Wank li k’irtesink sa’ xxik’, xb’aan laj Jon McNaughton

4-10 marzo

Mateo 8-9; Markos 2-5

“Laa paab’aal xk’irtesink aawe”

Re xtikib’ankil, il ru Mateo 8–9 ut Markos 2–5. Kim, Taaqehin—Choq’ reheb’ li Komon ut li Junkab’al naru chatenq’ankil chixtawb’al ruheb’ li ch’ol a’an, ut li tusleb’ aatin a’in naru naxk’eheb’ laa na’leb’ re li k’utuk.

Xtz’iib’ankil li nakak’oxla

Xkanab’ankileb’ chi wotzok

Patz’ reheb’ li kok’al naq te’xwotz jun seraq’ b’ar wi’ li Jesus kixb’aanu jun li sachb’a-ch’oolej (chi’ilmanq xtusulal li sachb’a-ch’oolej sa’ li tusleb’ aatin re li xamaan a’in sa’ Kim, Taaqehin—Choq’ reheb’ li Komon ut li Junkab’al). Naru ajwi’ taak’uteb’ li jalam-uuch wan rilom rik’in a’an sa’ (chi’ilmanq Libro de obras de arte del Evangelio, ajl 40, 41, malaj LDS.org).

Xk’utb’al li tzol’leb’

Kok’al toj ka’ch’ineb’ xyu’am

Mateo 8–9; Markos 2; 5

Li Jesus wan lix wankil re xb’aanunkil li sachb’a-ch’oolej.

Naq yookat chirilb’al chirixeb’ li sachb’a-ch’oolej re k’irtesink kixb’aanu li Kolonel, tz’il rix b’ar wan li sachb’a-ch’oolej taawotz. Chan ru naru nakatenq’aheb’ li kok’al li nakatzoleb’ chixtawb’al ru lix k’anjel li paab’aal sa’eb’ li sachb’a-ch’oolej kixb’aanu li Jesus?

Kok’ k’anjel naru chi b’aanumank

• Wotz li seraq’ re li winq sik li natawman sa’ Markos 2:1–12. Wi nakawaj aatenq’, sik’ sa’ “Ch’ol 23: Li winq ink’a’ naru chi b’eek,” Eb’ li Esilal sa’ li Ak’ Chaq’rab’, 57–58, malaj li video sa’ (LDS.org). Ch’olob’ chiruheb’ li kok’al naq jun li winq sik ink’a’ naru chi b’eek. Tenq’aheb’ chixk’eeb’al reetal naq li winq a’an kik’irtesiik ut kikuye’ xmaak xb’aan li Kolonel.

• Kanab’eb’ li kok’al chixyeeb’al naq yookeb’ chi “ajk”, jo’ lix rab’in laj Jairo, naq yooqat chirilb’al ru Markos 5:22–23, 35–43. Tenq’aheb’ chixtawb’al ru naq li Jesus kixk’uub’ li b’e re naq naru taawanq qayu’am chi junelik.

• Il ru Markos 5:34. Tenq’aheb’ li kok’al chixkanab’ankil sa’ xk’a’uxleb’ li ch’ol aatin “Laa paab’aal xk’irtesink aawe,” maare rik’in xk’eeb’al re li junjunq chi kok’al jun li aatin ut chirix a’an xpatz’b’al reheb’ li kok’al naq te’xye li aatin wan rik’ineb’ chi tustu. Ma nekenaw ru anihaq li kik’irtesiik naq yaj chaq?

• Patz’ reheb’ li kok’al naq te’xmutz’ li ruheb’ ut tate’rab’i naq yookat chirilb’al ru Mateo 9:27–30. Naq taawil ru naq li Jesus kixk’irtesiheb’ li winq mutz’eb’, kanab’eb’ li kok’al chixteeb’aleb’ li ru. Chan raj ru te’reek’a li kok’al wi ta li Jesus kik’irtesin reheb’?

• Kanab’eb’ li kok’al chi aatinak chirix jun li hoonal naq yajeb’ chaq. Seraq’i jun reheb’ li resilal naq li Jesus kixk’irtesiheb’ li yaj ut jultika xyaalal naq lix wankilal li Jesus naru chi k’irtesink ut chi osob’tesink naq nokotijok ut naq naqak’ul li osob’tesihom re li tijonelil. Ch’olob’ naq us ta wan naq li Qaawa ink’a’ naxk’e qe li sachb’a-ch’oolej naqaj laa’o, a’an nokoxra ut naxnaw k’a’ru li aajel ru choq’ qe. Tixk’e xk’ojob’ankil li qach’ool li naqaj ru.

