li Jesus ki’aatinak rik’in laj Nikodemo

11–17 febrero

Jwan 2–4

”Tento naq texyo’laaq wi’chik”

Lix kawresinkil aawib’ re k’utuk natikla rik’in rilb’al ru Jwan 2–4. Kim, Taaqehin—Choq’ reheb’ li komon ut li junkab’al naru chatenq’ankil chixtawb’al ruheb’ li ch’ol a’an, ut li tusleb’ aatin a’in naru naxk’eheb’ laa na’leb’ re li k’utuk.

Xtz’iib’ankil li nakak’oxla

reetalil l wotzok

Xkanab’ankileb’ chi wotzok

Waklesiheb’ xch’ool li kok’al chiwotzb’al li yookeb’ chixtzolb’al ut chixnumsinkil, rik’in xpatz’b’al reheb’ k’a’ru xe’xb’aanu toje’ re naq te’wanq jo’ “aj sik’onel reheb’ li qas qiitz’in choq’ ruuchil li kar” (Mateo 4:19). Maare taa’ajmanq ru naq taawil wi’chik ru rik’ineb’ li xetzol sa’ li xamaan xnume’.

reetalil li k’utuk

Xk’utb’al li tzolʼlebʼ

Kok’al toj ka’ch’ineb’ xyu’am

Jwan 3:1–10

Tento naq taakub’eeq inha’ ut tink’ojob’aaq re tinq’ajq chi wank rik’in lin Choxahil Yuwa’.

Eb’ li kok’al li nakatzoleb’ yookeb’ chixkawresinkil rib’ re xk’eeb’al xb’een li yokb’ re te’kub’eeq xha’ (yo’laak rik’in ha’) ut te’k’ojob’aaq choq’ komon (yo’laak rik’in Musiq’ej) re naq te’wanq wi’chik rik’in li qaChoxahil Yuwa’. Chan ru naru nakatenq’aheb’ chixtawb’al ru lix aajelil ru li wiib’ chi k’ojob’anb’il k’anjel a’an?

Kok’ k’anjel naru chi b’aanumank

• K’os ru li esil naq li Jesus kixtzol laj Nikodemo. Ye reheb’ li kok’al naq chirix naq te’kub’eeq xha’, li qaChoxahil Yuwa’ tixk’e li maatan re li Santil Musiq’ej reheb’.

• Oksi Jwan 3:5 ut li perel re li kok’ k’anjel re li xamaan a’in re xk’utb’al naq tento taakub’eeq qaha’ ut took’ojob’aaq re wank wi’chik rik’in li qaChoxahil Yuwa’.

• Patz’ reheb’ li kok’al naq te’aatinaq chirix li neke’xb’aanu re xch’ajb’aleb’ li ruq’. K’ut li jalam-uuch El bautismo de una niña (Libro de obras de arte del Evangelio, ajl 104) ut tenq’aheb’ li kok’al chixjuntaq’eetinkil li xch’ajb’aleb’ li ruq’ rik’in ha’ rik’in li wulak chi saq qu sa’ musiq’ej rik’in li kub’iha’.

Jwan 3:16

Li qaChoxahil Yuwa’ nikinixra, xb’aan a’an naq kixk’e jun aj Kolol we.

Chan ru naru nakatenq’aheb’ li kok’al chixtzolb’al li nim xloq’alil yaal a’an?

Kok’ k’anjel naru chi b’aanumank

• Patz’ reheb’ li kok’al naq te’xtz’aqob’resi ru li ch’ol aatin jo’eb’ a’in: “Xb’aan naq eb’ lin yuwa’ nikine’xra, a’aneb’. ...” Il ru Jwan 3:16. Chirix a’an tenq’aheb’ li junjunq chi kok’al chixka’sutinkil Jwan 3:16, rik’in xjalb’al ru li aatin “li ruchich’och’ ” rik’in lix k’ab’a’eb’, ut patz’ reheb’ li kok’al naq’ te’ab’inq chi us re xk’eeb’al reetal li kixb’aanu li qaChoxahil Yuwa’ xb’aan naq nokoxra. Kanab’eb’ li kok’al chixyiib’ankil jun xjalam-uuch li natenq’an reheb’ chireek’ankil lix rahom li qaChoxahil Yuwa’ (jo’eb’ li junkab’al, li tzuul taq’a, eb’ li loq’laj hu, ut wankeb’ chik xkomon). Kanab’eb’ chixwotzb’aleb’ lix jalam-uuch chirib’ileb’ rib’.

• Kanab’eb’ li kok’al naq te’xchap chi kutankil jun li jalam-uuch re li Jesus rajlal sut naq te’xb’icha “Ralal” sa’ Kixtaqla li Ralal,” B’ichleb’aal choq’ reheb’ li Kok’al, 20–21.

