li Jesus naq yoo chi k’utuk chire li palaw

Li Jesus kixtzoleb’ li tenamit chire li palaw, xb’aan laj James Tissot

25 febrero-3 marzo

Mateo 6-7

"Kixtzoleb’ chi wank xwankil"

Re xtikib’ankil, il ru Mateo 6–7 naq yookat chixk’oxlankileb’ li kok’al li nakatzoleb’. B’ar wan reheb’ li esil reheb’ li ch’ol a’an aajel ru naq te’rab’i?Kim, Taaqehin—Choq’ reheb’ li Komon ut li Junkab’al ut li tusleb’ aatin a’in naru naxk’eheb’ laa na’leb’ re li k’utuk, a’ yaal jo’ chanru nakawaj ru.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Patz’ reheb’ li kok’al naq te’xwotz li xe’xb’aanu sa’ li xamaan xnume’ re wank jo’ jun saqen malaj eetalil choq’ re anihaq.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Mateo 6:5–13

Naru nintijok chiru lin Choxahil Yuwa’ jo’ kixb’aanu li Jesus.

Eb’ li kok’al naru neke’xtzol li tijok naq neke’rab’i lix tijeb’ li komon. Chan ru naru nakatenq’aheb’ chi tzolok chirix lix tij li Jesukristo sa’eb’ li raqal a’an?

Kok’ k’anjel naru chi b’aanumank

• Tzol lix k’utum li Jesus chirix li tijok li natawman sa’ Mateo 6:5–13. Naru nakawoksi li “Ch’ol 20: Li Jesus nak’utuk chirix li tijok,” Eb’ li Esilal sa’ li Ak’ Chaq’rab’,46> 51–52, malaj li video sa’ (LDS.org).

• Oksi li perel re li kok’ k’anjel re li xamaan a’in re xtenq’ankileb’ li kok’al chixjultikankil li xcha’alil li tij.

• Yiib’ lix jalam-uuch li ruq’eb’ chixjunjunqaleb’ li kok’al sa’ jun perel li hu. Aatinan chirix li tento taqab’aanu rik’ineb’ li quq’ ut li qatel naq nokotijok. Sa’ li junjunq chi jalam-uuch, tz’iib’a k’a’ruhaq li naqab’aanu re xk’utb’al li oxloq’ naq nokotijok (qayehaq, xxulub’ankil li qajolom, xmutz’b’al li qu, ut wan chik xkomon).

• Tenq’aheb’ li kok’al chixyiib’ankil jun li jalam-uuch malaj reetalil li tijok li taatenq’anq reheb’ chixjultikankil tijok eq’la ut sa’ li q’ojyin, ut kanab’eb’ chixwotzb’al rik’ineb’ lix junkab’al.

• B’icha jun li b’ich chirix li tijok rik’ineb’ li kok’al (jo’ “Ninmutz’ li wu,” B’ichleb’aal choq’ reheb’ li Kok’al,58>  18), ut wotz lix nawom aach’ool chirix lix wankilal li tijok. Naru ajwi’ taakanab’eb’ li kok’al chixwotzb’al lix numsihomeb’ rik’in li tij.

ch’ina al natijok

Naru nintijok chiru lin Choxahil Yuwa’ jo kixb’aanu li Jesus.

Mateo 7:12

Tento tinb’aanu reheb’ lin komon jo’ nawulak raj chiwu naq te’xb’aanu we laa’in.

Lix k’utum li Jesus li natawman sa’ Mateo 7:12—li nanawman ajwi’ ru jo’ li ooril taqlanb’il—naxk’e qab’eresinkil moko ch’a’aj ta ru re chan ru wank rik’ineb’ li qakomon. K’a’ru taatenq’anq reheb’ li kok’al li nakatzoleb’ chixyu’aminkil li na’leb’ a’in?

Kok’ k’anjel naru chi b’aanumank

• Il ru Mateo 7:12 ut k’os ru li naxye rik’in aatin moko ch’a’aj ta li naru te’xtaw ru li kok’al. Tenq’aheb’ li kok’al chixk’oxlankil chi jalan jalanq xyaalal xtz’aqob’resinkil ru li ch’ol aatin jo’ a’in: “Nawulak chiwu naq eb’ li jun siir chik choq’ we.” Chirix li junjunq chi ch’ol aatin, kanab’eb’ chixk’asutinkil aawik’in: “Jo’kan naq laa’in tento choq’ reheb’ li jun siir chik”.

