li Kristo naq kixk’e chi wa’ak li k’iila tenamit

K’ehomaqeb’ chi wa’ak, xb’aan laj Jorge Cocco

25–31 marzo

Mateo 14–15; Markos 6–7; Jwan 5–6

”Mexxiwak”

Naq nakakawresi aawib’ chixk’utb’al li k’a’ru wan sa’ Mateo 14–15; Markos 6–7; ut Jwan 5–6, sik’eb’ li esil li taawanq xloq’al sa’ xyu’ameb’ li kok’al li nakatzoleb’. K’a’ru naru chi tenq’ank reheb’ li kok’al chixtawb’aleb’ ru li esil a’an? Li tusleb’ aatin a’in naru naxk’e junjunq laa na’leb’.

Xtz’iib’ankil li nakak’oxla

reetalil l wotzok

Xkanab’ankileb’ chi wotzok

K’ut jun xjalam-uuch li Jesus naq nab’eek sa’ xb’een li ha’ (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’alut patz’ reheb’ li kok’al naq te’xwotz li k’a’ru neke’xnaw chirix li seraq’.

reetalil li k’utuk

Xk’utb’al li tzolʼlebʼ

Kok’al toj ka’ch’ineb’ xyu’am

Jwan 5:1–9

Li Jesukristo naxnaw li k’a’ru naqaj ru ut naru chiqatenq’ankil.

Naq yookat chirilb’al ru li esil chirix li Jesus naq kixk’irtesi li winq chixk’atq li pumpuukil ha’ Betesda, tz’il rix chan ru naru nakatenq’aheb’ li kok’al chirilb’al li k’a’ru naxk’ut li seraq’ chirix lix chaab’ilal, lix rahom, ut xkomoneb’ chik lix chaab’ilal li Jesus.

Kok’ k’anjel naru chi b’aanumank

• Oksi li jalam-uuch Cristo sana al enfermo de Betesda Libro de obras de arte del Evangelio,ajl 42) re xseraq’inkil reheb’ li kok’al li esil sa’ Jwan 5:1–9. Malaj k’ut li video “Jesús sana a un hombre paralítico en el día de reposo” (LDS.org). Patz’ reheb’ li kok’al naq’ te’xk’oxla naq a’aneb’ li kristiaan kixk’irtesi li Jesus. Chan raj ru te’reek’a naq te’k’irtesiiq raj xb’aan li Jesus.

• Patz’ reheb’ li kok’al naq te’xye junjunq li k’a’aq re ru ch’a’aj choq’ reheb’ a’an malaj li narahob’tesin xch’ooleb’. Seraq’i reheb’ jun sutaq naq xak’ul aatenq’ankil xb’aan li Kolonel sa’ laa yu’am chiru jun li ch’a’ajkil yale’k. Ch’olob’ xyaalal naq li Jesus naxnaw chirix chixjunileb’ li qach’a’ajkilal ut naraj qatenq’ankil.

Mateo 14:13–21

Naqataaqe lix b’aanuhom li Jesukristo naq chaab’ilo rik’ineb’ li kristiaan.

Jun reheb’ jo’ chanru naq li Jesus kixk’ut lix rahom a’an naq kixk’eheb’ chi wa’ak laj taaqehom re naq ke’tz’oka. Chan ru naru nakatenq’aheb’ li kok’al chixtzolb’al k’anjelak chiruheb’ li kristiaan jo’ kixb’aanu li Jesus?

Kok’ k’anjel naru chi b’aanumank

• K’ut chiruheb’ li kok’al jun li chakach ut b’ayaq li kaxlan wa naq yookat chixseraq’inkil li esil sa’ Mateo 14:13–21. Ch’olob’ naq us ta li Jesus ak kixyal xq’e re wank xjunes, li kristiaan ke’raj wank chi nach’ rik’in a’an. Wotz lix raqik li seraq’ rik’ineb’ li kok’al ut patz’ reheb’ naq te’rab’i chi us li kixb’aanu li Jesus re xk’utb’al lix chaab’ilal ut xrahom choq’ reheb’ a’an.