Jwan 4:5–15

Li Jesukristo a’an lin “yo’yookil ha’

Chixjunileb’ li kok’al sa’ laa tzoleb’aal naru neke’xtaw ru chan ru naq nawan li chaqi-eel. Chan ru naru nakawoksi li numsihom a’an re xtenq’ankileb’ li kok’al chixtawb’al ru li rajb’al ru li yo’yookil ha’ li naxyeechi’i li Jesukristo?

Kok’ k’anjel naru chi b’aanumank

• Oksi jun li jalam-uuch re li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al re xseraq’inkil resilal li Jesus ut li ixq chire li yo’leb’aal ha’. Patz’ reheb’ li kok’al naq te’xye wi’chik li seraq’.

• K’ut jun li sek’ rik’in ha’ ut patz’ reheb’ li kok’al k’a’ raj ru taak’ulmanq wi wan raj mas naab’al li qachaqi-eel ut li sek’ yamyo raj xsa’. K’os ru Jwan 4:5–15, ut ch’olob’ xyaalal naq li Jesukristo ut lix evangelio neke’xk’e xyu’am li qamusiq’, jo’ chanchan naq li ha’ naxk’e xyu’am li qajunxaqalil.

reetalil li k’utuk

Xk’utb’al li tzolʼlebʼ

Kok’al ak ninqeb’

Jwan 2:1–11

Naru nawoxloq’i lin na’ jo’ kixb’aanu li Jesus.

Sa’ li sumlaak re Kana, xMaria kixye re li Jesus naq ki’oso’ li viin. Jo’ naxye sa’ lix Jaltesinkil ru li Santil Hu xb’aan laj Jose Smith, li Jesus kixsume lix na’ rik’in xpatz’b’al re, “At ixq, k’a’ru taawaj tinb’aanu laa’in choq’ aawe? Tinb’aanu” (Jwan 2:4, jo’ jaltesinb’il ru xb’aan laj Jose Smith). Li Jesus a’an jun chaab’il eetalil re chan ru naq eb’ li kok’al tento te’roxloq’i lix na’eb’.

Kok’ k’anjel naru chi b’aanumank

• Kanab’eb’ li kok’al chirilb’al ru Jwan 2:1–11 ut chixk’eeb’al xhoonaleb’ chirib’ileb’ rib’ re xyeeb’al xcha’alil li seraq’ rik’in ajwi’ li raatineb’.

• Patz’ reheb’ li kok’al naq te’xye k’a’ raj ru li taaraj wi’ xtenq’ankil lix na’eb’. Kanab’eb’ chixyalb’al xb’aanunkil li k’a’ raj ru te’xye re lix na’eb’ rik’in roksinkileb’ junjunq reheb’ li raatin li Jesus: “K’a’ru taawaj tinb’aanu laa’in choq’ aawe?” Jwan 2:4, jo’ jaltesinb’il ru xb’aan laj Jose Smith).

• Kanab’eb’ junjunq li na’b’ej chirula’aninkil laa tzoleb’aal ut chixwotzb’al li neke’xb’aanu lix kok’aleb’ re xk’utb’al li roxloq’ choq’ reheb’ a’an.

Li Jesus na’aatinak rik’in xMaria sa’ ninq’e re li sumlaak

Li Jesus kixye re lix na’, “K’a’ru taawaj tinb’aanu laa’in choq’ aawe?” (Jwan 2:4,jo’ jaltesinb’il ru xb’aan laj Jose Smith).

Jwan 3:1–8

Li kub’iha’ ut li k’ojob’aak choq’ komon a’an chanchan li yo’laak wi’chik.

Naq nakub’e qaha’, li kixk’ab’a’in li Jesus jo’ “yo’laak rik’in ha’,” naqak’ul lix kuyb’al li qamaak ut naru “noko’ok sa’ li rawa’b’ejihom li Dios” (Jwan 3:5). Chan ru naru nakatenq’aheb’ li kok’al li nakatzoleb’ chixtawb’al ru li k’a’ru naraj naxye li yo’laak wi’chik?

Kok’ k’anjel naru chi b’aanumank

• Junaji ruheb’ li raatin li Kolonel li natawman sa’ Jwan 3:3 ut kanab’eb’ li kok’al chixk’eeb’al sa’ xtusulal ru. Chan ru naq li kub’iha’ ut li k’ojob’aak a’an chanchan li yo’laak wi’chik?

• K’ut jun li jalam-uuch re jun li k’uula’al toje’ xyo’la ut re junaq xqa’al li yoo chi kub’eek xha’ ut chi k’ojob’aak choq’ komon (chi’ilmanq Libro de obras de arte del Evangelio ajl 104 ut 105). Chan ru naq chanchano jun li k’uula’al toje’ xyo’la chirix naq nakub’e qaha’ ut nokok’ojob’aak? (chi’ilmanq Jwan 3:3–5).