Markos 4:35–41

Naq naweek’a inxiw malaj wankin sa’ xiwxiw, li Jesus naru nikinixtenq’a chireek’ankil tuqtuukilal.

Li seraq’ naq li Jesus kixch’anab’ li kaq-sut-iq’ naru chixtenq’ankileb’ li kok’al chixnawb’al naq a’an naru chixk’eeb’al xtuqtuukilaleb’ naq neke’reek’a xxiw.

Kok’ k’anjel naru chi b’aanumank

• Tenq’aheb’ li kok’al chixk’oxlankil naq wankeb’ sa’ jun li jukub’ naq yookat chirilb’al ru Markos 4:35–41 (Chi’ilmanq ajwi’ “Ch’ol 21: Li Jesus naxtaqlaheb’ li iq’ ut eb’ lix b’oolam li palaw,” Eb’ li Esilal sa’ li Ak’ Chaq’rab’, 53, malaj li video sa’ LDS.org). Patz’ reheb’ li kok’al naq te’xch’olob’ chan raj ru xe’reek’a wi ta xe’wan raj aran. Jo’q’e reek’ahomeb’ xxiw li kok’al? Chan ru xe’xtaw li tuqtuukilal?

• Kanab’eb’ li kok’al chixb’aanunkil lix yaab’ jun li kaq-sut-iq’ ut chixkanab’ankil naq anihaq tixye “Maqtchoqink, ch’anaqat.” Ch’olob’ xyaalal naq jo’ li Jesus naru naxk’e qatuqtuukilal naq wan li kaq-sut-iq’ chirix kab’l, naru naxk’e li tuqtuukilal sa’ li qaam naq ra li qach’ool.

• K’oxlaheb’ li eek’asink-ib’ li tixk’ul rib’ rik’in li rox raqal re li b’ich “Ye we resil li Jesus,” B’ichleb’aal choq’ reheb’ li Kok’al,  36.

Li Kristo naxch’anab’ li kaq-sut-iq’, xb’aan laj Robert T. Barrett.

Xk’utb’al li tzol’leb’

Kok’al ak ninqeb’

Markos 2; 5

Li Jesus naru naxk’e chi uxmank li sachb’a-ch’oolej sa’ lin yu’am naq wan lin paab’aal chirix a’an.

Li Jesus kixk’e chi uxmank naab’al li sachb’a-ch’oolej chiru lix k’anjel sa’ li ruchich’och’. Chan ru naru nakatenq’aheb’ li kok’al chixk’eeb’al reetal naq eb’ li sachb’a-ch’oolej neke’uxman sa’eb’ li qakutan?

Kok’ k’anjel naru chi b’aanumank

• Patz’ reheb’ li kok’al naq te’xsik’ ru jun reheb’ li sachb’a-ch’oolej a’in re naq te’ril ru chirix a’an ut te’xyiib’ jun li jalam-uuch: Markos 2:1–12; Markos 5:22–23, 35–43; malaj Markos 5:24–34. Kanab’eb’ li kok’al chixch’olob’ankileb’ lix jalam-uuch chiruheb’ li rech komonil. K’a’ru neke’xtzol chirix li Jesus sa’eb’ li seraq’ a’in?

• Patz’ reheb’ li kok’al naq te’xk’utb’esi li neke’reek’a naq yajeb’, naq raheb’ xch’ool, naq wankeb’ xxiw malaj wankeb’ xk’a’uxl. Chan ru nokoxtenq’a li Jesus naq wankeb’ li qeek’ahom a’an? Ch’olob’ xyaalal naq li Jesus naru chixtenq’ankileb’ li kok’al sa’eb’ chixjunil li hoonal a’an.

• Kanab’eb’ li kok’al chixwotzb’al xnumsihomeb’ naq eb’ a’an malaj anihaq chik neke’xnaw ru xk’ul jun li osob’tesihom re li tijonelil. Chan ru kik’irtesiik malaj ki’osob’tesiik li kristiaan a’an?

Mateo 8–9; Markos 2; 5

Naru nink’utb’esi lin rahom choq’ reheb’ li kristiaan jo’ kixb’aanu li Jesus.

Li Jesus kixk’ut xnimal xrahom naq kixk’irtesiheb’ li yaj ut li tawasinb’il. Tz’il rix chan ru naru nakak’ut chiruheb’ li kok’al chan ru xk’utb’aleb’ lix toq’ob’ahom choq’ reheb’ li kristiaan wankeb’ rajb’al ru.

