxch’olob’ lix rahom li Kolonel? Patz’ reheb’ li kok’al chan ru naru neke’xtenq’a li kristiaan chireek’ankil lix rahom li Kolonel.

Sa’ xk’ab’a’ naq li Jesus kiwakli chi yo’yo, naru taawanq inyu’am wi’chik.

Chan ru naru nakatenq’aheb’ li kok’al chixtawb’al ru naq, sa’ xk’ab’a’ li Jesukristo, laa’o ut eb’ li neke’qara toowakliiq chi yo’yo sa’ jun kutan?

Kok’ k’anjel naru chi b’aanumank

• K’ut chiruheb’ li kok’al li seraq’ chirix li Paswa rik’in roksinkileb’ li jalam-uuch re li Kristo sa’ Getsemani, chiru li krus ut chirix lix waklijik chi yo’yo, li wankeb’ sa’ li Libro de obras de arte del Evangelio ( 56, 57, 58, 59 ut 60), jo’ ajwi’ li jalam-uuch re chixjunil jun li perel li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li Komon ut li Junkab’al. Kanab’eb’ junjunq li kok’al chixchapb’aleb’ li jalam-uuch naq yookat chixyeeb’al li seraq’. Aatinan rik’ineb’ li kok’al chirix junjunq reheb’ li kristiaan li ke’ilok re li Jesus chirix naq kiwakli chi yo’yo, jo’ li xMaria (chi’ilmanq Jwan 20:1–18) malaj laj Tomas (chi’ilmanq Jwan 20:24–29).

• Ab’i ma neke’xnaw li kok’al k’a’ut naq naninq’ehiman li Paswa. Ch’olob’ naq chiru li Paswa naninq’ehiman li kutan jwal aajel ru chalen chaq xtiklajik li ruchich’och’—li kutan naq li Jesukristo kiwakli chi yo’yo. Patz’ re jun li ch’ina al ma taawulaq raj chiru xwotzb’al li k’a’ru naxb’aanu lix junkab’al re xjultikankil lix waklijik chi yo’yo li Jesukristo.

• Ch’olob’ naq li wakliik chi yo’yonaraj naxye wank wi’chik chi yo’yo chirix li kamk. Ch’olob’ xyaalal naq sa’ xk’ab’a’ li Jesukristo, toowakliiq chi yo’yo—taawanq wi’chik qayu’am chirix naq ak xookam, ut maajun wa chik tookamq.

• Oksi jun li ramleb’ uq’ re xk’utb’al chiruheb’ li kok’al naq chiqajunilo wan qajunxaqalil (eetalinib’il rik’in li ramleb’ uq’) ut li qamusiq’ (eetalinb’il rik’in li uq’ej). Naq nokokam, li qamusiq’ toj nakana chi yo’yo, a’b’an li qajunxaqalil ink’a’. Naq nokowakli chi yo’yo, li qamusiq’ ut li qajunxaqalil naxjunaji wi’chik rib’. Kanab’eb’ li kok’al chixk’eeb’aleb’ xhoonal chiroksinkil li ramleb’ uq’ ut chirisinkil wi’chik.

• B’ichahomaq sa’ komonil jun li b’ich re li Paswa, qayehaq “Xwakli Jesus” malaj “Ma yaal naq li Jesus xwakli,” B’ichleb’aal choq’ reheb’ li Kok’al,44, 45, ut k’ut chiruheb’ li kok’al li jalam-uuch naq ak xwakli chi yo’yo ( Libro de obras de arte del Evangelio,  59, 60, 61).

• K’ut lix jalam-uuch anihaq nakanaw ru li kikam. Wotz lix nawom aach’ool naq a’an taawakliiq chi yo’yo sa’ xk’ab’a’ lix tojb’al rix maak xb’aan li Jesukristo ut lix waklijik chi yo’yo.

• Ilomaq sa’ komonil li video “Jesús resucita” malaj “El Señor resucitado se aparece a los Apóstoles” (LDS.org). Naru natawman xkomoneb’ li video re li Paswa sa’ mormon.org/pascua.

Ak waklijenaq chik, xb’aan laj Greg K. Olsen

Xk’utb’al li tzol’leb’

Kok’al ak ninqeb’

Li Jesus kixnumsi rahilal sa’ ink’ab’a’ sa’ Getsemani ut chiru li krus.

