li trigo li ok re chi q’ole’k

18–24 marzo

Mateo 13; Lukas 8;  13

”Ani wan xxik, chi’ab’inq”

Eb’ li jaljookil ru aatin a’aneb’ esilal moko ch’a’aj ta xtawb’aleb’ ru li naru naxchap li rab’ihomeb’ li kok’al. Li tusleb’ aatin a’in ut Kim, Taaqehin—Choq’ reheb’ li Komon ut li Junkab’al, naru tate’xtenq’a chiroksinkileb’ lix jaljookil ru aatin li Kolonel re xk’utb’al chiruheb’ li kok’al li aajelil ru yaal.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’am junjunq li k’a’aq re ru li naru chixtenq’ankileb’ li kok’al chixjultikankil junjunq reheb’ li jaljookil ru aatin sa’ Mateo 13, jo’ jun li iyaj, jun li q’ol malaj jun li kaxon re b’ihomal. Kanab’eb’ li kok’al chixwotzb’al li najultiko’ reheb’ chirixeb’ li jaljookil ru aatin.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Mateo 13:1–23

Tento tinkawresi wib’ re xtzolb’aleb’ lix k’utum li Jesus.

Maare eb’ li kok’al toj ka’ch’ineb’ xyu’am ink’a’ te’xtaw ru chixjunileb’ li eetalil sa’ li jaljookil ru aatin re laj awinel, a’b’an naru neke’xtzol li yaal moko ch’a’aj ta xtawb’al ru li nakak’ut. Chan ru naru nakatenq’aheb’ chixtawb’al ru chi chaab’il naq sa’ li jaljookil ru aatin a’an wan rilom rik’ineb’ a’an?

Kok’ k’anjel naru chi b’aanumank

• K’ut reetalileb’ k’iila paay li ch’och’ (malaj k’uteb’ li jalam-uuch re li ch’och’) naq yookat chixk’osb’al ru Mateo 13:3–8. K’e reheb’ li junjunq chi kok’al jun li iyaj re rawb’al sa’ li ch’och’. Patz’ reheb’ li kok’al k’a’ru naru naqab’aanu re xtenq’ankil li iyaj chi k’iik. Ch’olob’ naq li qapaab’aal chirix li qaChoxahil Yuwa’ ut chirix li Jesukristo a’an jun xyaalal jo’ chanru naru naqatenq’a li “riyajil” lix nawom qach’ool chi k’iik.

• Oksi li perel re kok’ k’anjel re li xamaan a’in re xtenq’ankileb’ li kok’al chixtawb’al ru li naxch’olob’ li junjunq reetalil li ch’och’ wan resil sa’ Mateo 13 chirix li qaam. Patz’ reheb’ li kok’al chan ru naraj li Jesus naq taawanq li qaam re xtzolb’aleb’ lix k’utum.

• Il ru Mateo 13:9, 15 ut kanab’eb’ li kok’al chixk’utb’al jalan jalanq xcha’alileb’ lix junxaqalil naq te’rab’i chi yaab’asiik lix k’ab’a’. Chan ru naru naqoksiheb’ lix cha’alileb’ li qajunxaqalil a’an re xtzolb’aleb’ lix k’utum li Jesus?

Mateo 13:24–30, 36–43, 47–48

Li qaChoxahil Yuwa’ naraj naq tinsik’ ru li us.

Junjunq reheb’ lix jaljookil ru aatin li Jesus neke’xk’ut naq sa’ roso’jik li kutan, li Dios tixjacheb’ ru laj maak rik’ineb’ li tiikeb’ xch’ool. Chan ru naru nakawoksiheb’ li jaljookil ru aatin re xmusiq’ankileb’ li kok’al chixsik’b’al ru li us?

Kok’ k’anjel naru chi b’aanumank

• Kanab’eb’ li kok’al chixk’utb’esinkil li jaljookil ru aatin re li trigo ut li yib’ aj pim (chi’ilmanq Mateo 13:24–30). Ch’olob’ naq li trigo naxk’utb’esi reetalileb’ li kristiaan li neke’xsik’ ru li us, ut naq li yib’ aj pim (pim neke’sachok) naxk’utb’esi reetalileb’ li kristiaan li ink’a’ neke’xb’aanu li us. Sa’ jun kutan, li qaChoxahil Yuwa’ tixch’utub’eb’ li kristiaan tiikeb’ xch’ool re te’wanq rik’in a’an.

