li Kristo naq kijaltesiik ru

Li jaltesiik ru, xb’aan laj Carl Heinrich Bloch

1-14 abril

Mateo 16-17; Markos 9; Lukas 9

”Laa’at li Kristo”

Naq yookat chixtz’ilb’al rixeb’ li ch’ol a’an re li Ak’ Chaq’rab’ ut nakawab’iheb’ li aatin chiru li jolomil ch’utub’aj-ib’, ab’iheb’ chi us li aatin li taaweek’a naq aajelaq ru choq’ reheb’ li kok’al sa’ laa tzoleb’aal.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Wi li kok’al re laa tzoleb’aal xe’rab’i malaj xe’ril li jolomil ch’utub’aj-ib’, kanab’eb’ chixwotzb’al li k’a’ru xe’ril malaj xe’rab’i.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Mateo 16:13–17

Naru nintaw jun xnawom inch’ool chirix naq li Jesukristo a’an li Ralal li Dios.

K’oxla chan ru naru nakawoksi lix nawom xch’ool laj Pedro ut lix sumehom li Jesus re xk’utb’al chiruheb’ li kok’al k’a’ru li xnawom ch’oolej ut re xwaklesinkileb’ xch’ool chixsik’b’al li reheb’.

Kok’ k’anjel naru chi b’aanumank

• Naq yookat chirilb’al ru Mateo 16:15–17, patz’ reheb’ li kok’al naq te’ab’inq chi us re xk’eeb’al reetal li kixye laj Pedro. (Chi’ilmanq ajwi’ “Ch’ol 32: Laj Pedro naxch’olob’ xyaalal li Kristo,” Eb’ li Esilal sa’ li Ak’ Chaq’rab’, 76–77, malaj li video sa’ LDS.org.) Ch’olob’ naq laj Pedro yoo chixyeeb’al lix nawom xch’ool chirix li Jesukristo. Il wi’chik ruheb’ li raqal. (Malaj k’ut wi’chik li video.) Anajwan patz’ reheb’ li kok’al naq te’ab’inq chi us re xk’eeb’al reetal ani kiyehok re laj Pedro naq li Jesukristo a’an li Ralal li Dios.

• Ye lix nawom aach’ool chirix li Jesukristo ut ch’olob’ chanru naq xataw. B’oqeb’ li kok’al chixyalb’al xtawb’al rik’in li qaChoxahil Yuwa’ lix nawomeb’ xch’ool.

Mateo 16:15–19

Li Jesukristo naxk’e reheb’ li profeet ut eb’ li apostol lix laawil li tijonelil re xb’eresinkil lix Iglees.

Li Kolonel kixjuntaq’eeta li k’utb’esinb’il na’leb’ rik’in jun li pek ut li wankilal re li tijonelil rik’ineb’ li laaw. Chan ru naru nakawoksiheb’ li juntaq’eetank a’an re xtenq’ankileb’ li kok’al chi wank xpaab’aaleb’ chirixeb’ li ani neke’b’eresin re lix Iglees li Kristo?

Kok’ k’anjel naru chi b’aanumank

• Naq yookat chrilb’al ru rik’ineb’ li kok’al Mateo 16:18, k’ut jun li pek chiruheb’. Ka’suti rik’ineb’ a’an li ch’ol aatin: “sa’ xb’een li pek a’in tink’ojob’ lin iglees,” rik’in eek’asink-ib’ li naxk’ul rib’ rik’ineb’ li aatin. Ch’olob’ naq li Iglees k’ojk’o sa’ xb’een li “pek” re li k’utb’esinb’il na’leb’.

• K’ut chiruheb’ li kok’al junjunqeb’ li laaw ut patz’ reheb’ k’a’ruheb’ aj-e. Ch’olob’ naq li Jesus kixk’e lix laawil li tijonelil re laj Pedro ut reheb’ xkomon li apostol. Eb’ li laaw a’an, “neke’xte” choq’ qe li osob’tesihom ut li b’e sa’ li choxa. Qayehaq, rik’ineb’ lix laawil li tijonelil naru nak’ub’siman qaha’ ut naru nokotz’aqon sa’ li loq’laj wa’ak. K’e reheb’ li kok’al li huhil laaw ut patz’ reheb’ naq te’xtz’iib’a junjunq li osob’tesihom “neke’xte” lix laawil li tijonelil.

• K’ut jun li jalam-uuch re li Awa’b’ej re li Iglees, ut ye lix nawom aach’ool chirix naq a’an wan chixjunileb’ li laaw re li tijonelil rik’in sa’eb’ li kutan a’in, jo’ naq kiwan chaq rik’in laj Pedro.

