“11–17 febrero. Jwan 2–4: “Tento naq texyo’laaq wi’chik” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“11–17 febrero. Jwan 2–4,” Kim, Taaqehin—Choq’ reheb’ li komon ut li junkab’al: 2019
11–17 febrero
Jwan 2–4
“Tento naq texyo’laaq wi’chik”
Naq nakawil Jwan 2–4, li Musiq’ej tixk’ut chawu li na’leb’ chirix lix jalajik laa ch’ool. Tz’iib’a resil li naxk’ut chawu. Naru taataw chik xkomon li musiq’ejil na’leb’ rik’in xtzolb’al li na’leb’ sa’ li jun ch’ol a’in.
Xtz’iib’ankil li nakak’oxla.
Sa’ xninq’ehinkil jun li sumlaak sa’ Kanahan, li Kristo kixjaltesi li ha’ choq’ vino—a’an “xtiklajikeb’ li eetalil” jo’ kixye laj Jwan (Jwan 2:11). Yaal a’in chi naab’al paay ru xyaalal: a’an li xb’een sachb’a-ch’oolej kixb’aanu li Jesus chi k’utk’u, a’ut jo’kan ajwi’ wan choq’ reetalil jun chik li sachb’a-ch’oolejil tiklaak—a’an naq najale’ li qach’ool naq yooko chi ok chanchan li qaKolonel. Li sachb’a-ch’oolej a’in li nak’ulman sa’ li qayu’am natikla naq naqak’e qach’ool chixtaaqenkil li Jesukristo, chixjalb’al qib’, ut chixsik’b’al rik’in a’an jun yu’am li q’axal chaab’il wi’chik. Sa’ roso’jik naru natz’aqlok ru li jalaak a’in toj reetal naq “yo’laak wi’chik” naru nayeeman re (Jwan 3:7). A’ut li yo’laak wi’chik a’an yal xtiklajik li b’e re li wank choq’ tzolom. Li raatin li Kristo re li ixq aj Samaria chire li yo’leb’aal ha’ naxjultika qe naq wi toj toowanq chi b’eek chiru li b’e a’in, li evangelio taawanq qe choq’ jun “yu’am ha’ ” sa’ li qach’ool, li “nab’ululnak re li junelik yu’am” (Jwan 4:14).
Li na’leb’ re xtzolb’aleb’ li loq’laj hu aajunes
Lix wankilal li Jesukristo naru chinjalb’al.
Naq nakawil resil naq li Kolonel kixjaltesi li ha’ choq’ vino sa’ Jwan 2:1–11, k’a’ru li na’leb’ nakataw chirix lix wankilal li Kristo re aajalb’al?
Naru taataw chik aana’leb’ rik’in xk’oxlankil li k’a’ru ke’ril li junjunq chi kristiaan li ke’wan aran, jo’ xMaria, eb’ li tzolom, ut wankeb’ chik xkomon. Chan ru naq eb’ li kristiaan a’in xe’xk’ul li sachb’a-ch’oolej a’an, jo’ nakak’oxla? Naru taajuntaq’eeta li k’a’ru xatzol chirixeb’ li sachb’a-ch’oolej rik’in li k’a’ru kixk’ut li Jesukristo chiru laj Nikodemo (chi’ilmanq Jwan 3:1–8) ut li ixq chire li yo’leb’aal ha’ (chi’ilmanq Jwan 4:3–26).
Tento naq tinyo’laaq wi’chik re tin’ok sa’ lix awa’b’ejihom li Dios.
Naq kiwulak laj Nikodemo rik’in li Jesus sa’ muqmu, a’an yal yoo chixsik’b’al xna’leb’. A’ut moqon ki’aatinak chi k’utk’u re xkolb’al rix li Jesus (chi’ilmanq Jwan 7:45–52) ut kixjunaji rib’ rik’ineb’ laj paab’anel sa’ xmuqlajik li Jesus (chi’ilmanq Jwan 19:38–40). K’a’ru li k’utb’il sa’ Jwan 3:1–21 li maare kireek’asi laj Nikodemo chixtaaqenkil li Jesus ut chi yo’laak wi’chik?
