Wank li k’irtesink sa’ xxik’, xb’aan laj Jon McNaughton

4–10 marzo

Mateo 8–9; Markos 2–5

“Laa paab’aal xk’irtesink aawe”

Naq nakawil sa’ Mateo 8–9 ut Markos 2–5, k’e reetal li na’leb’ naxk’e aawe li Santil Musiq’ej. Naru taatz’iib’a li na’leb’ nakak’ul ut li k’a’ru naru taab’aanu re xk’anjelankil li na’leb’ a’an.

Xtz’iib’ankil li nakak’oxla

Ink’a’ naru rilb’al li esilal sa’ li Ak’ Chaq’rab’ chi ink’a’ taasachq aach’ool rik’in li k’iila esil chirix li Kolonel naq kixk’irtesiheb’ li yaj ut li ani rahob’tesinb’il—toj jo’ li ixq li wan tiq chirix toj li xqa’al li ke’xye naq kamenaq. K’a’ru xyaalalileb’ choq’ qe laa’o li sachb’a-ch’oolej a’in chirix xk’irtesinkil li yajel? Jun lix yaalalil a’an naq li Jesukristo a’an li Ralal li Dios, ut wan xwankil sa’ xb’een chixjunil li k’a’aq re ru, ut sa’ xb’een ajwi’ lix rahil li qatib’el ut li qamajelal. A’ut jun chik xyaalalil choq’ qe natawman sa’ li raatin li Jesus choq’ reheb’ laj tz’iib’ li ink’a’ neke’paab’an: “Re naq teenaw naq li K’ajolb’ej wank xwankil sa’ ruchich’och’ re kuyuk sachok maak” (Markos 2:10). Chi jo’kan, naq nakawil resil anihaq li mutz’, malaj jun li saqlep rix li nak’irtesiik, naru nakak’oxla li k’irtesiik—re musiq’ej jo’ ajwi’ re tz’ejwalej—li naru nakak’ul rik’in li Kolonel, ut naru nakawab’i a’an chixyeeb’al aawe, “Laa paab’aal xk’irtesink aawe” (Markos 5:34).

Li na’leb’ re xtzolb’aleb’ li loq’laj hu aajunes

Mateo 8–9; Markos 2; 5

Li Kolonel naru chixk’irtesinkileb’ li rahilal ut li yajel.

Sa’eb’ li ch’ol a’in wankeb’ k’iila esil chirix li k’irtesink kixb’aanu li Kolonel rik’in sachb’a-ch’oolej. Naq nakatzoleb’ li k’irtesink a’in, k’e reetal ma wan li esilal choq’ aawe. Naru taapatz’ aawib’: K’a’ru naxk’ut li esilal a’in chirix li paab’aal? K’a’ru naxk’ut li esilal a’in chirix li Kolonel? K’a’ru naraj li Dios naq tintzol rik’in li sachb’a-ch’oolej a’in?

• Jun winq saqlep rix (Mateo 8:1–4)

• Jun xmoos lix jolomileb’ laj pleet (Mateo 8:5–13)

• Lix na’ rixaqil laj Pedro (Mateo 8:14–15)

• Wiib’ li mutz’ (Mateo 9:27–31)

• Jun winq sik (Markos 2:1–12)

• Jun winq li wan tz’aj aj musiq’ej rik’in (Markos 5:1–20)

• Lix rab’in laj Jairo (Markos 5:22–23, 35–43)

• Jun ixq li wan relik lix kik’el (Markos 5:24–34)

Chi’ilmanq ajwi’ Dallin H. Oaks, “Sanar a los enfermos,” Liahona, mayo 2010, 47–50.

Li Jesus yoo chixk’irtesinkileb’ li yaj, xb’aan laj Joseph Brickey, jo’ chanru b’onb’il xb’aan laj Heinrich Hofmann

Mateo 8:5–13; Markos 5:24–34

Naru ninsik’ intenq’ankil rik’in li Dios, us ta naweek’a naq moko ink’ulub’ ta.

Li jolomil aj pleet a’an aj Gentil, ut kixk’oxla naq moko xk’ulub’ ta naq taa’ok li Kolonel sa’ rochoch. Li ixq li yoo chi elk xkik’el, k’oxlanb’il naq tz’aj ru, ut tz’eqtaananb’il sa’ xyanqeb’ laj Judio. A’b’anan li Kolonel kirosob’tesiheb’ xkab’ichaleb’. K’a’ru nakatzol rik’ineb’ li wiib’ chi esilal a’in chirix xsik’b’al aatenq’ankil rik’in li Qaawa’?

Mateo 8:18–22; Markos 3:31–35

Li wank choq’ xtzolom li Jesukristo naraj naxye naq nink’e a’an xb’een wa sa’ lin yu’am.

Sa’eb’ li raqal a’in, li Jesus kixk’ut naq re toowanq choq’ xtzolom, tento taqak’e a’an xb’een wa sa’ li qayu’am, us ta wan naq taa’ajmanq ru xmayejankil li k’a’aq chik re ru wan xloq’al choq’ qe. Naq nakawileb’ li raqal a’in, k’oxla chan ru naq wankat jo’ xtzolom li Kristo. K’a’ut naq eb’ li tzolom tento naq taawanq li Kolonel xb’een wa sa’ xyu’ameb’? K’a’ru taa’ajmanq ru naq taamayeja re tatruuq chixk’eeb’al li Jesus xb’een wa sa’ laa yu’am? (Chi’ilmanq ajwi’ Lukas 9: 57–62.)

