“25 febrero–3 marzo. Mateo 6–7: Kixtzoleb’ chi wank xwankil” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“Febrero 25–marzo 3 Mateo 6–8,” Kim, Taaqehin—Choq’ reheb’ li komon ut li junkab’al: 2019
Li Jesus kixtzoleb’ li tenamit chire li palaw, xb’aan laj James Tissot
25 Febrero–3 marzo
Mateo 6–7
“Kixtzoleb’ chi wank xwankil”
Naq naqatzoleb’ li loq’laj hu chi wank sa’ qak’a’uxl jun patz’om, ut wi anchal qach’ool chixtawb’al ru li k’a’ru naraj li qaChoxahil Yuwa’ naq taqanaw, yooko chixb’oqb’al chaq li Santil Musiq’ej re xk’eeb’al qana’leb’. Naq nakawil Mateo 6–7, k’e reetaleb’ li na’leb’ nakak’ul.
Xtz’iib’ankil li nakak’oxla
Li aatin jultikanb’il chiru li tzuul a’an jun reheb’ li aatin q’axal nawb’il ru sa’ chixjunil li Kristiaanil. Li Kristo ki’aatinak rik’in chaq’al ru jaljookil ru aatin, jo’ chirix li tenamit k’ojk’o sa’ xb’een li tzuul, chirixeb’ li utz’u’uj sa’ pim, ut chirixeb’ li xojb’ tiqtookeb’ chaq rik’in rix li karneer. A’b’anan li aatin jultikanb’il chiru li tzuul maawa’ ka’ajwi’ ch’ina-usil aatin. Lix wankil li aatin kixk’ut li Kolonel chiruheb’ lix tzolom naru chixjalb’al qayu’am, ut k’a’jo’ wi’chik wi naqak’e qach’ool chixyu’aminkil. Chi jo’kan, ink’a’ chik yal aatin lix yehom; neke’ok choq’ jun kawil k’ojleb’aal choq’ re li qayu’am, ut chanchan lix kab’l li winq li wank xna’leb’, taaruuq chixkuyb’al li kaq-sut-iq’ ut li b’uut’iha’ re li ruchich’och’ (chi’ilmanq Mateo 7:24–25).
Li na’leb’ re xtzolb’aleb’ li loq’laj hu aajunes
Tento raj tink’e inch’ool rik’in li k’a’ru re choxa.
Wan naq ch’a’aj xk’eeb’al li k’a’ru re li Dios xb’een wa chiru li k’a’ru re li ruchich’och’. B’arwan reheb’ li na’leb’ kixk’ut li Kolonel sa’ Mateo 6–7 nakatxtenq’a chixk’eeb’al xb’een wa li k’a’ru re choxa? K’a’ru nakak’oxla malaj nakaweek’a naq nakatzol li raatin? K’a’ru li eek’asinb’ilat chixb’aanunkil? Maare naru taatz’iib’a li k’a’ru nakaweek’a. Jo’ jun eetalil:
|
Tento naq tink’oxla li k’a’ru naxk’oxla li Dios chiwix chi mas wi’chik chiru li k’a’ru neke’xk’oxla xkomoneb’ chik li kristiaan. | |
Mas wi’chik naq ninru chi nach’ok rik’in li Dios rik’in li tijok chi tuulan ut chi anchal inch’ool.
Sa’ li aatin li kijultikaman chiru li tzuul, wan k’iila paay chi na’leb’, ut taak’ul li na’leb’ a’an a’ yaal li yoo chi k’ulmank sa’ laa yu’am, ut a’ yaal jo’ li k’a’ru naraj li Qaawa’ xyeeb’al aawe.
