li Jesus naq kixk’ojob’ laj Pedro

11-17 marzo

Mateo 10-12; Markos 2; Lukas 7; 11

“Eb’ li kab’laju a’in ke’taqlaak xb’aan li Jesus”

Naq nakawil Mateo 10-12; Markos 2; ut Lukas 7; 11, taak’uleb’ lix musiq’anb’il na’leb’ li Santil Musiq’ej li taatenq’anq aawe chixkawresinkil aawib’. Eb’ li musiq’anb’il na’leb’ a’an, rik’in ajwi’ Kim, Taaqehin—Choq’ reheb’ li Komon ut li Junkab’al ut li tusleb’ aatin a’in, neke’ru chatenq’ankil rik’in lix kawresinkil aawib’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Waklesiheb’ xch’ool li kok’al chixwotzb’al chan ru naru neke’xsantob’resi li hilob’aal kutan.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Mateo 10:1–10

Li Jesus kixb’oqeb’ Kab’laju chi Apostol ut kixk’e xwankilaleb’ re xk’eeb’al chi uxmank lix k’anjel.

Ma neke’xnaw li kok’al nakatzoleb’ naq wankeb’ Kab’laju chi Apostol sa’ li qakutan? Chan ru naru nakawoksiheb’ li raqal a’an re xk’utb’al chiruheb’ lix aajelil ruheb’ li apostol sa’eb’ li kutan a’in ut li k’a’ru b’oqb’ileb’ chixb’aanunkil?

Kok’ k’anjel naru chi b’aanumank

• K’os ru Mateo 10:1–10 rik’ineb’ aatin moko ch’a’aj ta xtawb’aleb’ ru. (Chi’ilmanq Cristo ordena a los apóstoles, Libro de obras de arte del Evangelio,  38). Ch’olob’ naq li Jesus naxb’oqeb’ li apostol re tenq’ank chixwaklesinkil lix Iglees.

• Kanab’eb’ li kok’al chirajlankileb’ li apostol sa’ li jalam-uuch Cristo ordena a los apóstoles (Libro de obras de arte del Evangelio, ajl 38) ut sa’ jun li jalam-uuch reheb’ li Kab’laju chi Apostol reheb’ li qakutan (chi’ilmanq LDS.org malaj li revista Liahona li puktesinb’il wi’ li jolomil ch’utub’aj-ib’ xnume’). Ch’olob’ naq sa’eb’ li kutan a’in wankeb’ Kab’laju chi Apostol, jo sa’ lix kutankil li Jesus.

• Muqeb’ li jalam-uuch reheb’ li apostol re li kutan a’in sa’ li tzoleb’aal (naru nakataweb’ a’an sa’ li revista Liahona li puktesinb’il wi’ li jolomil ch’utub’aj-ib’ xnume’). Kanab’eb’ li kok’al chixtawb’aleb’ li jalam-uuch ut aatinan b’ayaq rik’ineb’ chirix li junjunq chi apostol (chi’ilmanq “ Conoce a los profetas y apóstoles de la actualidad” sa’ LDS.org).

• Kanab’ jun li ch’ina al chixchapb’al sa’ iq’ jun li jalam-uuch re li Xb’eenil Awa’b’ejil ut jun li jalam-uuch re lix Molameb’ li Kab’laju chi Apostol. Patz’ re jun li ch’ina al naq tixb’eresi xkomoneb’ li kok’al chire li tzoleb’aal toj reetal naq te’wulaq chixk’atq jun lix jalam-uuch li Jesus. Ch’olob’ xyaalal naq eb’ li profeet ut eb’ li apostol nokohe’xb’eresi rik’in li Jesukristo.

• Wotz lix nawom aach’ool chirixeb’ lix apostol li Qaawa’.

Lix Molameb’ li Kab’laju chi Apostol

Eb’ li Kab’laju chi Apostol neke’xk’e chi uxmank lix k’anjel li Qaawa’ sa’eb’ li kutan a’in.

Mateo 11:28–30

Li Jesus tinixtenq’a naq yooqin chi xik rik’in a’an.

Eb’ li kok’al naru neke’reek’a li tuqtuukilal rik’in xnawb’al naq li Jesus tixtenq’aheb’ rik’ineb’ li riiq naq neke’xsik’ a’an.

Kok’ k’anjel naru chi b’aanumank

• Il ru Mateo 11:28–30 ut k’ut jun li jalam-uuch reheb’ li b’ooyx sa’ li tusleb’ aatin re li xamaan a’in re Kim, Taaqehin—Choq’ reheb’ li Komon ut li Junkab’al. Ch’olob’ naq eb’ li b’ooyx b’ak’b’ookeb’ rik’in che’ naru neke’xkelo k’iila aalil chiru wi’chik li neke’xkelo raj chi jachjookeb’ ru. Ch’olob’ xyaalal naq wi naqeek’a xrahil qach’ool, naq wan qak’a’uxl malaj naq wan li qaxiw, naru naqasik’ li Jesus ut a’an tooxtenq’a.