Mateo 8:23–27; Markos 4:35–41

Li Jesukristo wan xwankil chixk’amb’al chaq li tuqtuukilal sa’ xyiheb’ li kaq-sut-iq’ re li yu’am a’in.

Ma xaweek’a jun sutaq jo’ ke’reek’a lix tzolom li Jesus sa’ li kaq-sut-iq’ chiru palaw, naq ke’ril li ha’ chi ok sa’ li jukub’ ut ke’xpatz’, “At Tzolonel! Ma maak’a’ nakawaj wi’ naq too’oso’q?”

Sa’ Markos 4:35–41, taataw kaahib’ li patz’om. Tz’iib’a li junjunq, ut k’oxla k’a’ru naxk’ut chawu chirix xk’ulb’aleb’ li ch’a’ajkilal re li yu’am a’in rik’in paab’aal chirix li Jesukristo. Chan ru naq li Kolonel naxk’am chaq li tuqtuukilal sa’eb’ li kaq-sut-iq’ sa’ laa yu’am?

Mateo 9:1–13; Markos 2:15–17

Naru ninkol rix lin paab’aal rik’in xk’utb’al li yaalil na’leb’.

Wan naq ch’a’aj xnawb’al chanru xsumenkil naq wankeb’ li neke’wech’ok re li k’a’ru naqapaab’ ut naqab’aanu. Naq nakawil Mateo 9:1–13 ut Markos 2:15–17, k’e reetal k’aruheb’ lix wech’omeb’ laj jitonel, ut k’a’ru kixsume li Kolonel. Naru taak’e reetalil li wech’ok ut li sumenk sa’ jalanq xb’onol, malaj yal taatz’iib’a. K’a’ru nakak’e reetal chirix li k’utuk kixb’aanu li Kolonel? Chan ru naq tatruuq chixb’aanunkil li kixb’aanu a’an sa’ xkolb’al rix jun na’leb’ chirix li evangelio, malaj li k’a’ru nab’aanuman sa’ li Iglees?

Chi’ilmanq ajwi’ li video “Everyday Example: When Beliefs Are Questioned” (LDS.org).

Mateo 9:1–8

Sa’ xk’ab’a’ li jalb’a-k’a’uxlej, naru nawan xkawil inch’ool.

Naq kik’ame’ jun sik rik’in li Kolonel, chixjunileb’ li tenamit ke’xnaw naq lix tib’el naraj k’irtesiik. A’b’anan li Jesus xb’een wa ki’aatinak chirix li q’axal aajel ru wi’chik—naq te’kuye’q lix maak. Wi ta ink’a’ kik’irtesiik li winq sa’ tz’ejwalej, toj taaruuq raj chixb’aanunkil jo’ li raatin li Jesus, ut taawanq “xkawil xch’ool” (Mateo 9:2). Jo’q’e xaweek’a li sahil ch’oolejil rik’in naq kuyb’il aamaak? (Chi’ilmanq ajwi’ Alma 36:18–24.)

Li na’leb’ re xtzolb’aleb’ li loq’laj hu sa’ junkab’al, ut choq’ re li Q’ojyin re Junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:

Mateo 8–9; Markos 2;  5

Naru nakatz’iib’a k’a’ruheb’ li sachb’a-ch’oolej li yeeb’ileb’ resil sa’eb’ li ch’ol a’in ut taataw xjalam-uuch junjunq reheb’ (chi’ilmanq li Libro de obras de arte del Evangelio malaj LDS.org). Naru taapatz’ re li junjunq komon sa’ li junkab’al naq tixye resil jun reheb’ li sachb’a-ch’oolej (rik’in jun li jalam-uuch, wi wan), ut tixye k’a’ru xtzol rik’in a’an. Naru ajwi’ taaye resil junjunq li sachb’a-ch’oolej xawil laa’at, malaj li xawil sa’ resilal li Iglees sa’ roso’jikeb’ li kutan.

Mateo 9:10–13

K’a’ru nakatzol rik’in chan ru naq li Kolonel kiraatinaheb’ laj titz’ol toj ut laj maak, li tz’eqtaananb’ileb’ xb’aaneb’ lix komoneb’? Chan ru naru taqab’aanu li kixb’aanu a’an naq naqaatinaheb’ li qas qiitz’in?

Mateo 9:36–38

Chan ru naru nakatenq’aheb’ laa komon chixtawb’al ru lix tz’aam li Kolonel naq te’wanq chik aj k’anjel re xwotzb’al li evangelio? Naru teeb’aanu sa’ komonil junaq ch’ina k’anjel li taab’ayq raj choq’ re jun li kristiaan, jo’ xch’ajb’al li ochoch chirix li wa’ak. K’a’ru naru taqab’aanu re xwotzb’al resil li evangelio?

Markos 4:35–41

Ma naru li esilal a’in chixtenq’ankileb’ li komon sa’ li junkab’al naq wankeb’ xxiw? Maare te’ruuq chirilb’al li raqal 39 ut te’xye resil naq li Kolonel xtenq’aheb’ chireek’ankil li tuqtuukilal naq xwan li rahilal malaj li xiw.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

Chatwanq rik’ineb’ ut chawab’iheb’. Wan naq li k’utuk q’axal chaab’il natikla naq wan li patz’om malaj li ch’a’ajkilal sa’ xch’ooleb’ li komon sa’ li junkab’al. Kanab’eb’ li komon sa’ laa junkab’al chixnawb’al rik’in aawaatin ut aab’aanuhom naq wan aach’ool chirab’inkileb’ (chi’ilmanq Li k’utuk jo’ li Kolonel, 16).

Li Kristo ut li winq sik, xb’aan laj J. Kirk Richards