Li profeet aj Jose Smith kixye, “Li yo’laak wi’chik, nachal chaq rik’in lix Musiq’ li Dios sa’ xk’ulb’aleb’ li k’ojob’anb’il k’anjel” (Enseñanzas de los Presidentes de la Iglesia: José Smith [2007], 101). K’a’ru xk’anjel lix kub’ik aaha’ (a’an li “yo’laak rik’in ha’ ” [Jwan 3:5]) ut laa k’ojob’ankil sa’ li Iglees (a’an li “yo’laak rik’in li musiq’ej” [Jwan 3:5]) sa’ li yo’laak wi’chik? K’a’ru yookat chixb’aanunkil re naq toj yooq chi uxmank li jalaak a’in? (chi’ilmanq Alma 5:11–14).
Chi’ilmanq ajwi’ Mosiah 5:7; 27:25–26; “Kolb’a-ib’,” K’utul Raqal reheb’ li Loq’laj Hu ; David A. Bednar,“Os es necesario nacer de nuevo,” Liahona, mayo 2007, 19–22.
Lin Choxahil Yuwa’ rik’in lix k’anjel li Jesukristo naxk’ut chiwu naq nikinixra.
Li Elder Jeffrey R. Holland kixk’ut, “Li xb’een xnimal ru yaal re li junelik q’e kutan a’an naq li Dios nokoxra laa’o chi anchal lix ch’ool, xmetz’ew, xk’a’uxl, ut xkawilal a’an” (“Wulaj li Qaawa’ tixb’aanu sachb’a-ch’oolej sa’ eeyanq,” Jolomil Ch’utub’aj-ib’ re abril 2016.) Chan ru naq xaweek’a lix rahom li Dios rik’in li maatan re li Ralal?
Li loq’laj wa’ak naxk’e qahoonal re xk’oxlankil lix rahom li Dios ut li maatan re li Ralal. K’a’ruheb’ li b’ich li neke’ten’qank aawe chireek’ankil li rahok a’in? Naru taawil li video re li Coro Tabernaculo Mormon naq neke’xb’icha “Sachso ninkana” (LDS.org). K’a’ru naru taab’aanu re naq mas wi’chik taatoch’e’q aach’ool rik’in li loq’laj wa’ak?
Ma yal musiq’ej li Dios?
Maare wankeb’ li neke’sach xna’leb’ rik’in li raatin li Jesus naq li Dios a’an musiq’ej. Li aatin a’in chi jaltesinb’il ru xb’aan laj Jose Smith naxkutanob’resi li na’leb’ a’in, ut naxye “re xkomoneb’ a’an li Dios kixyeechi’i lix Musiq’ ” (chi’ilmanq JJS, Jwan 4:26). Rik’in li k’a’ru k’utb’esinb’il sa’eb’ li kutan a’in, k’utb’il naq li Dios wan xjunxaqalil li tib’ ut b’aq okenaq (chi’ilmanq Tz. ut S. 130:22–23; chi’ilmanq ajwi’ Genesis 5:1–3; Hebreos 1:1–3).
Li Kristo naxyeechi’i we lix yo’yookil ha’.
K’a’ru xyaalalil li raatin li Jesus naq kixye re li ixq aj Samaria naq li ani taa’uk’aq re li ha’ tixk’e, maajo’q’e chik taachaqiq re? Chan ru naq li evangelio chanchan li yo’yookil ha’?
Lix evangelio li Kristo chanchan li yo’yookil ha’ li nach’olanink re li qaam.