Jun li na’leb’ sa’ Mateo 6–7 a’an li tijok. K’oxla chiru junpaat chan ru li tijok nakab’aanu. Chan ru nakaweek’a naq yookat chi nach’ok rik’in li Dios rik’in tijok? K’a’ru li k’utb’il sa’ Mateo 6–7 li na’eek’asink aawe chixchaab’ilob’resinkil laa tij? Tz’iib’a li na’leb’ naxk’e aawe li Musiq’ej. Jo’ jun eetalil:
|
Naq nintijok, tento tinwoxloq’i lix k’ab’a’ lin Choxahil Yuwa’. | |
|
Niq nintijok, tento tinch’olob’ naq nawaj naq taa’uxq li rajom li Qaawa’. | |
Us wi taawil jun sut chik li aatin jultikanb’il chiru li tzuul, ut taasik’ junaq chik na’leb’ malaj li esilal li taak’anjelaq sa’ laa yu’am. Tz’iib’a li k’a’ru nakataw sa’ jun li ch’ina hu, rochb’een li k’a’ru nakak’oxla ut nakaweek’a chirix.
Naru nokojilok rik’in li Dios rik’in tijok.
K’a’ru xyaalalil “xyeeb’al k’iila aatin” naq nokotijok?
Wankeb’ li neke’k’oxlank re naq “xyeeb’al k’iila aatin” naraj naxye xyeeb’al chi juntaq’eet k’iila sut li aatin. A’b’anan li raqal a’in yoo chi aatinak chirix li aatin li maak’a’ xyaalal, li maak’a’ na’ok wi’. Li tijok rik’in “xyeeb’al k’iila aatin” naru naxye tijok chi ink’a’ anchal li qach’ool (chi’ilmanq Alma 31:12–23).
K’a’ut naq ink’a’ yal naqanumsi li “Padre Nuestro”?
Li Awa’b’ej Russell M. Nelson kixye: “Li Qaawa’, junxilaj chiru naq kixye li tij a’in, kixye reheb’ lix tzolom naq me’xye “k’iila aatin” [Mateo 6:7] ut naq “jo’ka’in naq textijoq” [Mateo 6:9]. Chi jo’kan, li “Padre Nuestro” nak’anjelak jo’ jun eetalil, a’b’anan maawa’ li aatin li tento taqatzol ut taqaye k’iila sut. Li Qaawa’ yal naraj naq tootijoq re xtz’aamankil qatenq’ankil chiru li Dios naq yooko rajlal chixyalb’al qaq’e chixtz’eqtaanankil li ink’a’ us ut chi wank sa’ tiikilal” (“Lecciones que aprendemos de las oraciones del Señor,” Liahona, mayo 2009, 47).
Tento tinraqoq aatin chi tiik inch’ool.
Sa’ Mateo 7:1 chanchan naq li Kolonel yoo chixyeeb’al naq mooraqok aatin, a’b’anan sa’ jalaneb’ chik raqal (ut wankeb’ xkomon li raqal a’an sa’ li jun ch’ol a’in), naxk’e qana’leb’ chirix chan ru raqok aatin. Naru nasach qana’leb’ rik’in a’in, a’ut li raatinul li jun raqal a’in chi jaltesinb’il ru xb’aan laj Jose Smith naru nokoxtenq’a: “Mexraqok aatin chi moko tiik ta, re naq ink’a’ taaraqe’q aatin cherix; tiikaq b’an li raqb’a-aatin nekexraqok wi’ aatin” (sa’ JJS Mateo 7:1–2 ). K’a’ru nakataw sa’ Mateo 7:1–5, ut sa’ chixjunil li jun ch’ol a’in, li nakatxtenq’a re naq “tiikaq li raqb’a-aatin nakatraqok wi’ aatin”?
Chi’ilmanq ajwi’ “Juzgar a los demás,” Leales a la fe, 110–111; Lynn G. Robbins, “Aj tiikil Raqol Aatin,” Jolomil Ch’utub’aj-ib’ re octubre 2016.
Nin’ok chixnawb’al ru li Jesukristo rik’in xb’aanunkil li rajom xch’ool.
