Li aatin jultikanb’il chiru li tzuul, xb’aan laj Jorge Cocco

18–24 febrero

Mateo 5; Lukas 6

“Us xaq eere”

K’e reetal li musiq’anb’il na’leb’ nakak’ul naq nakawil Mateo 5 ut Lukas 6, ut tz’iib’a resil sa’ jun li ch’ina hu. Li tusleb’ aatin a’in naru nakatxtenq’a chixtawb’aleb’ li na’leb’ li xninqaleb’ ru ut aajeleb’ ru sa’eb’ li ch’ol a’in.

Xtz’iib’ankil li nakak’oxla

Naq li Jesus yoo chixb’aanunkil lix k’anjel, kik’eeman reetal naq li k’a’ru yoo chixk’utb’al jalan wi’ rik’in li k’a’ru k’aynaqeb’ chirab’inkil li ani yo’yookeb’ sa’ li kutan a’an. Eb’ li neb’a’ te’xk’ul lix awa’b’ejihom li Dios? Eb’ li tuulan te’reechani li ruchich’och’? Us xaq reheb’ li rahob’tesinb’ileb’? Eb’ laj tz’iib’ ut eb’ laj Fariseo ink’a’ yookeb’ chixk’utb’al xkomon li na’leb’ a’in. A’ut eb’ li neke’xtaw ru lix chaq’rab’ li Dios ke’reek’a naq tz’aqal yaal eb’ li aatin a’in. “Isinb’ilaq xsa’ ru li x’isink xsa’ aawu” ut “xik’ taawil li xik’ na’ilok aawe” a’aneb’ li chaq’rab’ kub’enaqeb’ wi’chik xwankil (Mateo 5:38, 43), li ke’k’ehe’ chaq re jun tenamit li moko wan ta xch’ooleb’ chixyu’aminkil li chaq’rab’ taqenaq wi’chik xwankil. A’b’anan li Jesus kichal chixtz’aqob’resinkil ru li chaq’rab’ li kub’enaq xwankil, ut chixk’utb’al li chaq’rab’ li taqenaq wi’chik (chi’ilmanq 3 Nefi 15:2–10) li kik’uub’aman re qatenq’ankil re naq sa’ junaq kutan “tz’aqalaq qe qu jo’ li qaChoxahil Yuwa’ tz’aqal re ru” (Mateo 5:48).

Li na’leb’ re xtzolb’aleb’ li loq’laj hu aajunes

Mateo 5:1–12; Lukas 6:20–26

Nachal li sahil ch’oolejil li ink’a’ nalaj na’oso’ rik’in li wank jo’ chanru kixk’ut li Jesukristo.

Chixjunileb’ neke’raj wank chi saheb’ sa’ xch’ool, a’b’anan moko juntaq’eet ta li na’ajej neke’xsik’ wi’ li sahil ch’oolejil. Wankeb’ li neke’sik’ok re sa’ li ruchich’och’il wankilal malaj li taqlank, ut wankeb’ chik li neke’sik’ok re rik’in li b’ihomal, malaj rik’in xsahob’resinkil li atawanb’il xb’aan li tz’ejwalej. Li Jesukristo kichal re xk’utb’al li b’e li nawulak sa’ li sahil ch’oolejil li ink’a’ nalaj na’oso’, ut re xk’utb’al k’a’ru xyaalalil li wank chi osob’tesinb’il. K’a’ru nakatzol chirix xtawb’al li sahil ch’oolejil sa’ Mateo 5:1–12 ut Lukas 6:20–26? Chan ru naq jalan wi’ a’in chiru lix na’leb’ li ruchich’och’ chirix li sahil ch’oolejil?

K’a’ru li patz’om malaj li na’leb’ li nachal sa’ aak’a’uxl naq nakawil li junjunq raqal? K’a’ru neke’xk’ut chawu eb’ li raqal a’in chirix li wank choq’ xtzolom li Jesukristo? K’a’ru nakaweek’a naq taawaj xb’aanunkil re tatwanq jo’ chanru yeeb’il sa’eb’ li raqal a’in?