Jun reheb’ li na’leb’ kixk’ut li Jesus chiru li ixq aj Samaria a’an naq nim wi’chik xwankil chan ru nokoloq’onin chiru b’ar nokoloq’onin (chi’ilmanq Jwan 4:21–24). K’a’ru yookat chixb’aanunkil re “xloq’onkinkil li Yuwa’b’ej sa’ musiq’ej ut rik’in li yaal”? (Jwan 4:23).
Chi’ilmanq ajwi’ li K’utul Raqal reheb’ li Loq’laj Hu, “Loq’onink”; Dean M. Davies, “Eb’ li osob’tesink re li loq’onink,” Jolomil Ch’utub’aj-ib’ re octubre 2016.
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Naq nekeril sa’ junkab’al eb’ li ch’ol a’in chiru li xamaan a’in, k’ehomaq reetal chan ru naq li Kolonel kiroksi li k’a’aq re ru na’ilman wulaj wulaj—jo’ li yo’laak, li iq’, li ha’, ut li tzakemq—re xk’utb’al li musiq’ejil na’leb’. K’a’ru wan sa’ laa wochoch li naru na’oksiman re xk’utb’aleb’ li musiq’ejil yaal?
Naq taatz’eqtaana ru li k’a’aq re ru tixk’e chi tz’ajniik laa wochoch sa’ tz’ejwalej ut sa’ musiq’ej, naru nawan laa wochoch choq’ loq’laj na’ajej—jo’ li santil ochoch. K’a’ru li tento teeram chi ok sa’ lee rochoch re naq taawanq choq’ loq’laj na’ajej? K’a’ru taab’aanu laa’at re xramb’al chi ok li k’a’aq re ru a’an?
Ye reheb’ li komon sa’ li junkab’al naq te’xk’oxla li sachb’a-ch’oolej na’uxman rik’in li wank sa’ yu’am ut li alank—sa’ li nayo’ob’tesiman wi’ li ani yo’yo, na’eek’an, ut wan xna’leb’. Li Kristo kixk’ut naq tento tooyo’laaq wi’chik xb’een wa chiru naq too’ok sa’ lix awa’b’ejihom li Dios. Chan ru naq li yo’laak wi’chik a’an jun chaab’il jaljookil ru aatin chirix li jalaak li na’ajman ru re tooruuq chi ok sa’ lix awa’b’ejihom li Dios? Chan ru naq laa’o xqak’ul li yo’laak wi’chik sa’ li musiq’ej?
K’e xb’oqb’aleb’ li komon sa’ li junkab’al naq te’xye li jun raqal a’in sa’ tz’aqal li raatineb’, chanchan yookeb’ chixch’olob’ankil chiru jun ramiiw. Chan ru naq li Kristo xtenq’an qe chireek’ankil lix rahom li Dios sa’ li qayu’am?
K’a’ru yoo chixk’utb’al li Kolonel naq kixjuntaq’eeta li evangelio rik’in li yo’yookil ha’? Naru taak’ut jun uk’leb’ ha’, ut taapatz’ reheb’ laa komon chixyeeb’al chan ru naq wan li ha’. K’a’ut naq aajel ru naq naquk’ li ha’ wulaj wulaj? K’a’ut naq li Jesukristo kixjuntaq’eeta lix evangelio rik’in “jun yu’am ha’ nab’ululnak re li junelik yu’am”? (Jwan 4:14).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Sik’eb’ li eetalil. Sa’eb’ li loq’laj hu, k’iila sut na’oksiman li k’a’ru ilb’il, li k’a’ru b’aanunb’il, malaj li k’a’ru k’utb’il, choq’ reetalil li yaalil musiq’ejil na’leb’. Eb’ li eetalil a’in neke’ru chixchaab’ilob’resinkil laa nawom chirix li na’leb’ li yoo chi k’utmank. Jo’ jun eetalil, li Kolonel kixjuntaq’eeta lix jalajik qach’ool rik’in li yo’laak wi’chik.
Yo’yookil ha’, xb’aan laj Simon Dewey