Xjalam-uuch laj Pedro naq naxchapeb’ li laaw

Li Jesus kixk’e lix laawil li tijonelil re laj Pedro.

Mateo 17:19–20

Lin paab’aal naru naxk’eheb’ chi uxmank li sachb’a-ch’oolej.

Naq nakawil ru lix yeechi’ihom li Jesus naq li paab’aal chanchan li riyajil li mostaza naru nareek’asiheb’ li tzuul, k’a’ru li na’leb’ nakak’ul chirixeb’ li kok’al li nakatzoleb’?

Kok’ k’anjel naru chi b’aanumank

• Kanab’eb’ li kok’al chixk’eeb’al xhoonaleb’ re xyiib’ankil xjalam-uuch li ninqi tz’uul ut eb’ li kok’ iyaj sa’ li pizarron naq yookat chirilb’al ru Mateo 17:19–20 rik’ineb’ a’an. Ch’olob’ naq li ninqi tzuul li tento taaqeek’asi a’aneb’ li k’a’aq re ru li ch’a’ajeb’ choq’ qe xb’aanunkil. B’ar wankeb’ junjunq reheb’ li k’a’aq re ru chanchaneb’ li ninqi tz’uul choq’ qe? Oksi li perel re kok’ k’anjel re li xamaan a’in re xtenq’ankileb’ li kok’al chixk’oxlankil chan ru naq li paab’aal naru chixtenq’ankileb’ chixb’aanunkileb’ li k’a’aq re ru li naraj li Dios naq te’xb’aanu.

• K’e jun li jalam-uuch re jun li nimla tzuul sa’ xjunpak’al li tzoleb’aal, ut tz’iib’aheb’ li aatin a’in chiru xiw, wiib’ank ch’oolej, malaj k’a’uxlej. Patz’ reheb’ li kok’al naq te’xye junjunq li k’a’aq re ru li naru neke’xb’aanu re xtawb’al xkomon lix paab’aaleb’ chirix li Jesukristo. Kanab’ naq li junjunq chi ch’ina al li tixye junaq na’leb’ tixnumsi li tzuul mas nach’ wi’chik sa’ xjunpak’alil li tzoleb’aal. Il ru Mateo 17:19–20 ut ch’olob’ xyaalal lix wankilal li paab’aal sa’ laa yu’am.

• Patz’ reheb’ li kok’al naq te’xb’icha “Li paab’aal,” B’ichleb’aal choq’ reheb’ li Kok’al, 50–51, ut chirix a’an k’e reheb’ li junjunq chi kok’al jun li iyaj li naru neke’xk’am sa’ kab’l. Kanab’eb’ chirawb’al li iyaj ut chixk’eeb’al sa’ jun na’ajej b’ar wi’ naru neke’ril chi k’iik re xtenq’ankileb’ chixjultikankil naq te’wanq xpaab’aal chirix li qaChoxahil Yuwa’ ut li Jesukristo.

reetalil li k’utuk

Xk’utb’al li tzol’leb’

Kok’al ak ninqeb’

Mateo 16:13–17

Li nawom ch’oolej chirix li Jesukristo natawman rik’in li k’utb’esinb’il na’leb’ re li choxa.

Chan raj ru naq lix nawom xch’ool laj Pedro li wan resilal sa’ Mateo 16:13–17 naru chixtenq’ankileb’ li kok’al chixwaklesinkil lix nawomeb’ xch’ool ajwi’eb’ a’an?

Kok’ k’anjel naru chi b’aanumank

• Patz’ reheb’ li kok’al k’a’ raj ru te’xye wi junaq tixpatz’ reheb’, “Ani li Jesus?” Kanab’eb’ li kok’al chirilb’al ru Mateo 16:13–17 re xsik’b’al chan ru kisumen laj Pedro rik’in li patz’om a’an. Chan ru naq xataw lix nawom aach’ool chirix li Jesus? K’a’ru naru naqab’aanu re xkawob’resinkil lix nawom qach’ool?

• Tenq’aheb’ li kok’al chixjuntaq’eetankil chan ru naq naqanaweb’ li musiq’ejil yaal rik’in chan ru naq naqanaweb’ jalaneb’ chik li yaal. Qayehaq, chan ru naqanaw lix teram jun li kristiaan malaj chan ru wan li kutan? Chan ru naqanaw naq li Jesukristo a’an li Ralil li Dios?

• Wotz lix nawom aach’ool chirix li Jesukristo ut b’oqeb’ li kok’al chixtawb’al malaj chixkawob’resinkil lix nawomeb’ xch’ool.