• B’icha rik’ineb’ li kok’al “Chiqara li qas qiitz’in,” B’ichleb’aal choq’ reheb’ li Kok’al, 39, ut yoob’ eek’asink-ib’ li tixk’ul rib’ rik’in li raatinul li b’ich. Patz’ reheb’ li kok’al k’a’ru naru neke’xtzol rik’in lix b’aanuhom li Kolonel chirix chan ru toowanq rik’ineb’ li qakomon.

• Kanab’eb’ li kok’al chixtusb’al rajlil li chaab’il k’a’aq re ru li neke’xb’aanu lix yuwa’eb’ malaj jalan chik komon sa’eb’ lix junkab’al choq’ reheb’. Il ru Mateo 7:12 ut kanab’eb’ li kok’al chixtusb’al reetalil li chaab’il k’a’aq re ru li naru neke’xb’aanu choq’ reheb’ lix junkab’al.

Mateo 7:24–27

Naru ninkab’lak sa’ xb’een jun kawil k’ojleb’aal naq nintaaqe li Jesus.

Roksinkil lix jaljookil ru aatin li Kolonel chirix xkab’lankil jun li ochoch sa’ xb’een li samahib’ malaj sa’ xb’een li pek naru naq chaab’ilaq a’an re xk’utb’al chiruheb’ li kok’al lix aajelil ru li k’anjelak a’ yaal jo’ li k’a’ru naqatzol.

Kok’ k’anjel naru chi b’aanumank

• B’icha rik’ineb’ li kok’al “Li ochoch sa’ xb’een li pek,” B’ichleb’aal choq’ reheb’ li Kok’al, 132, ut oksiheb’ eek’asink-ib’ li tixk’ul rib’ rik’in li raatinul li b’ich.

• Oksi Mateo 7:24 re k’utuk chirix lix jalanileb’ li winq chaab’il xna’leb’ ut li winq maak’a’ xna’leb’. Kanab’eb’ li kok’al chixb’aanunkil naq yookeb’ chixkab’lankil jun li ochoch. Chan ru naq chanchanaqo li winq wan xna’leb’?

• Kanab’eb’ li kok’al chixyiib’ankileb’ li jalam-uuch re li jaljookil ru aatin chirix li winq wan xna’leb’ ut li winq maak’a’ xna’leb’.

reetalil li k’utuk

Xk’utb’al li tzol’leb’

Kok’al ak ninqeb’

Mateo 6–7

Sa’ li aatin jultikanb’il chiru li tzuul wan li esil choq’ we.

Sa’eb’ li ch’ol a’in wan naab’al li esil li naru na’oksiman choq’ reheb’ li kok’al li nakatzoleb’. Ileb’ ru rik’in xk’oxlankileb’ li kok’al. K’a’ru li mas nawulak chawu?

Kok’ k’anjel naru chi b’aanumank

• Chajultikaheb’ li kok’al li ak yookeb’ chixtzolb’al li kixk’ut li Jesus sa’ li aatin jultikanb’il chiru li tzuul. K’a’ru li yaal najultiko’ reheb’ li xe’xtzol sa’ li xamaan xnume’?

• Tz’iib’a sa’ li pizarron junjunq li ch’ol aatin re li aatin jultikanb’il sa’ li tzuul ut junjunq chik li ch’ol aatin li moko na’el ta chaq sa’eb’ li loq’laj hu. Kanab’eb’ li kok’al chixk’eeb’al reetal b’ar wan li ch’ol aatin na’el chaq sa’ li aatin jultikanb’il chiru li tzuul ut chixwotzb’al li neke’xtzol rik’ineb’ a’an.

• Sik’ ru junjunq li raqal sa’ Mateo 6–7 li nakak’oxla naq wanq xyaalal choq’ reheb’ li kok’al. Tz’iib’aheb’ b’ar neke’el chaq li raqal chiru kok’ hu ut muqeb’ sa’ li tzoleb’aal. Kanab’eb’ li kok’al chixtawb’aleb’, chirilb’al ruheb’ li raqal ut chixch’olob’ankil k’a’ut naq eb’ li k’utum a’an aajel ru choq’ reheb’.

• Wotz jun raqal mas nawulak chawu sa’ Mateo 6–7, ut ch’olob’ k’a’ut naq nawulak chawu. Wi wan junaq raqal nawulak chiruheb’ li kok’al, kanab’eb’ chixwotzb’al k’a’ut nawulak chiruheb’ ut li neke’xtzol rik’in a’an.

• B’icha rik’ineb’ li kok’al “Chinwanq raj joʼ li Jesus,111> B’ichleb’aal choq’ reheb’ li Kok’al, 40–41, ut teekanab’ b’ichank naq texwulaq sa’ jun li ch’ol aatin li wan rilom rik’in jun li na’leb’ nak’utman sa’ Mateo 6–7 (jo’ li “sa’ chaab’ilal lee komon chetenq’a”). Tenq’aheb’ li kok’al chixk’eeb’al reetal rilom li ch’ol aatin rik’in li yookeb’ chixtzolb’al sa’eb’ li ch’ol a’an.