Chi’ilmanq ajwi’ Jwan 13:17; 3 Nefi 12:3–12; “El Sermón del Monte: Las Bienaventuranzas” (video, LDS.org).

Mateo 5:13

K’a’ut naq li Kolonel kixjuntaq’eetaheb’ lix tzolom rik’in li atz’am?

Chalen chaq najter na’oksiman li atz’am re k’uulank, re xk’eeb’al xsahil li tzakemq, ut re saqob’resink. Li atz’am kiwan ajwi’ xk’anjel sa’ lix paab’aaleb’ laj Israelita. Ki’oksiman sa’eb’ li mayej re xul li kib’aanuman sa’ lix chaq’rab’ laj Moises (chi’ilmanq Levitico 2:13; Numeros 18:19). Naq li atz’am nasach xsahil, maak’a’ chik xk’anjel, ut “maak’a’ na’ok wi’ ” (Mateo 5:13). Nak’ulman a’in naq li atz’am wan chi junajinb’il rik’in k’a’aq chik re ru, malaj naq tz’ajninb’il xb’aan. Jo’ lix tzolom li Kristo, nakana li “qasahil” wi ink’a’ naqakanab’ qib’ chi tz’ajniik xb’aan li ruchich’och’. Chi jo’kan naru naqab’aanu li qak’anjel re k’uulank ut re saqob’resink jo’ li ratz’amil li ruchich’och’—jo’ rik’in xwotzb’al li evangelio, ut rik’in xjek’inkil li chaab’ilal sa’ li ruchich’och’ (chi’ilmanq Tz. ut S. 103:9–10).

“Laa’ex li ratz’amil li ruchich’och’ ” (Mateo 5:13).

Mateo 5:17–48; Lukas 6:27–35

Lix chaq’rab’ li Kristo naxk’ul xna’aj lix chaq’rab’ laj Moises.

Eb’ li tzolom maare ke’sach xch’ool naq ke’rab’i li Jesus chixyeeb’al naq lix tiikilaleb’ tento tixq’ax ru xtiikilaleb’ laj tz’iib’ ut laj Fariseo (chi’ilmanq Mateo 5:20), rik’in naq eb’ a’an neke’xnima rib’ rik’in xpaab’ankil chi tz’aqal tz’aqal lix chaq’rab’ laj Moises. A’b’anan li Jesus kixk’ut jun li chaq’rab’ q’axal taqenaq wi’chik, li ink’a’ ka’ajwi’ na’aatinak chirix li qab’aanuhom, chirix aj b’an wi’ li qak’oxlahom ut li reek’ahom qach’ool li na’el wi’ qab’aanuhom. Mas wi’chik li naxpatz’ li taqenaqil chaq’rab’ a’in: li qach’ool, li qaam, ut li qak’a’uxl (chi’ilmanq Mateo 22:37).

Naq nakawil Mateo 5:21–48 ut Lukas 6:27–35, k’oxla xk’eeb’al reetalil li k’a’ru yeeb’il sa’ lix chaq’rab’ laj Moises (“Eerab’ihom resil naq ...”) ut li k’a’ru kixye li Jesus re xtaqsinkil wi’chik xwankil.

Jo’ jun eetalil, k’a’ru kixk’ut li Jesus sa’ Mateo 5:27–28 chirix li qateneb’ankil rik’in li k’a’ru naqak’oxla? Chan ru naq tatruuq chixtawb’al aawankil sa’ xb’een li na’leb’ li na’ok sa’ laa k’a’uxl ut sa’ laa ch’ool? (chiʼilmanq Tz. ut S. 121:45).

Chi’ilmanq ajwi’ “El sermón del monte: La ley mayor” (video, LDS.org).

Mateo 5:48

Ma tz’aqal taaraj inChoxahil Yuwa’ naq tinwanq chi tz’aqal we wu?

Li Awa’b’ej Russell M. Nelson kixye:

“Li aatin tz’aqalaq eere eeru jaltesinb’il chaq ru rik’in jun aatin sa’ Griego, teleios, li naraj naxye “tz’aqlojenaq.” ... Lix xe’il li aatin a’an teleiono, li naraj naxye, “wulak sa’ xraqik, nimank toj sa’ q’anil, xtz’aqob’resinkil ru, malaj xchoyb’al.” Chek’e reetal naq li aatin ink’a’ naraj naxye “chi maak’a’ xmajelal”; ka’ajwi’ naraj naxye naq wulajenaq sa’ jun sik’b’il na’ajej. ...