Kok’ k’anjel naru chi b’aanumank

• Sik’ ru jun malaj wiib’ oxib’ paay ruheb’ li sachb’a-ch’oolej kixb’aanu li Jesus re naq taawil wi’chik ru rik’ineb’ li kok’al, jo’eb’ li neke’tawman sa’ Markos 2:1–12; Markos 5:22–23, 35–43; malaj Markos 5:24–34. (Chi’ilmanq ajwi’ eb’ li video “Jesús perdona pecados y sana a un paralítico,” “Jesús resucita a la hija de Jairo” ut “Jesús sana a una mujer de fe” sa’ LDS.org). Kanab’eb’ li kok’al chixwotzb’al resil jun li hoonal naq xe’xtenq’a anihaq li wan rajb’al ru ut li k’a’ru xe’reek’a.

• K’ut li video “El abrigo” (LDS.org). Chan ru naq eb’ li kok’al sa’ li video ke’xtaaqe lix b’aanuhom li Jesus? Kanab’eb’ li kok’al chixwotzb’al jalan chik hoonal naq anihaq wan xmajelal. K’a’ru naru naqab’aanu re xtenq’ankileb’?

• Jultika reheb’ li kok’al naq xtenq’ankileb’ li komon a’an xcha’aleb’ lix sumwank re li kub’iha’ (chi’ilmanq Mosiah 18:8–10; Alma 34:28).

Mateo 8:23–27; Markos 4:35–41

Naq naweek’a inxiw malaj wankin sa’ xiwxiw, li Jesus naru nikinixtenq’a chireek’ankil tuqtuukilal.

Aajel ru naq eb’ li kok’al te’xnaw naq li Kolonel naru naxk’e xtuqtuukilaleb’ naq neke’tawman sa’ lix kaq-sut-iq’ li yu’am—anajwan ut chalel.

Kok’ k’anjel naru chi b’aanumank

• Patz’ re jun li ch’ina al naq taaroksi Markos 4:35–41 ut li jalam-uuch Jesús calma la tempestad (Libro de obras de arte del Evangelio, ajl 40) re xseraq’inkil naq li Jesus kixch’anab’ li kaq-sut-iq’. Patz’ reheb’ li kok’al naq te’xch’olob’ chan raj ru xe’reek’a wi ta xe’wan raj aran.

• Kanab’eb’ li kok’al chixwotzb’al li numsihom b’ar wi’ xe’reek’a li tuqtuukilal chirix naq xe’tijok re xpatz’b’al lix tenq’. Jultika reheb’ naq li tuqtuukilal a’an nachal rik’in li Kolonel.

• B’icha rik’ineb’ li kok’al “Qaawa’, xwakli chik li iq’,”, Eb’ li b’ich,  59, ut kanab’eb’ chi hasb’ak naq te’xb’ichaheb’ li aatin “Chexch’anaaq, chexch’anaaq.”

• K’e reheb’ li junjunq chi kok’al jun li ch’ina hu setb’il jo’ li choql rik’in hab’ ut patz’ reheb’ naq te’xtz’iib’a chiru jun li yale’k li taawanq raj re anihaq. K’eheb’ chixjunileb’ li choql sa’ li pizarron, chiru jun lix jalam-uuch li Kolonel. Kanab’ jun li ch’ina al chirisinkil jun reheb’ li choql ut chixsik’b’al xyaalal chan raj ru nokoru chixtenq’ankil anihaq li yalb’il rix chi jo’kan chixtawb’al li tuqtuukilal. Naq ak xe’risi chixjunileb’ li choql, ch’olob’ xyaalal lix wankilal li Kolonel re xch’anab’ankileb’ li kaq-sut-iq’ sa’ li qayu’am.

Xb’oqb’aleb’ chi tzolok sa’ kab’l

Tenq’aheb’ li kok’al chixtz’iib’ankil resil jun li k’anjel li te’xb’aanu choq’ re anihaq chiru li xamaan a’in.

Xchaab’ilob’resinkil li qak’utum

Eb’ li kok’al mas aj ajeb’ ru Maare wan naq taaweek’a naq lix metz’eweb’ li kok’al a’an jun risinkileb’ li rab’ib’aal chiru li tzolok. A’b’anan, naru nakawoksi lix metz’eweb’ rik’in xb’oqb’aleb’ chixk’utb’esinkil jun seraq’ malaj reek’asinkileb’ rib’ jo’ chanru naxk’ul rib’ rik’in jun li b’ich malaj jun li raqal sa’eb’ li loq’laj hu. (Chi’ilmanq Li k’utuk jo’ li Kolonel, 25.)