Li aatin “Maajun wa xinnaw eeru” sa’ Mateo 7:23 kijalman sa’ li aatin jaltesinb’il xb’aan laj Jose Smith chixyeeb’al “Maajun wa xenaw wu.” Chan ru naq li jalb’il aatin a’in nakatxtenq’a chixnawb’al li k’a’ru kixk’ut li Qaawa’ sa’eb’ li raqal 21–22 chirix xb’aanunkil li rajom a’an? Ma nakaweek’a naq nakanaw ru chi us li Qaawa’? Kʼaʼru naru taabʼaanu re naq taanaw ru chi mas us wi’chik?
Chi’ilmanq ajwi’ David A. Bednar, “Wi nekenaw wu laa’in,” Jolomil Ch’utub’aj-ib’ re octubre 2016.
Li na’leb’ re xtzolb’aleb’ li loq’laj hu sa’ junkab’al, ut choq’ re li Q’ojyin re Junkab’al
Naq nakatzol li aatin jultikanb’il chiru li tzuul rik’in laa junkab’al, li Musiq’ej tatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re te’tenq’aaq laa junkab’al. Aʼin junjunq li naʼlebʼ naru taabʼaanu:
Jun li na’leb’ re textzoloq chirix Mateo 6–7 jo’ junkab’al a’an rilb’al li video “El Sermón del Monte: El Padrenuestro” ut “El Sermón del Monte: Tesoros en los cielos” (LDS.org). Eb’ li komon sa’ li junkab’al te’ruuq chirilb’al sa’eb’ li loq’laj hu ut te’xxaqab’ li video naq neke’rab’i k’a’ruhaq li te’raj aatinak wi’. Taaruuq taab’aanumanq li k’anjel a’in chiru wiib’ oxib’ kutan, wi na’ajman ru.
K’a’ru naru naqatzol chirix li tijok rik’in chan ru naq kitijok li Kolonel? Chan ru naq lix tij a’an naru chi ok choq’ eetalil re xchaab’ilob’resinkil li tij naqab’aanu qajunes ut sa’ junkab’al? (Chi’ilmanq ajwi’ Lukas 11:1–13.) Wi wankeb’ laa kok’al li ka’ch’ineb’ xyu’am, naru teeyal tijok sa’ komonil.
K’a’ru xyaalalil “xsik’b’al xb’een wa lix nimajwal awa’b’ejihom li Dios”? Chan ru yooko chixb’aanunkil a’in jo’ junkab’al?
Taaruuq taawoksi jun ch’ina k’aj che’ ut jun nimla che’ jo’ li ch’ina mul ut li tz’amb’a naq nekex’aatinak chirix li raatin li Kolonel chirix raqok aatin chirixeb’ li qas qiitz’in. Naru taawil li aatin “Juzgar a los demás” sa’ li hu Leales a la Fe, 110–111, naq yookex chi aatinak chirix a’in.
Re xtenq’ankil laa junkab’al chixtawb’al ru lix jaljookil ru aatin li Kolonel chirix li winq li wan xna’leb’ ut li maak’a’ xna’leb’, naru nakakanab’eb’ chixhoyb’al li ha’ sa’ xb’een li samahi’ ut sa’ xb’een jun pek. Chan ru naru naqak’e li qamusiq’ejil k’ojleb’aal sa’ xb’een li pek?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Xwotzb’al li na’leb’ nakak’ul. Rik’in aatinak chirix li na’leb’ nakak’ul sa’ tzolok aajunes, nakatru chixtzolb’aleb’ aawas aawiitz’in, a’ut jo’kan ajwi’ taanimanq aanawom laa’at. K’e aach’ool chixwotzb’al jun li na’leb’ xatzol sa’ rilb’al li loq’laj hu sa’ li xamaan a’in rik’in jun komon sa’ laa junkab’al malaj sa’ laa tzoleb’aal sa’ li Iglees.
Xintijok chawix, xb’aan laj Del Parson