“... Li Qaawa’ kixye, “Ink’a’ nekexru chixkuyb’al wank chiru li Dios anajwan ... ; jo’kan ut, chexkanaaq chi wank eekuyum toj reetal naq tz’aqob’resinb’il eere eeru” [Tz. ut S. 67:13].

“Ink’a’ na’ajman ru naq taaraho’q qach’ool wi li k’anjel re xtawb’al xtz’aqalil qe qu chanchan naq ch’a’aj ut chanchan naq maamin taa’oso’q. Lix tz’aqalil qe qu toj chalk re. K’a’ajwi’ naru chi chalk chi tz’aqal chirix li wakliik chi yo’yo, ut ka’ajwi’ sa’ xk’ab’a’ li Qaawa’. A’ut wan choq’ reheb’ chixjunileb’ li neke’rahok re a’an ut neke’xpaab’eb’ lix taqlahom” (“La inminencia de la perfección,” Ensign, noviembre 1995, 86, 88).

Chi’ilmanq ajwi’ Filipenses 3:13–15; 2 Pedro 1:3–11; Apokalipsis 3:21–22; 3 Nefi 27:27; Moroni 10:32–33; Tzol’leb’ ut Sumwank 76:69.

Li na’leb’ chirix xtzolb’aleb’ li loq’laj hu sa’ junkab’al, ut choq’ re li Q’ojyin sa’ Junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:

Mateo 5:1–9

K’a’ruheb’ li na’leb’ k’utb’il sa’ Mateo 5:1–9 li te’ruuq chetenq’ankil re naq taawanq li sahil ch’oolejil sa’ lee rochoch? Naru taak’oxla wiib’ oxib’ reheb’ li na’leb’ a’an naq nakatzol li aatin jultikanb’il chixb’een li tzuul chiruheb’ li xamaan chalel. Jo’ jun eetalil, k’a’ru li na’leb’ xe’xtaw li komon sa’ laa junkab’al li taatenq’anq reheb’ chi wank choq’ aj tuqub’anel ch’oolej? (chi’ilmanq Mateo 5:21–25, 38–44). K’a’ru naru taak’oxla xb’aanunkil? Chan ru taawil naq taab’aanumanq?

Mateo 5:14–16

Re xtenq’ankil laa junkab’al chixtawb’al ru k’a’ru xyaalalil li wank choq’ “xkutan li ruchich’och’,” naru tex’aatinaq chirix li k’a’ru nak’ehok saqen sa’ lee rochoch, sa’ lee tenamit, ut sa’ li ruchich’och’. Maare naru nakak’ut k’a’ru nak’ulman naq nakatz’ap ru jun saqen. K’a’ru xyaalalil li raatin li Jesus naq kixye, “Laa’ex lix kutan li ruchich’och’ ”? (Mateo 5:14). Ani wanjenaq jo’ kutan chiru li qajunkab’al? Chan ru naq nokoru chi wank choq’ kutan chiruheb’ li kristiaan? (chiʼilmanq Tz. ut S. 103:9–10).

Mateo 5:43–44

K’a’ut naq li Qaawa’ naraj naq tootijoq chirixeb’ li neke’rahob’tesink qe? Chan ru naq nokoru chixb’aanunkil a’in sa’ li qajunkab’al?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

K’e reetal li nak’ulman. Naq nakak’e reetal li k’a’ru yoo chi k’ulmank sa’ xyu’ameb’ laa kok’al, k’a’jo’ naq taak’eemanq chawu xk’eeb’aleb’ xna’leb’. Li raatineb’ ut lix patz’omeb’ li kok’al chiru li kutan naru ajwi’ tixk’e aawe li hoonal re xtzolb’aleb’. (Chi’ilmanq Li k’utuk jo’ li Kolonel,  16.)

“Laa’ex lix kutan li ruchich’och’ ” (Mateo 5:14).