• Kanab’eb’ li kok’al chixwotzb’al li najultiko’ reheb’ chirix lix kub’iha’eb’. Il ru Mosiah 18:8–10 ut Tzol’leb’ ut Sumwank 20:37 re xjultikankil li sumwank re li kub’iha’. K’ut chiruheb’ li kok’al naq rik’in tz’aqonk sa’ li loq’laj wa’ak rajlal xamaan, toj yooko chi yo’laak wi’chik.

• Tenq’aheb’ lo kok’al chixk’uulankil sa’ xk’a’uxleb’ Eb’ lix Raqalil li Paab’aal 1:4.

Jwan 3:16–17

Li qaChoxahil Yuwa’ nikinxra, xb’aan a’an naq kixtaqla chaq li Ralal.

Chan ru naru nakatenq’aheb’ li kok’al chixnawb’al naq li Jesukristo kitaqlaak chaq sa’ li ruchich’och’ jo’ jun reetalil lix rahom li qaChoxahil Yuwa’?

Kok’ k’anjel naru chi b’aanumank

• Patz’ reheb’ li kok’al naq te’xyiib’ jun li jalam-uuch re li maatan mas nawulak chiruheb’ ut re li ani li kik’ehok reheb’. Chirix a’an patz’ re jun li ch’ina al naq taaril ru Jwan 3:16. K’a’ru li maatan kixk’e qe li qaChoxahil Yuwa’? Chan ru naq li maatan a’an naxk’utb’esi lix rahom?

• Naq yookex chixb’ichankil malaj chirab’inkil Kixtaqla li Ralal,”B’ichleb’aal choq’ reheb’ li Kok’al, 20–21, patz’ reheb’ li kok’al naq te’ab’inq chi us re xtawb’al xsumenkil li patz’om a’in, “K’a’ut naq kitaqlaak chaq qe li Jesukristo xb’aan li qaChoxahil Yuwa’?”

Jwan 4:6–23

Li Jesukristo naxyeechi’i we li “yo’yookil ha’.”

Jo’ ajwi’ naq li Jesus kiroksi li ha’ re xtzolb’al li ixq aj Samaria, laa’at naru nakawoksi li ha’ re xtzolb’aleb’ li kok’al k’a’ut naq aajel ru lix evangelio li Jesukristo choq’ qe.

Kok’ k’anjel naru chi b’aanumank

• K’e li ha’ reheb’ li kok’al re ruk’b’al ut kanab’eb’ chixwotzb’al lix numsihomeb’ naq wankeb’ chaq xchaqi-eel. Aatinanqex chirix li k’a’ru xe’reek’a naq xe’ruk’ li ha’.

• Tz’iib’aheb’ li ch’ol aatin re xk’osb’al ru li seraq’ re li ixq chixk’atq li yo’leb’aal ha’ ut patz’ reheb’ li kok’al naq te’ril sa’ Jwan 4:6–23 re naq te’xk’e li ch’ol aatin sa’ xtusulal ru. K’a’ru li yoo chixyalb’al xk’utb’al li Jesus chiru li ixq?

• Yiib’ chiru li pizarron jun li sek’ rik’in ha’ ut jun li roq ha’. Kanab’eb’ li kok’al chixyeeb’al li k’a’aq re ru, jo’ li sek’ rik’in ha’, li nokoxsahob’resi chiru junpaat. K’a’ru a’an li chanchan li “yo’yookil ha’ ” li naru nokoxsahob’resi chi junelik?

• Tz’iib’a sa’ li pizarron Chan ru naq li evangelio a’an jo’ li ha’? Patz’ reheb’ li kok’al naq te’xk’oxla chan raj ru te’xsume li patz’om a’an naq yookeb’ chirilb’al ru Jwan 4:6–23.

reetalil li tzolok

Xb’oqb’aleb’ chi tzolok sa’ kab’l

K’oxla xpatzb’al reheb’ li kok’al naq te’xk’e reheb’ li komon sa’ lix junkab’al li ha’ re te’ruk’ naq te’wulaq sa’ ochoch. Naq te’xb’aanu, naru te’xwotz li k’a’ru xe’xtzol chirix li yo’yookil ha’.

Xchaab’ilob’resinkil li qak’utum

Oksi li perel re li kok’ k’anjel. Naq eb’ li kok’al te’xtz’aqob’resi ru li perel re li kok’ k’anjel, oksi li hoonal re rilb’al wi’chik li na’leb’ re li tzolok a’an.

perel re li kok’ k’anjel: tento taakub’eeq inha’ ut tink’ojob’aaq