Mateo 16:15–19

Lix Iglees li Jesukristo b’eresinb’il xb’aaneb’ li wankeb’ xlaawil li tijonelil rik’ineb’.

Naq nakatzol Mateo 16:15–19 naru nakak’ojob’ xpaab’aaleb’ li kok’al chirix naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an jun xk’ojob’ankil wi’chik li Iglees kixk’ojob’ li Jesus naq kiwan sa’ li ruchich’och’.

Kok’ k’anjel naru chi b’aanumank

• Tz’iib’a Mateo 16:19 sa’ li pizarron, ut isi junjunqeb’ li aatin, jo’ ajwi’ li aatin “laaw.” Patz’ reheb’ li kok’al naq te’xtaw li aatin maak’a’eb’.

• K’ut li video “Las llaves del sacerdocio: La restauración de las llaves del sacerdocio” (LDS.org) malaj il wi’chik ru li resilal lix laawil li tijonelil sa’ Leales a la Fe, 166–167. K’a’ruheb’ a’an lix laawil li tijonelil? Chan ru naq eb’ lix laawil li tijonelil chanchaneb’ li tz’aqal laaw?

• Tenq’aheb’ li kok’al chixtusb’aleb’ rajlil sa’ li pizarron li kristiaan neke’xk’am lix laawil li tijonelil. (Sa’ li huLeales a la Fe, 166–167, wan jun xtusulal li naru natenq’an reheb’.) Kanab’ jun li komon re laa teep li naxk’ameb’ li laaw a’an re taa’aatinaq sa’ laa tzoleb’aal chirix k’a’ut naq lix laawil li tijonelil mas aajeleb’ ru.

• Muq naab’aleb’ li laaw (malaj jalam-uuch re li laaw) sa’ li tzoleb’aal ut kanab’eb’ li kok’al chixtawb’aleb’. Naq ak xe’xtaw chixjunileb’ li laaw, tenq’aheb’ li kok’al chixk’oxlankil li osob’tesihom li neke’xyal xsahil sa’ xk’ab’a’eb’ lix laawil li tijonelil (qayehaq, eb’ li junelikil junkab’al, li kub’iha’, ut li loq’laj wa’ak).

Lukas 9:28–36

Li Jesukristo a’an li Ralal li Dios.

Naq kijaltesiik ru li Kristo, a’an jun reheb’ li hoonal sa’eb’ li loq’laj hu naq ki’ab’iman lix yaab’ xkux li Dios li Yuwa’b’ej chixch’olob’ankil xyaalal lix Raarookil Alal. Naq nakatzol li seraq’ a’an rik’ineb’ li kok’al naru nakak’ojob’ lix paab’aaleb’ chirix li Jesukristo.

Kok’ k’anjel naru chi b’aanumank

• Kanab’eb’ li kok’al chixyiib’ankileb’ lix jalam-uuch li Kristo naq kijaltesiik ru, jo’ yeeb’il resil sa’ Mateo 17:1–9. Patz’ reheb’ naq te’xch’olob’ lix jalam-uucheb’ chirib’ileb’ rib’. (Chi’ilmanq ajwi’ li tusleb’ aatin re li xamaan a’in sa’ Kim, Taaqehin—Choq’ reheb’ li Komon ut li Junkab’al. )

• K’e xhoonaleb’ li kok’al chi aatinak chirix li k’a’ru naxk’ut li seraq’ a’an chirix li Jesukristo. Kanab’eb’ chixtz’iib’ankil chiru li pizarron li k’a’ru xe’xk’oxla. Kanab’eb’ junjunqeb’ li kok’al chixwotzb’al chan ru neke’xnaw naq li Jesukristo a’an li Ralal li Dios.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixpatz’b’al reheb’ lix na’ xyuwa’ malaj re jalan chik komon re lix junkab’al chan ru xe’xtaw xnawom xch’ool chirix li Jesukristo.

Xchaab’ilob’resinkil li qak’utum

Oksiheb’ li b’ich. Eb’ li b’ich ut eb’ li b’ich reheb’ li kok’al naru naxtenq’aheb’ li kok’al a’ yaal jarub’ chihab’ wankeb’ re chixtawb’al ru ut chixjultikankil lix yaalalil li evangelio. Li b’ichank naru ajwi’ naxtenq’aheb’ li kok’al chi tz’aqonk junelik sa’ jun li hoonal re tzolok. (Chi’ilmanq Li k’utuk jo li Kolonel, perel 22).

perel re kok’ k’anjel: li qapaab’aal naru naxk’eheb’ chi uxmank li sachb’a-ch’oolej