Mateo 6:5–13; 7:7–11

Lin Choxahil Yuwa’ tinrab’i ut tinixsume naq tintijoq.

Naq nakatzol Mateo 6:5–13; 7:7–11, k’a’ru nakak’oxla naq tento te’xtaw ru li kok’al chirix li tijok?

Kok’ k’anjel naru chi b’aanumank

• Kanab’eb’ li kok’al chirilb’al ru Mateo 6:9–13 chi kaw xyaab’eb’ xkux ut chirix a’an chixtusb’al rajlil li k’a’ru kixye li Kolonel sa’ lix tij. Chan ru nokoru chixtaaqenkil lix b’aanuhom naq nokotijok?

• B’icha rik’ineb’ li kok’al jun li b’ich chirix li tij, jo “Ma tijok xayal?” Eb’ li B’ich,  81. Tenq’aheb’ li ko’k’al chixsik’b’al sa’ li raatinul k’a’ut naq nokotijok ut eb’ li osob’tesihom li neke’chal rik’in li tijok.

• Tenq’aheb’ li kok’al chixkanab’ankil sa’ xk’a’uxleb’ Mateo 7:7; re xb’aanunkil a’an, b’aanu jun li b’atz’unk jo’ a’in: Jun li ch’ina al tixye li xb’een li aatin malaj li ch’ol aatin re li raqal ut chirix a’an tixkut li b’olotz’ re jun chik ch’ina al, ut a’an tixye li aatin jun chik malaj li ch’ol aatin.

• K’utb’esi Mateo 7:9–10 rik’ineb’ li kok’al rik’in roksinkil kok’ k’anjeleb’aal moko ch’a’aj ta xnawb’aleb’ ru. Patz’ reheb’ li ko’k’al naq te’xwotz li naxk’ut a’in chiruheb’ chirix li tijok.

• Wotz jun numsihom b’ar wi’ xe’sumeek laa tij.

Mateo 6:19–21

Naru ninsik’eb’ li junelikil b’ihomal sa’ xna’aj li ruchich’och’il b’ihomal.

Chan ru taatenq’aheb’ li kok’al li nakatzoleb’ chixk’eeb’al xnimal xloq’al li k’a’ru nawan chi junelik ut ink’a’ li k’a’ru re li ruchich’och’?

Kok’ k’anjel naru chi b’aanumank

• K’am jun li “kaxon re li b’ihomal” nujenaq rik’in k’a’ruhaq malaj jalam-uuch li neke’reetali li k’a’aq re ru naxk’e xloq’al li ruchich’och’— qayehaq li tumin malaj eb’ li b’atz’uul. Ilomaq sa’ komonil Mateo 6:19–21 ut chirix a’an patz’ reheb’ li kok’al naq tate’xtenq’a chixk’oxlankileb’ li choxahil b’ihomal li naru tixchap xna’aj li k’a’aq re ru re li ruchich’och’ li wankeb’ sa’ li kaxon.

• Kanab’eb’ li kok’al chixk’eeb’al xk’ab’a’eb’ malaj chixyiib’ankil lix jalam-uuch junjunq li k’a’aq re ru li naru nab’aanuman re “xtamresinkil … li b’ihomal sa’ choxa” (Mateo 6:20).

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al rik’ineb’ lix junkab’al li k’utum mas nawulak chiruheb’ sa’ li aatin jultikanb’il chiru li tzuul.

Xchaab’ilob’resinkil li qak’utum

Chayal xtawb’aleb’ ru li komon sa’ laa tzoleb’aal. Laa’at nakanaweb’ ru li kok’al nakatzoleb’. Maare aajelaq ru xjalb’al li na’leb’ re li tusleb’ aatin a’in re xtenq’ankileb’ chi us li nakatzoleb’ rik’in li ajb’il ru xb’aaneb’. Re xtawb’aleb’ li na’leb’ re laa tzoleb’aal, maare us rilb’al wi’chik chixjunil li kok’ k’anjel yeeb’ileb’ resil sa’ li tusleb’ aatin a’in, ut moko ka’ajwi’ ta li kok’ k’anjel yiib’anb’ileb’ choq’ reheb’ lix chihab’ li kok’al nakatzoleb’. (Chi’ilmanq Li k’utuk jo’ li Kolonel, perel 7).

perel re li kok’ k’anjel: Naru nintijok jo kixb’aanu li Jesus.