• Patz’ re jun li ch’ina al naq tixtaqsi jun li k’a’aq re ru jwal aal. Naq ch’a’ajaq chiru, yeechi’i laa tenq’ re. Chan ru nokoxtenq’a li Jesus chixb’aanunkil li k’a’aq re ru ch’a’aj? Ma ak reek’ahomeb’ li kok’al jun sutaq lix tenq’ li Jesus?

Mateo 12:1–13

Naru ninsantob’resi li hilob’aal kutan.

Chan ru naru naq laa’at naru nakatzoleb’ li kok’al chirix li hilob’aal kutan ut k’a’ut naq naqasantob’resi?

Kok’ k’anjel naru chi b’aanumank

• Il ru Mateo 12:10–13 chi kaw xyaab’ aakux. Kanab’eb’ li kok’al chi xaqliik ut chi chunlaak rajlal sut naq laa’at taaye “hilob’aal kutan,” ut ka’suti rik’ineb’ li ch’ol aatin: “Chaab’il xb’aanunkil li us sa’eb’ li hilob’aal kutan” (Mateo 12:12). K’a’ru neke’xk’oxla a’an naq naraj naxye?

• K’ut jun li ajleb’aal kutan chiruheb’ li kok’al ut k’ut li hilob’aal kutan chi sa’. K’a’ru naqab’aanu sa’ xkomoneb’ chik li kutan sa’ li xamaan? K’a’ru naru naqab’aanu chiru li hilob’aal kutan re naq jalanaq chiruheb’ chik xkomon li kutan? (chi’ilmanq Isaias 58:13–14).

• Patz’ reheb’ li kok’al naq te’xyiib’ sa’ jalam-uuch eb’ li chaab’il ka’a’q re ru naru neke’xb’aanu sa’ li hilob’aal kutan (il li perel re kok’ k’anjel re li xamaan a’in).

• Kanab’eb’ li kok’al chixk’oxlankileb’ eek’asink-ib’ li taatenq’anq reheb’ chixjultikankil xyaalal lix kawresinkileb’ rib’ re li hilob’aal kutan naq yooqex chixb’ichankil “Sabado, jun kutan chaabʼil,” B’ichleb’aal choq’ reheb’ li Kok’al, 105.

• Yiib’ xjalam-uuch li sa’ uhej, li xik, jun li xuk-e, ut eb’ li uq’ej sa’ li pizarron. Patz’ reheb’ li kok’al naq te’xye aawe k’a’ru naru neke’xb’aanu li junjunq xcha’alileb’ li junxaqalil a’in re xsantob’resinkil li hilob’aal kutan.

reetalil li k’utuk

Xk’utb’al li tzol’leb’

Kok’al ak ninqeb’

Mateo 10:1–10; Markos 3:13–19

Eb’ li Kab’laju chi Apostol naru nikine’xtzol chirix li Jesus.

Chan ru naq lix tzolb’al rixeb’ li Kab’laju chi Apostol sa’ lix kutankil li Kristo naru chixtenq’ankileb’ li kok’al chixtawb’al ru chi us li k’a’ru neke’xb’aanu li Kab’laju chi Apostol sa’eb’ li kutan a’in?

Kok’ k’anjel naru chi b’aanumank

• K’uteb’ li jalam-uuch reheb’ li Kab’laju chi Apostol sa’ lix kutankil li Jesus ut re li qakutankil (chi’ilmanq Cristo ordena a los apóstoles, Libro de obras de arte del Evangelio, ajl 38, ut jun liahona puktesinb’il wi’ li jolomil ch’utub’aj-ib’ xnume’). Patz’ reheb’ li kok’al naq te’ril ru Mateo 10:1–10 ut Markos 3:14–15 re xsik’b’al k’a’ru neke’xb’aanu li apostol.

• Kanab’eb’ junjunq li kok’al chi wulak chi kawresinb’ileb’ re xwotzb’al jun seraq’ lix yehom jun reheb’ li yo’yookil apostol. Chan ru naq eb’ li yo’yookil apostol nokohe’xtenq’a chi wulak mas wi’chik jo’ li Kolonel?

• Tz’iib’a lix k’ab’a’eb’ li apostol re li kutan a’in chiru kok’ setb’il hu. Kanab’eb’ li kok’al chixtusb’al lix k’ab’a’eb’ rik’in lix jalam-uucheb’ (LDS.org). Li ch’ina k’anjel a’in naru naka’sutiman k’iila sut.