• Patz’ reheb’ li kok’al naq te’xwotz chan ru naq xk’ut xchaab’ilal junaq rik’ineb’ a’an. K’a’ru naru neke’xb’aanu chiru li xamaan a’in re xk’utb’al xchaab’ilaleb’ chiruheb’ li rech kristiaanil? Rik’in li junjunq chi sumenk te’xye, yiib’ jun li jalam-uuch re li kaxlan wa malaj jun li kar sa’ li pizarron. Ye reheb’ li kok’al naq wi neke’xb’aanu li k’a’aq re ru a’an, yookeb’ chixtaaqenkil lix b’aanuhom li Jesus naq kixk’eheb’ chi wa’ak li oob’ mil chi kristiaan ke’tz’oka.

Mateo 14:22–33

Li paab’aal chirix li Jesukristo naru nokoxtenq’a chirisinkil li qaxiw.

Laj Pedro kixk’ut xnimal xpaab’aal naq kib’eek sa’ xb’een li ha’ rik’in li Jesus. K’a’ raj ru li tzole’k naru natawman sa’ li seraq’ a’an choq’ reheb’ li kok’al?

Kok’ k’anjel naru chi b’aanumank

• K’ut li jalam-uuch Jesús camina sobre el agua (Libro de obras de arte del Evangelio,ajl 43) naq yookat chixyeeb’al li seraq’ rik’in laa waatin ajwi’. Maare us naq taawoksi li perel re kok’ k’anjel re li xamaan a’in re xtenq’ankileb’ li kok’al chixyeeb’al aawe li seraq’. Naru ajwi’ taak’am jun li ch’ina sek’ rik’in ha’ ut kanab’eb’ li kok’al chixyeeb’al naq “neke’b’eek” rik’in li ru’uj ruq’eb’ sa’ xb’een li ha’.

• K’ut li video “¿Por qué dudaste?” (LDS.org), ut patz’ reheb’ li kok’al naq te’rab’i chi us k’a’ut naq kiwan xxiw laj Pedro. Chirix a’an patz’ reheb’ naq te’aatinaq chirix jun hoonal naq xe’reek’a xxiw ut te’xwotz k’a’ru xtenq’an reheb’. Tenq’aheb’ chirilb’al naq li paab’aal chirix li Jesukristo nokoxtenq’a chixq’axb’al ru li qaxiw.

reetalil li k’utuk

Xk’utb’al li tzolʼlebʼ

Kok’al ak ninqeb’

Jwan 5:17–47

Li Jesukristo nokoxtzol chirix li qaChoxahil Yuwa’.

Chan ru naq lix k’utum li Jesus chirix lix Yuwa’ naru naxtenq’aheb’ li kok’al chixtzolb’al chirix li qaChoxahil Yuwa’?

Kok’ k’anjel naru chi b’aanumank

• Yoob’ wiib’ li b’atz’unk rik’ineb’ kok’ hu li neke’xk’ul rib’, rik’ineb’ li aatin kiroksi li Jesus naq kik’utuk chirix li qaChoxahil Yuwa’ sa’ Jwan 5, jo’eb’ li aatin rahok, yu’am ut k’anjel (chi’ilmanq Jwan 5:20, 26, 36). K’eheb’ li kok’ hu chi huphu ut patz’ reheb’ li kok’al naq te’xsik’ li neke’xk’ul rib’ rik’in xb’alq’usinkil wiib’ sa’ jun sut. Rajlal sut naq te’xtaw jun sumal, il ru li raqal wan wi’ li aatin a’an, ut patz’ reheb’ li kok’al k’a’ru naxk’ut chiqu li aatin a’an chirix li qaChoxahil Yuwa’.

• Patz’ reheb’ li kok’al naq te’ril ru Jwan 5:30, ut chirix a’an te’xtz’aqob’resi ru li ch’ol aatin a’in: “Ink’a’ ninsik’ li wajom laa’in, a’ b’an  Chan ru kixb’aanu li Kristo li rajom lix Choxahil Yuwa’? Chan ru naru naqab’aanu laa’o li rajom li qaChoxahil Yuwa’?

Jwan 6:5–14

Li qakok’ mayej naru naxb’aanu xk’anjel.

Jun li ch’ina al kik’ehok re li kaxlan wa ut eb’ li kar li kiroksi li Jesus re xk’eeb’aleb’ chi wa’ak oob’ mil chi kristiaan. Chan ru naru nakatenq’aheb’ li kok’al li nakatzoleb’ chirilb’al chan ru naru neke’tenq’an sa’ lix k’anjel li Qaawa’?