• Seraq’i junjunqeb’ li esil moko ch’a’aj ta xtawb’al ru chirixeb’ kok’al li yookeb’ chixsik’b’al ru li k’a’ru te’xb’aanu. Patz’ reheb’ li kok’al naq te’xye “b’aanuhom re trigo” naq eb’ li kok’al sa’ li seraq’ te’xsik’ ru li us, ut “b’aanuhom re yib’ aj pim” naq eb’ li kok’al sa’ li seraq’ te’xsik’ ru li ink’a’ us.

• K’ameb’ li jalam-uuch re lix xtoon li trigo ut kanab’eb’ li kok’al chixyiib’ankileb’ sa jalam-uuch junjunq xyaalal chan ru naru neke’wan chi tiikeb’ xch’ool.

• Yoob’ jun li b’atz’unk b’ar wi’ naq eb’ li kok’al te’xk’e chixk’ulb’aleb’ rib’ li resilal li jaljookil ru aatin re laj awinel rik’in lix ch’olob’ankil natawman sa’ Mateo 13:18–23.

Mateo 13:44–46

Lin wanjik jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an jun b’ihomal.

Chan ru naru nakawoksiheb’ lix jalam-uuch li b’ihomal ut eb’ li ch’ina-usil q’ol re xtenq’ankileb’ li kok’al chixtawb’al ru lix loq’al li wank jo’ komon re lix Iglees li Kristo?

Kok’ k’anjel naru chi b’aanumank

• Muqeb’ sa’ li tzoleb’aal lix jalam-uuch jun li kaxon re li b’ihomal ut re jun li q’ol, ut kanab’eb’ li kok’al chixtawb’aleb’. Oksiheb’ li jalam-uuch re aatenq’ankil chi k’utuk chirixeb’ li jaljookil ru aatin neke’tawman sa’ Mateo 13:44–46. K’a’ raj ru te’xk’e li kok’al re te’wanq jun xq’ol chaq’al ru malaj jun xb’ihomaleb’ sa’ jun li ch’och’? Ch’olob’ naq, wan naq naqamayeja k’a’ruhaq chaab’il re xtawb’al li k’a’ru mas chaab’il wi’chik. Ye reheb’ li kok’al k’a’ut naq li evangelio mas nim xloq’al choq’ aawe.

• K’e sa’ jun li kaxon k’iila k’a’aq re ru malaj jalam-uuch li neke’reetaliheb’ “li b’ihomal” sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, jo’eb’ li santil ochoch malaj lix Hu laj Mormon. Patz’ reheb’ li junjunq chi kok’al naq te’xsik’ ru jun li k’a’aq re ru malaj jun li jalam-uuch ut te’aatinaq chirix k’a’ut naq a’an jun li b’ihomal.

• B’ichahomaq sa’ komonil “Lix Iglees li Jesukristo,” B’ichleb’aal choq’ reheb’ li Kok’al,  48, ut patz’ reheb’ li kok’al naq te’xk’e xxik chi ab’ink re xk’eeb’al reetaleb’ li osob’tesihom naqak’ul xb’aan naq laa’o komon re li Iglees. Ch’olob’ xyaalaleb’ li osob’tesihom nakak’ul xb’aan naq laa’at komon re li Iglees.

reetalil li k’utuk

Xk’utb’al li tzol’leb’

Kok’al ak ninqeb’

Mateo 13:1–23

Tento tinkawresi li waam re xk’ulb’aleb’ lix k’utum li Jesus.

Chan ru naru nakatenq’aheb’ li kok’al chixk’eeb’al reetal lix aajelil ru lix q’unal xch’ooleb’ ut li wank chi wan rajomeb’ re naq li Jesus naru tixtzoleb’?

Kok’ k’anjel naru chi b’aanumank

• K’e reheb’ li junjunq chi kok’al naq te’ril ru jun reheb’ li kaahib’ paay chi ch’och’ sa’ Mateo 13:4–8. Kanab’eb’ chixsik’b’al ut chixwotzb’al li k’a’ru nak’ulman rik’in li iyaj sa’ lix paay li ch’och’ li xe’ril resil. Chan ru naq li qaam naru nawan jo’ li junjunq paay chi ch’och’? (chi’ilmanq Mateo 13:19–23).

• K’e reheb’ li junjunq chi kok’al wiib’ li iyaj ut kanab’eb’ chirawb’al sa’ li q’unil ch’och’ ut sa’ jun siir li pek. B’arwan reheb’ li iyaj a’an naru taak’iiq chi us? Chan ru naru naqanaw chi yaal naq li qaam chanchanaq li q’unil ch’och’ re naq tooruuq chixk’ulb’aleb’ lix k’utum li Kolonel?