Naq yookat chi tzolok chirix lix tojb’al rix li maak xb’aan li Kolonel, tz’il rix chan ru naru nakatenq’aheb’ li kok’al chixtzolb’al ut chixjultikankil li Kristo li kixnumsi rahilal sa’ Getsemani ut chiru li krus xb’aaneb’ lix maak, lix yajeleb’, ut lix rahil xch’ooleb’.

Kok’ k’anjel naru chi b’aanumank

• Il ru rik’ineb’ li kok’al Lukas 22:39–44 ut junjunqeb’ li raqal sa’ Mateo 27:29–50. Kanab’eb’ chixsik’b’aleb’ li aatin li taatenq’anq reheb’ chixtawb’al ru li kixnumsi li Kolonel sa’ li Getsemani ut chiru li krus.

• Tenq’aheb’ li kok’al chixkanab’ankil sa’ xk’a’uxleb’ li rox xraqalil li paab’aal. Ch’olob’ xyaalal naq li Jesukristo wan xwankil re qakolb’al chiru li maak ut chiru li kamk.

• Tenq’aheb’ li kok’al chixkawresinkileb’ li kok’ esil chirix lix tojb’al rix li maak xb’aan li Jesukristo li naru neke’xwotz rik’ineb’ li kristiaan. Waklesiheb’ xch’ool chixk’eeb’al sa’eb’ lix kok’ esil jun li raqal reheb’ li loq’laj hu ut lix nawom xch’ooleb’. Wi neke’raj xkomon lix tenq’, naru neke’ril ru “Expiación de Jesucristo” sa’ Leales a la Fe (81–87).

Sa’ xk’ab’a’ naq li Jesus kikam ut kiwakli chi yo’yo, tawanq wi’chik inyu’am.

Eb’ li kok’al li nakatzoleb’ sa’ jun kutan te’nume’q chiru lix kamik junaq lix komoneb’ wi toj maji’ neke’nume’ chiru a’an. Tenq’aheb’ chixnawb’al naq sa’ xk’ab’a’ naq li Jesukristo kiwakli chi yo’yo, chiqajunilo toowakliiq chi yo’yo.

Kok’ k’anjel naru chi b’aanumank

• K’ut li Libro de obras de arte del Evangelio,  57, 58 ut 59, ut patz’ reheb’ li kok’al naq te’xk’e chixk’ul rib’ li jalam-uuch rik’ineb’ li raqal a’in: Mateo 27:29–38, 59–60; Jwan 20:10–18.

• Kanab’eb’ li kok’al chirilb’al ru xjuneseb’ “Wakliik chi yo’yo” sa’ li K’utul Raqal reheb’ li Loq’laj Hu, ut chixtz’iib’ankileb’ xpatz’om re jun yalok-ix li naru neke’xpatz’ chirix li xe’ril ru. K’e xhoonaleb’ li kok’al re xpatz’b’aleb’ chirib’ileb’ rib’ li patz’om ut re xtawb’aleb’ lix sumenkil sa’ komonil.

• Tenq’aheb’ li kok’al chixsik’b’al sa’ li wan chi sa’ li B’ichleb’aal choq’ reheb’ li Kok’al re xtawb’al jun li b’ich chirix li Jesukristo malaj chirix li wakliik chi yo’yoli te’raj raj xtzolb’al. B’ichahomaq sa’ komonil li b’ich junjunq sut. Patz’ reheb’ li kok’al k’a’ru neke’xtzol sa’ li b’ich a’an.

• Rub’elaj li tzolok, kanab’eb’ junjunq li kok’al chi wulak chi kawresinb’ileb’ re xwotzb’al lix nawom xch’ooleb’ chirix lix tojb’al rix’ li maak xb’aan li Jesukristo ut lix waklijik chi yo’yo. Kanab’eb’ li kok’al chixtz’iib’ankil lix nawom xch’ooleb’ re naq te’xwotz sa’ kab’l.

Xb’oqb’aleb’ chi tzolok sa’ kab’l

Re xtenq’ankileb’ li kok’al chixwotzb’al rik’ineb’ lix junkab’al li k’a’ru xe’xtzol, waklesiheb’ xch’ool chixb’ichankil jun li b’ich chirix li Jesukristo chiru li xamaan a’in sa’ kab’l.

Xchaab’ilob’resinkil li qak’utum

Eb’ li kok’al te’tenq’aak xb’aan li ka’sutink. Matxuwak chixka’sutinkileb’ li kok’ k’anjel chi naab’al sut, mas wi’chik rik’ineb’ li kok’al toj ka’ch’ineb’ xyu’am. Li ka’sutink tixtenq’aheb’ chixjultikankil li taak’ut chiruheb’.