• Wotz rik’ineb’ li kok’al naab’al reetalileb’ lix nawom xch’ooleb’ li apostol re li kutan a’in chirix li Kristo (chi’ilmanq li aatin re li jolomil ch’utub’aj-ib’ toje’ xnume’ malaj “Li Yo’yookil Kristo: Lix Ch’olob’ahomeb’ li Apostol,” Liahona, abril re 2000, 2).

• Tenq’aheb’ li kok’al chixkanab’ankil sa’ xk’a’uxleb’ Eb’ lix Raqalil li Paab’aal 1:6.

Mateo 11:28–30

Li Jesus tinixtenq’a naq yooqin chi xik rik’in a’an.

Chan ru naru nakatenq’aheb’ li kok’al chixtawb’al ru naq li Kolonel tixk’e xhilaaleb’ chiruheb’ lix ch’a’ajkilal a’ yaal wi’ yooqeb’ chi xik rik’in a’an?

Kok’ k’anjel naru chi b’aanumank

• Kanab’eb’ li kok’al chixwotzb’al jun li hoonal b’ar wi’ xe’wan xk’a’uxl malaj xxiw chirix k’a’ruhaq. Kanab’eb’ chixsik’b’al sa’ Mateo 11:28–30 li na’leb’ naru chi tenq’ank reheb’ sa’eb’ li hoonal jo’eb’ a’an.

• Kanab’eb’ li kok’al chixyiib’ankil sa’ jalam-uuch li k’a’ru yookeb’ chixb’aanunkil re chalk chiru li Kristo ut tzolok chirix a’an. Li xkaa xraqalil li paab’aal naru naxk’e xna’leb’eb’.

Mateo 12:1–14

Li hilob’aal kutan a’an jun li kutan re xb’aanunkil chaab’il k’a’aq re ru li tinixnach’ob’resi chi us rik’in li Dios.

Eb’ li kok’al li nakatzoleb’ te’kawob’resiiq naq laa’at taajultika li rajom ut li rosob’tesihom lix santob’resinkil li hilob’aal kutan.

Kok’ k’anjel naru chi b’aanumank

• Kanab’ jun li ch’ina al chixb’aanunkil rib’ jo’ li winq li kik’irtesiik li ruq’ xb’aan li Kolonel (chi’ilmanq Mateo 12:10–13). Jun chik li ch’ina al naru na’aatinak rik’in, chirix li numsihom a’an.

• Ilomaq ru sa’ komonil Mateo 12:12. B’ar wan junjunq reheb’ li chaab’il k’a’aq re ru li naru naqab’aanu sa’ li hilob’aal kutan? Kanab’eb’ li kok’al chixyiib’ankil lix na’leb’eb’ sa’ jalam-uuch sa’ li perel re kok’ k’anjel re li xamaan a’in, chixsetb’aleb’ lix cha’alil ut te’xjali ru jorb’a k’a’uxlej ut te’xtusub’ ru.

• Muqeb’ li jalam-uuch reheb’ li kristiaan li yookeb’ chixb’aanunkil k’a’ruhaq li naxk’ut lix rahomeb’ choq’ re li qaChoxahil Yuwa’ sa’ li hilob’aal kutan. Patz’ reheb’ li kok’al naq te’xtaw li jalam-uuch ut naq te’xwotz chan ru naq xb’aanunkil li k’a’aq re ru li wan sa’eb’ li jalam-uuch naxk’ut li qarahom choq’ re li Dios.

• K’e reheb’ li junjunq chi kok’al jun li b’oolx re te’xnujob’resi rik’in chaab’il na’leb’ li naru chi b’aanumank sa’ li hilob’aal kutan. Naru neke’xtaw junjunq li na’leb’ sa’ “La observancia del día de reposo” sa’ Para la Fortaleza de la Juventud, 30–31.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al rik’ineb’ lix junkab’al li na’leb’ re xsantob’resinkil li hilob’aal kutan.

Xchaab’ilob’resinkil li qak’utum

Waklesiheb’ xch’ool chi oxloq’ink. Tenq’aheb’ li kok’al chixtawb’al ru naq jun xcha’al aajel ru re li oxloq’ink a’an xk’oxlankil li qaChoxahil Yuwa’ ut li Jesukristo. Naru nakajultika reheb’ li kok’al naq te’oxloq’inq naq neke’b’ichan malaj naq neke’xtz’uyi jun li b’ich malaj naq neke’xk’ut jun lix jalam-uuch li Jesus.

perel re kok’ k’anjel: Tinsantob’resi li hilob’aal kutan