• Kanab’eb’ li kok’al chirilb’al ru Mateo 13:9–17. Yiib’ xjalam-uuch jun li xsa’ uhej, jun li xik ut jun li aamej sa’ li pizarron. Chan ru naqoksiheb’ lix cha’alileb’ li qajunxaqalil a’an re xtzolb’aleb’ lix k’utum li Jesus?

Mateo 13:24–30, 36–43

Naru ninsik’ ru li us, us ta li wankeb’ sa’ insutam ink’a’ neke’xb’aanu.

Naq nakawil ruheb’ li raqal a’an rik’in xk’oxlankileb’ li kok’al, k’a’ru li musiq’anb’il na’leb’ nakak’ul?

Kok’ k’anjel naru chi b’aanumank

• Kanab’eb’ li kok’al chixyiib’ankil li jalam-uuch reheb’ li jalan jalanq reetalileb’ li jaljookil ru aatin re li trigo ut li yib’ aj pim, li natawman sa’ Mateo 13:24–30, ut chixwotzb’aleb’ lix jalam-uuch sa’ li tzoleb’aal. Patz’ reheb’ naq te’xk’e xk’ab’a’eb’ lix jalam-uucheb’ rik’in lix ch’olob’ankil li jaljookil ru aatin li natawman sa’ Mateo 13:36–43. Ch’olob’ naq li yib’ aj pim a’an jun li pim nasachok.

• Wi naru, k’ut jun li jalam-uuch re li trigo ut li yib’ aj pim. Ch’olob’ naq li trigo ut li yib’ aj pim te’k’iiq sa’ komonil toj sa’ xraqik li ruchich’och’. A’an naxk’ut chiqu naq wanko rik’in li k’a’ru chaab’il ut rik’in li ink’a’ us li wan sa’ qasutam, ut tento naq taqasik’ ru li k’a’ru us. Patz’ reheb’ li kok’al naq te’xwotz chan ru naru te’xnaw b’ar wan li us ut li ink’a’ us.

Mateo 13:44–46

Lin wanjik jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an jun b’ihomal.

Ma neke’xk’e reetal li kok’al li nakatzoleb’ naq lix wanjikeb’ jo’ komon re lix Iglees li Jesukristo a’an jun b’ihomal nim xloq’al? Maare eb’ li jaljookil ru aatin sa’ Mateo 13:44–46 naru chi tenq’ank reheb’.

Kok’ k’anjel naru chi b’aanumank

• Kanab’eb’ li kok’al chirilb’al ru xjuneseb’ Mateo 13:44–46 ut chixseraq’inkileb’ li jaljookil ru aatin rik’ineb’ ajwi’ li raatineb’ re jun chik li komon sa’ li tzoleb’aal.

• Set naab’al li sirso re xk’utb’al reetalileb’ li kok’ tumin ut k’eheb’ sa’ jun li kaxon re b’ihomal. Kanab’eb’ li kok’al chixsik’b’al ru jun li kok’ tumin ut chixyiib’ankil jun li jalam-uuch malaj chixtz’iib’ankil chiru a’an jun li k’a’aq re ru li mas nawulak chiruheb’ chirix li wank jo’ komon re li Iglees. Patz’ reheb’ li kok’al naq te’wotz li xe’xk’e chiru lix kok’ tumineb’.

• Kanab’ jun li komon re li teep chixwotzb’al resilal lix jalajik xch’ool rik’ineb’ li kok’al ut chixyeeb’al li k’a’ru kixmayeja re ok sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixtzolb’aleb’ lix junkab’aleb’ chirix jun reheb’ li jaljookil ru aatin li xe’xtzol sa’ li Tzoleb’aal reheb’ li Kok’al.

Xchaab’ilob’resinkil li qak’utum

Nawulak chiruheb’ li kok’al xwotzb’al li k’a’ru yookeb’ chixtzolb’al. Us ta toj kok’eb’, naru neke’xkawob’resi li komon sa’eb’ lix junkab’al. Waklesiheb’ xch’ool chixwotzb’al rik’ineb’ lix junkab’al li k’a’ru neke’xtzol sa’ li Tzoleb’aal reheb’ li Kok’al. (Chi’ilmanq Li k’utuk jo’ li Kolonel, perel 30).

Perel re kok’ k’anjel: Tento tintzoloq re naq kawresib’ilaqin