Kok’ k’anjel naru chi b’aanumank

• Jachi ru wiib’ oxib’ li galleet atz’am rix malaj putz’inb’il kaxlan wa rik’ineb’ li kok’al. Tenq’aheb’ chixk’oxlankil chan raj ru xk’ihaleb’ oob’ mil chi kristiaan. Chan raj ru xk’eeb’aleb’ chi wa’ak chixjunileb’ li kristiaan a’an rik’in ka’ajwi’ oob’ chi kaxlan wa ut wiib’ chi kar?

• Kanab’ jun li ch’ina al chixyeeb’al rik’in li raatin li seraq’ re xk’eeb’aleb’ chi wa’ak li oob’ mil chi kristiaan. Chan ru naru nokowan jo’ li ch’ina al sa’ Jwan 6:9? Kanab’eb’ li kok’al chixyiib’ankil xjalam-uuch li kaxlan wa ut eb’ li kar chiru li hu, ut chixtz’iib’ankil chiruheb’ junjunq li k’a’aq re ru naru neke’xk’e re li Qaawa’ re tenq’ank sa’ lix k’anjel.

• K’e reheb’ li junjunq chi kok’al jun li ch’ina jorb’a-k’a’uxlej re naq te’xtusub’ ru. K’a’ raj ru taak’ulmanq wi ta jun re lix cha’alil li jorb’a-k’a’uxlej sachso? Ch’olob’ naq li junjunq qe laa’o, chanchano jun xcha’alil li jorb’a-k’a’uxlej—chiqajunilo wan k’a’ru aajel ru li naru naqab’aanu sa’ xyu’ameb’ li kristiaan. Chan ru neke’tenq’an li kok’al sa’ lix junkab’aleb’ malaj sa’ lix tzoleb’aaleb’?

eb’ li kaxlan wa ut li kar

Li Jesus kixk’e chi wa’ak oob’ mil rik’in oob’ kaxlan wa ut wiib’ kar.

Mateo 14:22–33

Li paab’aal chirix li Jesukristo naru nokoxtenq’a chirisinkil li qaxiw.

Li paab’aal ut li xiw wan jun xnimal xk’anjeleb’ sa’ li seraq’ naq li Jesus ut laj Pedro ke’b’eek sa’ xb’een li palaw. K’a’ru naru naqatzol sa’ li seraq’ a’an?

Kok’ k’anjel naru chi b’aanumank

• K’ut li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ li kok’al naq te’xsik’ jun raqal sa’ Mateo 14li tixch’olob’ li jalam-uuch a’an.

• Patz’ reheb’ li kok’al naq te’xsik’ reetalil li paab’aal ut li xiw naq yooqeb’ chirilb’al ru Mateo 14:22–33. Naru ajwi’ nakak’ut li video “¿Por qué dudaste?” ((LDS.org)). K’a’ru naraj naxye naq wanq aapaab’al chirix li Jesukristo? Chan ru naqajal ru li xiw rik’in li paab’aal?

• Patz’ reheb’ li kok’al naq te’xk’oxla naq ke’wan ut kiwan jun li camara rik’ineb’ naq li Jesus ut laj Pedro kib’eek sa’ xb’een li palaw. B’ar raj wan reheb’ li hoonal li te’risi raj sa’ jalam-uuch ut k’a’ut? Ye reheb’ naq naru neke’xsik’ xna’leb’eb’ sa Mateo 14:22–33. Kanab’eb’ chixyiib’ankil jun li jalam-uuch re li hoonal xe’xsik’ ru, ut chixwotzb’aleb’ lix jalam-uuch, ut chixch’olob’ankil k’a’ut naq xe’xsik’ ru li hoonal a’an.

reetalil li tzolok

Xb’oqb’aleb’ chi tzolok sa’ kab’l

Wi eb’ li kok’al xe’xtz’aqob’resi ru li perel re kok’ k’anjel re li xamaan a’in, kanab’eb’ chiroksinkil re xk’utb’al chiruheb’ lix junkab’aleb’ li xe’xtzol sa’ li kutan a’in.

Xchaab’ilob’resinkil li qak’utum

Xkanab’ankileb’ chi wotzok. Patz’ reheb’ li kok’al chirix lix k’a’uxleb’, li reek’ahomeb’, ut li k’a’ru xe’xk’ul. Taak’e reetal naq junelik wan xna’leb’eb’ moko ch’a’aj ta xtawb’al ru a’b’an jwal ninqeb’ ru.

perel re kok’ k’anjel: li Jesus naru tinixtenq’a re naq ink’a’ tinxuwaq